အခွန်နှုန်းသစ်နှင့် လှုပ်လှုပ်ခတ်ခတ် ကားဈေးကွက်

အခွန်နှုန်းထားသစ်က ငြိမ်သက်နေသော မော်တော်ယာဉ်ဈေးကွက်ကို လှုပ်နှိုးလိုက်သည်။

ဝင်ငွေရလမ်း မဖော်ပြနိုင်သောငွေ တစ်နည်းအားဖြင့် ငွေဖြူမပြနိုင်သောငွေဖြင့် အခြေပစ္စည်းများဖြစ်သည့် အိမ်၊ ခြံ၊ မြေ နှင့် မော်တော်ယာဉ်များ ဝယ်ယူရာတွင် စည်းကြပ်ကောက်ခံသော အခွန်နှုန်း လျှော့ချလိုက်ခြင်းကြောင့် မော်တော် ယာဉ်ဈေးကွက် ပြန်လည်လှုပ်ခတ်လာခြင်းဖြစ်သည်။

စည်းကြပ်မှုမှ လွတ်ကင်းနေသော ဝင်ငွေခွန်ဟု တရားဝင်ခေါ်ဆိုသည့် အဆိုပါအခွန်နှုန်းထားကို ၂၀၁၉ ခုနှစ် ပြည်ထောင်စု၏ အခွန်အကောက်ဥပဒေတွင် ယခင်နှစ်က သတ်မှတ်သည့် အခွန်နှုန်းထက် ရာခိုင်နှုန်း များစွာလျှော့ချထားခြင်းဖြစ်သည်။ အောက်တိုဘာ ၁ ရက်မှစတင်၍ အဆိုပါ အခွန်နှုန်းသစ် အသက်ဝင်ခြင်းဖြစ်သည်။ ယင်းသို့ လျှော့ချခြင်းသည် မော်တော်ယာဉ်ဈေးကွက်အပေါ် မည်မျှသက်ရောက်မှုရှိမည်နည်း။

မော်တော်ယာဉ်များ ဝယ်ယူစီးနင်ရာတွင် ဝယ်ယူသူသည် အခွန်အမျိုးမျိုး ပေးဆောင်ရသည်။

မော်တော်ယာဉ်၏ အင်ဂျင်ပါဝါ (မြင်းကောင်ရေအား)၊ မော်ဒယ်လ်နှစ် သတ်မှတ်ချက် (ထုတ်လုပ်သည့်ခုနှစ်) နှင့် ယာဉ်အမျိုးအစားအလိုက် မူရင်းပေးဆောင်ရသည့် ဈေးနှုန်းအမျိုးမျိုးရှိပြီး ယင်းဈေးအပေါ်တွင် မူတည်ကာ အခွန်အရပ်ရပ် ပေးဆောင်ရခြင်းဖြစ်သည်။

ပြည်ပမှ မော်တော်ယာဉ်တစ်စီး တင်သွင်းရာတွင် အကောက်ခွန်၊ ကုန်သွယ်လုပ်ငန်းခွန်၊ ဝင်ငွေခွန်နှင့် ကုန်လမ်းပို့ဆောင်ရေး ညွှန်ကြားမှုဦးစီးဌာန (က.ည.န) မှတ်ပုံတင်ခ စသည်ဖြင့် အသီးသီး ကောက်ခံပြီး အင်ဂျင်ပါဝါ ၁၅၀၁ စီစီ အထက်ယာဉ်များ တင်သွင်းလျှင် အထူးကုန်စည်ခွန် ပေးဆောင်ရသည်။

ပြည်တွင်း၌ SKD (Semi Knock Down) စနစ်ဖြင့် တပ်ဆင်ထုတ်လုပ်ရောင်းချသည့် မော်တော်ယာဉ်များ ဝယ်ယူရာတွင်လည်း သတ်မှတ်အခွန်အခများ ပေးဆောင်ရသည်။ ယင်းကဲ့သို့ ပေးဆောင်ရသည့် အခွန်၊ အခ အသီးသီးအနက် ၂၀၁၉ ခုနှစ်တွင် ဝင်ငွေခွန်နှုန်းထားကို လျှော့ချလိုက်ခြင်းဖြစ်သည်။

