မိုးပျံရာမှ မြေလျှိုးသွားသော မြန်မာ့အိမ်၊ ခြံ၊ မြေ ဈေးကွက် ပြန်လည်လူးလွန့်ချိန်

ပြီးခဲ့သည့်လ တတိယပတ်အတွင်း ဝင်ငွေရလမ်းမဖော်ပြနိုင်သော စည်းကြပ်မှုလွတ်ကင်းနေသည့် ဝင်ငွေများအပေါ် ကောက်ခံသည့်အခွန်နှုန်းထားကို ပြည်ထောင်စုလွှတ်တော်၏ အတည်ပြုချက်ဖြင့် အစိုးရအဖွဲ့က ဖြေလျှော့ပေးလိုက်သည်။

အဆိုပါအခွန်နှုန်းထားဖြေလျှော့ပေးမှုသည် ယခုအောက်တိုဘာလ ၁ ရက်နေ့မှစတင် အကျိုးသက်ရောက်မည် ဖြစ်ပြီး ယင်းဖြေလျှော့မှုကြောင့် မော်တော် ယာဉ်ဈေးကွက်၊ ဆောက်လုပ်ရေးနှင့် အိမ်၊ ခြံ၊ မြေဈေးကွက်တို့အပေါ် အကျိုးသက်ရောက်မှုများ ရှိလာသည်။

ငါးနှစ်နီးပါးကြာ ဈေးကွက်ကျဆင်းနေသော မြန်မာ့အိမ်၊ ခြံ၊ မြေဈေးကွက်မှာ ထိုသတင်းအတည်ဖြစ်ပြီး နောက်ပိုင်း ချက်ချင်းဆိုသလို အသက်ပြန်ဝင်လာသည်။

ယာယီပိုင်ဆိုင်မှုမှ အမှန်တကယ်ပိုင်ဆိုင်မှုသို့ အမည်ပေါက်ပြောင်းလဲရန်၊ အထူးကိုယ်စားလှယ်လွှဲစာ၊ အရပ်စာချုပ် စသဖြင့် ပိုင်ဆိုင်မှုကို စတိချုပ်ဆိုထားသည့် အခြေအနေကို ပြောင်းလဲရန် ဈေးကွက်အတွင်း မေးမြန်းစုံစမ်းမှုများ ဆက်တိုက်ရှိလာကြောင်း အိမ်၊ ခြံ၊ မြေ အကျိုးဆောင်များထံမှ စုံစမ်းသိရှိရသည်။

ယခုအစိုးရလက်ထက်တွင် ဝင်ငွေရလမ်းမဖော်ပြနိုင်သော စည်းကြပ်မှုမှ လွတ်ကင်းနေသည့် ဝင်ငွေများအပေါ် ကောက်ခံသည့် နှုန်းထားမှာ ကျပ်သိန်းသုံးရာအထိ ၁၅ ရာခိုင်နှုန်း၊ ကျပ်သိန်းသုံးရာအထက်မှ ကျပ်သိန်းတစ်ထောင်အထိ ၂၀ ရာခိုင်နှုန်းနှင့် ကျပ်သိန်းတစ်ထောင်အထက်ကို ၃၀ ရာခိုင်နှုန်း ကောက်ခံလျက်ရှိသည်။

အဆိုပါ အခွန်နှုန်းထားများသည် ယခုနှစ် စက်တင်ဘာလ ၃၀ ရက်နေ့အထိ အကျုံးဝင်ခဲ့သည်။

ယခုအခါ ထိုအခွန်နှုန်းထားကို များစွာဖြေလျှော့ပေးလိုက်ပြီး ကျပ်သိန်း တစ်ထောင်အထိ ၃ ရာခိုင်နှုန်း၊ ကျပ်သိန်း တစ်ထောင်အထက်မှ ကျပ်သိန်းသုံးထောင် အထိ ၅ ရာခိုင်နှုန်း၊ ကျပ်သိန်းသုံးထောင်အထက်မှ ကျပ်သိန်းတစ်သောင်းအထိ ၁၀ ရာခိုင်နှုန်း၊ ကျပ်သိန်းတစ်သောင်းအထက်မှ ကျပ်သိန်း သုံးသောင်းအထိ ၁၅ ရာခိုင်နှုန်းနှင့် ကျပ်သိန်းသုံးသောင်းအထက်ကို ၃၀ ရာခိုင်နှုန်းကောက်ခံရန် ပြင်ဆင်လိုက်သည်။

