BPI စက်ရုံမှူးနှင့် အဂတိ သင်ခန်းစာ

အဂတိလိုက်စားမှု ဖော်ထုတ်သည့်အချိန်တိုင်းတွင် လက်ခုပ်ဩဘာသံများ ရလေ့ရှိသော်လည်း ယခုတစ်ကြိမ်အရေးယူမှုတွင် ဆန့်ကျင်သူများရှိလာသည်။

မြန်မာ့ဆေးဝါးလုပ်ငန်း၊ ဆေးဝါးစက်ရုံ (အင်းစိန်) စက်ရုံမှူး ဒေါက်တာ အောင်ဇော်၏ လုပ်ဆောင်ချက်သည် နိုင်ငံတော်၏ ငွေကြေးနှင့်ပစ္စည်းကို ထိခိုက်စေသည်ဟုဆိုကာ အဂတိလိုက်စားမှု တိုက်ဖျက်ရေးကော်မရှင်က တရားစွဲဆို အရေးယူရန် လုပ်ဆောင်လာခြင်းကြောင့် ဖြစ်သည်။

အဂတိလိုက်စားမှု တိုက်ဖျက်ရေးဥပဒေဖြင့် အမှုဖွင့်ခံထားရပြီးနောက် ဒေါက်တာအောင်ဇော်၏ ပထမဆုံးအကြိမ် ရုံးထုတ်သည့် စက်တင်ဘာ ၉ ရက်နေ့တွင်ပင် အင်းစိန်ဆေးဝါးစက်ရုံ (BPI) မှ ဝန်ထမ်းတစ်ရာကျော် လာရောက်ဝန်းရံခဲ့ ကြသည်။ ကိုယ်ကျိုးမဖက်ဘဲ စက်ရုံကောင်းကျိုးအတွက် ဆောင်ရွက်ခဲ့သည်ဟုဆိုကာ စက်ရုံးမှူးကို ဝန်ရံခဲ့ကြခြင်း ဖြစ်သည်။

အဂတိ ငါးကြီးကြီးများကို ကြော်ပြနိုင်ခဲ့သဖြင့် ပြည်သူလူထုထောက်ခံမှုကို ရထားသည့် အဆိုပါကော်မရှင်၏ အရေးယူဆောင်ရွက်မှုကို ယခုကဲ့သို့ ထင်ထင်ပေါ်ပေါ် ကန့်ကွက်မှုမှာလည်း ဖြစ်တောင့်ဖြစ်ခဲ့ပင် ဖြစ်သည်။

စက်ရုံမှူးကို ဖမ်းဆီးအရေးယူဆောင်ရွက်မှုအပေါ် ထောက်ခံသူ၊ ကန့်ကွက်သူများလည်းရှိနေပြီး ကော်မရှင်ကလည်း အရေးယူရသည့် အကြောင်းအရင်းကို ပြည်သူထံ နှစ်ခါပြန် အသိပေးခဲ့ရသည်။ စက်ရုံမှူး ဒေါက်တာအောင်ဇော်အပေါ် ကော်မရှင်က အရေးယူရသည့် အကြောင်းက မည်သို့နည်း။ ကော်မရှင်က ဟာကွက်မရှိအောင် လုပ်ဆောင်ထားနိုင်ပါ၏လော။

လာဘ်ပေးလာဘ်ယူသည့်ကိစ္စများကို အဓိက စုံစမ်းစစ်ဆေးအရေးယူနေသည့် အဂတိလိုက်စားမှုတိုက်ဖျက်ရေးကော်မရှင်သည် ယခုတစ်ခေါက်တွင်တော့ ကိုယ်ကျိုးအတွက် လာဘ်ပေးလာဘ်ယူခဲ့ခြင်းမရှိသည့် ဒေါက်တာအောင်ဇော်ကို အဂတိလိုက်စားမှုတိုက်ဖျက်ရေးဥပဒေဖြင့် အရေးယူခြင်း ဖြစ်သည်။