“ဝင်ငွေခွန်နှုန်းထား လျှော့ချလိုက်တဲ့အပေါ်မှာ ကားဝယ်တဲ့ Customer တွေကတော့ ဝင်ငွေခွန်ဆောင်ရတဲ့နှုန်းထား နည်းသွားတဲ့အတွက် ပိုပြီးတော့ စိတ်ဝင်စားမှု များလာတာတွေ့ရတယ်” ဟု ရန်ကုန်တိုင်းဒေသကြီး မော်တော်ယာဉ် ထုတ်လုပ်ရေးနှင့် ဖြန့်ဖြူးရောင်းချရေးလုပ်ငန်းရှင်များအသင်း အထွေထွေအတွင်းရေးမှူး ဦးရန်မျိုးအောင်က ဆိုသည်။

ပြီးခဲ့သည့်ဘဏ္ဍာနှစ်က ဝင်ငွေရလမ်းမဖော်ပြနိုင်သော စည်းကြပ်မှုမှ လွတ်ကင်းနေသော ဝင်ငွေခွန်ကို ကျပ်သိန်းသုံးရာအထိ ၁၅ ရာခိုင်နှုန်း၊ ကျပ်သိန်းသုံးရာမှ တစ်ထောင်အထိ ၂၀ ရာခိုင်နှုန်း၊ ကျပ်သိန်းတစ်ထောင်အထက် ၃၀ ရာခိုင်နှုန်းကောက်ခံခဲ့သည်။

၂၀၁၉ ခုနှစ်အောက်တိုဘာ ၁ ရက်မှ စတင်ကာ သိန်းတစ်ထောင်အထိ ၃ ရာခိုင်နှုန်း၊ ကျပ်သိန်းတစ်ထောင်အထက်မှ ကျပ်သိန်းသုံးထောင်အထိ ၅ ရာခိုင်နှုန်း၊ ကျပ်သိန်းသုံးထောင်အထက်မှ သိန်းတစ်သောင်းအထိ ၁၀ ရာခိုင်နှုန်းနှင့် ကျပ်သိန်းတစ်သောင်းအထက်မှ ကျပ်သိန်းသုံးသောင်းအထိ ၁၅ ရာခိုင်နှုန်း၊ ကျပ်သိန်းသုံးသောင်းအထက်ကို ၃၀ ရာခိုင်နှုန်းဖြင့် အသီးသီးလျှော့ချ ကောက်ခံမည်ဖြစ်သည်။

အဆိုပါအခွန်များသည် အိမ်၊ ခြံ၊ မြေ၊ မော်တော်ယာဉ် စသည်တို့ ဝယ်ယူရာတွင် ဝင်ငွေရလမ်းမပြနိုင်ပါက ပေးဆောင်ရသည့်နှုန်းထားဖြစ်သည်။ ယင်းဝင်ငွေခွန် နှုန်းထားလျှော့ချရန် ယခင်ဘဏ္ဍာနှစ်များကတည်းက ဆောင်ရွက်သော်ခဲ့လည်း အထမမြောက်ခဲ့ပေ။ ယခုဘဏ္ဍာနှစ်တွင် ဝင်ငွေခွန်နှုန်းလျှော့ချနိုင်ခဲ့သဖြင့် အိမ်၊ ခြံ၊ မြေနှင့် မော်တော်ယာဉ်လုပ်ငန်းရှင်များ မျှော်လင့်ချက်တို့ ပြည့်ဝခဲ့သည်။

ဝင်ငွေခွန်နှုန်းလျော့သဖြင့် မော်တော်ယာဉ်တစ်စီးဝယ်ယူရာတွင် စုစုပေါင်း ကျသင့်ဈေးနှုန်းလည်းလျော့ကာ အရောင်းအဝယ် ပြန်ကောင်းလာကြောင်း ဦးရန်မျိုးအောင်က ဆိုသည်။ ယခင်က ကျပ်သိန်း ၃၀၀ ဈေးရှိသည့် မော်တော် ယာဉ်တစ်စီးလျှင် ဝင်ငွေခွန် ၁၅ ရာခိုင်နှုန်း ပေးဆောင်ရာမှ ယခုနှစ်တွင် ၃ ရာခိုင်နှုန်းသာ ပေးရမည်ဖြစ်သည်။

