ရုရှားအတိုက်အခံခေါင်းဆောင်၏ ရုံးခန်းများ ရဲတပ်ဖွဲ့ဝင်ရောက်စီးနင်း

ရုရှားအတိုက်အခံခေါင်းဆောင် နာဗာညီ

မော်စကို၊ စက်တင်ဘာ ၁၂

ရုရှားအတိုက်အခံခေါင်းဆောင် အလက်ဆီ နာဗာညီ၏ ရုံးခန်းများနှင့် ၎င်းကိုထောက်ခံသူများ၏ နေအိမ်ကို ရုရှားထောက်လှမ်းရေးက ဝင်ရောက်စီးနင်းခဲ့ကြောင်း AFP သတင်းတွင် ဖော်ပြထားသည်။

ယခုကဲ့သို့ ရုံးခန်းနှင့်နေအိမ်များကို ဝင်ရောက်ရှာဖွေမှုမှာ မကြာသေးခင်က ကျင်းပခဲ့သည့် မော်စကိုမြို့တော် လွှတ်တော်ရွေးကောက်ပွဲတွင် လက်ရှိသမ္မတပူတင် မဲအရေအတွက် ဆုံးရှုံးခဲ့မှုကြောင့် ကယောင်ချောက်ချားဖြစ်ခြင်း၏ ရလဒ် ဖြစ်ကြောင်း အတိုက်အခံခေါင်းဆောင် နာဗာညီက ပြောကြားသည်။

အတိုက်အခံခေါင်းဆောင် နာဗာညီ၏ ‘မဟာဗျူဟာမြောက် မဲပေးရေး’ ဆော်ဩမှုကြောင့် မကြာသေးခင်က ကျင်းပခဲ့သည့် မော်စကိုမြို့တော် လွှတ်တော်ရွေးကောက်ပွဲတွင် သမ္မတပူတင်နှင့် မဟာမိတ်ပါတီတို့မှာ လွှတ်တော်ကိုယ်စားလှယ်အရေအတွက် သုံးပုံတစ်ပုံခန့် ဆုံးရှုံးသွားခဲ့သည်။

ရုရှားအစိုးရက အိမ်လိပ်စာ ၂၀၀ ကျော်ကို ဝင်ရှောက်ရှာဖွေခဲ့ခြင်းဖြစ်ပြီး ခေတ်သစ်ရုရှားသမိုင်းတွင် အကြီးဆုံးရဲတပ်ဖွဲ့၏ စီးနင်းမှုဖြစ်ကြောင်း အတိုက်အခံခေါင်းဆောင် နာဗာညီက ပြောကြားသည်။

ရုရှားရဲတပ်ဖွဲ့သည် ၎င်း၏ ရွေးကောက်ပွဲမဲဆွယ်ရုံးနှင့် ချိတ်ဆက်ထားသော ကွန်ရက်များ၊ မဲဆွယ်ရေး ပူးပေါင်းလုပ်ဆောင်ခဲ့သူများ၊ ၎င်းတို့၏ ဆွေမျိုးများ၏ နေအိမ်များ၊ Anti-Corruption Foundation အဖွဲ့တို့ကို ပစ်မှတ်ထားခြင်းဖြစ်ကြောင်း ၎င်းက ဆိုသည်။

Anti-Corruption Foundation အဖွဲ့အစည်းမှာ ရုရှားအစိုးရတာဝန်ရှိသူများ၏ မေးခွန်းထုတ်စရာကောင်းသော ငွေကြေးဥစ္စာများကို ဖော်ထုတ်နေသည့် အဖွဲ့အစည်းလည်းဖြစ်ကြောင်း အဆိုပါသတင်းတွင် ဖော်ပြထားသည်။ 

You may also like...

Leave a Reply

Your email address will not be published. Required fields are marked *