ဘဏ် , အိမ်၊ ခြံ၊မြေ စီးပွား

ဘဏ်တွေ အသံကြားရပြန်သည်။ စိတ်ပူသူတို့ ဥစ္စာဓနကို ငွေသို့  ရွှေသို့ ဟိုရွှေ့ဒီရွှေ့ ရွှေ့ကြသည်။ ဘဏ်တို့ထံမှ ငွေချေးထားသူများ ပြန်မဆပ်နိုင်သူတို့ကို အတင်းပြန်တောင်းနေသည်ဆိုပြီး တိုးတိုး ကျယ်ကျယ် ပြောကြရာမှ ထိုသို့ဘဏ်သံများ ထွက်လာကြသည်။ အရင်းစစ်လျှင် အမြစ်မြေ ( အိမ်၊ ခြံ၊မြေ) က။

Land မြေ ၊ Labor လုပ်အားနှင့် Capital အရင်းအနှီးဟူသော စီးပွားရေးကျမ်းဂန်များလာ ကုန်လုပ်စွမ်းအားစု သုံးရပ်အနက် အိမ်၊ ခြံ၊မြေသည် တစ်ခုအပါအဝင်။  ကုန်၊ ဝန်ဆောင်မှု ထုတ်ချင်လျှင် ကုန်လုပ်စွမ်းအား သုံးရပ်လိုသည်။ ကွမ်းယာဆိုင်ဖွင့်လျှင်ပင် မြေ သို့မဟုတ် ဘတ်စ်ကားမှတ်တိုင် လိုမည်၊ ဆိုင်ဖွင့်ရန် ငွေအရင်းအနှီးလိုသည်၊ ကွမ်းယာ မည့် ရောင်းမည့်သူ၊ လုပ်အားလိုသည်။ အိမ်၊ ခြံ၊မြေသည် အရင်းအနှီးနှင့်  လုပ်အားသို့လည်း အသွင်ပြောင်းနိုင်သည်။ အိမ်၊ ခြံ၊မြေသည် ဥစ္စာဓန စုဆောင်းရာလည်း ဖြစ်သဖြင့် ရောင်းလျှင် ငွေအရင်းအနှီးထွက်လာမည်၊  ထိုငွေအရင်းအနှီးဖြင့် လုပ်အား Labor (လုပ်သား) ခေါ်နိုင်သည်။ တစ်ဖက်တွင် အိမ်၊ ခြံ၊မြေသည် ငွေပေါ်ရန်ခက်သည်။  နဂိုတည်းက ငွေဖြစ်ခက်သည့်အတွက် အိမ်၊ ခြံ၊မြေဈေးကွက်ပျက်လျင် အိမ်၊ ခြံ၊မြေအတွင်း ရောက်နေသည့် ဥစ္စာဓနများသည် ကုန်လုပ်စွမ်းအားစုများသို့ ပြောင်းရန်ခက်ခဲမည်။

အိမ်၊ ခြံ၊မြေနှင့် တစ်နိုင်ငံလုံး၏ စီးပွားရေးသည် ချိတ်နေသည်။ အိမ်၊ ခြံ၊ မြေကဏ္ဍ၏ ကျန်းမာရေးသည် နိုင်ငံ့စီးပွားရေးကောင်း မကောင်းအပေါ် တည်သည်။

အိမ်၊ ခြံ၊ မြေနှင့် ဆောက်လုပ်ရေးနယ်ပယ်သည် တိုက်ရိုက်ချိတ်နေသည်။ ဆောက်လုပ်ရေးသည် နိုင်ငံတစ်နိုင်ငံတွင် စီးပွားရေးတုံ့နှေးနေသဖြင့် လှုပ်နှိုးလိုလျှင် စတင်လေ့ရှိသော လုပ်ငန်းနယ်ပယ်ဖြစ်သည်။  ဆောက်လုပ်ရေးကဏ္ဍသည် အလုပ်ကြမ်းသမားမှစပြီး အင်ဂျင်နီယာ၊  ပစ္စည်းသွင်းသူစသည့် နယ်ပယ်အတော်များများသို့ ဥစ္စာဓန လျှံကျ စီးဆင်းသွားနိုင်စွမ်းများသဖြင့် အစိုးရများသည် စီးပွားရေးလှုပ်နှိုးလိုလျှင် ဆောက်လုပ်ရေးကဏ္ဍမှ စတင်လှုပ်နိုးကြသည်။

