စစ်

လူ့စရိုက်မှ ပေါက်ဖွားလာသောအရာဖြစ်ပြီး လူတို့ရှိနေသမျှ ဆက်ရှိနေမည်ဖြစ်သော်လည်း စစ်သည် မကောင်းပါ။ မြန်မာနိုင်ငံအတွက်ဆိုလျှင် စစ်သည် မကြားသင့်မကြားထိုက်သော အရာပင် ဖြစ်နေပြီ။

မြန်မာသည် အာဖဂန်နစ္စတန်၊ အီရတ်၊ ကမ္ဘောဒီးယားတို့ကဲ့သို့ ပြည်တွင်းလက်နက်ကိုင်ပဋိပက္ခဒဏ်ကြောင့် လုံးဝကြေမွသွားခြင်းမရှိဘဲ ဆက်လက်လည်ပတ်နေသော်လည်း ပြည်တွင်းပဋိပက္ခဒဏ်ကို လွတ်လပ်ရေးမရခင်ကတည်းက တောက်လျှောက်ခံနေရသဖြင့် စိတ်ထောင်းကိုယ်ကြေဖြစ်နေသော နိုင်ငံဖြစ်သည်။ စီးပွားရေး လူမှုရေးတို့တွင် အိမ်နီးချင်းနိုင်ငံများ နောက်တွင်ရောက်နေသော နိုင်ငံလည်းဖြစ်သည်။

ထိုသို့ စစ်ဒဏ်ကို တမြည့်မြည့်ခံနေရသောနိုင်ငံသည် ဒီမိုကရေစီပြုပြင်ပြောင်းလဲရေးကို ဆောင်ရွက်ခဲ့ရာ လမ်းခုလတ်သို့ ရောက်ရှိနေပြီ။ ဒီမိုကရေစီပြုပြင်ပြောင်းလဲရေးသည် ခက်ခဲသလို အန္တရာယ်ကြီးလှသည့်အတွက် ဒီမိုကရေစီအောင်မြင်ရန် အရာအားလုံး၏ ဖေးမမှုကို လိုအပ်သည်။ ထိုအထဲတွင် စစ် မပါဝင်ပါ။ စစ်ကိုမလိုလားသဖြင့် စစ်၏ဆန့်ကျင်ဘက်ဖြစ်သော ငြိမ်းချမ်းရေးကို အသစ်ဖော်ဆောင်နေသည်မှာ ၂၀၁၁ ယခင်အစိုးရ စတက်စဉ်ကတည်းက ဖြစ်ပြီး ယခုအစိုးရလက်ထက်တွင်လည်း ဆက်လက်ကြိုးစားနေသည်။

သို့ရာတွင် ငြိမ်းချမ်းရေးကြိုးပမ်းမှုသည် တိုးတက်မှုအချို့ရရှိရာမှနေ၍ နိမ့်လိုက်မြင့်လိုက်အခြေအနေသို့ ရောက်ရှိလာသည်။ ပြည်တွင်းလက်နက်ကိုင် တိုက်ပွဲများသည် ယခုနှစ်ပိုင်းတွင် နေရာကိုလိုက်ပြီး ပြင်းထန်လာသလို အညိုရောင်နယ်ပယ်များသည်လည်း မြို့ကြီးများအနီးသို့ပင် ကျယ်ပြန့်လာသည်ကို တွေ့ရသည်။ ထို့အပြင် စစ်တွင် ပြည်တွင်းအကြောင်းတရားများသာမက ပြည်ပအကြောင်းတရားများပါ ပါဝင်နေသလားဟု မေးခွန်းထုတ်စရာများလာသည်။

စစ်ဆိုသည် အရှိန်မြှင့်လာလျင် ထိန်းမရတော့ဘဲ ကြီးမားကျယ်ပြန့်စွာ တောက်လောင်သွားတတ်သဖြင့် ယခုအခြေအနေသည် စိုးရိမ်စရာဖြစ်သည်။ ထိုသို့ စစ်ကြီးမားတောက်လောင်သွားလျှင် ငြိမ်းချမ်းရေးဖော်ဆောင်မှုကိုသာမက ခက်ခက်ခဲခဲ တည်ဆောက်လာရသည့် ဒီမိုကရေစီပြုပြင်ပြောင်းလဲရေးနှင့် နိုင်ငံကိုပါ ပစ်လိုက်ရနိုင်သည်။

မြန်မာနိုင်ငံ ငတ်မွတ်နေသော ဖွံ့ဖြိုးရေး၊ ဒီမိုကရေစီတို့နှင့် စစ်သည် ပြဒါးတစ်လမ်း သံတစ်လမ်းဖြစ်သဖြင့် စစ်ကြီးမားကျယ်ပြန့်မလာအောင် နည်းကုန်သုံးပြီး ကြိုးစားကြရန် The Voice Journal က ဆော်ဩအပ်ပါသည်။

အယ်ဒီတာ
၂၂.၈.၂၀၁၉

You may also like...

Leave a Reply

Your email address will not be published. Required fields are marked *