လာဘ်ပေးလာဘ်ယူခဲ့ခြင်း မရှိသော်လည်း စည်းမျဉ်း၊ စည်းကမ်း၊ လုပ်ထုံးလုပ်နည်းကိုချိုးဖောက်ကာ လုပ်ဆောင်ခဲ့ခြင်းကြောင့် နိုင်ငံတော် ငွေကြေး၊ ပစ္စည်းနှင့် ပိုင်ဆိုင်မှုကို ထိခိုက်နစ်နာ၊ ဆုံးရှုံးခဲ့သည့်ဟုဆိုကာ အရေးယူရန် ကော်မရှင်ထံ တိုင်တန်းခြင်းဖြစ်သည်။

“ကျွန်တော်တို့က အခုက လာဘ်ပေးလာဘ်ယူတာ မရှိလည်း စည်းမျဉ်း စည်းကမ်းချိုးဖောက်လို့ နိုင်ငံတော်အတွက် ထိခိုက်နစ်နာဆုံးရှုံးစေလို့ အရေးယူဆောင်ရွက်တာပါ။ နောက်လူတွေလည်း ဒါမျိုးမလုပ်အောင်လို့ သတိပေးတဲ့သဘော ပေါ့” ဟု အဂတိလိုက်စားမှုတိုက်ဖျက်ရေးကော်မရှင်မှ တာဝန်ရှိသူတစ်ဦးက ပြောဆိုသည်။

ပြီးခဲ့သည့်နှစ်က စတုတ္တအကြိမ် ပြင်ဆင်လိုက်သည့်ဥပဒေတွင် အများပြည်သူဆိုင်ရာအဖွဲ့အစည်း၊ အခြားအဖွဲ့အစည်းတစ်ခု၏ တာဝန်ရှိသူတစ်ဦးသည် တည်ဆဲဥပဒေ၊ လုပ်ထုံးလုပ်နည်းများကို ချိုးဖောက်၍ နိုင်ငံတော်ငွေကြေး၊ ပစ္စည်းများကို ထိခိုက်ဆုံးရှုံးစေလျှင် အဂတိလိုက်စားမှုမြောက်ကြောင်း ပြဋ္ဌာန်းထားသည်။

ဒေါက်တာအောင်ဇော်၏ ပထမဆုံးအကြိမ် ရုံးထုတ်ရာတွင် ၎င်းဘက်က စက်ရုံဝန်ထမ်းများက ဝန်းရံခဲ့ကြပြီး အင်တာနက်လူမှုကွန်ရက်တွင်လည်း အရေးယူသင့်၊ မယူသင့် အမြင်အမျိုးမျိုးဖြင့် ပြောဆိုကြသည်။ ထို့ကြောင့် ယင်းနေ့တွင်ပင် ကော်မရှင်က ပြည်သူထံသို့ အသိပေးချက် ထုတ်ပြန်ခဲ့သည်။ ဒေါက်တာအောင်ဇော်အပေါ် ဝန်ထမ်းများ၏ ထောက်ခံချက် အများအပြားကိုလည်း လက်ခံစဉ်းစားပေးခဲ့ကြောင်း ထည့်သွင်းဖော်ပြထားသည်။

သို့ရာတွင် ကော်မရှင်၏ လုပ်ငန်းတာဝန်နှင့် သဘောသဘာဝအရ တစ်ဦးတစ်ယောက်၊ ဌာနအဖွဲ့အစည်းတစ်ခု၏ အကျိုးစီးပွားနှင့် အများပြည်သူအကျိုးစီးပွား ယှဉ်လာသည့်အခါတွင် အများပြည်သူအကျိုးစီးပွားအတွက်ကိုသာ ဦးစားပေး ကာကွယ်စောင့်ရှောက်ရခြင်းဖြစ်ကြောင်း ထုတ်ပြန်ချက်တွင် ဖော်ပြသည်။

