ဘေးကျပ်နံကျပ် စတုတ္ထမဏ္ဍိုင်

ပြည့်သူမဏ္ဍိုင်ဟု သမ္မတဦးဝင်းမြင့်ကိုယ်တိုင်ပြောဆိုထားသည့် သတင်းမီဒီယာကဏ္ဍကို ထိုးနှက်လိုက်သည့်စကားများ ထပ်မံထွက်ပေါ်လာသည်။

၂၀၀၈ ဖွဲ့စည်းပုံအခြေခံဥပဒေအရ တရားစီရင်ရေးမဏ္ဍိုင်၊ အုပ်ချုပ်ရေးမဏ္ဍိုင် နှင့် ဥပဒေပြုရေးမဏ္ဍိုင် သုံးခုသာရှိပြီး စတုတ္ထမဏ္ဍိုင်ဆိုသည်မှာမရှိကြောင်း မန္တလေးတိုင်းဝန်ကြီးချုပ် ဒေါက်တာဇော်မြင့်မောင်က ပြောဆိုခဲ့ခြင်းဖြစ်သည်။

“အခြေခံဥပဒေမှာ မဏ္ဍိုင်သုံးရပ်ပဲရှိတယ်ဗျ။ တရားစီရင်ရေးမဏ္ဍိုင်၊ အုပ်ချုပ်ရေးမဏ္ဍိုင်ရယ်၊ ဥပဒေပြုရေးမဏ္ဍိုင်ရယ်။ စတုတ္ထမဏ္ဍိုင် မရှိဘူး” ဟူ၍။

မဏ္ဍိုင်ကြီးလေးရပ်တွေ့ဆုံပွဲတွင် ဝန်ကြီးချုပ် ဒေါက်တာဇော်မြင့်မောင်က အဘယ်ကြောင့် ထိုကဲ့သို့ ပြောဆိုခဲ့သနည်း။

စတုတ္ထမဏ္ဍိုင် လားရာ

မြန်မာနိုင်ငံတွင် စတုတ္ထမဏ္ဍိုင်ဟုတင်စားခေါ်ဝေါ်ကြသည့် သတင်းမီဒီယာကဏ္ဍသည် အခြေဥပဒေတွင် မပါဝင်သည်နှင့် မရှိတော့ပြီလော။

“အခြေခံဥပဒေအရ မဏ္ဍိုင်ကြီး သုံးရပ်ပဲရှိတယ်ဆိုတာမှန်ပါတယ်။ သူက စတုတ္ထမဏ္ဍိုင်ဆိုတာ ဒီမှာထုတ်နေတဲ့ သတင်းစာတွေ၊ ဆိုရှယ်မီဒီယာတွေကို မြင်သွားတယ်။ ကျွန်တော်တို့အမြင်က ပြည်သူတွေရဲ့နားနဲ့ မျက်စိက စတုတ္ထမဏ္ဍိုင်ပါပဲ ။ ပြည်သူတွေရဲ့နားနဲ့ မျက်စိက မီဒီယာတွေပါပဲ” ဟု သတင်းစာဆရာ ဦးသီဟသွေးက ပြောဆိုသည်။

ဖွဲ့စည်းပုံအခြေခံဥပဒေတွင် စတုတ္ထမဏ္ဍိုင်ဟု မပါသော်လည်း ဦးသိန်းစိန်အစိုးရလက်ထက် ၂၀၁၄ ခုနှစ် မတ်လ၌ ပြည်ထောင်စုလွှတ်တော်က အတည်ပြုပြဋ္ဌာန်းလိုက်သည့် သတင်းမီဒီယာဥပဒေ ပုဒ်မ ၃ (ခ) တွင် သတင်းမီဒီယာလုပ်ငန်းသည် စတုတ္ထမဏ္ဍိုင်အဖြစ် ပီပြင်စွာရပ်တည်နိုင်စေရန်ဆိုသည့် စကားရပ်ကို အတိအလင်း ထည့်သွင်းဖော်ပြထားသည်။

ထိုသို့ဆိုလျှင် သမ္မတဦးသိန်းစိန်က စတုတ္ထမဏ္ဍိုင်ကို အသိအမှတ်ပြုခဲ့သည်ဟု ဆိုရမည်ပင်။