ထို့ကြောင့်ပင် မိုးပျံရာမှ မြေလျှိုးပျောက်ကွယ်သွားသည့် အိမ်၊ ခြံ၊ မြေဈေးကွက်မှာ ပြန်လည်လှုပ်ရှားလာခြင်း ဖြစ်သည်။

“အမှန်တကယ် အရောင်းအဝယ် ဖြစ်တဲ့ အနေအထားမျိုးတော့ မတွေ့ရသေးပေမယ့် ဈေးကွက်ထဲမှာ စုံစမ်းမေးမြန်းတာတွေ တော်တော်လေးများလာတာကို တွေ့ရပါတယ်” ဟု iMyanmarHouse.com အိမ်၊ ခြံ၊ မြေ အကျိုးဆောင်လုပ်ငန်း၏ မန်နေဂျင်းဒါရိုက်တာ ဦးနေမင်းသူက ဈေးကွက်လှုပ်ရှားလာမှု အခြေအနေကို ပြောပြသည်။

အခွန်နှုန်းထားအသစ်၊ မကြာမီ အမှန်တကယ် ကျင့်သုံးလာတော့မည့် စုပေါင်းပိုင်အဆောက်အအုံဥပဒေ (ကွန်ဒို မီနီယမ်ဥပဒေ) နှင့် ဝါလကင်းလွတ် သီတင်းကျွတ်ကာလ ရာသီချိန် ဝယ်လိုအားပြောင်းလဲမှုပုံစံတို့ ပေါင်းဆုံချိန်လည်း ဖြစ်သည်။

အခွန်နှုန်းထားအသစ်ကြောင့် လှုပ်ရှားလာသည့် ပုံစံမှာ ယခင်က ယာယီပိုင်ဆိုင်မှုအဖြစ်သာ ကိုင်ထားကြသည့် အခြေပစ္စည်းပိုင်ဆိုင်မှုကို ကိုယ်ပိုင်အမည်ပေါက် နာမည်ပြောင်းလဲရန် ကြိုးပမ်းလာခြင်းနှင့် အခွန်နှုန်းထားအသစ်ဖြင့် မည်သို့ရောင်းဝယ်နိုင်မည်ကို စုံစမ်းမေး မြန်းလာကြခြင်းဖြစ်ကြောင်း အိမ်၊ ခြံ၊ မြေအကျိုးဆောင်လုပ်ငန်းများထံမှ သိရသည်။

သို့ရာတွင် မူလရှိရင်းစွဲ ပိုင်ဆိုင်မှုကို အမည်ပေါက် နာမည်ပြောင်းခြင်းက များပြားသည့် အရောင်းအဝယ်တွင် အမှန်တကယ် ငွေထွက်လာရန်မရှိကြောင်း ကံကောင်းအိမ်၊ ခြံ၊ မြေအကျိုးဆောင်လုပ်ငန်းမှ ဦးမင်းခန့်က ပြောသည်။

“အခွန်နှုန်းလျှော့တဲ့ အချိန်မှ မပြောင်းရင်လည်း မလွယ်တော့ဘူး။ ငွေ မထွက်လာတဲ့အတွက်ကြောင့် ဈေးကွက်က ထင်သလောက်မဟုတ်သေးပါဘူး” ဟု ၎င်းက မှတ်ချက်ပေးသည်။

နောက်တစ်ချက်မှာ စုပေါင်းပိုင်အဆောက်အအုံဥပဒေ၊ နည်းဥပဒေကို မကြာမီ အမှန်တကယ် ဖိဖိစီးစီး ကျင့်သုံးနိုင်လိမ့်မည်ဆိုသည့် မျှော်မှန်းချက်ကြောင့် ကွန်ဒိုတိုက်ခန်းဈေးကွက်တွင် နိုင်ငံခြားသားများ ပါဝင်လာမည့် အလားအလာကို အကောင်းမြင်ထားကြခြင်းဖြစ်သည်။

