ရန်ကုန်စည်ပင်သို့ အခွန်များကို Mobile Banking ဖြင့်ပေးဆောင်နိုင်

ရန်ကုန်၊ စက်တင်ဘာ ၁၂

ရန်ကုန်မြို့တော်စည်ပင်သာယာရေးကော်မတီ (YCDC) က ကောက်ခံလျှက်ရှိသည် အခွန်အားလုံးကို လာမည့် အောက်တိုဘာလ ၁ ရက်မှစ၍ ရန်ကုန်မြို့တော်ဘဏ်နှင့် ချိတ်ဆက်ထားသည့် ဘဏ်များ၏ Mobile Banking မှတစ်ဆင့် ပေးဆောင်နိုင်ကြောင်း ရန်ကုန်မြို့တော်ဝန် ဦးမောင်မောင်စိုးက ပြောကြားသည်။

ရန်ကုန်မြို့တော်ခန်းမတွင် စက်တင်ဘာလ ၁၂ ရက်နေ့က ကျင်းပသည့် YCDC အခွန်အခများကို ဘဏ်များ၏ Mobile Banking မှတစ်ဆင့် ပေးဆောင်နိုင်သည့် YCB Payment Gateway စနစ် မိတ်ဆက်ပွဲ အခမ်းအနားတွင် ၎င်းက ယင်းသို့ ပြောဆိုခြင်းဖြစ်သည်။

Image may contain: 18 people

YCDC က လက်ရှိကောက်ခံနေသည့် အခွန်အခများ ပိုမိုရရှိစေရန်နှင့် အဂတိကင်းရှင်းစေရန် ရည်ရွယ်၍ Mobile Banking မှ အခွန်ပေးနိုင်သည့် YCB Payment Gateway အသုံးပြုရန် စီစဉ်ရခြင်းဖြစ်ကြောင်း ရန်ကုန်မြို့တော်ဝန်က ရှင်းပြသည်။

YCDC က ကောက်ခံနေသည့် ရေခွန်၊ မြေခွန်၊ အမှိုက်ခွန် စသည်တို့ကို ရန်ကုန်မြို့တော်ဘဏ်၏ YCB Payment Gateway အသုံးပြု၍ AYA Bank, KBZ Pay, CB Bank (CB Pay) တို့မှတစ်ဆင့် ပေးဆောင်ရခြင်း ဖြစ်သည်။

ထိုသို့ အခွန်ပေးဆောင်ခြင်းအတွက် သက်ဆိုင်ရာဘဏ်သို့ ဝင်ဆောင်ခ ပေးဆောင်ရန် မလိုအပ်ကြောင်း ကမ္ဘောဇဘဏ် KBZ pay ၏ Head of Agent Banking ဦးစိုးကိုကိုက ပြောဆိုသည်။

ထို့အပြင် ရန်ကုန်မြို့တော်ဘဏ်၏ YCB Payment Gateway ကိုအသုံးပြုကာ အစိုးရဌာနဆိုင်ရာများ၊ ဘဏ်၊ ဈေးနှင့် စတိုးဆိုင် စသည်တို့တွင်ပါ ငွေပေးချေနိုင်ရန် ချိတ်ဆက်ဆောင်ရွက်သွားမည်ဖြစ်ကြောင်း ရန်ကုန်မြို့တော်ဘဏ်ဥက္ကဋ္ဌ ဒေါ်လှိုင်မော်ဦးက ဆိုသည်။

You may also like...

Leave a Reply

Your email address will not be published. Required fields are marked *