မြန်မာ့အိမ်၊ ခြံ၊ မြေ၏ လက်ရှိအခြေအနေသည် အေးသည်။  မြန်မာအများအပြား အိမ်ပိ၊ မြေပိနေသည်။ အိမ်၊ ခြံ၊ မြေဈေးနှုန်းသည်  အမြင့်ဆုံးရောက်သောအချိန်နှင့် ယှဉ်ကြည့်လျှင် ရာခိုင်နှုန်းအတော်များများကျနေသည်။ ဈေးအတော်ကျသည်ဆိုသဖြင့် အလွန်အမင်း စိုးရိမ်စရာလည်းမရှိပါ။ အဘယ်ကြောင့်ဆိုသော် မဖြစ်သင့်သော ဈေးများ မဖြစ်သင့်သော နေရာများတွင် ဖြစ်ခဲ့ကြသည့်အတွက် ပြန်ကျသည်မှာ မဆန်း။ မြန်မာနိုင်ငံ ပြုပြင်ပြောင်းလဲစတွင် တက်လာသော စီးပွားရေး၊  နိုင်ငံတကာ၏ စိတ်ဝင်စားမှုကိုကြည့်ပြီး နောက်တစ်ဆင့် နိုင်ငံဖွင့်လျှင် ဝင်ရောက်လာမည့် နိုင်ငံတကာရင်းနှီးမြှုပ်နှံမှုတို့ကို အလွန်အမင်း မျှော်လင့်မိရာမှ မြေဈေးတက်လာသည်။  မြေသည် အကန့်အသတ်သာရှိသည်ဆိုပြီး မြေနေရာဦးကြ၊ ဈေးကစားကြရင်း မြေဈေးသည် ဖြစ်သင့်သည်ထက် များစွာတက်လာသည်။ ခါတော်မီဆွဲတင်ကြရင်း အဆပေါင်းများစွာ ချမ်းသာသွားသူများ ရှိသလို မြေပိသဖြင့် မချိမဆန့်ခံနေရသူများလည်း မနည်း။ မြေဈေးပြန်အဆင်းတွင် ရန်ကုန်တွင် ကွန်ဒိုများအပါအဝင် ဆောက်လုပ်ရေးလုပ်ငန်းခွင်များ အများအပြားပေါ်လာသည်။ အစိုးရ သစ်တက်သည်။ အခြေအနေစောင့်ကြည့်သူက စောင့်ကြည့်သည်။  ရန်ကုန်တွင် ဆောက်လုပ်ရေးလုပ်ငန်းများကို စည်းကမ်းတင်းကျပ်ရာမှ ဆောက်လုပ်ရေးလုပ်ငန်းအချို့ တန့်ကုန်သည်။ အထက်ဖော်ပြပါ ဖြစ်ရပ်အားလုံး စုဆုံကာ ယနေ့အခြေအနေသို့ ဆိုက်လာခြင်းဖြစ်သည်။ မြန်မာ့စီးပွားရေးသည် အချိန်တိုအတွင်း အဆမတန် ကြီးထွားလာမည်၊  နိုင်ငံခြားရင်းနှီးမြှုပ်နှံမှုများ အလုံးအရင်းနှင့် ဝင်ရောက်လာမည်ဟူသော  မျှော်လင့်ချက်ကြီးကြီးဖြင့် အိမ်၊ ခြံ၊မြေတွင်ရင်းနှီးခဲ့ခြင်း၊ ဈေးကစားသည့် နောက်သို့ တပြုံကြီးပါသွားခဲ့ကြခြင်းတို့၏ နိဂုံးကမ္ဗတ်အဆုံးသတ်။  အချက်အလက်ကိုသုံးပြီး တွက်ချက်ခြင်း အားနည်းသည့်အတွက် ဝယ်လိုအား၊ ရောင်းလိုအားကို မမှန်းနိုင်ဘဲ ဆောက်လုပ်ခဲ့ကြသည်လား၊  ဝယ်လိုအားရောင်းလိုအား ပြောင်းသွားခြင်းလား။

