ရဲတပ်ဖွဲ့ကို အိုးမည်းသုတ်ခြင်း

ပြည်သူ့ရဲတပ်ဖွဲ့ ပြည်သူနှင့် ပိုဝေးသွားသည်။

မူးယစ်ဆေးဝါး လက်ဝယ်တွေ့ရှိ သည်ဟုဆိုကာ အဆိုတော်ဖြိုးပြည့်စုံ အပါအဝင် အမျိုးသားသုံးဦးကို လူပုံ အလယ်တွင် ရာဇဝတ်သားကဲ့သို့ ဝင်ရောက်ရိုက်နှက်ဖမ်းဆီးလိုက်ပြီးမှ မူးယစ်ဆေးမဟုတ်သဖြင့် ပြန်လွှတ်ပေးရခြင်းမှာ ရဲတပ်ဖွဲ့အတွက် အရှက်ရစေသည့်၊ သင်ခန်းစာယူရမည့် ဖြစ်ရပ်ဖြစ်သည်။

ဖမ်းဆီးရာတွင် အရပ်ဝတ်ဖြင့် ရဲတပ်ဖွဲ့ဝင်ဟုဆိုသူများက လာရောက်ဖမ်းဆီးခြင်းဖြစ်ပြီး ထွက်ပြေးခြင်း၊ ခုခံခြင်း မရှိဘဲ အဖမ်းခံသည်ကို လည်ပင်းကိုချုပ် ကာ ပါးရိုက်ပြီး ခေါ်ဆောင်သွားခြင်းကြောင့်လည်း ပြစ်တင်ဝေဖန်သံများ ထွက်နေသည်။

မူးယစ်ရဲဟု အလွယ်ခေါ်သည့် မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့ဝင်များ ကိုယ်တိုင်ဖမ်းဆီးသည့် ယင်းဖြစ်ရပ်တွင် ချုပ်ရက် ရမန်ပင် ရယူခဲ့သည်အထိ မူးယစ်ဆေးဝါး ဟုတ် မဟုတ် မခွဲနိုင်ဘဲ ဓာတ်ခွဲခန်း အဖြေထွက်မှသာ ၎င်းတို့ သုံးဦးကို ပြန်လွှတ်ပေးခဲ့ခြင်းဖြစ်သည်။ ထို့ကြောင့်ပင် ရဲတပ်ဖွဲ့၏ အရည်အချင်းကလည်း မေးခွန်းထုတ်ခံနေရသည်။

ရဲတပ်ဖွဲ့သည် ပြည်သူ့ယုံကြည်မှု ရရန် ကြိုးပမ်းတည်ဆောက်နေသည့် ကာလတွင် ပြည်သူ အယုံအကြည့်မဲ့စေသည့် ဖြစ်ရပ်များ မကြာခဏဆိုသကဲ့ ဖြစ်ပွားနေသည်။

“ရဲတပ်ဖွဲ့ကို ပြည်သူတွေက နဂို ကတည်းက အယုံအကြည်မရှိတာ။ အခုလို ထပ်ဖြစ်တော့ ယုံကြည်မှု တည်ဆောက်ရတာ ပိုပြီးခက်ခဲသွားပြီ” ဟု တက်ကြွ လှုပ်ရှားသူ မောင်ဆောင်းခက ပြောဆိုသည်။ ၎င်းသည် လွတ်လပ်စွာ ပြောဆိုထုတ်ဖော်ခွင့် လှုပ်ရှားမှုအဖွဲ့ (အသံ) အဖွဲ့၏ အမှုဆောင်ဒါရိုက်တာလည်း ဖြစ်သည်။

(၁)

အဆိုတော်ဖြိုးပြည့်စုံအပါအဝင် အမျိုးသားသုံးဦးကို ရန်ကုန်မြို့တော်က လူစည်ကားရာနေရာဖြစ်သည့် မြန်မာပလာဇာရှိ Gloria Jean  ကော်ဖီဆိုင်တွင် အောက်တိုဘာလ ၇ ရက်နေ့ ညနေပိုင်းတွင် အရပ်ဝတ်ဝတ်ဆင်ထားသည့် ရဲတပ်ဖွဲ့ဝင်များက ဝင်ရောက်ဖမ်းဆီးခြင်းဖြစ်သည်။