ဒေါက်တာအောင်ဇော်ကို အရေးယူသည့်ကိစ္စတွင်လည်း ဥပဒေနှင့်အညီ အရေးယူရန် ခိုင်လုံသော အထောက်အထားများ ပေါ်ပေါက်နေသည့်အပြင် အများပြည်သူလူထုအတွက် ရေရှည်တွင် ထိခိုက်နစ်နာဆုံးရှုံးနိုင်ခြေရှိသဖြင့် အချိန်မီ တားဆီးကာကွယ်နိုင်ရန် လုပ်ဆောင်ရခြင်းဖြစ်ကြောင်း ကော်မရှင်က ထုတ်ပြန်သည်။

ဒေါက်တာအောင်ဇော်ကို ရုံးထုတ်သည့်နေ့တွင် အင်းစိန်ဆေးဝါးစက်ရုံစီမံ ခန့်ခွဲရေးဌာန အလုပ်ရုံမှူး ဦးထွန်းထွန်းနိုင်ကမူ “ကျွန်တော်တို့ စက်ရုံမှူးကို ဝန်ထမ်းတွေအားလုံးကလည်း ယုံကြည်တယ်။ စက်ရုံမှူးက ဘာမှ မဟုတ်တာ မလုပ်ဘူး၊ မကောင်းတာ မလုပ်ဘူး။ စက်ရုံအတွက် ကောင်းကျိုးဖြစ်တဲ့ဟာတွေပဲလုပ်တဲ့ စက်ရုံမှူးဖြစ်တယ်” ဟု ပြောဆိုသည်။

ဒေါက်တာအောင်ဇော်သည် အင်းစိန်ဆေးဝါးစက်ရုံ (BPI) သို့ ရောက်ရှိခဲ့သည်မှာ ၁၅နှစ်ခန့်ရှိပြီဖြစ်သည်။ စက်ရုံမှူးဖြစ်ချိန်တွင် မြွေဆိပ်ဖြေဆေး၊ ခွေးရူးပြန်ကာကွယ်ဆေးနှင့် ပိုးသတ်ဆေး ၁၄ မျိုးအပြင် အခြားဆေးဝါးများကိုလည်းထုတ်လုပ်နိုင်ခဲ့သည်။

ဒေါက်တာအောင်ဇော်သည် ပညာနှင့် အလုပ်အပေါ်တွင် ရူးသွပ်သူလည်းဖြစ်ကြောင်း ဒေါက်တာအောင်ဇော်နှင့် ရင်းနှီးသော သီပေါပြည်သူ့ဆေးရုံမှ ဆေးရုံအုပ်ကြီး ဒေါက်တာနန္ဒဝင်းက ပြောကြားသည်။ ဒေါက်တာနန္ဒဝင်းနှင့် ဒေါက်တာအောင်ဇော်၏ အစ်ကိုဖြစ်သူမှာ သူငယ်ချင်းများဖြစ်သဖြင့် ငယ်စဉ်ကတည်းကပင် ဒေါက်တာအောင်ဇော်၏ စိတ်နေသဘောထားကို သိရှိကြောင်း ၎င်းက ဆိုသည်။

“သူက ပညာအတွက်လည်း အရူးအမူးဖြစ်တဲ့သူ။ ကင်ဆာဝေဒနာရှင်တွေအတွက် လျှာပေါ်အစက်ချရုံနဲ့ နာကျင်မှုသက်သာတဲ့ဆေးဆိုလည်း သူစက်ရုံမှူးဖြစ်မှ ထွက်လာတာ” ဟု ၎င်းက ပြောဆိုသည်။

