နိုင်ငံရေး မလွန်ကဲစေရေး

ခေတ်အဆက်ဆက်တွင် နိုင်ငံရေးကသာ လွှမ်းမိုးထားလေ့ရှိသဖြင့် နောက်ကျကျန်ခဲ့သော မြန်မာနိုင်ငံသည် ယနေ့ခေတ်တွင်လည်း နိုင်ငံရေးက အရာရာကို အလွန်အကျွံ လွှမ်းမိုးမထားအောင် ဂရုစိုက်ရမည်ဖြစ်သည်။

မြန်မာနိုင်ငံတွင် ဖွံ့ဖြိုးရေးသည် နိုင်ငံရေးနှင့် ယှဉ်လိုက်လျှင် အမြဲတမ်းနောက်ကောက်ကျပြီး နောက်လိုက်အဆင့်ဖြင့်သာ ရပ်တည်ခဲ့ရသည်။ ဖွံ့ဖြိုးရေးမူဝါဒချမှတ်ရာတွင် ဖွံ့ဖြိုးရေးကို ဦးစားပေးမကြည့်ဘဲ နိုင်ငံရေးအကျိုးစီးပွား ကိုယ့်လူ သူ့လူ ကြည့်ခဲ့ကြသည်။ စီးပွားရေးတိုးတက်အောင် ဆောင်ရွက်လျှင်လည်း စီးပွားရေးအမြင်ဖြင့် အရင်မကြည့်ဘဲ နိုင်ငံရေးကို ကြည့်ပြီးမှ စီးပွားရေးအမြင်ကို ထည့်သွင်းစဉ်းစားသည်။ နိုင်ငံရေးရှုထောင့်နှင့် စီးပွားရေးရှုထောင့်တို့ ပဋိပက္ခဖြစ်လျှင် နိုင်ငံရေးရှုထောင့်ကသာ ဒိုင်ပွဲရပ်ဖြင့် နိုင်လေ့ရှိသည်။

ခေတ်အဆက်ဆက် အစိုးရယန္တရားကို တက်မောင်းနိုင်ခဲ့သူများသည် မိမိတို့၏ အချိန်အများစုကို အာဏာမရသေးလျှင် အာဏာရရန်၊ အာဏာရပြီးသားဆိုလျှင် ဆက်လက်အာဏာတည်မြဲရန်အတွက်သာ သုံးစွဲခဲ့ရပြီး နိုင်ငံတိုးတက်အောင် ကြံစည်ဆောင်ရွက်ခြင်းများတွင်မူ အချိန်ပေးမှု နည်းပါးခဲ့ရသည်။ ပါတီတွင်း၊ အဖွဲ့အစည်းတွင်း အာဏာလုပွဲများ၊ ဆရာမွေးတပည့်မွေးခြင်းများနှင့် အချိန်ကုန်ကြရပြီး နိုင်ငံကို ရှေ့သို့ရောက်အောင် တီထွင်ဖန်တီးမှု လုပ်ဆောင်ရာတွင် အစဉ်တစိုက် အားနည်းခဲ့ကြသည်။

မူဝါဒတစ်ခု၊ အကြံဉာဏ်တစ်ခုကို သုံးသင့် မသုံးသင့်ကို မိမိတို့ နိုင်ငံရေးခံယူချက်နှင့် ကိုက်မကိုက်၊ ယူဆောင်လာသောသူ၏ နောက်ခံ၊ ထိုမူဝါဒကို ကျင့်သုံးလိုက်လျှင် မိမိကို ထောက်ခံသူများ ထိခိုက် မခိုက်၊ မိမိ၏ အကျိုးစီးပွား ကျဆင်းနိုင်စွမ်း ရှိ မရှိကိုသာ ကြည့်ပြီး ထိုမူဝါဒ၏ နိုင်ငံတစ်နိုင်ငံလုံးအပေါ် ကောင်းကျိုးသက်ရောက်နိုင်စွမ်းကိုမူ များသောအားဖြင့် လျစ်လျူရှုခဲ့ကြသည်။ ‘နိုင်ငံရေးဆန်ခါ’ ဖြင့် တိုက်ချလိုက်သည့်အခါ ပြည်သူတို့အတွက် အကောင်းဆုံးမူဝါဒများမကျန်ခဲ့ဘဲ ဒုတိယတန်းစား၊ တတိယတန်းစားမူဝါဒများသည်သာ နိုင်ငံဖွံ့ဖြိုးရေးမူဝါဒများဖြစ်သွားသည်။ အဆိုပါမူဝါဒများသည်လည်း အကောင်အထည်ဖော်ရာတွင် တစ်ချီပြီးတစ်ချီရိုက်သော နိုင်ငံရေးလှိုင်းလုံးများအောက် ခေါင်းမထောင်နိုင်၊ သက်ဆိုးမရှည်။

ဦးဆောင်အကောင်အထည်ဖော်မည့်သူများ ရွေးရာတွင်လည်း နိုင်ငံရေးခံယူချက်နှင့် ပုဂ္ဂိုလ်ရေးကိုဦးစားပေးကာ လူရွေးသည့်အတွက် အကောင်အထည်ဖော်မည့်သူများနေရာတွင် တိုင်းပြည်အကျိုးစီးပွားကိုသာ ကြည့်သည့် တတ်သိကျွမ်းကျင်သူများ နေရာရနိုင်ရန်ခက်ခဲသည်။

အတိုချုပ်လျှင် မြန်မာနိုင်ငံသည် ဖွံ့ဖြိုးရေး ကြီးပွားရေး စီးပွားရေးဖော်ဆောင်ရာတွင် နိုင်ငံရေးက လွန်လွန်ကဲကဲ လွှမ်းမိုးထားသဖြင့် ယနေ့ဘ၀သို့ ရောက်ခဲ့ခြင်းဖြစ်သည်။

နိုင်ငံတည်ဆောက်ရာတွင် နိုင်ငံရေးကို ရှောင်၍မရနိုင်သော်လည်း နိုင်ငံရေး မလွန်ကဲသင့်။ ဖွံ့ဖြိုးရေးကို ဖွံ့ဖြိုးရေးလို စဉ်းစား၊ စီးပွားရေးကို စီးပွားရေးလို စဉ်းစားသင့်သည်။ 

 

အယ်ဒီတာ
၁၂.၉ .၂၀၁၉

You may also like...

Leave a Reply

Your email address will not be published. Required fields are marked *