“ဒီပုံစံအတိုင်းသွားရင် ဖြစ်ပေါ်လာမယ့် ဖွဲ့စည်းပုံက အင်အားကြီးပါတီရဲ့ သဘောထားအတိုင်းပဲဖြစ်တော့မယ်”

မအူပင်မြို့နယ်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးစိန်ဝင်းနှင့် ဆက်သွယ်မေးမြန်းခြင်

NLD ပါတီဝင်အများစုဖြင့် စုဖွဲ့ထားသော အခြေခံဥပဒေပြင်ဆင်ရေးပူးပေါင်းကော်မတီ (၄၅ ဦးကော်မတီ) မှ ယခုအခါ နုတ်ထွက်သူများ ရှိလာပြီဖြစ်သည်။ ပြည်သူ့လွှတ်တော်ကိုယ်စားလှယ် ဦးစိန်ဝင်းသည် စက်တင်ဘာလ ၂ ရက်တွင် နုတ်ထွက်ခဲ့ပြီး ရခိုင်အမျိုးသားပါတီဝင် အမျိုးသားလွှတ်တော်ကိုယ်စားလှယ်  ဦးမြင့်နိုင်နှင့် ပြည်သူ့လွှတ်တော်ကိုယ်စားလှယ် ဦးအောင်ကျော်ဇံတို့လည်း စက်တင်ဘာလ ၃ ရက်တွင် အဆိုပါကော်မတီမှ နုတ်ထွက်ခဲ့သည်။ ထို့ကြောင့် ၄၅ ဦး ကော်မတီသည် ယခုအခါ ၄၂ ဦးဖြင့် ဆက်လက်လည်  ပတ်လျက်ရှိသည်။ အခြေခံဥပဒေပြင်ဆင်ရေး အဆိုပြုချက်များကို ကော်မတီအတွင်း ဆွေးနွေးရာတွင် အာဏာရ NLD ပါတီက ကြီးစိုးထားသောကြောင့် နုတ်ထွက်ရသည်ဟု       ဦးစိန်ဝင်းကဆိုသည်။ ကော်မတီအတွင်း ဆွေးနွေးမှုများ၊ အခြေခံဥပဒေပြင်ဆင်ရေး ကော်မတီလုပ်ဆောင်ချက်များနှင့်ပတ်သက်၍ ၄၅ ဦးကော်မတီမှ နုတ်ထွက်ခဲ့သူ ပြည်သူ့လွှတ်တော်ကိုယ်စားလှယ် ဦးစိန်ဝင်းနှင့် The Voice Journal က ဆက်သွယ်မေးမြန်းထားခြင်းဖြစ်သည်။  

(ဦးစိန်ဝင်းသည် NLD ပါတီဝင်ဟောင်းဖြစ်ပြီး NLD ပါတီမှနုတ်ထွက်ကာ အမျိုးသားညီညွတ်သော ဒီမိုကရက်တစ်ပါတီ NUD ကို ၂၀၁၇ ခုနှစ် နှစ်လယ်တွင် တည်ထောင်ခဲ့သူဖြစ်သည်။ မအူပင်မြို့နယ်မှ ပြည်သူ့လွှတ်တော်ကိုယ်စားလှယ်ဖြစ်ပြီး လယ်သမားအရေး စိတ်ဝင်တစားရှိသည်ဟုဆိုကာ လူသိများသူဖြစ်သည်။)

The Voice Journal l – အန်ကယ့်လ်အနေနဲ့ အခြေခံဥပဒေပြင်ဆင်ရေး ပူးပေါင်းကော်မတီကနေ  နုတ်ထွက်တယ်လို့ ကြားရတယ်။ ဘာ့ကြောင့်များလဲ ခင်ဗျ။

USW – အဓိကအကြောင်းရင်းကတော့ သုံးချက်ပါပဲ။ လျှို့ဝှက်မဲစနစ်နဲ့ဆောင်ရွက်ဖို့ အကြံပြုတာကို သူတို့မဆောင်ရွက်ဘူး။ လက်ညှိုးထောင်မဲစနစ်နဲ့ပဲ  သူတို့လုပ်ဆောင်တယ်။