အဆိုတော် ဖြိုးပြည့်စုံကမူ ဆေးပြားများကို ထိုင်းနိုင်ငံက ဝယ်ယူလာခြင်းဖြစ်ပြီး မူးယစ်ဆေးဝါး မဟုတ်ကြောင်း ဖမ်းဆီးခံရသည့် ညတွင် ရဲတပ်ဖွဲ့ထံ ထွက်ချက်ပေးခဲ့သည်။ သို့သော်လည်း ရဲက မူးယစ်ဆေးဝါး ဟုတ် မဟုတ် မခွဲနိုင်သဖြင့် ဓာတုဗေဒအစည်းအရုံးသို့ ပို့ဆောင်ကာ ဓာတ်ခွဲစစ်ဆေးခဲ့သည်။

ယင်းသို့ဖမ်းဆီးပြီး တစ်ရက်အကြာ အောက်တိုဘာလ ၈ ရက်နေ့တွင် မူးယစ် ရဲတပ်ဖွဲ့နှင့် ပြည်ထဲရေးဝန်ကြီးဌာနတို့က အဆိုပါဖမ်းဆီးမှုနှင့် ပတ်သက်၍ ၎င်းတို့၏ Facebook စာမျက်နှာများမှ တစ်ဆင့် တရားဝင်သတင်းထုတ်ပြန်လာသည်။

ကတ်တမင်းဆေးပြား ၁၀ ပြားနှင့် အတူဖမ်းဆီးလိုက်ခြင်းဖြစ်သည်ဟုဆိုပြီး သက်သေခံပစ္စည်းဓာတ်ပုံမှတ်တမ်းများကိုပါ ဖော်ပြခဲ့ရာ ယင်းအနက် ထိုင်းနိုင်ငံထုတ် Playmore သကြားလုံးဘူးလည်း ပါဝင်ကာ ဆေးပြား ၁၁ ပြားကိုလည်း ထုတ်ဖော်ပြသခဲ့သည်။ သတင်းထုတ်ပြန်ချက်တွင် ဆေးပြား ၁၀ ဟု ဖော်ပြပြီး ဓာတ်ပုံတွင် ၁၁ ပြားဖြစ်နေခဲ့သည်။

ယင်းအပြင် သတင်းထုတ်ပြန်ပြီး နာရီပိုင်းအတွင် ထုတ်ပြန်ချက်ကို ပြန်လည်ပယ်ဖျက်သွားချိန်ကပင် ပြည်သူများကြား ဝေဖန်မှုမြင့်တက်လာခြင်းဖြစ်သည်။ သကြားလုံး၊ ပူရှိန်းကို မူးယစ်ဆေးဝါးဟု မှားယွင်းဖမ်းဆီးသည့် မူးယစ်ရဲဟု ပြစ်တင်ဝေဖန်သံများ စတင်ထွက်လာခြင်းဖြစ်သည်။

ယင်းသို့ ဝေဖန်သံများ မြင့်တက်လာချိန်တွင်ပင် ဖမ်းမိသည့်ဆေးပြားများကို ဓာတ်ခွဲစစ်ဆေးသည့် အဖြေထွက်လာသည်။ ဆေးပြားများတွင် မူးယစ်ဆေးဝါး မပါဟု အဖြေထွက်ခြင်းဖြစ်သည်။

ထို့ကြောင့် ဖမ်းဆီးပြီး သုံးရက်မြောက်နေ့တွင် အဆိုတော်ဖြိုးပြည့်စုံ အပါအဝင် ငြိမ်းချမ်းကို၊ ရော်နီစန်းလွင်တို့ သုံးဦးကို ပြန်လွှတ်ပေးလိုက်ရသည်။ သို့သော်လည်း ရဲတပ်ဖွဲ့အပေါ် ပြည်သူများ၏ ဝေဖန်မှုမှာ တိတ်မသွားဘဲ ပိုမြင့်တက်သထက် မြင့်တက်လာသည်။