ဘဏ်နှင့် အိမ်၊ ခြံ၊မြေ ကဏ္ဍ အဆက်အစပ်။ မြန်မာ့ အိမ်၊ ခြံ၊ မြေ ကဏ္ဍနှင့် မြန်မာ့ဘဏ်များ၏ အဆက်အစပ်ကို ဖွံ့ဖြိုးပြီးနိုင်ငံများထံမှ  တိုက်ရိုက်ပုံတူကူးခန့်မှန်း မရနိုင်ပါ။ မြန်မာနိုင်ငံတွင် ဘဏ်များနှင့် ချိတ်ဆက်ပြီး အရစ်ကျပေးချေသည့်စနစ်သည် အစမျှသာ ရှိသေးပြီး  လက်ရှိအိမ်ပိုင်ရှင်၊ မြေပိုင်ရှင်အများစုသည် တစ်ကြိမ်တည်း ငွေအစုလိုက်အပြုံလိုက်ပေးချေပြီး ဝယ်ယူခဲ့ကြရသည်။ အမေရိကန်ပြည်ထောင်စုတွင်  ၂၀၀၈ ဘဏ္ဍာရေးအကျပ်အတည်းသည် အိမ်၊ ခြံ၊မြေ ကဏ္ဍအကျပ်အတည်းက စခြင်းမှာ အမေရိကန်တွင် ငွေချေးပြီး အိမ်ဝယ်၊ အရစ်ကျ ပြန်ပေးဆပ်သည့်စနစ် အသားကျနေခြင်းကြောင့်လည်း ဖြစ်သည်။

မြန်မာနိုင်ငံတွင် သာမန် အိမ်၊ ခြံ၊ မြေပိုင်ရှင်များသည် ဘဏ်များနှင့်  ချိတ်ဆက်မှုနည်းသော်လည်း စီးပွားရေးလုပ်ငန်းရှင်များမှာမူ ပတ်သက်ကြရသည်။ ဘဏ်များမှ ငွေချေးပြီး စီးပွားရေးလုပ်ရာတွင် အပေါင်ပစ္စည်းကို အိမ်၊ ခြံ၊ မြေဖြင့်သာ ထားကြရသည်။ ပြန်ဆပ်နိုင်မည့်အနေအထားကို စီးပွားရေးလုပ်ငန်း၏ ငွေလည်ပတ်မှု၊ စီးပွားရေးလုပ်ငန်း၏ အခြေအနေတို့နှင့် တိုက်ဆိုင်စိစစ်ခြင်း နည်းပါးခဲ့သည်။ အိမ်၊ ခြံ၊ မြေတန်ဖိုးကို  ဖြတ်ရာတွင်လည်း အားနည်းခြင်းများ အကြောင်းကြောင်းကြောင့် ရှိနိုင်သည်။ အိမ်၊ ခြံ၊ မြေဈေးကွက်တွင် ဈေးကျလျှင် အပေါင်ပစ္စည်းတန်ဖိုးသည် ဈေးကျမည်။ အကယ်၍ အပေါင်ထားပြီး ငွေချေးယူထားသူ၏ စီးပွားရေး လုပ်ငန်း ငွေဝင်နည်းလာသည်နှင့် တိုက်ဆိုင်လျှင် ငွေချေးယူထားသူသည်  သူအပေါင်ထားသည့်ပစ္စည်း၏ လက်ရှိကာလတန်ဖိုးကို ပြန်ကြည့်မည်။ ပေးရမည့် အတိုးနှင့် အပေါင်ခံ အိမ်၊ ခြံ၊ မြေ၏ ကာလပေါက်ဈေး၊ ချရောင်းလျှင် ပြန်ထွက်မည့်ကာလတို့ကို တွက်ကြည့်ပြီး အဆုံးခံကောင်းခံမည်။  ထိုနည်းဖြင့် ဘဏ်တွင် အပေါင်ဆုံးပစ္စည်းများ စုပုံလာလျှင် ဘဏ်လည်း မျက်ခုံးလှုပ်မည်။ ဗဟိုဘဏ်ကလည်း ဘဏ်များ ခိုင်မာတောင့်တင်းအောင်၊ ဘဏ်စနစ်သန်မာအောင် စည်းမျဉ်းစည်းကမ်းများ ကြပ်မတ်လာသည်မှာ ၂ နှစ်လောက်ရှိပြီ။ ထို့ကြောင့် ဘဏ်များသည် အခြေအနေမကောင်းသည့် ချေးငွေများကို ရှင်းလင်းရန် ဖိအားများလာသည်။ စီးပွားရေး လုပ်ငန်းရှင်ကြီးငယ်တို့ အသံထွက်လာခြင်းသည် ယင်းကြောင့်ဖြစ်သည်။