The Voice Journal  – လျှို့ဝှက်မဲစနစ်ဆိုတာ  ကော်မတီအတွင်း မဲခွဲတဲ့အခါမှာလား ခင်ဗျ။

USW – ဟုတ်ပါတယ်။ ကော်မတီအတွင်းမှာ အဆိုပြုချက်တွေကို ဘာ့ကြောင့်အဆိုပြုတယ်၊ မပြုဘူး။  နောက်ဆုံးကျတော့ ဟိုအဆိုကaကာင်းတယ်၊ ဒီအဆိုက မကောင်းဘူးဆိုပြီး မဲပေးရွေးချယ်  ကြရတာ။ အဲဒီလို မဲပေးတဲ့အခါမှာ ကျွန်တော်က လျှို့ဝှက်မဲစနစ်နဲ့ လုပ်ပါ။ လက်ညှိုးထောင်မလုပ်ပါနဲ့။ လက်ညှိုးထောင်မဲခွဲရင် အင်အားကြီးတဲ့ ပါတီအဖွဲ့ဝင်တွေက မှန်တဲ့ဘက်ကို မလိုက်နိုင်ပါဘူး။ ဒါက ပါတီကြီးရဲ့ ဖွဲ့စည်းပုံ မဟုတ်ဘူး။ မြန်မာနိုင်ငံရဲ့ ဖွဲ့စည်းပုံအားလုံးအတွက် အရေးကြီးပါတယ်လို့ ကျွန်တော်နှစ်ခါပြောခဲ့တယ်။  သူတို့က ဒီအတိုင်းပဲ ဆက်လုပ်တာပေါ့ဗျာ။ ကျွန်တော်     ပြန်သုံးသပ်ကြည့်တဲ့အခါမှာ ကျွန်တော်တို့ကို ကော်မတီမှာ တာဝန်ပေးစဉ်က ဦးတည်ချက်ငါးရပ်နဲ့ တာဝန်ပေးထားတယ်။ ဦးတည်ချက်ငါးရပ်မှာ ဘာရေးထားလဲဆိုတော့ ဒီမိုကရေစီ ဖက်ဒရယ်ပြည်ထောင်စုစနစ်ကို  သွားမယ်လို့ပါထားတာလေ။ ဒီမိုကရေစီစံချိန်စံညွှန်းနဲ့အညီ  သွားမယ်လို့ပါထားတယ်လေ။ ပုဒ်မ ၆(စ)  မှာ အမျိုးသားနိုင်ငံရေးကို တပ်မတော်ကဦးဆောင်တဲ့ အခန်းကဏ္ဍက ပါဝင်ရမယ်လို့ပါတယ်။ သူက  NLD က ဘာပြင်လိုက်လဲဆိုတော့ တပ်မတော်သည်  နိုင်ငံရေးမှာ ပါဝင်ခွင့်ရှိသည်လို့ပြင်တယ်။ ကျွန်တော်အပါအဝင် တိုင်းရင်းသားအားလုံးကတော့ ဒီနိုင်ငံရေး ထဲမှာ တပ်မတော်မပါဝင်ဖို့။ သူတို့ကတော့ ပါဝင်ဖို့ပေါ့။  ဒီမိုကရေစီ ဖက်ဒရယ်ပြည်ထောင်စုကိုသွားမယ်ဆိုရင်  ဒီနေရာမှာ နည်းနည်းလေးလွဲတာနဲ့ နောက်ပိုင်းမှာ အများကြီးလွဲတော့မယ်။ ဒါကတစ်ချက်။