ဆိုလိုသည်မှာ ယခင်ကျပ်သိန်းရာ တန်ယာဉ်တစ်စီးလျှင် ဝင်ငွေခွန် ၄၅ သိန်း ပေးဆောင်ရာမှ ကိုးသိန်းသာအခွန်ဆောင်ရတော့မည်ဖြစ်သည်။ မော်တော်ယာဉ်တန်ဖိုးအပေါ်မူတည်ကာ ယခင် ၁၅ ရာခိုင်နှုန်းမှ ၃၀ ရာခိုင်နှုန်းအထိ ပေးဆောင်ခဲ့ရာမှ ယခုနှစ်တွင် ၃ ရာခိုင်နှုန်း၊ ၅ ရာခိုင်နှုန်း၊ ၁၀ ရာခိုင်းနှုန်း၊ ၁၅ ရာခိုင်နှုန်း အသီးသီးပေးဆောင်ရမည်ဖြစ်ရာ ဈေးနှုန်းများ လျော့ကျလာမည်ဖြစ်သည်။

“နှစ်ဦးနှစ်ဖက် ကားရောင်းသူရော၊ ဝယ်သူရော အဆင်ပြေတယ်” ဟု ဦးရန်မျိုးအောင်က ပြောသည်။

မြန်မာနိုင်ငံတွင် ကျပ်သိန်း ၃၀၀ တန်မော်တော်ယာဉ်ကို လူအများစုက ဝယ်ယူစီးနင်းခြင်းကြောင့် ယခင် ၄၅ သိန်းကျပ် ပေးဆောင်ခဲ့ရသည့် ဝင်ငွေခွန် ဝန်ထုပ်မှာ ကိုးသိန်းသို့ လျော့ပေါ့သွားကြောင်း မော်တော်ယာဉ်လုပ်ငန်းလုပ်ကိုင် သူများက ပြောကြားသည်။

မြန်မာနိုင်ငံ၏ မော်တော်ယာဉ်ဈေးကွက်တွင် အကြမ်းဖျင်းအားဖြင့် ပြည်ပမှသွင်းသည့် မော်တော်ယာဉ်နှင့် ပြည်တွင်း၌ တပ်ဆင်ထုတ်လုပ်သည့် ယာဉ်ဈေးကွက်ဟူ၍ နှစ်မျိုးနှစ်စားရှိသည်။ ပြည်ပမှ တင်သွင်းရာတွင် ယခင်က ဈေးကွက်တွင် လူကြိုက်များသည့် ညာမောင်း၊ ဂျပန်တစ်ပတ်ရစ်ယာဉ် ဈေးကွက်လည်း ရှိသည်။ ယခုအခါ ဘယ်မောင်းယာဉ်များကိုသာ တင်သွင်းခွင့်ပြုထားသဖြင့် ဂျပန်တစ်ပတ်ရစ်ညာမောင်းယာဉ်များ ထပ်မံတင်သွင်းမရတော့ပေ။

လျှော့ချလိုက်သည့် ဝင်ငွေခွန်နှုန်းထားသည် အဆိုပါမော်တော်ယာဉ်ဈေးကွက်အလိုက် သက်ရောက်မှုရှိသည်။ အထူးသဖြင့် ပြည်တွင်း၌ တပ်ဆင်ထုတ်လုပ်သည့် Brand New ယာဉ်များ ပိုမိုအရောင်းအဝယ်သွက်ကြောင်း Myanmar Theingi မော်တော်ယာဉ်ရောင်းဝယ်ရေးကုမ္ပဏီ၏ အုပ်ချုပ်မှုဒါရိုက်တာ ဒေါက်တာ ဖြိုးဇေဦးက ပြောကြားသည်။

“Brand New ကားတွေမှာ ဈေးကွက်က ဝယ်လိုအားက ပိုများလာတာပေါ့။ ပိုပြီးတော့ရောင်းကောင်းလာတယ်။ ဒီလတွေမှာ Used Car (တစ်ပတ်ရစ်ကား) တွေက အပြောင်းအလဲတော့ မရှိလောက်ပါဘူး။ တင်သွင်းခွင့်က ဘယ်မောင်းနဲ့ ထိန်းထားတာဆိုတော့” ဟု ၎င်းက ရှင်းပြသည်။