စင်စစ် ဗဟိုဘဏ်က တင်းလိုက်ပြီးမှ ပြန်သံပတ်လျှော့ပေးလိုက်သည်များပင် ရှိသည်။

လက်ရှိ အိမ်၊ ခြံ၊မြေဈေးကျသည်ကို ဘဏ်များ၊ အထူးသဖြင့် ဘဏ်ခွဲများသည့် ဘဏ်ကြီးများက ကြိုက်လှမည် မဟုတ်။ အပေါင်ခံ အိမ်၊ ခြံ၊ မြေများ တန်ဖိုးကျသွားခြင်းကြောင့်သာမကပါ။ သူတို့ပိုင် ဘဏ်များ၏ တန်ဖိုးသည်လည်း ကျသွားမည်ဖြစ်သောကြောင့်။ ဘဏ်ခွဲ အကြီးအသေး၊ ရန်ကုန်၊ နယ်ကွဲသည် တစ်ပိုင်းထားပြီး ပျမ်းမျှဘဏ်ခွဲ တစ်ခွဲ ယခင်က ဒေါ်လာတစ်သန်းတန်သည်၊ ဘဏ်ခွဲ တစ်ရာရှိသည် ဆိုလျှင် အိမ်၊ ခြံ၊မြေတန်ဖိုးချည်း သန်းတစ်ရာတန်မည်။ အိမ်၊ ခြံ၊မြေ ဈေး ၅၀ရာခိုင်နှုန်းကျသွားလျှင် ထိုဘဏ်၏ အိမ်၊ ခြံ၊မြေတန်ဖိုးသည် ထက်ဝက်လျော့ပြီး သန်း၅၀သာ တန်တော့မည်။

မြန်မာ့ အိမ်၊ ခြံ၊ မြေကဏ္ဍတွင် တိုးတက်ခေတ်မီလာသည်များလည်း ရှိသည်။ အိမ်၊ ခြံ၊မြေကို အရစ်ကျစနစ်ဖြင့် ဝယ်ယူပေးချေသည့်စနစ် စထားပြီ။ အိမ်၊ ခြံ၊ မြေကို ဝယ်ယူရာတွင် ငွေလက်ငင်းပေးဝယ်နိုင်သူ  တစ်ယောက်ရှိလျှင် အရစ်ကျဖြင့် ဆယ်နှစ်၊ ဆယ့်ငါးနှစ်ပေးဖြင့် ဝယ်ရမည်ဆိုလျှင် ဝယ်နိုင်သူ ဆယ်ဦး၊ ဆယ့်ငါးဦး ရှိလာနိုင်သည်။ ကုမ္ပဏီဥပဒေ သစ်အရ ကုမ္ပဏီတစ်ခုတွင် နိုင်ငံခြားသားပိုင်ဆိုင်မှု ၃၅ ရာခိုင်နှုန်း ရှိသည်အထိ နိုင်ငံသားပိုင်လုပ်ငန်းသာဖြစ်ဦးမည့်အတွက် နိုင်ငံခြားသား ရင်းနှီးမြှုပ်နှံမှုအချို့ ထပ်ဝင်လာဖွယ် ရှိသည်။ ရင်းနှီးမြှုပ်နှံမှုဝင်လာလျှင်  စီးပွားရေးကောင်းလာမည်၊ လုပ်ငန်းချဲ့လျှင် မြေ၊ တိုက်ခန်း၊ ဂိုဒေါင်လိုမည် ဖြစ်သည့်အတွက် အိမ်၊ခြံ၊ မြေကဏ္ဍကို အပြုသဘောသက်ရောက်မည်။  လက်ရှိ နိုင်ငံခြားရင်းနှီးမြှုပ်နှံမှု အလားအလာကိုမူ တွက်ဆရမည်။ ရခိုင်ကိစ္စ အရိပ်ရှိသည်။ တရုတ်-အမေရိကန် ကုန်သွယ်ရေးစစ်ပွဲအရှိန်ကို ရှောင်ချင်သည့် ကုမ္ပဏီများ မြန်မာဘက်သို့ ဝင်လာခြေရှိသည်။  ထိုစစ်ပွဲရှောင် ကုမ္ပဏီများကို ခြေမြန်လက်မြန် ဆွဲခေါ်ထားနိုင်လျှင် နိုင်ငံခြားရင်းနှီးမြှုပ်နှံမှု အခြေအနေတိုးတက်လာမည်။