ဒေါက်တာအောင်ဇော် အရေးယူခံရသည့်ကိစ္စမှာ သွေးကြောသွင်းဆေးရည်ထည့်သွင်းရန် ဆေးဘူးထုတ်လုပ်ရာတွင် အသုံးပြုသည့် ကော်စေ့ ၂၆ တန် ဝယ်ယူသည့်ကိစ္စကြောင့် ဖြစ်သည်။ ကော်စေ့ဝယ်ယူရေးလုပ်ငန်းစဉ်တွင် လုပ်ထုံး လုပ်နည်းချိုးဖောက်ပြီး စံချိန်စံညွှန်းမညီသည့်၊ အမျိုးအစားမတူသည့် ကော်စေ့များကို လက်ခံရယူခဲ့ခြင်းကြောင့် နိုင်ငံတော်အတွက် ထိခိုက်နစ်နာဆုံးရှုံးမှုများရှိခဲ့သည်ဟုဆိုကာ ကော်မရှင်က အရေးယူရန် တိုင်တန်းခြင်းဖြစ်သည်။

ကော်စေ့များ အသုံးပြုရာတွင် တင်ဒါလုပ်ငန်းမပြီးသေးသည့်အပြင် စက်ရုံက အသုံးပြုလိုသည့် ကိုရီးယားအမှတ်တံဆိပ်မရသေးချိန်တွင် မလေးရှားအမှတ်တံဆိပ်အသုံးပြုမည်ဆိုသည်ကို အထက်သို့ စက်ရုံမှူးကမတင်ပြခဲ့ဟု ဒေါက်တာအောင်ဇော်နှင့် ရင်းနှီးသူတစ်ဦးက ပြောဆိုသည်။

တင်ဒါအောင်မြင်သော ကုမ္ပဏီကို နေပြည်တော်ရှိ စက်မှုဝန်ကြီးဌာန၊ မြန်မာ့ဆေးဝါးလုပ်ငန်းရုံးချုပ်က ရွေးချယ်၍ တရားဝင်ကြေညာကာ ဝယ်ယူခြင်းဖြစ်ပြီး စက်ရုံအနေနှင့် ပစ္စည်းလက်ခံအသုံးပြုခွင့်သာရှိကာ ဝယ်ယူခြင်းအတွက် အခွင့် အာဏာမရှိကြောင်း ၎င်းက ဆက်လက်ပြောဆိုသည်။

တင်ဒါအောင်မြင်သောကုမ္ပဏီမှာ ကိုရီးယားအမှတ်တံဆိပ်ဖြင့် ကော်စေ့ကို တင်ဒါအောင်မြင်ခဲ့သော်လည်း လက်တွေ့ဆေးဝါးထုတ်လုပ်မည့်အချိန်တွင် ကိုရီးယားအမှတ်တံဆိပ်ကော်စေ့မှာ ချက်ချင်းမရနိုင်သေးကြောင်း အဆိုပါကုမ္ပဏီကပြောဆိုခဲ့ဟု အဆိုပါစက်ရုံမှ အမည်မဖော်လိုသည့် သတင်းရင်းမြစ်တစ်ဦးက ပြောဆိုသည်။

ထို့ကြောင့်ပင် ဆေးဝါးပြတ်လပ်မှု မဖြစ်ပေါ်စေရန် အခြားကော်စေ့ကို စမ်းသပ်အသုံးပြုရန်အတွက် အကြောင်းဖန်လာခဲ့ကြောင်း ၎င်းက ဆိုသည်။

သို့သော် အသုံးပြုမည့် ကော်စေ့ကို BPI ဆေးဝါးစက်ရုံ၏ ကိုယ်ပိုင်ဓာတ်ခွဲခန်းတွင်စစ်ဆေးခဲ့ပြီး စက်ရုံမှထုတ်လုပ်မည့်ဆေးဝါးကုန်ကြမ်းများကို ကိုယ်ပိုင်ဓာတ်ခွဲခန်းတွင် စစ်ဆေးအတည်ပြု၍ Food Grade (စံမီ ဆေးဝါး) ဖြစ်မှသာ အသုံးပြုခြင်းဖြစ်ကြောင်း ၎င်းက ဆက်လက်ပြောဆိုသည်။