လက်ရှိအချိန်တွင်လည်း သတင်းမီဒီယာများသည် အခက်အခဲများကြားက မီဒီယာကဏ္ဍကို ပီပြင်စွာဆက်လက်အကောင်အထည်ဖော်နေခြင်းပင် ဖြစ်သည်။

ဦးသိန်းစိန် အစိုးရလက်ထက်နှင့် လက်ရှိအစိုးရလက်ထက်တွင် သတင်းမီဒီယာကဏ္ဍကို အသိအမှတ်ပြုသည်ဟုဆိုသော်လည်း လက်ရှိအချိန်အထိ သတင်းရယူခွင့်များတွင် အခက်အခဲများရှိနေကြောင်း သတင်းမီဒီယာသမားများကပြောဆိုသည်။

စတုတ္ထမဏ္ဍိုင်သည် ပြည်သူ့မဏ္ဍိုင်ဟုပြောဆိုကြသည်။ သတင်းမီဒီယာကဏ္ဍကို တင်စားခေါ်ဝေါ်ခြင်းဖြစ်ပြီး နိုင်ငံတော်သမ္မတ ဦးဝင်းမြင့်ကိုယ်တိုင် ပြည်သူများ၏ နား၊ မျက်စိများဖြစ်သည့် သတင်းမီဒီယာကဏ္ဍကို အလေးအနက်ထားရန် ၂၀၁၈ ခုနှစ် မတ်လ မိန့်ခွန်းတွင် ထည့်သွင်းပြောကြားခဲ့သည်။

နိုင်ငံတော် သမ္မတက ဦးဝင်းမြင့်က သတင်းမီဒီယာကဏ္ဍကို အလေးအနက်ထားရန် ပြောဆိုပြီး တစ်နှစ်ခွဲခန့်အကြာတွင် ဒေါက်တာဇော်မြင့်မောင်က မဏ္ဍိုင်ကြီးလေးရပ်တွေ့ဆုံပွဲတွင် စတုတ္ထမဏ္ဍိုင်မရှိကြောင်း ပြောဆိုခဲ့ခြင်းဖြစ်သည်။

အဆိုပါပွဲတွင် မန္တလေးတိုင်းဝန်ကြီးချုပ် ဒေါက်တာဇော်မြင့်မောင်သည် မီတာခတက်သည့်အကြောင်းကို ဆန္ဒပြသည့်သတင်းရေးသားမှုများတွင် NLD ပါတီကို အယုံအကြည်မရှိဟုဆိုကာ ရေးသားမှုရှိခဲ့ကြောင်း ပြောဆိုခဲ့သည်။

ဒေါက်တာဇော်မြင့်မောင်က “သတင်းတစ်ခုတင်ပြတယ်ဆိုတာ သတင်းတင်ပြသူအာဘော်မပါရဘူး။ မီတာခတက်လို့ ဆန္ဒပြတာ ပြပါစေပေါ့။ အဲဒါကို NLD ပါတီအပေါ်မှာ ပြည်သူတွေ မယုံကြည်ဘူးဆိုတော့။ ပြည်သူဘယ်နှယောက်ပါလဲ ။ ဘယ်သူတွေလဲ။ ဘယ်အဖွဲ့အစည်းကလဲ ဒါတွေပါရမယ်။ ဆန္ဒပြတယ်ဆိုတာ အထောက်အပံ့မရှိဘဲ ဆန္ဒပြလို့မရဘူး” ဟု ဦးဇော်မြင့်မောင်က ပြောဆိုခဲ့သည်။

သို့သော် မည့်သည့်သတင်းဌာနကရေးသားခြင်း၊ မည်ကဲ့သို့ ရေးသားခဲ့ခြင်းကိုမှု တိတိကျကျပြောဆိုခဲ့ခြင်း မရှိပေ။ ထို့အပြင် သတင်းဓာတ်ပုံများရိုက်ကူးရာတွင် လူများနေ၍ ခွင့်မတောင်းပဲရိုက်ကာ သုံးသည်ကို လက်ခံသော်လည်း ဥပဒေအရ ခွင့်တောင်းရမည်ဖြစ်ကြောင်း ပြောဆိုခဲ့သည်။

