ကမ္ဘာ့ရင်းနှီးမြှုပ်နှံမှု အကောင်းဆုံးနိုင်ငံများတွင် ဗီယက်နမ် အဆင့်ရှစ်နေရာ ရပ်တည်

ဟနွိုင်း၊ စင်တင်ဘာ ၁၉

ကမ္ဘာ့ရင်းနှီးမြှုပ်နှံမှု အကောင်းဆုံးနိုင်ငံများတွင် ဗီယက်နမ်နိုင်ငံက စင်ကာပူ စသည့် အိမ်နီးချင်းနိုင်ငံများကို ကျော်တက်၍ အဆင့် ၈ နေရာတွင် ရပ်တည်ခဲ့ကြောင်း Vietnam News သတင်းတွင် ဖော်ပြထားသည်။

အမေရိကန်သတင်းမီဒီယာတစ်ခုဖြစ်သည့် US News and World Report ၏ မကြာသေးခင်က ထုတ်ပြန်ချက်အရ ဗီယက်နမ်နိုင်ငံမှာ ရင်းနှီးမြှုပ်နှံမှု အကောင်းဆုံး ၂၉ နိုင်ငံတွင် အဆင့် ၈ နေရာ ရရှိခဲ့ပြီး မလေးရှားက အဆင့် ၁၃၊ စင်ကာပူက အဆင့် ၁၄ နှင့် အင်ဒိုနီးရှားက အဆင့် ၁၈ နေရာတွင် ရှိခဲ့ခြင်းဖြစ်သည်။

ဗီယက်နမ်မှာ ယမန်နှစ်က ကမ္ဘာ့ရင်းနှီးမြှုပ်နှံမှု အကောင်းဆုံးအဆင့်တွင် အဆင့် ၂၃ ရှိရာမှ ယခုနှစ်တွင် အဆင့် ၈ နေရာသို့ မြင့်တက်သွားခြင်းဖြစ်သည်။

US News and World Report သည် အမေရိကန်မီဒီယာကုမ္ပဏီတစ်ခုဖြစ်ပြီး ယင်းမီဒီယာက သတင်းများ၊ လေ့လာသုံးသပ်ချက်များ၊ စားသုံးသူအကြံပေးချက်များနှင့် အဆင့်သတ်မှတ်ချက်များကို ထုတ်ပြန်လေ့ရှိသည်။

ယခုကမ္ဘာ့ကောင်ဆုံး ရင်းနှီးမြှုပ်နှံမှုဆိုင်ရာ အဆင့်သတ်မှတ်ချက်ကို ကမ္ဘာတစ်ဝန်းရှိ လူ ၂၀,၀၀၀ ကျော်က ပါဝင်ဖြေဆိုခဲ့ခြင်း ဖြစ်သည်။

ယခုစစ်တမ်းကို ဖြေဆိုသူများတွင် ကမ္ဘာတစ်ဝန်းရှိ စီးပွားရေးနယ်ပယ်တွင် ဦးဆောင်လုပ်ကိုင်နေသူ ၇,၀၀၀ ပါဝင်ပြီး နိုင်ငံတစ်နိုင်ငံ၏ လာဘ်စားမှု၊ စီးပွားရေးအရ တက်ကြွမှုရှိခြင်း၊ စီးပွားရေး တည်ငြိမ်မှု၊ စွန့်ဦးတီထွင်လုပ်ကိုင်နိုင်စွမ်းရှိခြင်း၊ သင်တင့်မျှတသော အခွန်ဆိုင်ရာ ပတ်ဝန်းကျင်အခြေအနေရှိမှု၊ တီထွင်ဖန်တီးနိုင်စွမ်းရှိမှု၊ ကျွမ်းကျင်လုပ်သားများရှိခြင်းနှင့် နည်းပညာကျွမ်းကျင်သူများရှိခြင်းဟူသော အချက်ရှစ်ချက်ဖြင့် တိုင်းတာခြင်းဖြစ်သည်။

ဗီယက်နမ်နိုင်ငံမှာ ယခုနှစ် ဩဂုတ်လအထိ နိုင်ငံခြားရင်းနှီးမြှုပ်နှံမှု ၂၉,၅၃၀ ရှိခဲ့ပြီး တန်ဖိုးအားဖြင့် အမေရိကန်ဒေါ်လာ ၃၅၃ ဒသမ ၇ ဘီလီယံထိရှိသည်။

ယခုနှစ်အတွက် ရင်းနှီးမြှုပ်နှံရန် အကောင်းဆုံးငါးနိုင်ငံမှာ ဥရုဂွေးနိုင်ငံက ပထမ၊ ဆော်ဒီအာရေးဗီးယားက ဒုတိယ၊ လူဇင်ဘတ်န်ိုင်ငံက တတိယ၊ အိန္ဒိယက စတုတ္ထနှင့် ပိုလန်နိုင်ငံက အဆင့်ငါးအဖြစ် သတ်မှတ်ခံခဲ့ရကြောင်း အဆိုပါ သတင်းတွင် ဖော်ပြထားသည်။ 

You may also like...

Leave a Reply

Your email address will not be published. Required fields are marked *