ယခု ပြဿနာဖြစ်ပွားချိန်တွင် ထိုကော်စေ့ကို FDA က ထပ်မံစစ်ဆေးခဲ့ရာ ပထမအကြိမ်တွင် BPI ဓာတ်ခွဲခန်းရလဒ်အတိုင်း အရည်အသွေးပြည့်မီကြောင်း ထွက်ပေါ်ခဲ့ပြီး ဒုတိယအကြိမ် စစ်ဆေးချိန်တွင် ခဲဆိပ်ပါဝင်နေသည်ဟု ရလဒ်ထွက်ပေါ်ခဲ့ကြောင်း BPI ဆေးဝါးစက်ရုံမှ အမည်မဖော်လိုသူ ဝန်ထမ်းတစ်ဦးက ပြောကြားသည်။

“ဆရာက ဆရာဝန်တစ်ယောက်လည်းဖြစ်တယ်၊ သုတေသနပြုနေတဲ့ ပညာရှင်တစ်ယောက်လည်းဖြစ်တယ်။ လက်လွတ်စပယ်နဲ့ ငါတို့ထုတ်ကုန်ရရင်ပြီးရောဆိုပြီး လူတွေကျန်းမာရေးထိခိုက်မယ်ဆိုတဲ့အရာကိုလုံးဝ မလုပ်ဘူး။ နောက် တစ်ခုကတော့ BPI မှာ စစ်ပြီးသားပါ။ စစ်ပြီးလို့ အောင်လို့သုံးတာပါ” ဟု ၎င်းက ဆိုသည်။

တင်ဒါ အောင်မြင်ထားသည့်ကုမ္ပဏီမှ ဝယ်ယူရမည့် ကိုရီးယားအမှတ်တံဆိပ်ကော်စေ့ပမာဏသည် တန်သုံးရာကျော်ဖြစ်သည်။ သို့သော် လက်ရှိအချိန်တွင် အဆိုပါကော်စေ့များ မရရှိနိုင်သေးသဖြင့် ဆေးဝါးပြတ်လပ်မှု မဖြစ်ပေါ်စေရန်အတွက် နှစ်လခန့် အသုံးပြုနိုင်ရန် မလေးရှားကော်စေ့ ၂၆ တန်ကို စမ်းသပ်အသုံးပြုခဲ့ခြင်းကြောင့် စက်ရုံမှ အမည်မဖော်လိုသည့် သတင်းရင်းမြစ်တစ်ဦးက ပြောဆိုသည်။

စံချိန်စံညွှန်းနှင့် မညီဟုဆိုသည့် ကော်စေ့များကို အသုံးပြုလိုက်ခြင်းက ဒေါက်တာအောင်ဇော်ကို အဂတိလိုက်စားမှုတိုက်ဖျက်ရေးဥပဒေဖြင့် အရေးယူလိုက်သည့်အခြေအနေထိ ဖြစ်သွားခဲ့သည်။ ယခုဖြစ်ရပ်မှာ ဆေးဝါးပြတ်လပ်မှုဖြစ်ပေါ် မည့်အရေးအတွက် ဒေါက်တာအောင်ဇော်၏ လုပ်မှားကိုင်မှားဖြစ်ခဲ့ခြင်းဖြစ်နိုင်ကြောင်းလည်း ဒေါက်တာနန္ဒဝင်းက ပြောဆိုသည်။

BPI ဆေးဝါးများကိုကျန်းမာရေးနှင့် အားကစားဝန်ကြီးဌာနလက်အောက်ရှိ ဆေးရုံ၊ ဆေးခန်းများတွင် အများဆုံးအသုံးပြုလျက်ရှိနေပြီး ပြည်တွင်းဆေးဝါး လိုအပ်ချက်အတွက် ၃၀ ရာခိုင်နှုန်းခန့် ထုတ်လုပ်ပေးနိုင်သည်။ BPI ဆေးဝါးစက်ရုံကို ၁၉၅၄ တွင် စတင်တည်ထောင်ခဲ့ပြီး ၁၉၅၇ တွင် ဆေးဝါးများ စတင်ထုတ်လုပ်ခဲ့ကာ BPI ဆေးဝါးများကို တစ်နိုင်ငံလုံးတွင် ဆိုင်ခွဲပေါင်း ၂၈ ဆိုင်နှင့် ပုဂ္ဂလိကဆေးဝါးအရောင်းဆိုင်များတွင် ရောင်းချပေးလျက်ရှိသည်။