ဒေါက်တာဇော်မြင့်မောင်၏ ပြောဆိုချက်များသည် အစိုးရနှင့် NLD ပါတီကို ဝေဖန်ရေးသားမှုများကို သတင်း Page အတုများတွင် ဖော်ပြခဲ့ခြင်းကို ဖတ်မိရာမှ ဖြစ်နိုင်ကြောင်း သတင်းမီဒီယာအသိုင်းအဝိုင်းက ပြောဆိုသည်။

ထို့အပြင် သတင်းမီဒီယာလောကကို အများပြည်သူအယုံအကြည်မဲ့စေမည့် သတင်းအတုအယောင်များကို လူမှုကွန်ရက်စာမျက်နှာတွင် ရေးသားဖြန့်ဝေနေသည့် သတင်းအမည်ခံစာမျက်နှာ အတုများကလည်း များစွာရှိနေသည်။

ပြီးခဲ့သည့် ဩဂုတ်လ ၁၅ ရက်ကပင် သတင်းအတုအယောင်များဖြန့်ဝေနေသည့် သတင်း Page အတု ၄၈ ခုကို မြန်မာနိုင်ငံသတင်းမီဒီယာကောင်စီက အများပြည်သူသိစေရန် ထုတ်ပြန်ခဲ့သည်။ ထို့အပြင် မေလ ၂၇ ရက်ကလည်း သတင်း Page အတု ၃၁ ခုကို ထုတ်ပြန်ခဲ့သေးသည်။ သတင်းမီဒီယာများသည် အခက်အခဲများကြားက အများပြည်သူသတင်းမှန်ရရှိရေးအတွက် လုပ်ဆောင်နေခြင်း ဖြစ်သည်။

ထိုသို့ဆိုလျှင် ဝန်ကြီးချုပ်ဒေါက်တာဇော်မြင့်မောင် ဆိုလိုသော စတုတ္ထမဏ္ဍိုင်ဆိုသည်မှာ အဘယ်နည်း။

စတုတ္ထမဏ္ဍိုင်စကားရပ် ဘယ်ကစ

စတုတ္ထမဏ္ဍိုင်ဆိုသည့် စကားသည် ဗြိတိသျှပါလီမန်အမတ် Edmund Burke က ၁၇၈၉ ခုနှစ်က ထုတ်ပြောခဲ့ရာ စတင်ခဲ့ခြင်းဖြစ်ကြောင်း သတင်းစာဆရာကြီး လူထုစိန်ဝင်းရေးသားသည် သတင်းစာပညာသောင်းပြောင်းထွေလာ စာအုပ်တွင် ရေးသားထားသည်။

မန္တလေးတိုင်းဝန်ကြီးချုပ် ဒေါက်တာဇော်မြင့်မောင်ကမူ စတုတ္ထမဏ္ဍိုင်ဆိုသည်ကို သတင်းထောက်များ စတင်ရေးသားခဲ့ရာမှ စတင်ခဲ့ခြင်းဖြစ်ကြောင်း မဏ္ဍိုင်လေးရပ်တွေ့ဆုံပွဲတွင် ပြောဆိုခဲ့သည်။

“ဒါက နိုင်ငံတကာမှာ သတင်းထောက်တွေကရေးလိုက်တယ်။ သူတို့က စတုတ္ထမဏ္ဍိုင်ဆိုပြီး” ဟု ၎င်းကပြောဆိုခဲ့သည်။

သတင်းစာဆရာကြီး လူထုစိန်ဝင်းက စတုတ္ထမဏ္ဍိုင်ဟု စတင်ပြောဆိုခဲ့ခြင်းသည် သတင်းသမားများက ရေးသားခဲ့ခြင်းကြောင့်မဟုတ်ဘဲ ပါလီမန်အမတ်က ပြောဆိုခဲ့ရာမှ စတင်ခဲ့ခြင်းဖြစ်ကြောင်းရေးသားခဲ့သည်။

မည်သို့ပင်ဖြစ်စေ ၂၀၀၈ ဖွဲ့စည်းပုံအခြေခံဥပဒေပြင်ဆင်ရေး၊ ဒီမိုကရေစီစနစ်ကူပြောင်းရေးလုပ်ဆောင်နေသည့် အစိုးရအဖွဲ့အကြီးအကဲတစ်ဦးက အခြေခံဥပဒေကိုတည်ကာ စတုတ္ထမဏ္ဍိုင်မရှိကြောင်း ပြောဆိုလိုက်ပြီဖြစ်သည်။