“နိုင်ငံခြားသားတွေကို ကွန်ဒိုရဲ့ ၄၀ ရာခိုင်နှုန်းအထိ ဝယ်ခွင့်ပြုထားလို့ သူတို့တွေရဲ့ ဝယ်ယူမှုတွေ ရှိလာမယ်ဆိုရင် ကွန်ဒိုအရောင်းအဝယ် ပြန်သွက်လာမယ်လို့ ထင်တယ်” ဟု ဦးနေမင်းသူက ဆိုသည်။

လေးနှစ်ကျော်၊ ငါးနှစ်နီးပါး တအိအိပြိုဆင်းသွားမှုကို ကြုံတွေ့နေရသည့် အိမ်၊ ခြံ၊ မြေဈေးကွက်ကို အဆိုး၊ အကောင်းမြင်မှုက ရောထွေးနေဆဲသာဖြစ်သည်။

အိမ်၊ ခြံ၊ မြေသမိုင်းတစ်လျှောက် ခေတ်ကောင်းချိန်၊ ဈေးကောင်းချိန်၊ အရောင်းအဝယ်ဖြစ်ထွန်းချိန်များ ရှိခဲ့ဖူးသည်။

လွန်ခဲ့သည့် နှစ်သုံးဆယ်ခန့် ၁၉၉၀ ပြည့်နှစ်ဝန်းကျင်မှသည် ၁၉၉၇ ခုနှစ် နှစ်လယ်အထိကာလသည် မြန်မာ့အိမ်၊ ခြံ၊ မြေဈေးကွက်၏ ပထမရွှေခေတ်ဟု ဝါရင့်အိမ်၊ ခြံ၊ မြေအကျိုးဆောင် လုပ်ငန်းရှင်များက ဆိုကြသည်။

ထို့နောက် နိုင်ငံရေးပြုပြင်ပြောင်းလဲမှုများစတင်ခဲ့သည့် ၂၀၁၁ ခုနှစ်မှသည် ၂၀၁၄ ခုနှစ်သည် အိမ်၊ ခြံ၊ မြေဈေးကွက် ဒုတိယရွှေခေတ်ဖြစ်ကြောင်း မဏ္ဍိုင်အိမ်၊ ခြံ၊ မြေအကျိုးဆောင်လုပ်ငန်းရှင် ဦးသန်းဦးက ပြောသည်။

ရွှေခေတ်ဟုဆိုသော်လည်း အမှန်တကယ်ဖြစ်သင့်သည့် ဈေးနှုန်းထက် များစွာကျော်လွန်သွားချိန်တွင် ဈေးကွက်ပူဖောင်း ပေါက်သွားသည်။

အဆိုပါ ဒုတိယရွှေခေတ်အဆုံးပိုင်း ၂၀၁၄ ခုနှစ် နောက်ပိုင်းတွင် အိမ်၊ ခြံ၊ မြေဈေးကွက်တွင် အရောင်းအဝယ်ဖြစ်မှု ထိုးကျသွားသလို ဈေးနှုန်းများပါ ကျဆင်းသွားသည်။

ထိုစဉ်က ရှိခဲ့သည့်ဈေးနှုန်းနှင့် လက်ရှိကာလ ပေါက်ဈေးနှိုင်းယှဉ်ပါက တချို့နေရာများတွင် ထက်ဝက်ခေါက်ချိုးအထိ ဈေးကျသွားသည်။

“သိန်းရာဂဏန်းနဲ့ ပါမစ်လိုဟာမျိုးတွေဆို ဈေးခေါက်ချိုးလောက်ကို ကျသွားတယ်။ တချို့ ကောင်းတယ်ဆိုတဲ့ ကာလက သိန်း ၂၂၀၀ လောက်နဲ့ ဝယ်ထားတာတွေက ခုချိန်မှာ သိန်း ၁၂၀၀ လောက်ပဲရတာ တွေ့ရတယ်” ဟု ဦးသန်းဦး က ဆိုသည်။