ဒေါက်တာအောင်ဇော်သည် ဌာနဆိုင်ရာအရာထမ်းဖြစ်၍ အဂတိလိုက်စားမှုတိုက်ဖျက်ရေးကော်မရှင်က တိုက်ရိုက်မကိုင်တွယ်ခင် ဌာနဆိုင်ရာ စုံစမ်းစစ်ဆေးမှုများလုပ်ရန်လိုအပ်ကြောင်း ဥပဒေအကြံပေး ဦးခင်မောင်မြင့်က မှတ်ချက်ပေး သည်။

“သူက ညွှန်ကြားရေးမှူးဖြစ်တဲ့အတွက် သူ့အထက်ကသူတွေပါဝင်တဲ့ ဌာနဆိုင်ရာ စုံစမ်းစစ်ဆေးမှုတွေ အရင်လုပ်ရမယ်။ စုံစမ်းစစ်ဆေးချက်တွေအရ အဂတိလိုက်စားမှုတိုက်ဖျက်ရေးဥပဒေအရ အရေးယူဖို့လိုတယ်ဆိုရင် အဂတိလိုက် စားမှုတိုက်ဖျက်ရေးကော်မရှင်ကို တင်ပြပြီး ကော်မရှင်က အရေးယူဆောင်ရွက်ဖို့လိုတယ်လို့မြင်ပါတယ်” ဟု ၎င်းကဆိုသည်။

လူနာတင်ယာဉ်များအတွက် လိုအပ်သည်များကို ဝယ်ယူခြင်း၊ BPI စက်ရုံအတွက် ဆေးဝါးကုန်းကြမ်းဝယ်ယူခြင်းများတွင် တင်ဒါခေါ်ယူခြင်းမရှိဘဲ ဝယ်ယူလိုက်သည်ဟုဆိုကာ ဝေဖန်သံများထွက်ပေါ်ပြီးနောက် နုတ်ထွက်သွားသည့် စက်မှု ဝန်ကြီးဌာန ပြည်ထောင်စုဝန်ကြီး ဦးခင်မောင်ချိုကိုမှု ကော်မရှင်က စစ်ဆေးခဲ့ခြင်းမရှိပေ။

အဆိုပါသတင်းသည် ပြည်သူများအကြားတွင် ရေပန်းစားစိတ်ဝင်စားခဲ့သည့်သတင်းဖြစ်သော်လည်း နိုင်ငံတော်သမ္မတထံ တိုင်ကြားစာရောက်လာသည်ဟုဆိုကာ သမ္မတက စုံစမ်းစစ်ဆေးရေးအဖွဲ့ဖွဲ့ပြီး စစ်ဆေးခဲ့သည်။

ယင်းစစ်ဆေးပေါ်ပေါက်ချက်အရ ရုံးပိုင်းဆိုင်ရာလုပ်ထုံးလုပ်နည်းလွဲမှားခဲ့၍ တာဝန်ယူမှု တာဝန်ခံမှုအပြည့်ဖြင့် နုတ်ထွက်စာတင်ကာ သမ္မတက ဇူလိုင်လ ၂၆ ရက်နေ့တွင် ဦးခင်မောင်ချိုကို ရာထူးမှအနားပေးလိုက်ပြီဖြစ်ကြောင်း နိုင်ငံ တော်သမ္မတရုံး၏ ပြောရေးဆိုခွင့်ရှိသူ ဦးဇော်ဌေးက ပြောဆိုသည်။

“တိုင်ကြားစာပေါ်အခြေခံပြီးတော့ အသေးစိတ် စုံစမ်းစစ်ဆေးမေးမြန်းမှုတွေပြုလုပ်ပါတယ်။ ဒီအဖွဲ့ရဲ့ စစ်ဆေးတွေ့ရှိချက်က ရုံးပိုင်းဆိုင်ရာ လုပ်ထုံးလုပ်နည်းလွဲမှားခြင်းလို့ စစ်ဆေးပေါ်ပေါက်ပါတယ်”