ယင်းကဲ့သို့ ပြောဆိုခြင်းသည် သတင်းမီဒီယာအပေါ် သဘောမကျသည့်ပုံစံမျိုးဖြစ်နေကြောင်း မြန်မာနိုင်ငံသတင်းမီဒီယာကောင်စီဝင် ဦးမြင့်ကျော်က ဆက်ပြောဆိုသည်။

“မီဒီယာကို ဓာတ်မတည့်တဲ့ ရပ်တည်ချက်လိုမျိုးပေါ့။ ကျွန်တော်တို့ကလည်း မဏ္ဍိုင်သုံးရပ်ကိုဝေဖန်ထောက်ပြတာကို စတုတ္ထမဏ္ဍိုင်ဆိုပြီး တင်စားပြောကြတာ။ သတင်းမီဒီယာကို အသိအမှတ်ပြုစေချင်တာပဲရှိတာပါ” ဟု ၎င်းကဆိုသည်။

အခက်အခဲများကြားက မြန်မာ့မီဒီယာ

ပုဂ္ဂလိကသတင်းမီဒီယာကဏ္ဍမှာ မဏ္ဍိုင်ကြီးသုံးရပ်(အုပ်ချုပ်ရေး၊ တရားစီ ရင်ရေး၊ ဥပဒေပြုရေး)အတွင်း သတင်းရယူမှုတွင် အကျပ်အတည်းတွေ့နေရသည်။

ပြည်သူများ သတင်းသိပိုင်ခွင့်အတွက် အခက်အခဲကြားမှ သတင်းရယူနိုင်မှုတွင် ယခင်ထက် အခြေအနေပိုမိုဆိုးရွားလျက်ရှိကြောင်း သတင်းစာဆရာများက ဖွင့်ဟသည်။

အုပ်ချုပ်ရေးကဏ္ဍသတင်းရယူရာတွင် အချိန်နှင့်တစ်ပြေးညီ သတင်းရယူနိုင်ခွင့်မရှိဘဲ ဌာနဆိုင်ရာအဆင့်ဆင့်သို့ လွှဲပြောင်းမှုကြောင့် နှောင့်နှေးကြန့်ကြာမှုများ၊ သတင်းဖြေကြားပေးရန် ပျက်ကွက်မှုများ၊ ပုံနှိပ်ဖော်ပြပြီးသော သတင်းများနှင့်ပတ်သက်၍ တရားရင်ဆိုင်ရမှုများ လက်ရှိကြုံတွေ့နေရသည်။

တရားစီရင်ရေးကဏ္ဍတွင်လည်း ပြည်သူများအထိတ်တလန့်ဖြစ်စေသည့် အမှုကြီးများ ဖြစ်ပွားနေသော်လည်း အချို့တရားရုံးများတွင် သတင်းရယူနိုင်ခွင့် အခက်အခဲများ ရှိနေဆဲပင်ဖြစ်သည်။

ဥပဒေပြုရေးကဏ္ဍတွင်လည်း သမ္မတဦးသိန်းစိန်အစိုးရလက်ထက်က သတင်းယူခွင့်သတ်မှတ်နေရာများရှိခဲ့သော်လည်း လက်ရှိအစိုးရလက်ထက်တွင်မူ ပိုမိုဆိုးရွားသော ကန့်သတ်ချက်များ ရှိလာသည်။

နိုင်ငံအတွင်း တည်ရှိနေသည် မဏ္ဍိုင်သုံးရပ်တွင် တည့်မတ်မှုမရှိသည့် မဏ္ဍိုင်ကို သတင်းမီဒီယာများက ဝေဖန်ရေးသားရဲရမည်ဖြစ်ကြောင်း အမျိုးသားဒီမိုကရေစီအင်အားစုပါတီ ဥက္ကဋ္ဌ ဦးခင်မောင်ဆွေ ကပြောသည်။