နောက်တစ်ချက်က  ဩဂုတ်လ ၂၉ ရက်က  ကျွန်တော်တို့ အခန်း (၁) ကို လက်ညှိုးထောင်စနစ်နဲ့  မဲခွဲတဲ့အတွက် အခန်း(၁) အဆိုပြုချက်တွေ အားလုံးက အင်အားကြီးပါတီရဲ့ အဆိုပြုချက်တွေပဲ   ဖြစ်ကုန်တယ်။ အဲဒီတော့ ကျွန်တော်ကကြည့်နေတာ။  တိုင်းရင်းသားတွေမျက်နှာက ဇီးရွက်လောက် ရှိတော့တာ။ တကယ်ပြင်တာက ရှမ်းပါတီကဆို အဆိုပြုချက်တစ်ထောင်ကျော်၊ ရခိုင်ပါတီက အဆိုပြုချက် ၈၀၀ ကျော်၊ မွန်ပါတီကဆို ၆၀၀ ကျော်၊ ကျွန်တော်ကဆို ၄၀၀ ကျော်တင်ထားတာ။ ဒီပုံစံအတိုင်းသွားရင် ဖြစ်ပေါ်လာမယ့် ဖွဲ့စည်းပုံက အင်အားကြီးပါတီရဲ့ သဘောထားအတိုင်းပဲ     ဖြစ်တော့မယ်။ အဲဒီတော့ တိုင်းရင်းသားအားလုံးရဲ့ လိုအင်ဆန္ဒအတတ်နိုင်ဆုံးပါဝင်တဲ့ ဖွဲ့စည်းပုံဖြစ်မလာတော့ဘူးလို့သုံးသပ်ပြီး  လက်ညှိုးထောင်စနစ်ကိုလည်းမကြိုက်၊ မလုပ်ပါနဲ့  ပြောတော့လည်းလုပ်တော့ ကဲ ငါတော့ဒီမှာထိုင်ပြီး  အနိုင်ကျင့်တာလည်း မကြည့်ချင်ဘူး။ အနိုင်ကျင့်တဲ့အထဲလည်း အပါမခံနိုင်ဘူးဆိုပြီးတော့ ကျွန်တော်က ထွက်ခဲ့တာ။

The Voice Journal – လျှို့ဝှက်မဲစနစ်နဲ့မလုပ်ဘဲ  လက်ညှိုးထောင်ပြီးမဲခွဲတော့ ကိုယ့်စိတ်ရင်းအတိုင်း မဲမပေးနိုင်ဘဲ ပါတီအလိုကျမဲပေးရတယ်။ ဒါမျိုး ပြောချင်တာလား။

USW – ဟုတ်တာပေါ့ဗျာ။ လက်ညှိုးထောင်ရတော့  ပုဒ်မ (၁) က ဘယ်သူထောက်ခံလဲ။ ပုဒ်မ (၂) က  ဘယ်သူထောက်ခံလဲ။ အဲသူတို့အဆိုကျတော့  ဒီအချက်ဘယ်သူထောက်ခံလဲဆိုရင် (ကော်မတီတွင်း ရှိ NLD ပါတီဝင်) ၁၈ ယောက်လုံးက အကုန်ထောင်တာကိုးဗျ။ အင်အားများနေတာပေါ့။ လျှို့ဝှက်မဲစနစ်နဲ့ဆိုရင် စဉ်းစားအားကောင်းပြီး တိုင်းပြည်အတွက် စေတနာပါတဲ့သူက ပေါ်လာမှာပဲ။ အခု ပုဒ်မခြောက်ခုလုံးက အင်အားကြီးပါတီကပဲ အနိုင်ရသွားတယ်လေ။

The Voice Journal – အခုနောက်ဆုံး ရခိုင်ပါတီကလည်း နှစ်ယောက်ထပ်ပြီး နုတ်ထွက်တယ်ဆိုတော့ အခြေခံဥပဒေပြင်ဆင်ရေးပူးပေါင်းကော်မတီမှာက ၄၂ ဦးပဲ ရှိတော့တာပေါ့။

USW – ဟုတ်တယ်ဗျ။ နောက်တစ်ယောက်တောင် ထွက်တယ်လို့ ကြားမိသေးတယ်။ သုံးယောက်ကတော့ သေချာသွားတယ်။ ၄၂ ဦး ဖြစ်သွားတာပေါ့။

The Voice Journal – အန်ကယ်လ် ခုနပြောတဲ့အထဲမှာ သုံးချက်လို့ ပြောတယ်မလား။ အခုက နှစ်ချက်ပဲရှိသေးတယ်။

