စက္ကန့်နှင့်အမျှ လှုပ်ခတ်နေသော ရွှေဈေးနှင့် တရိပ်ရိပ်ပြန်တက်လာသော ဒေါ်လာဈေး

တစ်ရက်တာ ပြည်တွင်းရွှေ၊ ဒေါ်လာနှင့် စတော့ရှယ်ယာကိန်းဂဏန်းများ (စက်တင်ဘာ ၆ ရက်၊ ၂၀၁၉ ခုနှစ်)

ရွှေ

ယမန်နေ့က ရွှေဈေး တစ်ဆယ့်သုံးသိန်းကျော်အထိ စံချိန်တင်မြင့်တက်ခဲ့သော ရွှေဈေးမှာ ယနေ့တွင် ပြန်လည်ကျဆင်းခဲ့သည်။
ယနေ့နံနက်ပိုင်းတွင် ကျပ် ၁,၃၀,၀၀၀ ကျော်ဖြင့် ဈေးစဖွင့်ခဲ့ပြီး နေ့လယ်ပိုင်းတွင် ကျပ် ၁,၂၇၁,၀၀၀ ဝန်းကျင်သို့ ဈေးပြန်ကျလာကာ ညနေပိုင်းတွင် ကျပ် ၁,၂၆၅,၀၀၀ ဝန်းကျင်ဖြင့် ဈေးပိတ်သွားသည်။
ညနေပိုင်း ဈေးပိတ်ချိန်တွင် ကမ္ဘာ့ရွှေဈေးမှာ ရွှေတစ်အောင်စလျှင် အမေရိကန်ဒေါ်လာ ၁၅၀၆ ဝန်းကျင်ထိ ဈေးကျနေသော်လည်း ယင်းနောက်ပိုင်းတွင် ဈေးတရိပ်ရိပ်ပြန်တက်လာကာ ည ရှစ်နာရီတွင် အမေရိကန်ဒေါ်လာ ၁၅၂၃ ဝန်းကျင်သို့ ဈေးပြန်မြင့်တက်လာသည်။
ပြည်တွင်းရွှေဈေးမှာ ကမ္ဘာ့ရွှေဈေးအလှုပ်အခတ်နှင့် ကျပ်-အမေရိကန်ဒေါ်လာငွေလဲနှုန်း မြင့်တက်နေမှုကြောင့် စက္ကန့်နှင့်အမျှ ဈေးပြောင်းလဲနေသည်။