“အဲ့မဏ္ဍိုင်သုံးရပ်ကို အပြန်အလှန် ထိန်းကျောင်းဖို့ တရားစီရင်ရေးကော ၊ အုပ်ချုပ်ရေးကော ၊ ဥပဒေပြုရေးကိုရော ထိန်းမတ်ဖို့က စတုတ္ထမဏ္ဍိုင်မရှိလို့ မဖြစ်ဘူးဆိုတာ နိုင်ငံအတော်များများမှာရော၊ ခေတ်အဆက်ဆက်မှာရော အသိအမှတ်ပြုလက်ခံထားတာချည်းပဲ။ အုပ်ချုပ်ရေးမတည့်မတ်ရင် အုပ်ချုပ်ရေးကို ထိုးနှက်ရမှာပဲလေ” ဟု ၎င်းကပြောဆိုသည်။

ထိုကဲ့သို့မဏ္ဍိုင်ကြီးသုံးရပ်နှင့် ပတ်သက်၍ သတင်းရယူပိုင်ခွင့် ဘေးကျပ်နံကျပ်ဖြစ်နေချိန် တရားရင်ဆိုင်နေရသော သတင်းသမားအရေအတွက်မှာလည်း ယခင်အစိုးရထက်ပိုမိုများပြားနေသည်။

သတင်းမီဒီယာများက အစိုးရအပေါ် ဝေဖန်ရေးသားချက်များကြောင့် အကျဉ်းကျခံခဲ့ရသည့် သတင်းသမားများပင်ရှိခဲ့သည်။ သို့သော် သတင်းသမားများ၏ လုံခြုံရေးအတွက် ဖမ်းဆီးချင်းတိုင်း ဖမ်းဆီးခြင်းမျိုး မရှိကြောင်း ဒေါက်တာ ဇော်မြင့် မောင်က ပြောဆိုသည်။

“Safty of Journalism ဒါက ကမ္ဘာမှာပြောနေကြတာ။ ကျွန်တော်တို့လည်း လေးစားလိုက်နာတယ်။ ဖမ်းချင်တိုင်း မဖမ်းဘူး” ဟု ၎င်းကဆိုသည်။

လက်ရှိအစိုးရလက်ထက်တွင် သတင်းသမားများအပေါ် တရားစွဲဆိုထားသည့် အမှုပေါင်း ၃၆ မှု အထိရှိခဲ့ပြီး သတင်းသမား ၅၂ ဦး တရားရင်ဆိုင်ခဲ့ရကြောင်း လွတ်လပ်စွာထုတ်ဖော်ပြောဆိုခွင့်အဖွဲ့(အသံ) ထံမှ သိရသည်။

“သတင်းဆိုတာကတော့ တစ်ခါတစ်ရံ မှားနိုင်တာပါပဲ။ ဒါကလူတွေကလုပ်တာလေ။ မှားတဲ့အပေါ်မှာ တာဝန်ခံနိုင်ပြီး ပြန်ပြင်ဖို့လိုတာပေါ့။ အဲဒီမှားတဲ့ အပေါ်ကို အပြစ်ပြောပြီး စတုတ္ထမဏ္ဍိုင်မရှိဘူး ပြောဆိုတာကတော့ သတင်းမီဒီယာလုပ်ငန်းတွေအပေါ်မှာ ချိုးနှိမ်ပြီးပြောသလိုဖြစ်နေတယ်” ဟု လွတ်လပ်စွာထုတ်ဖော်ပြောဆိုရေးအဖွဲ့ အမှုဆောင် ဒါရိုက်တာ ကိုဆောင်းခက ပြောဆိုသည်။

တရားစွဲဆိုခဲ့သည့် အမှုပေါင်း ၃၆ မှုသည် လက်ရှိအစိုးရ စတက်ချိန်မှစ၍ ၂၀၁၉ ဇွန်လ ၁၅ ရက်နေ့အထိဖြစ်ပြီး၊ အစိုးရဝန်ထမ်းများက တရားစွဲဆိုမှု ၂၀ မှု၊ တပ်မတော်က တရားစွဲဆိုထားသည့် အမှုခြောက်မှုနှင့် အခြားသူများက တရား စွဲဆိုထားမှု ၁၀ မှုတို့ဖြစ်သည်။