ယင်းအမှုကို အောက်တိုဘာလ ၈ ရက်နေ့တွင် ချုပ်ရမန်ယူခဲ့သေးသည်။ ရမန်ယူပြီး နောက်တစ်ရက်တွင် ပြန်လွှတ်ပေးရခြင်းဖြစ်သည်။ မည်သို့ပင်ဆိုစေကာမှု ရဲတပ်ဖွဲ့က မှားယွင်းဖမ်းဆီးမှုကြောင့် အဆိုတော် ဖြိုးပြည့်စုံ အပါအဝင် သုံးဦး သည် အချုပ်ခန်းထဲတွင် နှစ်ညတာ အိပ်လိုက်ရသည်။

ဖမ်းဆီးခံခဲ့ရသည့် ကိစ္စနှင့်ပတ်သက်ပြီး အဆိုတော် ဖြိုးပြည့်စုံက သတင်းစာရှင်းလင်းပွဲကို အောက်တိုဘာလ ၁၀ ရက်တွင် ပြုလုပ်မည်ဟု လူမှုကွန်ရက်မှ တစ်ဆင့် အသိပေးခဲ့သော်လည်း ယင်း ရှင်းလင်းပွဲ ရွှေ့ဆိုင်းသွားခဲ့သည်။

(၂)

ဖမ်းဆီးခဲ့စဉ်ကပင် ရဲတပ်ဖွဲ့လိုက်နာကျင့်သုံးရမည့် ဥပဒေ၊ လုပ်ထုံးလုပ်နည်းကျင့်ဝတ်များကို ကျော်လွန်သည့် လုပ်ရပ်များရှိခဲ့သောကြောင့် ပြည်သူအချို့ဆိုလျှင် ရဲတပ်ဖွဲ့အပေါ် အယုံအကြည်မရှိသည့်အပြင် ကြောက်ရွံ့သည်ဆိုသည်အထိ လူမှုကွန်ရက်တွင် ဝေဖန်မှုများရှိခဲ့သည်။

လူမြင်ကွင်းတွင် ဖမ်းဆီးချိန် အသာတကြည် အဖမ်းခံနေသူတစ်ဦးကို ရိုက်နှက်ခဲ့သည့် ဖြစ်ရပ်သည် ရဲတပ်ဖွဲ့အပေါ် ပြည်သူများက ယုံကြည်မှုနည်းပါးစေကြောင်း ဥပဒေအကြံပေး ဦးခင်မောင်မြင့်က ပြောဆိုသည်။

ရိုက်နှက်ဖမ်းဆီးခဲ့သူသည် ရဲတပ်ဖွဲ့ဝင်တစ်ဦးမဟုတ်ကြောင်း လူမှုကွန်ရက်တွင် ချေပပြောဆိုနေသော်လည်း အဆိုပါဖြစ်ရပ်အပေါ် ရဲတပ်ဖွဲ့က တစ်စုံတစ်ရာ ဖြေရှင်းချက်ပေးခြင်း၊ ကြေညာချက်ထုတ်ပြန်ခြင်းမျိုးလည်း မရှိပေ။

“လူမြင်ကွင်းလို နေရာမျိုးမှာ ဖမ်းဆီးတာကို ရိုက်တာနှက်တာတို့ ၊ မလိုအပ်ဘဲ လူအင်အားသုံးတာကလည်း သင့်လျော်တဲ့ ကိစ္စမဟုတ်ဘူး။ ရဲတပ်ဖွဲ့က လုပ်တာ မဟုတ်လည်း သူတာဝန်ခံပြီးလုပ်တာ ဖြစ်တဲ့အတွက် သူ့မှာ တာဝန် ရှိတယ်” ဟု ဦးခင်မောင်မြင့်က မှတ်ချက်ပေးသည်။

မူးယစ်ဆေးဝါးတားဆီးနှိမ်နှင်းရေးရဲတပ်ဖွဲ့မှ ရဲမှူးဝင်းကိုကိုက ပြစ်မှုကျူးလွန်သည်ဟု ယူဆရသူများကို ဖမ်းဆီးရာတွင် ဥပဒေနှင့် အညီသာ ဖမ်းဆီးသင့်ကြောင်း ပြောကြားသည်။

