မြန်မာလှေမြုပ်လျှင် အားလုံးပါသွားမည်

မြန်မာနိုင်ငံသည် ညီညွတ်မှုကို ခက်ခက်ခဲခဲ ပြန်လည်တည်ဆောက်နေရသော နိုင်ငံဖြစ်သဖြင့် ကိုယ်နှင့်မတည့်သည့်အဖွဲ့များ၊ လူများထိခိုက်လျှင် ဝမ်းသာတတ်ကြခြင်းသည် သဘာဝကျသော်လည်း တစ်မြေတည်းနေ တစ်ရေတည်း သောက် အနီးကပ် ဆက်စပ်ပတ်သက်နေသဖြင့် ထိခိုက်မှုများသည် ထိုလူများ ပုဂ္ဂိုလ်များ အဖွဲ့အစည်းများထံတွင်သာ ရပ်နေမည်မဟုတ်ဘဲ ကိုယ့်ထံသို့ပါ အနှေးနှင့်အမြန်ရောက်လာနိုင်သည်ကို သတိပြုသင့်သည်။

ကမ္ဘာ့တစ်ဖက်ခြမ်းတွင် လိပ်ပြာတောင်ပံခတ်ချက် တစ်ချက်ကြောင့် ကမ္ဘာ့အခြားတစ်ဖက်ခြမ်းတွင် မုန်တိုင်းဖြစ်ပေါ်သွားနိုင်သည်ဟူသော နာမည်ကျော် Chaos Theory သဘောတရားကို ကြည့်လျင် အရာရာသည် သူ့ဘာသာသူ သီးသန့်မရှိဘဲ တစ်ခုနှင့်တစ်ခု ချိတ်ဆက်နေကြကြောင်း၊ တစ်ခုနှင့်တစ်ခု သီးခြားဟုထင်ရသော အဖြစ်အပျက်များ၊ အကြောင်းအရာများပင်လျင် နီးကပ်စွာချိတ်ဆက်နေသဖြင့် အပြန်အလှန် ပြင်းထန်စွာ ရိုက်ခတ်နိုင်ကြောင်း မြင်နိုင်သည်။ မြန်မာတို့ သုံးနေကျစကားဖြင့် ပြောရလျှင် ‘ညောင်ဦးက ကမ်းပါးပြို၊ စမ္ဗာနဂိုရ်က နွားမပေါင်ကျိုး’ ခြင်း။

မြန်မာသည် နိုင်ငံငယ်ဖြစ်သလို ဖွံ့ဖြိုးဆဲနိုင်ငံ၊ ဆင်းရဲသောနိုင်ငံဖြစ်သဖြင့် ထိပ်သီးပုဂ္ဂိုလ်များ၊ အဖွဲ့အစည်းများသည် တစ်ဦးနှင့် တစ်ဦး တစ်ဖွဲ့နှင့်တစ်ဖွဲ့ နီးကပ်စွာ ဆက်စပ်ပတ်သက်နေသည်။ နိုင်ငံသည် ရခိုင်အရေးကဲ့သို့ တစ်ကမ္ဘာလုံး က လက်ညှိုးထိုး ဖိအားပေးနေသော မဟာနိုင်ငံတကာအရေးနှင့် ရင်ဆိုင်နေရသဖြင့် ထိလွယ်နာလွယ် အခြေအနေတွင် ရှိနေသည်။ ဖိအားသည် တစ်နေ့တခြား တိုးလာပြီး ယခုထက်ထိလည်း တိုးနေဆဲပင်ရှိသည်။ ယခုကဲ့သို့ စိုးရိမ်ဖွယ် အခြေအနေတွင် ဘယ်သူထိလျှင် ပျော်၊ ဘယ်သူထိလျှင် ငိုဟု ရွေးထုတ်မရနိုင်ပါ။ ခေါင်ထိလျှင် အကုန်ပါမည်သာ။ အစိုးရထိလျှင် ပျော်မရ၊ တပ်မတော်ထိလျှင် ပျော်မရ၊ ရဲတပ်ဖွဲ့ထိလျှင် ပျော်မရ၊ ပြည်နယ်တိုင်းဒေသကြီး အစိုးရအဖွဲ့ထိလျှင် ပျော်မရ။ ထိုအဖွဲ့အစည်းကြီးများအားလုံးသည် အစိုးရအဖွဲ့တည်းဟူသော ခေါင်းစဉ်အောက်တွင် ချိတ်ဆက်နေသည်။ တစ်ဖန် အစိုးရအဖွဲ့ဆိုသည် မြန်မာနိုင်ငံကို ကိုယ်စားပြုနေသည့်အတွက် တစ်ယောက်ယောက်၊ တစ်ဖွဲ့ဖွဲ့ ထိခိုက်လျှင် ထိခိုက်မှုဒဏ်သည် မြန်မာနိုင်ငံသူ နိုင်ငံသားအားလုံးထံသို့ ကျရောက်သည်သာ။

ဦးနှောက်က ညွှန်ကြားသည့်အတိုင်း ခြေလက်များက မလိုက်နာ မလှုပ်ရှားပါက အဆိုပါ ခြေလက်များကို ဖြတ်တောက်ပစ်ရန်၊ ခြေတု လက်တုဖြင့် အစားထိုးပစ်ရန် ဆရာဝန်များ လွယ်လွယ်အကြံမပေးကြပါ။ ခြေအစစ် လက်အစစ်ကို ပြန်ကောင်းလာစေမည့်၊ ကောင်းစွာ ထိန်းချုပ်စေစားနိုင်မည့် နည်းလမ်းများဖြင့် ကြံစည်ကုစားကြသည်သာ။

လှေဝမ်းပေါက်သည့်အခါ သူ့ဘက်ခြမ်းက ပေါက်သည်ဖြစ်ဖြစ်၊ ကိုယ့်ဘက်ခြမ်းကပေါက်သည်ဖြစ်ဖြစ် အရေးမကြီး၊ လှေမြုပ်လျှင် အားလုံးပါသွား မည်ဖြစ်သည်။ ဘက်ရွေးရမည့် အချိန်မဟုတ်ပါ။

မြန်မာလှေမြုပ်လျှင် အားလုံးပါသွားမည်။

အယ်ဒီတာ
၂၆.၉ .၂၀၁၉

(၂၀၁၈ ခုနှစ် ဩဂုတ်လက ဖော်ပြခဲ့သော Editorial ကို အနည်းငယ် ပြင်ဆင်မွမ်းမံပြီး ပြန်လည်ဖော်ပြခြင်း ဖြစ်သည်။)

You may also like...

Leave a Reply

Your email address will not be published. Required fields are marked *