သတင်းသမားများကို ဆက်သွယ်ရေးဥပဒေပုဒ်မဖြင့် အများဆုံးတရားစွဲဆိုခဲ့ခြင်းဖြစ်ပြီး မတရားအသင်းဆက်သွယ်မှု၊ မြန်မာနိုင်ငံလျို့ဝှက်ချက်အက် ဥပဒေ၊ ရာဇသတ်ကြီးပုဒ်မ ၅၀၅ ၊ ၅၀၅(ခ)၊ သတင်းမီဒီယာဥပဒေနှင့် နိုင်ငံသားများ၏ ပုဂ္ဂိုလ်ဆိုင်ရာ လွတ်လပ်မှုနှင့် လုံခြုံမှုကိုအကာအကွယ်ပေးရေးဥပဒေ၊ လေကြောင်းပျံသန်းရေး ဥပဒေ၊ ပို့ကုန်/ သွင်းကုန် ဥပဒေနှင့် လူဝင်မှုကြီးကြပ်ရေးဥပဒေတို့ဖြင့် တရားစွဲဆိုလေ့ရှိကြောင်း အဆိုပါအဖွဲ့ထံမှ သိရသည်။

သတင်းမီဒီယာများသည် အစိုးရနှင့်တပ်မတော်အပေါ် ဝေဖန်ရေးသားမှုများနှင့် ပတ်သက်ပြီးဖမ်းဆီးခံရကာ ထောင်ဒဏ် နှစ်ရှည်ချမှတ်ခံခဲ့ရသည်အထိရှိခဲ့သည်။ ရခိုင်ပြည်နယ်၊ မောင်တောမြို့နယ် အင်းဒင်တွင်ဖြစ်ပွားခဲ့သည့် လူသတ်မှုပတ်သက်ပြီး ရိုက်တာသတင်းထောက်နှစ်ဦးဖြစ်သည့် ကိုဝလုံးနှင့် ကိုကျော်စိုးဦးတို့ကို ၂၀၁၇ ခုနှစ် ဒီဇင်ဘာ ၁၂ ရက်ညပိုင်းကဖမ်းဆီးခဲ့ပြီး ထောင်ဒဏ် ခုနှစ်နှစ် ချမှတ်ခဲ့သည်။

၎င်းတို့နှစ်ဦးကို နိုင်ငံတော်သမ္မတ လွတ်ငြိမ်းချမ်းသာခွင့်ဖြင့် ယခုနှစ်တွင် ပြန်လည်လွှတ်ပေးခဲ့သည်။

သို့သော်လည်း NLD အစိုးရလက်ထက်တွင် အစိုးရက စွဲဆိုထားသည့် အမှုအခင်းများနှင့် ရင်ဆိုင်နေရသည့် သတင်းသမားများ ရှိနေသေးသည်။

ဒီမိုကရေစနစ်ကို ကူပြောင်းနေသည့် အစိုးရအနေနှင့် ဝေဖန်ရေးသားမှုများကို လက်ခံရမည်ဖြစ်ကြောင်း ဦးမြင့်ကျော်က ဆိုသည်။

“ပုဂ္ဂလိက ပိုင်မီဒီယာတွေပေါ်မှာ အမြင်စောင်းနေတာတွေ၊ မကြိုက်တဲ့ဟာတွေ အခုအစိုးရလက်ထက်မှာလည်း ရှိနေတုန်းပဲ။ ထောက်ခံမဲနိုင်လို့တက်လာတဲ့ ဘယ်အစိုးရဖြစ်ပါစေ မီဒီယာက ဝေဖန်ထောက်ပြတာက ဒါသဘာဝပဲ။ အဲ့ဒီ သဘောသဘာဝကိုတော့ လက်ခံရမယ်”ဟု ၎င်းက ဆိုသည်။

လက်ရှိအစိုးရလက်ထက်တွင် ပုဂ္ဂလိကမီဒီယာများသည် စီးပွားရေးအရ ဖိအားများနှင့် ရင်ဆိုင်နေရပြီး သတင်းရယူပိုင်ခွင့်တွင်လည်း အစိုးရဘက်မှ ပူးပေါင်းဆောင်ရွက်မှု အားနည်းနေကြောင်း ဇွန်လ ၁၅ ရက်တွင် “စတုတ္ထမဏ္ဍိုင် ယိုင်နဲ့နေသလား” ခေါင်းစဉ်ဖြင့် ပြုလုပ်သည့် RFA သတင်းစကားဝိုင်းတွင် ဦးရဲထွဋ်က ပြောဆိုခဲ့သည်။