USW – ဒီလိုဗျာ။ တစ်ခုက လက်ညှိုးထောင်မဲခွဲတာကို မကြိုက်တာ။ နောက်တစ်ချက်က ဦးတည်ချက်ငါးရပ်နဲ့ မညီတာ။ နောက်တစ်ချက်ကတော့ တစ်ပါတီလွှမ်းမိုးမှုနဲ့ပဲ ဖွဲ့စည်းပုံက ဖြစ်လာမှာလေ။ တစ်နည်းအားဖြင့် ဒီမိုကရေစီဖက်ဒရယ်ပြည်ထောင်စု အနှစ်သာရတွေပါလာဖို့ နည်းသွားပြီ။ အဲဒါပေါ့။

The Voice Journal- ဖွဲ့စည်းပုံအခြေခံဥပဒေပြင်ဆင်ရေး ပူးပေါင်းကော်မတီဖွဲ့စကတည်းက  တပ်မတော်နဲ့ ကြံ့ခိုင်ရေးပါတီက အခန်း (၁၂)  အခြေခံဥပဒေ ပြင်ဆင်ရေးနည်းလမ်းနဲ့ မညီဘူး။  ကော်မတီထဲမှာလည်း မဲခွဲတဲ့အခါ ပါတီကြီးတွေကပဲ  လွှမ်းမိုးမယ်ဆိုပြီး ကနဦးကတည်းက ပြောခဲ့တယ်။  အန်ကယ်လ်ကရော ဒါမျိုးကြိုတွက်မိခဲ့သေးလား။

