တရားမဝင်ရွှေထုတ်လုပ်မှုကြောင့် အင်းတော်ကြီးကန် ရေညစ်ညမ်းမှုကို စစ်ဆေး

ရန်ကုန်၊ ဩဂုတ် ၂၉

အင်းတော်ကြီးကန်အတွင်း တရားမဝင် ရွှေထုတ်လုပ်မှုကြောင့် ပတ်ဝန်းကျင်ညစ်ညမ်းမှု အခြေအနေများကို ကွင်းဆင်းစစ်ဆေးထားပြီး သစ်တောဦးစီးဌာနအောက်ရှိ ရေဓာတ်ခွဲခန်းတွင် ရေကို စစ်ဆေးနေကြောင်း သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန ဒုတိယဝန်ကြီး ဒေါက်တာရဲမြင့်ဆွေက  ပြောကြားသည်။

အင်းတော်ကြီးကန်အတွင်း တရားမဝင်ရွှေတူးဖော်မှုများ ပပျောက်ရေး ဆောင်ရွက်နေပြီး ရွှေတူးဖော်မှုမှ အနည်အနှစ်များ ကန်အတွင်းသို့ စီးဝင်မှု တားဆီးနိုင်ရေးအတွက် နုန်းတားဆည်များ တည်ဆောက်ထားကြောင်း ၎င်းကဆိုသည်။

အင်းတော်ကြီးကန်တွင် ပတ်ဝန်းကျင်ညစ်ညမ်းမှုကြောင့် ရေဝပ်ဒေသအဆင့်အတန်း မကျဆင်းစေရေးအတွက် ပတ်ဝန်းကျင်ထိခိုက်မှုဆန်းစစ်ခြင်းဆိုင်ရာ လုပ်ထုံးလုပ်နည်းများနှင့် အမျိုးသားပတ်ဝန်းကျင်ဆိုင်ရာ အရည်အသွေးထုတ်လွှတ်မှု လမ်းညွှန်ချက်များ လိုက်နာရန် ကြပ်မတ်လျက်ရှိကြောင်း ၎င်းက ဆက်လက်ပြောကြားသည်။

မြန်မာနိုင်ငံတွင် အကြီးဆုံး ရေချိုသဘာဝကန်ဖြစ်သော အင်းတော်ကြီးကန်၌ ကမ္ဘာ့နိုင်ငံများတွင် ခြိမ်းခြောက်ခံနေရသော မျိုးစိတ်များအပါအဝင် ငှက်မျိုးပေါင်း ၁၀၀ ကျော် နေထိုင်ကျက်စားလျက် ရှိသည်။

ရေတိမ်ဒေသဖြစ်သော အင်းတော်ကြီးကန်သို့ စီးဝင်သော ချောင်းလက်တက်တစ်ခုဖြစ်သည့် ခေါင်းတုံချောင်းထိပ်ပိုင်းတွင် တရားမဝင်ရွှေတူးဖော်နေသည်များကို တွေ့ရှိထားကြောင်း နိုင်ငံတကာတောရိုင်း တိရစ္ဆာန်နှင့် သဘာဝအပင်များအဖွဲ့ (FFI) က ၂၀၁၆ ခုနှစ်တွင် သတင်းထုတ်ပြန်ထားသည်။

မည်သူမဆို သဘာဝနယ်မြေအတွင်း ရေထု၊ လေထုကို တမင်ညစ်ညမ်းစေခြင်း၊ ရေစီးရေလာ ပျက်စီးစေခြင်းနှင့် ရေတွင် အဆိပ်ခတ်ခြင်းများကို ပြုလုပ်ပါက ထောင်ဒဏ် သုံးနှစ်အထိ၊ ငွေဒဏ် နှစ်သိန်း မှ ငါးသိန်းအထိ ဒဏ်နှစ်ရပ်လုံး ချမှတ်ခံရမည်ဖြစ်ကြောင်း ဇီဝမျိုးစုံမျိုးကွဲနှင့် သဘာဝထိန်းသိမ်းရေးနယ်မြေများ  ကာကွယ်စောင့်ရှောက်ခြင်းဆိုင်ရာ ဥပဒေတွင် ပြဋ္ဌာန်းထားသည်။ 

You may also like...

Leave a Reply

Your email address will not be published. Required fields are marked *