“ပြည်သူတွေအနေနဲ့လည်း ဥပဒေကို နားလည်အောင်လုပ်ပေါ့။ ဒီဘက်က ဖမ်းဆီးတဲ့သူတွေကလည်း ဥပဒေနဲ့ အညီ ဖမ်းဆီးပေါ့” ဟု ၎င်းက ဆိုသည်။

(၃)

ရဲတပ်ဖွဲ့က မှားယွင်းဖမ်းဆီးခြင်းသည် ယခုတစ်ကြိမ်မှာ ပထမဆုံးအကြိမ် မဟုတ်တော့ပေ။ သတင်းပေးချက် အမှားကြောင့် မဟုတ်ဘဲ ရဲတပ်ဖွဲ့က မှားယွင်းကာ ဖမ်းဆီးရိုက်နှက်စစ်ဆေးမှုများလည်း ရှိခဲ့သည်။

ရဲတပ်ဖွဲ့က သူခိုးဖြင့် လူမှားကာ ဖမ်းဆီးရိုက်နှက်ခဲ့သူတစ်ဦးက ခရီးသွားလုပ်ငန်းတစ်ခု ဖြစ်သည့် Babylon Trekking & Camping Tour ၏ ဒါရိုက်တာ ဦးအောင်စိုးထိုက်ပင်ဖြစ်သည်။ အဆိုတော်ဖြိုးပြည့်စုံ ဖမ်းဆီးခံရမှုအပေါ် ၎င်းက အောက်ပါအတိုင်းမှတ်ချက်ပေးသည်။

“အခုအဖြစ်အပျက်က တကယ်ကို ကြောက်ဖို့ကောင်းတယ်။ လူအများကြီး သိတဲ့ နာမည်ကျော်အဆိုတော်ကိုတောင် အခုလို မှားဖမ်းတယ်ဆိုရင် အောက်ခြေက လူတန်းစားတွေဆိုရင် မတွေးဝံ့စရာဘဲ။ နောက်လူတွေကို ငါတို့အလှည့် ဘယ်တော့လာမလဲဆိုတာ မီးမောင်းထိုးပြနေသလို ဖြစ်နေတယ်”

ဦးအောင်စိုးထိုက်သည် ၂၀၁၈ ခုနှစ် နိုဝင်ဘာလ ၉ ရက်နေ့ ညနေ ၆ နာရီခန့်က ငါးနှစ်သားအရွယ် သမီးငယ်ကို အလုံသစ်တောလမ်းတွင် သွားကြိုစဉ် အရပ်ဝတ်လူနှစ်ဦးက ၎င်းကို စစ်ဆေးရန် ခေါ်ဆောင်ခြင်း ခံခဲ့ရကြောင်း ၎င်းက ပြောဆိုသည်။

မည်သည့်ကိစ္စကြောင့် လိုက်ခဲ့ရမည်နည်းဟု မေးမြန်းခဲ့သော်လည်း ပြန်မမေးရန်နှင့် အသာတကြည်လိုက်ခဲ့ရန်သာ အဆိုပါအရပ်ဝတ်နှစ်ဦးက ပြောဆိုခဲ့သည်။

ယင်းနောက် ၎င်းတို့နှစ်ဦး ခေါ်ဆောင်သွားသည့် အလုံမြို့နယ်စောရန်ပိုင် (တောင်ပိုင်း) ရပ်ကွက်အုပ်ချုပ်ရေးမှူးရုံးသို့ လိုက်ပါခဲ့ရပြီး ခဏအကြာတွင် ယင်းရုံးသို့ ရဲနှစ်ဦးနှင့် အရပ်ဝတ် လူအနည်းငယ် ရောက်လာပြီး ၎င်းကို လက်ထိပ်ခတ်၍ ကားတစ်စီးပေါ်သို့ တင်ကာ အလုံမြို့မရဲစခန်းကို ခေါ်ဆောင်သွားခဲ့ကြောင်း ဦးအောင်စိုးထိုက်က ရှင်းပြသည်။