ယင်းကဲ့သို့ ပြည်သူများကြား အဂတိလိုက်စားသည်ဟုဆိုကာ ဝေဖန်သံ မြင့်တက်နေသည့် ဦးခင်မောင်ချိုကိစ္စမျိုးတွင် အဂတိလိုက်စားမှုတိုက်ဖျက်ရေးကော်မရှင်က စုံစမ်းစစ်ဆေးမှု မလုပ်ခြင်းသည် ဝေဖန်ထောက်ပြစရာဖြစ်နေကြောင်း ဥပဒေအကြံပေး ဦးခင်မောင်မြင့်ကပြောဆိုသည်။

“အစိုးရဘက်က အရေးယူလို့ အရေးမယူတော့ဘူးဆိုတာတွေက အဂတိလိုက်စားမှုတိုက်ဖျက်ရေးကော်မရှင်ရဲ့ လုပ်ငန်းစဉ်မှာ အဂတိလိုက်စားမှု တိုက်ဖျက်ရေးဥပဒေက လူပုဂ္ဂိုလ်ပေါ်မှာ မူတည်ပြီးတော့ ဥပဒေက လိုက်ပြောင်းသလို ဖြစ်နေလား။ ဒါကအဓိပ္ပာယ်မရှိဘူးလို့ ကျွန်တော်တို့မြင်ပါတယ်” ဟု ၎င်းက ပြောဆိုသည်။

ဒေါက်တာအောင်ဇော်ကို အရေးယူထားမှုနှင့် ပတ်သက်ပြီး ဝေဖန်သံများ ထွက်ပေါ်နေသော်လည်း တရားရုံးက စစ်ဆေးဆုံးဖြတ်စီရင်မည်ဖြစ်ကြောင်း ကော်မရှင်မှ တာဝန်ရှိသူတစ်ဦးက ပြောဆိုသည်။

“ကျွန်တော်တို့ဘက်က တချို့အကြောင်းအရာတွေကို အသေးစိတ်မဖော်ပြတာတွေရှိပါသေးတယ်။ တရားရုံးရောက်ရင် သိပါလိမ့်မယ်” ဟု ၎င်းက ပြောဆိုသည်။

ဒေါက်တာအောင်ဇော်ကို လာမည့်စက်တင်ဘာလ ၁၉ ရက်နေ့တွင် ထပ်မံရုံးထုတ်မည်ဖြစ်ပြီး အဂတိလိုက်စားမှုတိုက်ဖျက်ရေးဥပဒေ ပုဒ်မ ၅၆ ဖြင့် အရေးယူထားသည်။ လာဘ်ပေးလာဘ်ယူခဲ့ခြင်းမရှိသည့် ဒေါက်တာအောင်ဇော်သည် စက်တင်ဘာလ ၉ ရက်ရုံးထုတ်ချိန်အတွက် မျက်မှန် သို့မဟုတ် ဦးထုပ် တစ်ခုခုယူမည်လားဟု မိသားစုက မေးမြန်းခဲ့သော်လည်း ၎င်းက ငြင်းဆိုခဲ့သည်။

“ကျွန်တော်လိပ်ပြာသန့်တာပဲ။ မျက်နှာကိုဖွက်စရာ မလိုဘူးလို့ပြောတယ်” ဟု ဒေါက်တာအောင်ဇော်ကို ရုံးမထုတ်ခင်တစ်ရက်က ပြောကြားထားသည်ကို BPI ဆေးဝါးစက်ရုံ၏ အမည်မဖော်လိုသူဝန်ထမ်းက ပြန်လည်ပြောဆို
သည်။ 

 

အောင်ဖြိုးဦး၊ မေသက်ဇင်

You may also like...

Leave a Reply

Your email address will not be published. Required fields are marked *