အဂတိကင်းသည့် ရန်ကုန်စည်ပင်ဖြစ်ရန် သုံးလအတွင်း Single Window စနစ်ကျင့်သုံးမည်

ရန်ကုန်၊ စက်တင်ဘာ ၁၂

ရန်ကုန်မြို့တော်စည်ပင်သာယာရေးကော်မတီ (YCDC) ကို အဂတိကင်းစင်သည့် ဌာနတစ်ခုဖြစ်စေရန်အတွက် အချိန်သုံးလအတွင်း Single Window စနစ်ကျင့်သုံးမည်ဖြစ်ကြောင်း ရန်ကုန်တိုင်းဒေသဝန်ကြီးချုပ် ဦးဖြိုးမင်းသိန်းကဆိုသည်။

ရန်ကုန်မြို့တော်ခန်းမတွင် စက်တင်ဘာလ ၁၂ ရက်က ကျင်းပသည့် YCDC က ကောက်ခံသာ အခွန်အခများကို Mobile Banking မှတစ်ဆင့် ပေးဆောင်နိုင်မည့် YCB Payment Gateway စနစ် မိတ်ဆက်ပွဲ အခမ်းအနားတွင် ၎င်းကပြောကြားခဲ့ခြင်းဖြစ်သည်။

ရန်ကုန်မြို့သည် နိုင်ငံခြားရင်းနှီးမြှုပ်နှံမှု အများဆုံးဝင်ရောက်သည့်အပြင် ရင်းနှီးမြှုပ်နှံသည့်လုပ်ငန်းစဉ်တွင် အခက်အခဲများရှိသောကြောင့် Doing Business အဆင့်သတ်မှတ်ချက်ကို အထောက်အကူပြုနိုင်ရန် YYCDC ၏ဝန်ဆောင်မှုများကို Single Window အဖြစ်ပြောင်းလဲရန် စီစဉ်ရခြင်းဖြစ်ကြောင်း ဝန်ကြီးချုပ်ဦးဖြိုး မင်းသိန်းက ရှင်းပြသည်။

Single Window စနစ်ကျင့်သုံးခြင်းသည် ဝန်ကြီးဌာနများအတွင်း လုပ်ထုံးလုပ်နည်းများပြားမှုကို လျှော့ချခြင်း ဖြစ်ပြီး ဝန်ကြီးဌာန၏ ဝန်ဆောင်မှုကို သုံးစွဲသူများ အချိန်ကုန်သက်သာ အဆင်ပြေစေရန် ရည်ရွယ်ခြင်းဖြစ်သည်

အရှေ့တောင်အာရှနိုင်ငံများအတွင်း အဆိုပါစနစ် (ASEAN Single Window) ကို ကျင့်သုံးလျက်ရှိပြီး မြန်မာနိုင်ငံတွင် အကောက်ခွန်ဦးစီးဌာနနှင့် အခြားသောဦးစီးဌာနများလည်း ကျင့်သုံးလျက်ရှိသည်။

Single Window ကျင့်သုံးမည် ဆိုပါက YCDC လက်အောက်ရှိ ဌာနပေါင်းနှစ်ဆယ်၏ လုပ်ထုံးလုပ်နည်းများကို လျှော့ချပြီး တစ်နေရာတည်းတွင် ပြီးပြည့်စုံသောဝန်ဆောင်မှုရရှိနိုင်ရေး ကြိုးစားရမည်ဟု ဦးဖြိုးမင်းသိန်းက ဆိုသည်။

လက်ရှိတွင် အဆောက်အုံတစ်ခု တည်ဆာက်ရန် အင်ဂျင်နီယာဌာန (အဆောက်အအုံ)၊ အင်ဂျင်နီယာဌာန (ရေနှင့်သန့်ရှင်းမှု)၊ ရန်ကုန်မြို့တော် ဘဏ်စသည်ဖြင့် ဌာနသုံးလေးခုခန့်သို့သွားကာ ခွင့်ပြုမိန့်များအဆင့်ဆင့် ယူရလျက်ရှိသည်။

Single  Window စနစ်အောင်မြင်ပြီးပါက နောက်တစ်ဆင့်တွင် YCDC နှင့်ပတ်သက်သည့် ကိစ္စရပ်များကို အွန် လိုင်းစနစ်သုံးကာ ဆောင်ရွက်ရန်စီစဉ်နေကြောင်း ဝန်ကြီးချုပ်ဦးဖြိုးမင်းသိန်းက ဆိုသည်။

လာမည့်အောက်တိုဘာလ ၁ ရက်မှစ၍ YCDC ၏ အခွန်အခများကို လူကိုယ်တိုင်ကိုယ်ကျ ကောက်ခံခြင်းအစား Mobile Banking သုံး၍ အခွန်ကောက်ရန် စီစဉ်လျက်ရှိသည်ဟု ရန်ကုန်မြို့တော်ဝန် ဦးမောင်မောင်စိုးကဆိုသည်။

ထိုပြင် အဆောက်အအုံဆောက်လုပ်ခွင့်နှင့် မြေပုံရာဇဝင်လျှောက်ထားခြင်းတို့ကို ပြီးခဲ့သည့် ဇူလိုင်လမှစ၍ အွန်လိုင်းစနစ်ဖြင့် စတင်လုပ်ဆောင်ခဲ့သည်။

You may also like...

Leave a Reply

Your email address will not be published. Required fields are marked *