၂၀၁၇ ခုနှစ်ကစတင်ပြီး ဘယ်မောင်းယာဉ်များသာ တင်သွင်းသည့်မူဝါဒ စတင်ခဲ့သည့်နောက်ပိုင်း ညာမောင်းတစ်ပတ်ရစ် ဂျပန်ယာဉ်များ ထပ်မံတင်သွင်းခွင့်မရတော့ပေ။ ထိုအချိန်မှစတင်ကာ ပြည်တွင်း၌ SKD စနစ်ဖြင့် တပ်ဆင်ထုတ်လုပ်သည့် မော်တော်ယာဉ်များ ဈေးကွက်ဝေစု ပိုရလာကြောင်း ဈေးကွက်အတွင်းမှ သိရသည်။

သို့သော် အဆိုပါယာဉ်များမှာလည်း ဈေးနှုန်းကြီးမြင့်သဖြင့် သိန်းနှစ်ရာဝန်းကျင် ဆူဇူကီးယာဉ်များကိုသာ ဝယ်ယူစီးနင်းသူ များပြားနေကြောင်း မော်တော်ယာဉ်ဈေးကွက်အတွင်းမှ သိရသည်။ မြန်မာနိုင်ငံတွင် SKD စနစ်ဖြင့် မော်တော် ယာဉ်ထုတ်လုပ်ခြင်းကို KIA ၊ Ford ၊ Suzuki ၊ Nissan စသည့်ကုမ္ပဏီများက ထုတ်လုပ်နေပြီး တိုယိုတာကုမ္ပဏီလည်း ယခုနှစ်တွင် ဝင်ရောက်လာသည်။

နာမည်ကြီး မော်တော်ယာဉ်ထုတ်လုပ်ရေး လုပ်ငန်းဖြစ်သည့် တိုယိုတာမော်တော်ကော်ပိုရေးရှင်းသည် အမေရိကန်ဒေါ်လာ ၅၂ ဒသမ ၆ သန်း ရင်းနှီးမြှုပ်နှံကာ သီလဝါအထူးစီးပွားရေးဇုန်တွင် စက်ရုံတည်ထောင်ပြီး SKD (Semi Knock Down) စနစ်ဖြင့် မော်တော်ယာဉ်များ ထုတ်လုပ်မည်ဖြစ်သည်။

တိုယိုတာမော်တော်ကော်ပိုရေးရှင်းသည် မြန်မာနိုင်ငံတွင် မော်တော်ယာဉ်ထုတ်လုပ်ရန် တိုယိုတာမြန်မာကုမ္ပဏီလီမိတက်ကို ဖွဲ့စည်းတည်ထောင်ပြီး ၂၀၂၁ ခုနှစ်မှစတင်၍ တစ်နှစ်လျှင် Toyota Hilux ယာဉ်အစီးရေ ၂၅၀၀ ကို SKD စနစ်ဖြင့် ထုတ်လုပ်သွားမည်ဖြစ်ကြောင်း အဆိုပါကုမ္ပဏီထံမှသိရသည်။

“Brand New ဝယ်လိုအားတက်သွားတယ်ဆိုတာ အရင်ကတည်း ကားဝယ်ဖို့ စောင့်နေတဲ့သူတွေ၊ Brand New ကို ဝယ်ချင်တဲ့သူတွေ၊ အစောကြီးကတည်းက စဉ်းစားထားတဲ့သူတွေအတွက် အခွန်က လျော့သွားတယ်ဆိုပြီး တွန်းအားဖြစ်ပြီး ချက်ချင်းလာဝယ်တယ်။ ဒီလို Demand တစ်ခု ပိုများလာတာပေါ့” ဦးဖြိုးဇေဦးက ဆိုသည်။