ဦးရဲထွဋ်သည် ပြီးခဲ့သည့် အစိုးရလက်ထက်က ပြန်ကြားရေးဝန်ကြီးဟောင်းတစ်ဦးလည်းဖြစ်သည်။

“အစိုးရကဖြစ်ဖြစ်၊ တပ်မတော်ဘက်ကဖြစ်ဖြစ်၊ နိုင်ငံရေးပါတီထဲကဖြစ်ဖြစ် ကိုယ်နဲ့သဘောထားချင်းမတိုက်ဆိုင်တဲ့ မီဒီယာတွေကို လူမှုကွန်ရက်ကနေ ထိုးနှက်တိုက်ခိုက်တာကို အကြောင်းပြုပြီး ပြည်သူရဲ့အမြင်မှာလည်း မီဒီယာကို အားကိုးစရာလို့မမြင်တော့ဘဲအွန်လိုင်းပေါ်မှာ ပေါ်နေတဲ့သတင်းတွေကပဲ အားကိုးစရာလို့ မြင်ကြတဲ့အခြေအနေတွေနဲ့ရင်ဆိုင်နေရတယ်” ဟု ဦးရဲထွဋ်က သုံးသပ်ပြောဆိုခဲ့သည်။

ပုဂ္ဂလိကမီဒီယာများ အခက်အခဲနှင့် ရင်ဆိုင်နေရချိန် အစိုးရခေါင်းဆောင်ပိုင်းကလည်း အခြေခံဥပဒေအရ စတုတ္ထမဏ္ဍိုင်မရှိဟုပြောဆိုခဲ့သည့် မန္တလေးဝန်ကြီးချုပ်အပြင် သတင်းမီဒီယာကို ချိုးနှိမ်ပြောဆိုသူ နောက်တစ်ဦးလည်း ရှိနေသေးသည်။ ရွေးကောက်ပွဲကော်မရှင် ဥက္ကဋ္ဌ ဦးလှသိန်းပင် ဖြစ်သည်။

ရွေးကောက်ပွဲကိစ္စနှင့် ပတ်သက်ပြီး ပြည်တွင်းမီဒီယာတစ်ခုက မေးမြန်းရာတွင် ဦးလှသိန်းက “ဂျာနယ်တွေ၊ ဂျာနယ်လစ်တွေက တိုင်းပြည်အတွက် ဘာများကောင်းလဲ” ဟု ပြန်လည်မေးခွန်းထုတ်ခဲ့သည်။

ဒီမိုကရေစီ ကူပြောင်းနေသည့် နိုင်ငံအတော်များများတွင် သတင်းမီဒီယာကဏ္ဍကို အသိအမှတ်ပြုကြပြီး မြန်မာနိုင်ငံတွင်လည်း သတင်းမီဒီယာများ၏ မှန်ကန်သည့်ဘက်မှ ဝေဖန်ရေးသားမှုများကို လက်ခံရန် အချိန်ရောက်နေပါပြီလော။

ဒီမိုကရေစီ စနစ်ကူပြောင်းနေသည့်ကာလတွင် စတုတ္ထမဏ္ဍိုင်ဟု တင်စားခေါ်ဝေါ်သည့် သတင်းမီဒီယာအခန်းကဏ္ဍသည် တည်ရှိနေမည်ဖြစ်ကြောင်း ဦးခင်မောင်ဆွေကပြောသည်။

သတင်းစာဆရာဦးသီဟသွေးကလည်း ထိုနည်းလည်းကောင်းပင် ယခုလိုပြောဆိုသည်။

“မဏ္ဍိုင်ကြီးသုံးရပ်လုံးကို ပြန်ထိန်းကျောင်းဖို့ ပြည်သူကလိုတယ်။ ပြည်သူတွေက ရွေးချယ်ပေးပြီးတာနဲ့မပြီးဘူး သူတို့ (မဏ္ဍိုင်ကြီးသုံးရပ်) ကို မီဒီယာတွေ ကနေစောင့်ကြည့်ရတယ်။ ဒါကြောင့် မီဒီယာဟာ ပြည်သူရဲ့နားနဲ့ မျက်စိဖြစ်တဲ့ အတွက် ပြည်သူ့ကိုယ်စား စတုတ္ထမဏ္ဍိုင်အနေနဲ့ ရပ်တာ” 

အောင်ဖြိုးဦး

You may also like...

Leave a Reply

Your email address will not be published. Required fields are marked *