ဒေသတွင်းနိုင်ငံများရှိ အိမ်၊ ခြံ၊ မြေဈေးနှုန်းနှင့်ပင် ရင်ပေါင်တန်းနိုင်သည့် ရန်ကုန်မြို့လယ်ခေါင် အိမ်၊ ခြံ၊ မြေ ဈေးနှုန်းမှာလည်း ယခင်ထက် လေးပုံတစ်ပုံလောက် ဈေးကျသွားသော်လည်း အငှားဈေးကွက်မှလွဲလျှင် အရောင်းအဝယ်မှာ မရှိသလောက်ဖြစ်သွားသည်။

“အဝယ်ကတော့ အ, တုန်းပဲ။ အရောင်းကလည်း မထွက်ဘူး။ အငှားကလည်း ခေါ်ဈေးအတိုင်းတော့ ငှားဖို့ မလွယ်ပြန်ဘူး” ဟု ကံကောင်းအိမ်၊ ခြံ၊ မြေအကျိုးဆောင်လုပ်ငန်းရှင် ဦးမင်းခန့် က ပြောသည်။

အရောင်းအဝယ်ဈေးကွက်နှင့် အငှားဈေးကွက်မှာ ရေမြင့်ကြာတင့်ဆိုသလို ချိတ်ဆက်နေရာ အရောင်းအဝယ် ဈေးကွက်အခြေအနေမကောင်းချိန်တွင် အငှားဈေးကွက်ပါ ကျဆင်းသွားသည်။

သို့ရာတွင် အငှားဈေးကွက်သည် စီးပွားရေးလုပ်ငန်း၊ လူနေအိမ်၊ တိုက်ခန်း စသည်ဖြင့် မဖြစ်မနေ လည်ပတ်ရသည့် ဈေးကွက်ဖြစ်သောကြောင့် အငှားဖြစ်မှု အခြေအနေမှာမူ ဈေးနှုန်းအရ ပြောင်းလဲမှုမှလွဲလျှင် ပုံမှန်အတိုင်း ဆက်လည်ပတ်နေကြောင်း iMyanmarHouse.com  အိမ်၊ ခြံ၊ မြေ အကျိုးဆောင်လုပ်ငန်း၏ မန်နေဂျင်းဒါရိုက်တာ ဦးနေမင်းသူက ဆိုသည်။

မကြာမီ ဝါတွင်းကာလပြီးဆုံးမည်ဖြစ်ရာ ဗုဒ္ဓဘာသာဝင်တို့၏ ရိုးရာဓလေ့ ထုံးစံအရ အိမ်ပြောင်းအိမ်ရွှေ့၊ အိမ်ငှား၊ စာချုပ်သက်တမ်းတိုး စသည်တို့ ပိုမိုများပြားလာတော့မည်ဖြစ်သည်။

“ဝါကျွတ်ကာလနောက်ပိုင်း အငှားဖြစ်မှုနှုန်း ပြန်တက်လာစရာ ရှိပါတယ်”ဟု ဦးနေမင်းသူက ပြောသည်။

အိမ်၊ ခြံ၊ မြေအငှားဈေးကွက်မှာ ငှားရမ်းမှုဖြစ်မြောက်နှုန်း ပုံမှန်အတိုင်းရှိသော်လည်း ငှားရမ်းခဈေးနှုန်းများမှာ နေအိမ်၊ တိုက်ခန်း၊ ရုံးခန်း စသည့် အမျိုး အစားနှင့် နေရာဒေသပေါ်မူတည်ကာ ကျဆင်းလျက်ရှိကြောင်း အိမ်၊ ခြံ၊ မြေအကျိုးဆောင်လုပ်ငန်းရှင်များထံမှ သိရသည်။