ရဲစခန်းရောက်ချိန်တွင် သူခိုးဟု စွပ်စွဲကာ ရဲတပ်ဖွဲ့ဝင်အချို့က ရိုက်နှိက်ပြီး အတင်းအဓမ္မဝန်ခံခိုင်းကြောင်း၊ အဆိုပါကိစ္စနှင့်ပတ်သက်ပြီး ရဲတပ်ဖွဲ့က စစ်ဆေးခဲ့သော်လည်း ဦးအောင်စိုးထိုက်အား ရိုက်နှက်သည်ဆိုသည့် နေရာတွင် CCTV မရှိ၍ အရေးယူမရဟုသာ ရဲတပ်ဖွဲ့က အကြောင်းပြန်ခဲ့ကြောင်း ၎င်းက ဆိုသည်။

ယင်းအပေါ် မကျေနပ်သော်လည်း တရားစွဲပါက ရုံးချိန်းများသွားရခြင်းနှင့် ၎င်းလုပ်ငန်းများ မအားလပ်ခြင်းကြောင့် တရားမစွဲဆိုဖြစ်ကြောင်း ၎င်းက ဆိုသည်။ ယင်းသို့ အလားတူ မှားယွင်းဖမ်းဆီးခံရပြီး စစ်ဆေးရေးကာလတွင်ပင် ဒဏ်ရာများဖြင့် အသက်ဆုံးပါးရသည့်အထိ ဖြစ်ရပ်များလည်း ရှိသည်။

ယခုကဲ့သို့ဖြစ်ရပ်များဖြစ်နေခြင်းသည် ပြည်သူများအပေါ် ကြောက်ရွံ့စိတ်များဖြစ်စေသည်ဟု ဦးအောင်စိုးထိုက်က မှတ်ချက်ပြုသည်။ အဆိုတော် ဖြိုးပြည့်စုံကိစ္စတွင် ဝေဖန်သံများ မြင့်တက်လာပြီး မြန်မြန်ဆန်ဆန်လွှတ်လိုက်ခြင်းအပေါ်လည်း ၎င်းက ယခုကဲ့သို့ ပြောဆိုသည်။

“နိုင်ငံကျော်မို့လို့ပေါ့။ အောက်ခြေက လူတန်းစာသာဖြစ်ကြည့်ပါလား သိတောင်သိလိုက်မှာ မဟုတ်ဘူး”

(၄)

မြန်မာနိုင်ငံရဲတပ်ဖွဲ့ စည်းကမ်းထိန်းသိမ်းရေးဥပဒေအရ အကျဉ်းသား၊ အချုပ်သား၊ ဖမ်းဆီးထားသူ တစ်ဦးဦးကို ရိုက်ပုတ်လျှင်၊ အခြားနည်းဖြင့် ညှဉ်းပမ်းနှိပ်စက်လျှင် ရဲတရားရုံးဖြင့် စစ်ဆေးပြီး ပြစ်မှုထင်ရှားစီရင်ခံရပါက သုံးနှစ်အထိ ထောင်ဒဏ်ချမှတ်နိုင်ကြောင်း ပြဋ္ဌာန်းထားသည်။ ထို့အပြင် ညှဉ်းပမ်းနှိပ်စက်လျှင် ရဲကို တရားစွဲဆိုခွင့်ရှိကြောင်းလည်း ပြဋ္ဌာန်းထားသည်။

ထို့အပြင် အရေးယူနိုင်သည်ထက် အနိုင်ကျင့်နှိပ်စက်သော ရဲကို ရာထူးအဆင့်အတန်းမရွေး သက်ဆိုင်ရာဌာန အကြီးအကဲများက အဆိုပါရဲ၏ ကောင်းခဲ့သည့် အချက်များကိုပင် မထောက်ဘဲ ရာထူးမှ အမြဲတမ်း ထုတ်ပယ်ရမည်ဟု ရဲလက်စွဲတွင် ပါရှိသည်။ ရဲတပ်ဖွဲ့ဝင်များသည် ရဲသင်တန်းများတက်ကာ ရဲတပ်ဖွဲ့သို့ ဝင်ရောက်ခဲ့သော်လည်း ထိုအချက်များကို မျက်ကွယ်ပြုနေကြသလော။

