သက်သေမပြနိုင်သေးသရွေ့ တရားခံမဟုတ်

အပြစ်ရှိကြောင်း သက်သေမပြနိုင်သေးသရွေ့ အပြစ်ကင်းသည်။ တရားခံမဟုတ်။ Innocent until proven guilty ။

ပြစ်မှုကျူးလွန်သည်ဟု တရားစွဲခံရသော်လည်း အပြစ်ရှိကြောင်း တရားရုံးတွင် သက်သေပြနိုင်ခြင်း မရှိသေးသရွေ့ အပြစ်ကင်းသည်။ အချုပ်ခံထားရပြီး အချုပ်တွင်းမှ တရားရင်ဆိုင်ရသော်လည်း အပြစ်ရှိကြောင်း တွေ့ရှိပြီး အမိန့်အချမခံရသေးသရွေ့ အပြစ်မရှိ။ ထိုသူကို တရားခံဟု မသုံးနှုန်းသင့်၊ တရားခံသဖွယ် မပြောသင့်။

Innocent until proven guilty သည် တရားရုံးများတွင် ဥပဒေနှင့်အညီ မျှမျှတတ တရားစီရင်ခြင်း Fair Trial အတွက် အသက်ဖြစ်သည်။ သို့မဟုတ်လျှင် အာဏာမဲ့သူများကို အာဏာရှိသူများက ကြက်ကလေး၊ ငှက်ကလေးကဲ့သို့ အလွယ်တကူဖမ်းချုပ် ထောင်ထဲထည့်ကြမည်။

Innocent until proven guilty သည် တရားရုံးများတွင် တရားစီရင်ခြင်းအတွက်သာမဟုတ်။ the court of public opinion ခေါ် ‘အများသဘောထား တရားရုံး’ တွင် စီရင်ခြင်းအတွက်ပါ အရေးကြီးသည်။ လူသည် တစ်ဦးတည်းမနေ၊ အများနှင့် နေသည်ဖြစ်ရာ အများသဘောထားသည် လူတို့ဘ၀အတွက် အရေးကြီးသည်။ သူခိုးဟု အများကမြင်ပြီး ဝေးဝေး ကရှောင်ကြပါက သူခိုးဟုတ်သည်ဖြစ်စေ၊ မဟုတ်သည်ဖြစ်စေ သူခိုးအဖြစ် အပြစ်ဒဏ်ချခံရခြင်းပင်။ ထို့ကြောင့် တရားခံဟု အလွယ်တကူ မစွပ်စွဲမိစေရန် အများသဘောထားတရားရုံးတွင် အသံကျယ်ဆုံးသူများဖြစ်သည့် သတင်းမီဒီယာများနှင့် ထင်ပေါ်ကျော်ကြားသူများ၊ လူ့အသိုင်းအဝိုင်းတွင် ဩဇာရှိသူများသည် အထူးသတိပြုသင့်သည်။

ရိုးရိုးတရားရုံးနှင့် အများသဘောထား တရားရုံးသည် အမြဲတမ်း စင်ပြိုင်တည်ရှိသည်။ အများသဘောထား တရားရုံးက ချမှတ်သော အပြစ်ဒဏ်သည် ရိုးရိုးတရားရုံးကဲ့သို့ ကြီးနိုင်သည်။ ရိုးရိုးတရားရုံးက ထောင်ဒဏ်သုံးနှစ်ချသော်လည်း အများသဘောထားတရားရုံးက တစ်သက်လုံးအပြစ် ဒဏ်ပင် ချမှတ်နိုင်သည်။ အများသဘောထားတရားရုံးသည် ရိုးရိုးတရားရုံးများပေါ် လွှမ်းမိုးနိုင်စွမ်းလည်းရှိသည်။ ထို့ကြောင့် မျှတစွာတရားစီရင်ခြင်း Fair Trial အတွက် အရေးကြီးသော Innocent until proven guilty အယူအဆသည် ရိုးရိုးတရားရုံးနှင့်သာမက အများသဘောထားတရားရုံးနှင့်ပါ ဆိုင်သည်။

အစွပ်စွဲခံရသူ၊ အဖမ်းခံရသူတို့ကို သက်သေမပြနိုင်သေးဘဲနှင့် တရားခံ၊ အပြစ်ကျူးလွန်သူဟု အလိုအလျောက်သတ်မှတ်လိုက်ပါက မဟုတ်ခဲ့လျှင် အစွပ်စွဲခံရသူ အလွန်နစ်နာမည်။ လူမှုကွန်ရက် Facebook ခေတ်ကြီးတွင် ပိုပြီးပင်နစ်နာမည်။ လူမှုကွန်ရက်ခေတ်မတိုင်မီက အများသဘောထားသည် နယ်ပယ်ကျဉ်းသော်လည်း ယနေ့တွင် တစ်နိုင်ငံလုံး၊ တစ်ကမ္ဘာလုံး ဖြစ်နိုင်သည်။

ထို့ကြောင့် ရိုးရိုးတရားရုံးတွင်ဖြစ်စေ၊ အများသဘောထားတရားရုံးတွင်ဖြစ်စေ၊ ထိုတရားရုံးနှစ်ခုလုံးတွင်ဖြစ်စေ ရင်ဆိုင်နေရသူသည် သူ့ကို အပြစ်ရှိကြောင်း သက်သေမပြနိုင်သရွေ့ တရားခံမဖြစ်သေးကြောင်း သိစေလိုသည်။

 

အယ်ဒီတာ
၁၀.၁၀.၂၀၁၉

You may also like...

Leave a Reply

Your email address will not be published. Required fields are marked *