ယခုနှစ် ဧပြီလမှ ဇွန်လအထိ ဒုတိယသုံးလပတ်တွင် ရုံးခန်းနေရာငှားရမ်းခ တစ်လစာမှာ ပျမ်းမျှ တစ်စတုရန်းမီတာ (ဆယ်ပေပတ်လည်ဝန်းကျင်) လျှင် အမေရိကန်ဒေါ်လာ ၃၉ ဒသမ ၅ ရှိကြောင်း အိမ်၊ ခြံ၊ မြေဈေးကွက် အတိုင်ပင်ခံကုမ္ပဏီ Colliers Myanmar ၏ ယခုနှစ် ဒုတိယသုံးလပတ် အစီရင်ခံစာတွင် ဖော်ပြထားသည်။

ရုံးခန်းငှားရမ်းခမှာ တစ်နှစ်ထက် တစ်နှစ် ဈေးကျဆင်းနေဆဲဖြစ်ပြီး ၂၀၁၇ ခုနှစ် ဒုတိယသုံးလပတ်တွင် ပျမ်းမျှ တစ်စတုရန်းမီတာလျှင် အမေရိကန်ဒေါ်လာ ၄၅ ဒသမ ၈၁ ရှိကာ ၂၀၁၈ ခုနှစ် ဒုတိယ သုံးလပတ်တွင် ပျမ်းမျှ တစ်စတုရန်း မီတာလျှင် အမေရိကန်ဒေါ်လာ ၄၂ ဒသမ ၉ ရှိကြောင်း အဆိုပါကုမ္ပဏီ၏ သုံးလပတ် အစီရင်ခံစာများအရ သိရသည်။

စီးပွားရေးလုပ်ငန်းလုပ်ကိုင်ရန် ငှားရမ်းသည့် လုံးချင်းအိမ်၊ အခန်းငှားရမ်းခများမှာလည်း ယခင်ထက် ၁၀ ရာခိုင်နှုန်းမှ ၂၀ ရာခိုင်နှုန်းကျော်အထိ ဈေးကျဆင်းသွားသည်။

“ငှားမယ့်သူကလည်း လုပ်ငန်းလုပ်ဖို့ အမြတ်မကျန်ရင် ဘယ်သူမှ မငှားဘူး လေ။ ဒီတော့ ဆယ်သိန်းလို့ ခေါ်ပေမယ့် ခုနစ်သိန်းခွဲ၊ ရှစ်သိန်းလောက်နဲ့ အငှားဖြစ်သွားတာတွေလည်း ရှိတာပဲ” ဟု ဦးနေမင်းခန့် ဆိုသည်။

ပြည်တွင်း အိမ်ငှားဈေးကွက်တွင်လည်း ဆောက်လုပ်ပြီးစီးသည့် တိုက်ခန်းအသစ်များ ဆက်တိုက် ပေါ်ထွက်လာသည့်အတွက် ငှားရမ်းခမြင့်တက်ခြင်းမရှိဘဲ အနည်းငယ်ကျဆင်းလာသည်။

“ဈေးကွက်ထဲမှာ ရောင်းစရာ အများကြီးရှိနေသေးသလို ငှားစရာတွေလည်း တဖြည်းဖြည်း ပေါ်ထွက်လာနေတယ်။ ဒီတော့ ရေတိုကာလ (ခြောက်လမှ တစ်နှစ်) အတွင်းမှာတော့ ဈေးအများကြီး တက်တာ၊ ကျတာ မရှိနိုင်ပါဘူး” ဟု ဦးနေမင်းသူက သုံးသပ်သည်။

စမ်းချောင်းမြို့နယ်တွင် ကျပ်တစ်သိန်း ရှစ်သောင်းမှ သုံးသိန်းခွဲအတွင်း၊ ကြည့် မြင်တိုင်မြို့နယ်တွင် ကျပ် တစ်သိန်းခုနစ်သောင်း မှ သုံးသိန်းအတွင်း၊ အင်းစိန်မြို့နယ် သမိုင်းဘက်တွင် ကျပ် တစ်သိန်းနှစ်သောင်းမှ နှစ်သိန်းအတွင်း အများဆုံး ငှားရမ်းကြကြောင်း အိမ်၊ ခြံ၊ မြေအငှားဈေးကွက်အတွင်းမှ စုံစမ်းသိရှိရသည်။