အောက်တိုဘာ ၁ ရက်မတိုင်ခင် နှစ်ပတ်ခန့်တွင် ယာဉ်အရောင်းအဝယ် ရပ်တန့်သွားပြီး ဝင်ငွေခွန်လျှော့ချမှု အကျိုးခံစားရမည့် ၂၀၁၉ အောက်တိုဘာလ ၁ ရက် နောက်ပိုင်းတွင် ပြန်လည်လှုပ်ခတ်လာခြင်းဖြစ်ကြောင်း ၎င်းကပြောကြား သည်။ Brand New ဈေးကွက်တွင် ဆူဇူကီးသည် ဈေးကွက်ဝေစု အများဆုံးဖြစ်ပြီး ဆူဇူကီး Ciaz နှင့် Ertiga ယာဉ်များ အရောင်းသွက်နေသည်။

ပြည်တွင်းဈေးကွက်တွင် တင်သွင်းထားပြီးသား ဂျပန်တစ်ပတ်ရစ်ယာဉ်များ ထပ်မံတင်သွင်းခွင့်မရှိသကဲ့သို့ ရှိပြီးသားယာဉ်များမှာလည်း သတ်မှတ်အခွန်အရပ်ရပ် ပေးဆောင်ပြီးဖြစ်သဖြင့် အပြောင်းအလဲနည်းကြောင်း ဦးဖြိုးဇေဦး က သုံးသပ်သည်။

သို့သော် ဂျပန်တစ်ပတ်ရစ်ယာဉ်ကို စွဲမြဲစွာဝယ်ယူအသုံးပြုနေသူများရှိသဖြင့် အဆိုပါဈေးကွက်သီးသန့်ရှိနေပြီး ယာဉ်ဈေးမှာလည်း အတက်၊ အကျမရှိကြောင်း ၎င်းကဆိုသည်။

“ရာသီကလည်း ကားအရောင်းအဝယ် ပြန်သွက်တဲ့ကာလပေါ့။ သီတင်းကျွတ်ဆိုရင် ကားအရာင်းအဝယ်က ပြန်ကောင်းတယ်။ ဝင်ငွေခွန်နှုန်းထား လျော့သွားတဲ့အတွက် ကားအသစ်တွေက ရောင်းအားပိုကောင်းတယ်။ ကားအဟောင်းတွေကတော့ သက်ရောက်မှုသိပ်မရှိဘူး” ဟု မြန်မာ့မော်တော်ယာဉ်ထုတ်လုပ်ရေးနှင့် ဖြန့်ဖြူးရောင်းချရေးလုပ်ငန်းရှင်များအသင်းဥက္ကဋ္ဌ ဒေါက်တာစိုးထွန်းက ပြောကြားသည်။

ပြည်တွင်းဈေးကွက်တွင် ဂျပန်တစ်ပတ်ရစ်ယာဉ်ကို လက်လွှဲလက်ပြောင်းရောင်းချရာတွင် ယခင်နှစ်များက ဝင်ငွေခွန်နှုန်းထား မြင့်မားသဖြင့် အမည်ပေါက် မပြောင်းလဲသူ များစွာရှိနေကြောင်း မော်တော်ယာဉ်ဈေးကွက်အတွင်းမှ သိရသည်။ လက်ရှိတွင် ဝင်ငွေခွန်နှုန်းထားလျှော့လိုက်ခြင်းကြောင့် အမည်ပေါက်ပြောင်းလဲသူများအတွက် အခွင့်အလမ်းကောင်း ဖြစ်သည်။

သို့သော် အမည်ပေါက်ပြောင်းလဲသူ နည်းပါးကြောင်း ဒေါက်တာစိုးထွန်းက ပြောကြားသည်။ ဥပမာအားဖြင့် ပဲခူးလိုင်စင်ကို ရန်ကုန်လိုင်စင်ကဲ့သို့ ပြောင်းလဲ၍မရခြင်းကြောင့် အမည်ပေါက်ပြောင်းလဲရန် စိတ်ဝင်စားသူ နည်းခြင်းဖြစ်ကြောင်း ၎င်းက ပြောကြားသည်။

