သတိထားရမည့် အစိုးရစကား

နိုင်ငံ့ထိပ်ပိုင်း အစိုးရအဖွဲ့အစည်းများ၏ ကြေညာချက်များနှင့် ထိပ်ပိုင်းတာဝန်များကို ယူထားရသော ပုဂ္ဂိုလ်ကြီးများ၏ နှုတ်ထွက်စကားတို့သည် နိုင်ငံကို လှုပ်ခတ်စေ၊ ဈေးကွက်များပေါ် သက်ရောက်စေသဖြင့် ကြေညာချက်များ ထုတ်ပြန်ရာ၊ စကားပြောဆိုရာတွင် သတိထားဆင်ခြင် ပြောကြားထုတ်ပြန်ရမည်ဖြစ်သည်။

မြန်မာနိုင်ငံကဲ့သို့ ပုဂ္ဂလိက ဥစ္စာဓနပိုင်ဆိုင်မှုကို အစိုးရက ကြေညာချက်တစ်ချက်ဖြင့် ဖျက်သိမ်းပစ်ခဲ့သော ရာဇဝင်ရှိသည့်နိုင်ငံမျိုးတွင် ပြည်သူပြည်သားတို့သည် ကျီးလန့်စာစားဖြစ်နေဆဲပင်ရှိသည့်အတွက် ဗဟိုဘဏ်ကဲ့သို့သော ငွေကြေးနှင့် ဘဏ္ဍာရေးအာဏာပိုင်အဖွဲ့အစည်းများ၊ ထိုအဖွဲ့အစည်းများ၏ တာဝန်ရှိပုဂ္ဂိုလ်ကြီးများသည် စကားပြောဆိုရာ၊ ကြေညာချက်ထုတ်ပြန်ရာတွင် အခြားသော အစိုးရအဖွဲ့အစည်းများထက်ပင် အရာရာတွက်ဆ သတိထားသင့်သည်။

အစိုးရအဖွဲ့အစည်းများနှင့် ထိုအဖွဲ့များကို ဦးဆောင်နေသူတို့ လူသိရှင်ကြား ပြောဆိုလိုက်သောစကားသည် အမှတ်တမဲ့ပြောဆိုလိုက်လျှင်ပင် နိုင်ငံ့လက်ရှိအခြေအနေကို ထင်ဟပ်သည်ဟု ထင်မြင်ကြ၍လည်းကောင်း၊ မူဝါဒဟု ထင်မှတ်၍လည်းကောင်း ထိုစကားများကိုလိုက်ပြီး လူတို့ လှုပ်ရှားဆောင်ရွက်ကြသည်ဖြစ်ရာ တရားဝင်ထုတ်ပြန်သော ကြေညာချက်များ၊ လွှတ်တော်ကဲ့သို့ နိုင်ငံ့အမြင့်ဆုံးဆွေးနွေးဝိုင်းတွင် ပြောဆိုသည့်စကားများသည် လူတစ်ဦးချင်း အကောက်အယူပေါ်မူတည်ပြီး ထိတ်လန့်တုန်လှုပ်စေတတ်သည်မှာ ဓမ္မတာပင်ဖြစ်သည်။

စကားတစ်ခွန်း၊ ကြေညာချက်တစ်ချက်ကို ပြည်သူလူထုက အကောက်အယူလွဲသည်ဟု မြင်လျှင် ထပ်မံရှင်းလင်းပြောဆိုရ၊ နောက်ဆက်တွဲကြေညာချက်များ ထုတ်သင့်လျှင် ထုတ်ရပေမည်။ ထိုသို့ နောက်ဆက်တွဲ ရှင်းလင်းရာတွင် ဆေးအတွက်မလေးအောင်၊ နဂိုထက် ပိုအကောက်အယူလွဲမသွားအောင် သတိထားကြရမည်။

Institution ခိုင်မာသော၊ စနစ်ခိုင်မာသော အမေရိကန်ပြည်ထောင်စုတွင်ပင် ယခင်ဗဟိုဘဏ်ဥက္ကဋ္ဌ Alan Greenspan ၏ စကားတစ်ခွန်းကြောင့် စတော့ဈေးကွက်ရှိ စတော့ဈေးနှုန်းများ အတက်အကျ၊ အမေရိကန်ဒေါ်လာဈေးနှုန်း အတက်အကျ ဖြစ်ပေါ်စေနိုင်သည်။ ဗဟိုဘဏ်၏ ကြေညာချက်ကြောင့် အမေရိကန်စီးပွားရေးလမ်းကြောင်း ပြောင်းသွားနိုင်သည်။ တစ်ခုခု အရေးကြုံလျှင် နိုင်ငံ့ခေါင်းဆောင်များက ဘာထွက်ပြောမလဲဟု အမေရိကန်ပြည်ထောင်စုတွင်ပင် စောင့်မျှော်နေကြသည်။ ခေါင်းဆောင်တို့၏ စကား၊ အစိုးရအဖွဲ့အစည်းတို့၏ ကြေညာချက်သည် နိုင်ငံ့စီးပွားရေးကို ဆွဲချနိုင်သလို ပြန်လည်ဦးမော့စေနိုင်သည်။

အစိုးရအဖွဲ့အစည်းကြီးများ၏ ကြေညာချက်များ၊ ပုဂ္ဂိုလ်ကြီးများ၏ စကားသည် အာစက်လျှာစက်ပြင်းသဖြင့် မိမိတို့စကား ဘယ်အထိသွားနိုင်သည်၊ ပြည်သူပြည်သားတို့က မည်သို့ဘာသာပြန်နိုင်သည်ကို ဘက်ပေါင်းစုံမှ ဆင်ခြင်ပြီးမှသာ ကြေညာပြောဆိုသင့်ပါကြောင်း သတိပေးလိုရင်းဖြစ်သည်။

 

အယ်ဒီတာ
၅.၉.၂၀၁၉

You may also like...

Leave a Reply

Your email address will not be published. Required fields are marked *