ရဲတပ်ဖွဲ့ဂုဏ်သိက္ခာကို အချုပ်သားကို စော်ကားခြင်းဖြင့် မစွန်းထင်းရအောင် ရဲအားလုံးက ကြိုးစားကာကွယ်ကြရမည်ဟု ရဲလက်စွဲတွင် ရေးသားထားသည်။ သို့သော် လတ်တလောဖြစ်ပေါ်ခဲ့သည့် အဖြစ်အပျက်များမှာ အဆိုပါလက်စွဲများကို လက်စွဲအဆင့်ထက် မပိုသော သဘောကို ထင်ဟပ်စေခဲ့သည်။

မကြာသေးမီက ဖြစ်ပွားခဲ့သည့် နေပြည်တော် Wisdom Hill ပုဂ္ဂလိကကိုယ်ပိုင်အထက်တန်းကျောင်းတွင် ဖြစ်ပွားခဲ့သည့် အသက် နှစ်နှစ်ကျော်သာ ရှိသေးသည့် ကလေးငယ်ကို လိင်အမြတ်ထုတ်သည့် ကိစ္စတွင်လည်း ရဲတပ်ဖွဲ့ရှင်းလင်းချက်များအပေါ် ပြည်သူများက ဝေဖန်သံမျိုးစုံထွက်ပေါ်ခဲ့သည်။

အဆိုပါကိစ္စနှင့် ပတ်သက်ပြီး ဒုတိယရဲချုပ်အောင်နိုင်သူက Victoria ၏ မိန်းမကိုယ်တွင် တွေ့ရှိသည့် သုက်ပိုးသည် ပြစ်မှုကျူးလွန်သူက လက်ကို မိမိ ဘောင်းဘီအတွင်းနှိုက်၍ အာသာဖြေပြီး ကလေးငယ်ကို လက်ဖြင့် လိင်အမြတ်ထုတ်ရာမှ လက်တွင် သုက်ပိုးပါလာခြင်းဖြစ်နိုင်ကြောင်း ပြောဆိုခဲ့သည်။

ယင်းအပြင် ပြစ်မှုကျူးလွန်သူကို ဖမ်းဆီးရာတွင်လည်း ပြည်သူများက ယုံကြည်စေနိုင်သည့် သက်သေအထောက်အထား အခိုင်အလုံ မပြသနိုင်ချိန် သံသယဖြစ်ဖွယ်ရာကောင်းသည့် ရုပ်သံမှတ်တမ်းများ ထွက်ပေါ်လာခြင်းကြောင့်လည်း ရဲတပ်ဖွဲ့လုပ်ရပ်အပေါ် မေးခွန်းထုတ်ဝေဖန်ခံခဲ့ရသေးသည်။

ယင်းသို့ ဝေဖန်ခံရပြီး ငါးလခန့်အကြာတွင် အဆိုတော်ဖြိုးပြည့်စုံကိစ္စ ထပ်ပေါ်လာခြင်းဖြစ်သည်။

ယင်းသို့ဆိုလျှင် ရဲတပ်ဖွဲ့အနေနှင့် ပြည်သူက လေးစားအားကိုးရသည့် ရဲတပ်ဖွဲ့အဖြစ် ပြောင်းလဲရန် လိုအပ်လျက်ရှိနေသည့် အချိန်လည်းဖြစ်သည်။ ရဲတပ်ဖွဲ့သည် နှစ်ပေါင်းများစွာကြာ ပြည်သူများက အယုံအကြည် ကင်းမဲ့လာမှုကို ယုံကြည်မှုပြန်လည်ရရှိရန် လုပ်ဆောင်ရနိုင်ပါမည်လောဆိုသည့်အပေါ် ဥပဒေအကြံပေး ဦးခင်မောင်မြင့်ကမူ အောက်ပါအတိုင်း မှတ်ချက်ပေးသည်။

“စနစ်တစ်ခုလုံးကို ချိန်းလိုက်မှ ပြည်သူချစ်တဲ့ ရဲတပ်ဖွဲ့ဖြစ်လာနိုင်မှာ။ ရဲတပ်ဖွဲ့အပေါ်ပြည်သူလူထုရဲ့ အားကိုးမှု၊ ယုံကြည်မှုက တော်တော်လေးကို ကျလာတယ်”

အောင်ဖြိုးဦး

You may also like...

Leave a Reply

Your email address will not be published. Required fields are marked *