USW – ကျွန်တော်တို့က ကြိုမသိဘူးဗျ။ ကြိုမသိဘူးဆိုတာက ကော်မတီထဲမှာပါတဲ့ အတွင်းရေးမှူးအဖွဲ့တွေကလည်း ပွင့်ပွင့်လင်းလင်းမသိခဲ့ကြပါဘူး။ ကျွန်တော်ထင်ပါတယ်။ အပေါ်ကနေပဲ လမ်းညွှန်တဲ့အတိုင်း လုပ်နေတယ်လို့ ထင်ပါတယ်။ ခုနပြောတဲ့ စကားလေးပြန်ဆက်ရရင်ဗျာ ကျွန်တော်တို့ထင်ခဲ့တာက တိုင်းရင်းသားတွေအားလုံးပါဝင်တဲ့၊ တစ်တိုင်းတစ်ပြည်လုံးပါဝင်တဲ့ ဖွဲ့စည်းပုံဖြစ်လာမလားလို့  ပူးပေါင်းပြီးဆောင်ရွက်ခဲ့တာ။ ဒါ့ကြောင့်လည်း ကျွန်တော့်ပါတီ (အမျိုးသားညီညွတ်သော ဒီမိုကရက်တစ်ပါတီ )က အကြံပြုချက် ၄၆၂ ချက် ထည့်ခဲ့တာပေါ့ဗျာ။ တကယ်အလုပ်လုပ်ကြည့်တော့ ဒီလိုမျိုးလုပ်တဲ့အတွက် ကျွန်တော်က လျှို့ဝှက်မဲစနစ်နဲ့သွားဖို့ ပြောတယ်။ လျှို့ဝှက်မဲစနစ်နဲ့သွားရင် ဒီလောက်မဆိုးဘူးဗျ။ ဘာလို့ဆိုတော့ ဒီ ၄၅ ဦးက သာမန်မဟုတ်ဘူး။ ဒီဖွဲ့စည်းပုံကို ထုံးလိုချေ ရေလိုနှောက်ပြီး နေ့တိုင်းဖတ်နေရတာ။ ဖတ်နေတော့ ငါတို့ပါတီရဲ့ အဆိုပြုချက်ထက် ဟိုဘက်ပါတီရဲ့အဆိုပြုချက်က ဒီမိုကရေစီ ဖက်ဒရယ်ပြည်ထောင်စု စနစ်နဲ့ကိုက်ညီတယ်၊ မညီဘူး  တွေးလို့ရတယ်။ ဒါခက်ခဲတာမဟုတ်ဘူး။ စဉ်းစားလိုက်တာနဲ့ အဖြေက ရတယ်။ အဲဒါကို ကျွန်တော်တို့ကလည်း  ဖြစ်လာမယ် ထင်တယ်။ တစ်နည်းအားဖြင့် သုံးပုံလုံး အပြည့်မရတောင် သုံးပုံနှစ်ပုံတော့ ဖြစ်လာမယ်ထင်တာ။ ဆရာသမားပြောသလို တချို့ကိစ္စတွေကျတော့လည်း ဦးတည်ချက်အတိုင်း လုပ်မယ်ဆိုရင် အင်မတန်ကောင်းတယ်။ ဦးတည်ချက်က ဒီလိုဆိုထားတယ်။  ခင်ဗျားအချက်က ဦးတည်ချက် နံပါတ်ဘယ်လောက်နဲ့ လွဲတယ်။ ဒီမိုကရေစီစံချိန်စံညွှန်းနဲ့ မညီဘူး။  ဒါ့ကြောင့်မို့ မထည့်သင့်ဘူး ပြောလို့ရတယ် ဟုတ်တယ်မလား။ ၆(စ) ဗျာ။ ဒီမိုကရေစီစံနှုန်းနဲ့ မညီဘူး။ ဘာ့ကြောင့်မညီလဲဆို တပ်မတော်သည် စီးပွားရေး၊  လူမှုရေးမှာပါနေတာ။ ဒါကတပ်မတော်ကိုမုန်းလို့ မဟုတ်ဘူး။ တပ်မတော်နဲ့ ကျွန်တော် ရန်သူ မဟုတ်ပါဘူး။ ကျွန်တော်တို့က ပြည်သူတွေလိုချင်တဲ့ မတောင့်မကျနေရတဲ့ နိုင်ငံတော်သစ်ဖြစ်ရေးဖြစ်ချင်တာပါ။ ကျွန်တော်တို့လည်း နေရ ၁၀ နှစ်ပါပဲ။ ဒါပေမဲ့ ကိုယ်လုပ်နိုင်တဲ့အပေါ် မလိမ်မညာဘဲ အမှန်အတိုင်းပဲလုပ်ချင်တယ်လေ။ လှည့်စားပြီး ဟိုလိုလုပ်လိုက်၊  ဒီလိုလုပ်လိုက် အဲဒီအထဲ ကျွန်တော်တို့မပါဘူးဗျ။  အဲဒါမျိုး မတွေးထားဘူးလားဆိုတဲ့မေးခွန်းက ကျွန်တော်တို့က အကောင်းဆုံးလုပ်မယ်လို့ဆိုပြီး တွေးထားခဲ့တာလေ။ ဒါက ကျွန်တော့်ဘက်ကလေ။ ဒါတွေက  အကြောင်းရှိလို့ အကျိုးဖြစ်လာတာ။ ကျွန်တော်တို့ လည်း တစ်ခါတလေကျ  လိုက်ကြည့်တာပေါ့ဗျာ။  လိုက်ကြည့်တော့ အခုသိသွားပြီလေ။ အဲဒီတော့  မှေးမလိုက်တော့ဘူးလေ။

The Voice Journal – အခြေခံဥပဒေပြင်ဆင်ရေး ပူးပေါင်းကော်မတီမှာ NLD က ဘယ်နှဦးလောက်ပါလဲ။

USW – ၁၈ ဦးလောက်ပါတယ်ဗျ။ အတိအကျလောက်ပါပဲ ။ တပ်မတော်က ခြောက်ဦးပေါ့။ ကျွန်တော် အဲဒါတွေကတော့ အတိအကျမရလို့ပါ။ စာအုပ်ထဲမှာတော့  ရှိပါတယ်။ အလွတ်ပြောနေရလို့ပါ။

the Voice Journal – အန်ကယ်လ်က အခုနုတ်ထွက်ပေမယ့် လွှတ်တော်မှာ ဆွေးနွေးတုန်းကတော့ အခြေခံဥပဒေပြင်ဆင်ရေးပူးပေါင်းကော်မတီကို ထောက်ခံဆွေးနွေးခဲ့တာနော်။