မည်သို့ဆိုစေ ဝင်ငွေခွန်လျော့ကျလာမှုနှင့်အတူ မော်တော်ယာဉ်ဈေးကွက်မှာ ပြန်လည်လှုပ်ရှားလာပြီဖြစ်သည်။ မြန်မာ့စီးပွားရေး တိုးတက်လာသည်နှင့်အမျှ မော်တော်ယာဉ်အသစ်ဝယ်လိုအား တိုးတက်လာမည်ဖြစ်ကြောင်း တိုယိုတာ မော်တော်ကော်ပိုရေးရှင်းက ခန့်မှန်းထားသည်။ မြန်မာနိုင်ငံသည် ၂၀၁၈ ခုနှစ်က ယာဉ်အစီးရေ ၁၈,၀၀၀ ဝယ်ယူမှုရှိခဲ့ပြီး ယင်းပမာဏသည် ၂၀၁၈ ခုနှစ်မတိုင်ခင်နှစ်များထက် နှစ်ဆကျော်မြင့်တက်ခြင်းဖြစ်ကြောင်း တိုယိုတာက ခန့်မှန်းသည်။

ဈေးကွက်ကို ပိုမိုအရှိန်မြှင့်စေမည့် နောက်ထပ်မူဝါဒတစ်ရပ်ကို အစပျိုးပေးရန် မော်တော်ယာဉ်လုပ်ငန်းရှင်များက မျှော်လင့်နေကြသည်။ ထိုမူဝါဒက ရန်ကုန်မော်တော်ယာဉ် လိုင်စင်ခွင့်ပြုရန်ဖြစ်သည်။

ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်း စတင်တာဝန်ယူချိန်မှ စတင်၍ ရန်ကုန်လိုင်စင်ကို ပိတ်ပင်ထားခဲ့ပြီး ယနေ့တိုင် ပြန်လည်ခွင့်ပြုခြင်းမရှိသေးပေ။ ၂၀၁၈ ခုနှစ် ဧပြီလကတည်းက COE (Certificate of Entitlement) စနစ် ဖြင့်ခွင့်ပြုရန် လေသံပစ်ခဲ့သော်လည်း ယနေ့တိုင် အကောင်အထည် မပေါ်သေးပေ။

COE စနစ်ဆိုသည်မှာ မော်တော်ယာဉ်အစီးရေ တိုးပွားမှုကို ထိန်းချုပ်သောစနစ်ဖြစ်သည်။ ယာဉ်မှတ်ပုံတင်ရန် အစိုးရက အကန့်အသတ်ဖြင့်ရောင်းချသော ယာဉ်လိုင်စင်နံပါတ်ကို ဈေးပြိုင်ဝယ်ယူကာ မှတ်ပုံတင်ရသောစနစ် ဖြစ်သည်။

လက်ရှိတွင် Brand New ယာဉ်များ ရန်ကုန်လိုင်စင်ရရန် ကျပ်သိန်းတစ်ရာ တန်ဖိုးရှိသည့် ယာဉ်အိုဟောင်းစလစ်ကပ်၍ မှတ်ပုံတင်နေရခြင်းဖြစ်သည်။

ဝင်ငွေခွန် လျှော့ချလိုက်ခြင်းကြောင့် ဖြစ်ပေါ်လာသည့် ဈေးကွက်အခင်းအကျင်းတွင် ရန်ကုန်လိုင်စင်ခွင့်ပြုမှု ထပ်မံဖြည့်စွက်ပါက ပိုမိုကောင်းမွန်သော ဈေးကွက်ဖြစ်လာနိုင်ကြောင်း ၎င်းက ယခုကဲ့သို့ဆိုသည်။

“ရန်ကုန်လိုင်စင်ခွင့်ပြုမယ်၊ ခွင့်ပြုမယ်ဆိုပြီး ဆိုင်းငံ့ထားတာ အစိုးရသစ်တက်ကတည်းကဆိုတော့ သုံးနှစ်ကျော်ရှိသွားပြီးပေါ့။ ဒါလေးကို ပြန်ခွင့်ပြုရင်တော့ အလုံးစုံပြည့်စုံသွားမယ့် အနေအထားရှိတယ်” ဟု ဦးရန်မျိုးအောင်က ဆိုသည်။ 

နိုင်လင်းအောင်

You may also like...

Leave a Reply

Your email address will not be published. Required fields are marked *