“အားလုံးခြုံကြည့်ရင်တော့ အကုန်ကျတာပဲ။ ဈေးကျတဲ့နေရာမှာ မြေချည်းပဲ ကျတာ မဟုတ်ဘူး။ တိုက်ခန်းရော၊ ကွန်ဒိုပါ ကျတာ” ဟု မဏ္ဍိုင်အိမ်၊ ခြံ၊ မြေအကျိုး ဆောင်လုပ်ငန်းရှင် ဦးသန်းဦးက ဆိုသည်။

ကွန်ဒိုမီနီယံအငှားဈေးကွက်တွင်လည်း ဈေးနှုန်းများစွာ ထိုးကျခဲ့ပြီး ယခင်အမြင့်ဆုံးကာလနှင့် ယှဉ်လျှင် ၂၀ ရာခိုင်နှုန်းမှ ၄၀ ရာခိုင်နှုန်းအထိ ငှားရမ်းခများကျဆင်းသွားကြောင်း ၎င်းက ပြောသည်။

“ကျားကြီးရင် ခြေရာကြီးဆိုသလိုပေါ့။ အရောင်းအဝယ်တန်ဖိုး ဈေးမြင့်လာရင် အငှားဈေးလည်း မြင့်လာတာပဲ။ အရောင်းအဝယ်တန်ဖိုးကျရင် အငှားပါ လိုက်ကျရတာပဲ” ဟု ၎င်း ကပင် ဆက်ပြောသည်။

အိမ်၊ ခြံ၊ မြေအရောင်းအဝယ် ဈေး နှုန်းများ မိုးပျံနေချိန်တွင် ငှားရမ်းခနှုန်းထားများမှာလည်း အမြင့်ပျံနေခဲ့ပြီး အရောင်းအဝယ်ဈေးကွက်နှင့် ဈေးနှုန်းများ မြေလျှိုးသွားချိန်တွင် ငှားရမ်းခနှုန်းထားများလည်း သစ်ငုတ်တိုတွင် သက်ဆင်းနားရသည့် အခြေအနေ ရောက်သွားသည်။

အိမ်၊ ခြံ၊ မြေဈေးကွက်သည် ရွှေ၊ ဒေါ်လာကဲ့သို့ ငွေဖြစ်လွယ်သည့် ပိုင်ဆိုင်မှု မဟုတ်သည့်အတွက် ဈေးကွက်အခြေအနေ ချက်ချင်းပြောင်းလဲလာရန်၊ ဈေးအတက်အကျ ရုတ်ချည်းဖြစ်ရန် မလွယ်ကူပေ။

ထို့ကြောင့်ပင် လေးနှစ်ကျော်၊ ငါးနှစ်နီးပါး ကျဆင်းလာသည့် အိမ်၊ ခြံ၊ မြေ ရောင်း၊ ဝယ်၊ ငှား ဈေးနှုန်းများမှာ အကျဘက်တွင်သာ ဆက်ရှိနေသည်။

အခွန်နှုန်းထားဖြေလျှော့မှုကြောင့် ယခင်ထက် ဈေးကွက်လှုပ်ရှားလာသည် ဆိုသော်လည်း ယခင်ကာလများက ရှိခဲ့သည့် သာဓကနှင့် ယှဉ်ကြည့်လျှင် သုံး၊ လေးနှစ်ခန့် အရှိန်ယူရလေ့ရှိကြောင်း ဦးသန်းဦးက ပြောသည်။

“အခွန်ဖြေလျှော့မှုကို တစ်နှစ်ဆိုတဲ့ ကာလတစ်ခုပဲပေးထားတယ်။ နောက်ဆုံးအခွင့်အရေးလို့လည်း ပြောထားတယ်။ ဘယ်လောက်ထိ အခွန်ဆောင်ပြီး တရားဝင်ဖြစ်အောင် လုပ်ကြမလဲဆိုတာ စောင့်ကြည့်ကြရုံပေါ့” ဟု ၎င်းက ဆိုလေသည်။

စစ်ငြိမ်းသူ

You may also like...

Leave a Reply

Your email address will not be published. Required fields are marked *