ငွေလည်ဖို့ အရေးကြီးသည်။ အိမ်၊ ခြံ၊ မြေ ဈေးကျသည်ထက် အဝယ်အရောင်းနှေးကွေးနေခြင်းက စိုးရိမ်စရာ ကောင်းသည်။ အဝယ် အရောင်းနှေးသောကြောင့် ငွေပိုသူလက်ထဲမှ ငွေလိုသူလက်ထဲ ငွေအရောက်  နှေးသည်၊ ငွေကြေးလည်ပတ်စီးဆင်းမှု အားနည်းသည်။ ယခင် မတန်တဆဖြစ်ဖူးသော ဈေးများကို စိတ်ကူးမယဉ်တော့ဘဲ လက်ရှိကာလပေါက်ဈေးဖြင့် အရောင်းအဝယ်ဖြစ်လျှင် ငွေဖော်ချင်သူတို့ ငွေပေါ်မည်၊  လုပ်ငန်းထဲ ငွေထည့်ချင်သူ ထည့်နိုင်မည်။ အိမ်၊ ခြံ၊မြေဈေးကွက် ပြန်လည်ပတ်လာမည်။ လုပ်ငန်းများထဲ ငွေထည့်နိုင်၊ လူအများလက်ထဲ ငွေပြန်ရောက်လျှင် နိုင်ငံ့စီးပွားရေးလည်း ပိုလည်ပတ်မည်။ နိုင်ငံ့စီးပွားရေး လည်ပတ်လျှင် မြေဈေးကို ဈေးကြီးမိပြီး ယခုပေါက်ဈေးဖြင့် ပြန်ရောင်းထားသူများထံသို့ တစ်နည်းနည်းဖြင့် ငွေပြန်ဝင်လာမည်။ သက်ဆိုင်သူ  အားလုံးကောင်းသွားနိုင်သည်။

မြန်မာတို့သည် အပိတ်စီးပွားရေးနှင့်သာ ရင်းနှီးခဲ့သဖြင့် ထိတွေ့ကိုင်တွယ်နိုင်သော မြေကဲ့သို့ ဥစ္စာဓနကို အယုံအကြည်များသည်။  ရန်ကုန်ကဲ့သို့ စီးပွားရေးမြို့တော်တွင် နေထိုင်သူနှင့် အိမ်ရာပိုင်ဆိုင်သူ  အချိုး မမျှတသေးသဖြင့် တကယ့်ဝယ်လိုအားနှင့် ကိုက်သည့် ရောင်းလိုအား ဖော်နိုင်လျှင် ဈေးကွက်သွက်မည်။

မြန်မာ့မြေ၊ ဘဏ်နှင့် မြန်မာ့စီးပွားတို့၏ သုံးပွင့်ဆိုင် သဘောတရားတွင် အခက်အခဲများရှိနေသလို အခွင့်အလမ်းကောင်းများလည်း ရှိနေသည်။ သုံးတတ်ရန်သာ။

ဇေယျသူ

You may also like...

Leave a Reply

Your email address will not be published. Required fields are marked *