ရပ်ကျေးအဆင့်တွင် NLD အစိုးရ အဂတိတိုက်ဖျက်ရေး ဦးစားပေးလုပ်သင့်ဟု PRLM စစ်တမ်းဖော်ပြ

ရန်ကုန်၊ အောက်တိုဘာ ၁၀

NLD အစိုးရလက်ထက် လုပ်ဆောင်လျက်ရှိသော အဂတိတိုက်ဖျက်ရေးကို ရပ်ကျေးအဆင့်တွင် ဦးစားပေးလုပ်သင့်ကြောင်း Corruption and Access to Justice Survey စစ်တမ်းအရ သိရသည်။

အဆိုပါစစ်တမ်းကို USAID အစီအစဉ်ဖြင့် Promoting the Rule of Law in Myanmar (PRLM) အဖွဲ့က ၂၀၁၉ ခုနှစ်အတွင်း ကောက်ယူခဲ့ခြင်းဖြစ်ပြီး စစ်တမ်းရလဒ်များကို အောက်တိုဘာလ ၉ ရက်တွင် နေပြည်တော်ရှိ Kempinski Hotel ၌ မိတ်ဆက်ခဲ့သည်။

PRLM အဖွဲ့သည် နေပြည်တော်နှင့် တိုင်းဒေသကြီးနှင့်ပြည်နယ် ၁၄ ခုတွင် ကျား၊ မ အချိုးအစားခွဲ၍ လူဦးရေ ၃၀၉၆ ဦးအား မေးခွန်း ၉၉ ခုမေးကာ ကောက်ယူထားခဲ့ခြင်းဖြစ်ကြောင်း အဆိုပါစစ်တမ်းတွင် ဖော်ပြထားသည်။

စစ်တမ်းဖြေဆိုထားသူများအနက် မြို့ပြနေဖြေဆိုသူ ၅၆ ရာခိုင်နှုန်းနှင့် ကျေးလက်နေ ၅၄ ရာခိုင်နှုန်းတို့က NLD အစိုးရသည် အဂတိတိုက်ဖျက်ရေးအတွက် ရပ်ကျေးအဆင့်တွင် ဦးစားပေးလုပ်သင့်ကြောင်း ဖြေဆိုကြသည်။

ပြည်ထောင်စုအဆင့်တွင် အဂတိတိုက်ဖျက်ရေး ဦးစားပေးလုပ်သင့်ကြောင်း မြို့ပြနေ ၉ ရာခိုင်နှုန်းနှင့် ကျေးလက်နေ ၂၀ ရာခိုင်နှုန်းတို့က ဖြေဆိုကြသည်။

တိုင်းဒေသကြီးနှင့်ပြည်နယ်အဆင့်တွင် အဂတိတိုက်ဖျက်ရေးဦးစားပေးလုပ်သင့်ကြောင်း မြို့ပြနေ ၉ ရာခိုင်နှုန်းနှင့် ကျေးလက်နေ ၁၀ ရာခိုင်နှုန်းတို့က ဖြေဆိုကြသည်။

မြို့နယ် ကျေးလက်အဆင့်တွင် အဂတိတိုက်ဖျက်ရေး ဦးစားပေးလုပ်သင့်ကြောင်း မြို့ပြနေ ၁၃ ရာခိုင်နှုန်းနှင့် ကျေးလက်နေ ၁၁ ရာခိုင်နှုန်းတို့က ဖြေဆိုကြကြောင်း အဆိုပါစစ်တမ်းတွင် ဖော်ပြထားသည်။

ထို့အပြင် လွန်ခဲ့သည့်နှစ်နှစ်အတွင်း အဂတိလိုက်စားမှု လျော့ကျလာကြောင်း ရပ်ရွာအတွင်း ထင်မြင်သူသည် လူတစ်ရာလျှင် ၃၈ ဦး (၃၈ ရာခိုင်နှုန်း)သာရှိသည်။ ၁၅ ဦးကမူ အဂတိလိုက်စားမှုတိုးလာသည်ဟု ဖြေဆိုကြပြီး ၃၉ ဦးကမူ ယခင်အခြေအနေအတိုင်းရှိသည်ဟုသာ ဖြေဆိုထားကြောင်း အဆိုပါစစ်တမ်းအရ သိရသည်။

NLD အစိုးရက လုပ်ဆောင်လျက်ရှိသော အဂတိလိုက်စားမှုတိုက်ဖျက်ရေး အစီအစဉ်များသည် အဂတိလိုက်စားမှု ကျဆင်းလာခြင်းအပေါ် သက်ရောက်မှုရှိကြောင်း ရပ်ရွာအတွင်းရှိ လူတစ်ရာလျှင် ၈၂ ဦး (၈၂ ရာခိုင်နှုန်း)က ဖြေဆိုသည်ဟု Corruption and Access to Justice Survey စစ်တမ်းအရ သိရသည်။

စစ်တမ်းတွင် ဖော်ပြထားသည့် အချက်ဖြစ်သော ‘ပြည်သူများ၏ မျှော်လင့်ချက်တစ်ခုမှာ အစိုးရ၏ ပြုပြင်ပြောင်းလဲမှုများတွင် အများပြည်သူများအကြား ဖြစ်ပေါ်နေသော အသေးစားအဂတိလိုက်စားမှုများကို ဦးစားပေးတိုက်ဖျက်ရန်’ ဟူသောအချက်ကို လက်ခံကြောင်း အဂတိလိုက်စားမှုတိုက်ဖျက်ရေးကော်မရှင် ဥက္ကဋ္ဌ ဦးအောင်ကြည်ကဆိုသည်။

ထို့ပြင် ယခုစစ်တမ်းသည် အဂတိလိုက်စားမှုတိုက်ဖျက်ရေးကော်မရှင်အတွက် အသုံးဝင်မည့် စစ်တမ်းဖြစ်ကြောင်း ၎င်းကဆိုသည်။

NLD အစိုးရလက်ထက်တွင် တိုင်းဒေသကြီးနှင့် ပြည်နယ်အဆင့် ဝန်ကြီးချုပ်အပါအဝင် ပြည်ထောင်စုအဆင့်ဝန်ကြီးဌာန ညွှန်ကြားရေးမှူးချုပ်များကိုလည်း အဂတိလိုက်စားမှုဥပဒေဖြင့် အမှုဖွင့်အရေးယူခြင်းများရှိသည်။

International Transparency အဖွဲ့က ထုတ်ပြန်သည့် အဂတိလိုက်စားမှုအဆင့် (Corruption Perceptions Index-CPI)တွင် မြန်မာနိုင်ငံသည် ၂၀၁၇ ခုနှစ်တွင် အဆင့် ၁၃၀ ဖြစ်ပြီး ၂၀၁၈ ခုနှစ်တွင် အဆင့် ၁၃၂ သို့ ကျဆင်းသွားသည်။ 

You may also like...

Leave a Reply

Your email address will not be published. Required fields are marked *