USW – ဟုတ်တယ်ဗျ။ ဒီမှာ ကျွန်တော်ပြောပြမယ်။  ၅၉ (စ) ကို ပယ်ဖျက်သင့်ပါတယ်ဆိုပြီး ကျွန်တော်က လက်ခံခဲ့တာ။ အင်တာဗျူးတစ်ခုမှာလည်း ကျွန်တော်ပြောတယ်။ လူတစ်ယောက်ရဲ့ အမှားဟာလို့ အဲဒီလူရဲ့ သားကြောင့်၊ သမီးကြောင့်၊ အဖေကြောင့်၊ အမေကြောင့်ဆိုပြီး မဖြစ်သင့်ဘူးလို့။ ဒီနေ့တိုင်းပြည်ကို  ရောင်းစားခဲ့သူတွေဟာလည်း သူတို့ရဲ့မိန်းမတွေက  မြန်မာလူမျိုးအစစ်တွေပဲလို့။ ဒါပေမဲ့ ဘာလို့ တိုင်းပြည်ကို သူခိုးဈေးနဲ့ရောင်းနေလဲ။ အုပ်ချုပ်သူရဲ့ အရည်အချင်းနဲ့ စွမ်းဆောင်ရည်အပေါ် မူတည်နေတာလို့။  အဲဒီလို ကျွန်တော်ကပြောခဲ့တာ။ ဆိုလိုတာက လက်ရှိပကတိကို ထောက်ပြတာ။ တစ်ခါတလေကျတော့လည်း ဒေါ်စု (ဒေါ်အောင်ဆန်းစုကြည်) ကို ယထာဘူတကျကျပေါ့ဗျာ။ တစ်ခုတော့ရှိတယ်။ ဒေါ်စုဒီဘက်မှာ လုပ်လာတဲ့ ကလေးသူငယ်အခွင့်အရေးဆိုင်ရာ ဥပဒေတွေ၊ ရွှေ့ပြောင်းသွားသူတွေ ပြန်လက်ခံတဲ့ကိစ္စတွေကျတော့လည်း စောင့်ကြည့်တာပေါ့ဗျာ။  ဆိုလိုတာက ကျွန်တော်တို့က လူတစ်ယောက်ကို မကိုးကွယ်ဘူး။       အဲဒီလူရဲ့ လုပ်ဆောင်ချက်ကို စောင့်ကြည့်တာပေါ့ဗျာ။ ကျွန်တော့်အကျင့်က အဲဒါပါပဲ။

The Voice Journal  – ဒါဆို အခုနောက်ဆုံး  ပုဒ်မ ၆(စ)က NLD ပြင်ချင်တဲ့အတိုင်း ကော်မတီအတွင်းမှာ ဖြစ်သွားတယ်ပေါ့။

USW – ဟုတ်ပါတယ်ဗျာ။

The Voice Journal  – အခြေခံဥပဒေကို ကော်မတီထဲမှာ အခုပြင်တာ ဘယ်အဆင့်ထိရောက်ပြီလဲ။

USW – ကျွန်တော် မနေ့က (ဩဂုတ်လ ၂) အထိပဲ တက်ခဲ့တာ။ အခန်း(၁) အထိ ရောက်နေပြီ။

The Voice Journal- အန်ကယ့်လ်နုတ်ထွက်စာကိုရော အခြေခံဥပဒေပြင်ဆင်ရေး ပူးပေါင်းကော်မတီက လက်ခံပြီလား။

USW – လက်ခံတာ၊ လက်မခံတာ သူတို့အပိုင်းလေ။  ကျွန်တော်တို့က ကျွန်တော့်ပါတီ ကိုယ်စားပြုတက်တာကိုး။ တက်တဲ့အခါကျတော့ ဒီအချက်ဒီအချက်တွေကြောင့် နုတ်ထွက်ပါတယ်ဆိုတာ အကျိုးအကြောင်းနဲ့ ဖော်ပြပြီးပေးလိုက်တာ။ လက်ခံရမှာပေါ့။  တကယ်လို့ သူတို့ချက်ချင်းလက်မခံရင် ပြည်ထောင်စုလွှတ်တော်ကို တင်ရမယ်။

The Voice  Journal- ကျေးဇူးတင်ပါတယ်ခင်ဗျ။

ရဲနိုင်ဦး

 

You may also like...

Leave a Reply

Your email address will not be published. Required fields are marked *