ဘင်္ဂါလီအမျိုးသမီးတစ်ဦးကို ဘင်္ဂလားဒေ့ရ်ှတက္ကသိုလ်ကျောင်းထုတ်

Photo - CBIU

ကော့ဘဇာ၊ စက်တင်ဘာ ၉

ဘင်္ဂလားဒေ့ရ်ှရှိ ကော့ဘဇာ နိုင်ငံတကာတက္ကသိုလ်သည် ကျောင်းသူတစ်ဦးကို ဘင်္ဂါလီ(မူရင်းတွင် ရိုဟင်ဂျာဟုသုံး) ဒုက္ခသည် ဖြစ်နေသည့်အတွက် ကျောင်းထုတ်လိုက်ကြောင်း AFP သတင်းဌာက ဖော်ပြသည်။

ယင်းသို့ ကျောင်းထုတ်လိုက်ကြောင်းကို အဆိုပါကျောင်းက စက်တင်ဘာ ၈ ရက်နေ့က ထုတ်ပြန်ခဲ့ခြင်းဖြစ်သည်။

ဘင်္ဂလားဒေ့ရှ်၏ တရားဝင်ကျောင်းပညာရေးတွင် ဒုက္ခသည်များကို ပိတ်ပင်ထားသည်ဟုလည်း အဆိုပါသတင်းတွင် ဖော်ပြထားသည်။

အသက် ၂၀ အရွယ်ရှိ ရဟီမာအက်တာခူရှီးဆိုသည့် အမျိုးသမီးကို ကျောင်းထုတ်လိုက်ကြောင်း ကော့ဘဇာနိုင်ငံတကာတက္ကသိုလ်က ထုတ်ပြန်ခဲ့ပြီး သူ(မ)ကိစ္စကို စုံစမ်းစစ်ဆေးသွားမည်ဟုဆိုသည်။

ဘင်္ဂလားဒေ့ရ်ှပြည်တွင်းမီဒီယာများ၏ ဖော်ပြချက်အရ အဆိုပါအမျိုးသမီးသည် ကျောင်းဝင်ခွင့်လျှောက်ထားရာတွင် သူ၏ ဘင်္ဂါလီမှတ်ပုံတင်ကို ထိန်ချန်ထားသည်ဟု ဆိုသည်။

“ရိုဟင်ဂျာ(မူရင်းအသုံးအတိုင်း)တွေ ကျွန်တော်တို့တက္ကသိုလ်တက်လို့မရပါဘူး။ ဘာဖြစ်လို့လဲဆိုတော့ သူတို့က ဒုက္ခသည်တွေဖြစ်နေလို့ပါ။ နိုင်ငံခြားသားတွေ ဒီမှာကျောင်းတက်လို့ရတယ်၊ ဒါပေမဲ့ သူတို့က လုပ်ထုံးလုပ်နည်းကို လိုက်နာရပါမယ်” ဟု တက္ကသိုလ်၏ အကြီးအကဲ အဘူလ် ကတ်ရှမန်း က ပြောကြားခဲ့သည်။

ကျောင်းထုတ်ခံရသည့် အမျိုးသမီးသည် ဘင်္ဂလားဒေ့ရ်ှဆိပ်ကမ်းမြို့တော်ဖြစ်သည့် စစ်တကောင်းမြို့တွင် အထက်တန်းအောင်မြင်ခဲ့ကြောင်း အထောက်အထားစာရွက်စာတမ်းများ ပြသပြီး ကျောင်းလျှောက်ထားခဲ့သည်ဟုလည်း သူကဆိုသည်။

ဘင်္ဂလားဒေ့ရ်ှအမျိုးသားတက္ကသိုလ်တွင် ဥပဒေပညာသင်ကြားနေသည့် ခူရှီးသည် ၎င်းအနေနှင့် စိတ်ထိခိုက်ခံစားရကြောင်း AFP သတင်းဌာနသို့ ပြောဆိုခဲ့သည်။

“တခြားမိန်းကလေးတွေဆို အခုလိုအချိန်မှာ သူတို့ကိုယ်သူတို့ သတ်သေသွားလောက်တယ်၊ ဒါပေမဲ့ ဒီအခြေအနေကို ရင်ဆိုင်ဖို့ ကျွန်မအကောင်းဆုံးကြိုးစားနေပါတယ်” ဟု သူက ဆိုခဲ့သည်။

ဘင်္ဂလားဒေ့ရ်ှအာဏာပိုင်များသည် ပြီးခဲ့သည့် ရက်သတ္တပတ်များအတွင်း ဒုက္ခသည်စခန်းများတွင် အကြမ်းဖက်မှုများ ထိန်းချုပ်ရခက်လာသည့်အတွက် အော်ပရေတာများကို မိုဘိုင်းဖုန်း ဝန်ဆောင်မှု ဖြတ်တောက်ရန် ညွှန်ကြားခဲ့သည်။

ယင်းအခြေအနေကို ပယ်ဖျက်အဆုံးသတ်ပေးရန် လူ့အခွင့်အရေးစောင့်ကြည့်အဖွဲ့က စက်တင်ဘာ ၇ ရက်နေ့က တောင်းဆိုခဲ့ပြီး အခြေအနေများ ပိုမိုဆိုးသွားစေလိမ့်မည်ဟုလည်း ပြောဆိုခဲ့သည်။

ကျောင်းထုတ်ခံရသည့် ခူရှီကမူ သူ၏ မိဘများသည် ၁၉၉၀ ခုနှစ်များထဲက ရခိုင်ပြည်နယ်မှ ဘင်္ဂလားဒေ့ရ်ှသို့ ရောက်ရှိနေခဲ့ပြီး သူက ကော့ဘဇာတွင် မွေးဖွားကြီးပြင်းခဲ့ခြင်းဖြစ်ကြောင်း ပြောဆိုခဲ့သည်။

“ကျွန်မထပ်သွားချင်သေးတယ်၊ ဒါပေမဲ့ အဲဒါဘယ်လိုလုပ်ရမလဲ ကျွန်မ မသိဘူး” ဟု သူကဆိုသည်။

 

You may also like...

Leave a Reply

Your email address will not be published. Required fields are marked *