နိုင်ငံခြားငွေလဲနှုန်း

ကာလအတန်ကြာ တည်ငြိမ်နေသော အမေရိကန်ဒေါ်လာငွေလဲနှုန်းမှာ ယခုသီတင်းပတ် ဈေးကွက်ဖွင့်ချိန်တွင် ပြန်လည်လှုပ်ခတ်လာပြီး ဈေးဆက်တိုက်တက်လာရာ အမေရိကန် တစ်ဒေါ်လာလျှင် ၁၅၆၀ ကျော်ထိ ဈေးတက်ခဲ့သည်။
ယနေ့ ပုဂ္ဂလိကဘဏ်အများစုတွင် အမေရိကန်ဒေါ်လာ ဝယ်ရောင်းဈေးမှာ ၁၅၂၃ ကျပ်မှ ၁၅၆၇ ကျပ်အတွင်း၊ ပြင်ပငွေလဲကောင်တာများတွင် ၁၅၃၅ ကျပ်မှ ၁၅၆၅ ကျပ်အတွင်း၊ ပြင်ပဒေါ်လာဈေးကွက်တွင် ၁၅၃၅ ကျပ်မှ ၁၅၅၀ ကျပ်အတွင်း အရောင်းအဝယ်ဖြစ်လျက်ရှိသည်။
ဘဏ်အချင်းချင်းနှင့် ဘဏ်-ဝယ်သူ အမေရိကန်ဒေါ်လာရောင်းဝယ်မှုကို အလေးပေးပျမ်းမျှတွက်ချက်ထားသော ဗဟိုဘဏ်ရည်ညွှန်းနှုန်းမှာ ၁၅၄၈ ဒသမ ၁ ကျပ်ဖြစ်ပြီး ဘဏ်အချင်းချင်းရောင်းဝယ်မှုပျမ်းမျှနှုန်းမှာ ၁၅၅၀ ဒသမ ၆ ကျပ်နှင့် ဘဏ်-ဝယ်သူ ရောင်းဝယ်မှုနှုန်း ၁၅၄၄ ဒသမ ၃ ကျပ်ဖြစ်သည်။
ဗဟိုဘဏ်ရည်ညွှန်းနှုန်းမှာ နှစ်လအတွင်း ၄၄ ကျပ်မြင့်တက်လာပြီး ကျပ်ငွေတန်ဖိုး သုံးရာခိုင်နှုန်းခန့် ကျဆင်းသွားသည်။
ယနေ့ ဘဏ်အချင်းချင်း အမေရိကန်ဒေါ်လာရောင်းဝယ်မှုမှာ အမေရိကန်ဒေါ်လာ ၁၀ ဒသမ ၂ သန်း ရှိပြီး ငွေလဲနှုန်း ၁၅၄၀ ကျပ်မှ ၁၅၅၈ ကျပ်အတွင်း အရောင်းအဝယ် ဖြစ်ခဲ့သည်။
ယခုသီတင်းပတ်တွင် ဘဏ်အချင်းချင်း အမေရိကန်ဒေါ်လာရောင်းဝယ်မှုမှာ အမေရိကန်ဒေါ်လာ သန်း ၆၀ ခန့်ရှိပြီး ဘဏ်နှင့်ဝယ်သူရောင်းဝယ်မှုစုစုပေါင်းမှာ အမေရိကန်ဒေါ်လာ သန်း ၂၂၀ ကျော် ရှိသည်။

စတော့ရှယ်ယာ

ယခုသီတင်းပတ် စတော့ရှယ်ယာအရောင်းအဝယ်မှာ နှစ်နှစ်အတွင်း တတိယမြောက်အများဆုံးဖြစ်ပြီး စတော့အညွှန်းကိန်းမှာ ဩဂုတ်လ ၁၉ ရက်နောက်ပိုင်း အမြင့်ဆုံးပြန်ရောက်လာသည်။
ယခုသီတင်းပတ်တွင် ရှယ်ယာအစု ၉၀၀၀၀ ကျော်၊ တန်ဖိုး ကျပ်သန်း ၅၅၀ ကျော် အရောင်းအဝယ်ဖြစ်ခဲ့ပြီး စတော့အညွှန်းကိန်းမှာ ဈေးကွက်ဖွင့်ချိန်တွင် ၄၈၆ ဒသမ ၉၈၊ အမြင့်ဆုံး ၄၉၈ ဒသမ ၈၂၊ အနိမ့်ဆုံး ၄၈၆ ဒသမ ၉၈ နှင့် ဈေးကွက်ပိတ်ချိန်တွင် ၄၉၆ ဒသမ ၉၁ ဖြင့် ဈေးကွက်ပိတ်ခဲ့သည်။
ယခင်သီတင်းပတ် ရှယ်ယာဈေးနှုန်းများနှင့်နှိုင်းယှဉ်ပါက MTSH ရှယ်ယာ ၂၀၀ ကျပ်၊ TMH ရှယ်ယာ ၅၀ ကျပ် ဈေးတက်ခဲ့ပြီး FPB ရှယ်ယာ ၁၅၀၀ ကျပ် ဈေးကျခဲ့သည်။
ဈေးကွက်ပိတ်ချိန်တွင် FMI ရှယ်ယာ ၁၂၀၀၀ ကျပ်၊ MTSH ရှယ်ယာ ၄၃၀၀ ကျပ်၊ MCB ရှယ်ယာ ၈၄၀၀ ကျပ်၊ FPB ရှယ်ယာ ၂၄၅၀၀ ကျပ်နှင့် TMH ရှယ်ယာ ၃၁၀၀ ကျပ်တို့ဖြစ်သည်။
No photo description available.

You may also like...

Leave a Reply

Your email address will not be published. Required fields are marked *