ဂျပန် – မြန်မာ အောင်ဆန်း အသက်မွေးပညာသင်ကျောင်း ဒီပလိုမာသင်တန်းသားစခေါ်

ရန်ကုန်၊ အောက်တိုဘာ ၁၇

ဂျပန်နိုင်ငံ အထောက်အပံ့ဖြင့်ဖွင့်လှစ်သည့် ဂျပန်-မြန်မာ အောင်ဆန်း အသက်မွေးပညာသင်ကျောင်းက ပထမဆုံးအကြိမ် သင်တန်းသားများ ခေါ်ယူနေပြီဖြစ်ကြောင်း ပညာရေးဝန်ကြီးဌာနက အောက်တိုဘာ ၁၆ ရက်တွင် ကြေညာလိုက်သည်။

သင်တန်းကာလမှာ ၂ နှစ်ဖြစ်ပြီး သင်တန်းပြီးဆုံးလျှင် ဒီပလိုမာဘွဲ့ရမည်ဖြစ်ကြောင်း ကြေညာချက်တွင် ဖော်ပြသည်။

အောင်ဆန်း အသက်မွေးပညာသင်တန်းကျောင်းက လာမည့် ဒီဇင်ဘာလတွင် စတင်ဖွင့်လှစ်မည့် ၂၀၁၉-၂၀၂၀ ပညာသင်နှစ်အတွက် A.G.T.I ပထမနှစ်သင်တန်း ဝင်ခွင့်လျှောက်လွှာများကို အောက်တိုဘာလ ၁ ရက်နေ့တွင် စတင် ထုတ်ယူနိုင်ကြောင်း ယင်းသင်တန်းကျောင်းမှ တာဝန်ရှိသူတစ်ဦးက ပြောကြားသည်။

“ဒါက ပထမဆုံးအကြိမ်ခေါ်တာပါ။ အသက်ကန့်သတ်ချက် မရှိပါဘူး။ တက္ကသိုလ်ဝင်တန်းအောင်မြင်သူတိုင်း လျှောက်လို့ရပါတယ်။ ရုံးချိန်တွေမှာ ကျောင်းလာလျှောက်လို့ရတယ်” ဟု ၎င်းကဆိုသည်။

သင်တန်းကျောင်းတွင် မော်တော်ယာဉ်ပြုပြင်ထိန်းသိမ်းမှု နည်းပညာသင်တန်းနှင့် စက်မှုလုပ်ငန်းဆိုင်ရာ လျှပ်စစ်အင်ဂျင်နီယာသင်တန်းတို့ကို ဖွင့်လှစ်သင်ကြားပေးမည်ဖြစ်ပြီး သင်တန်းတစ်ခုတွင် သင်တန်းသား ၂၀ ဦးသာ လက်ခံမည် ဖြစ်ကြောင်း အဆိုပါသင်တန်းကျောင်းထံမှ သိရသည်။

အောင်ဆန်းအသက်မွေးပညာသင်ကျောင်းသည် ဂျပန်အပြည်ပြည်ဆိုင်ရာပူးပေါင်းဆောင်ရွက်မှုအေဂျင်စီ JICA ၏ ကူညီမှုဖြင့် ဖွင့်လှစ်သည့် အသက်မွေးပညာသင်ကျောင်းဖြစ်သည်။ ကျောင်းတည်ဆောက်ရေးအတွက် ဂျပန်နိုင်ငံက အမေရိကန်ဒေါ်လာသန်း ၂၀ ကျခံကူညီရန် ပြီးခဲ့သည့် ၂၀၁၈ ခုနှစ်ဒီဇင်ဘာလတွင် မြန်မာနိုင်ငံ နည်းပညာ၊ သက်မွေးပညာနှင့် လေ့ကျင့်သင်ကြားရေးဦးစီးဌာနတို့ သဘောတူထားခဲ့သည်။

ထို့သို့ သဘောတူထားပြီး ၁၀ လ ခန့်အကြာတွင် အောင်ဆန်းအသက်မွေးပညာသင်ကျောင်းက ပထမဆုံးအကြိမ် သင်တန်းသားခေါ်ယူခြင်းလည်း ဖြစ်သည်။

အောင်ဆန်းအသက်မွေးပညာသင်ကျောင်းတွင် ကျောင်းဆောက်လုပ်သည့်လုပ်ငန်းများ မပြီးပြတ်သေးဘဲ ဆက်လက်ဆောင်ရွက်နေဆဲဖြစ်ပြီး ကျောင်းဆောက်လုပ်မှုကိစ္စများ ပြီးစီးပါက ကျောင်းအိပ်၊ ကျောင်းစား သင်တန်းသားများခေါ်ယူရန်အထိ စဉ်းစားထားကြောင်း ယင်းကျောင်းမှ တာဝန်ရှိသူတစ်ဦးက ပြောကြားသည်။

သင်တန်းလျှောက်ထားရာတွင် သင်တန်းဝင်ခွင့်လျှောက်လွှာနှင့်အတူ လျှောက်ထားသူ၏ နိုင်ငံသားစိစစ်ရေးကတ်ပြား မိတ္တူ၊ ကျန်းမာရေးကောင်းမွန်ကြောင်း မြို့နယ်ကျန်းမာရေးဦးစီးဌာနမှ ထောက်ခံစာမူရင်း၊ တက္ကသိုလ်ဝင်စာမေးပွဲ အောင်လက်မှတ်၊ အမှတ်စာရင်းမူရင်း၊ အိမ်ထောင်စုစာရင်းမိတ္တူနှင့် ပတ်စ်ပို့ဓာတ်ပုံ သုံးပုံတို့ဖြင့် လျှောက်ထားရမည် ဖြစ်သည်။

သင်တန်းကို သင်္ချာ၊ ဓာတုဗေဒ၊ ရူပဗေဒ၊ ဓာတုဗေဒ ဘာသာရပ်တို့ဖြင့် တက္ကသိုလ်ဝင်စာမေးပွဲအောင်မြင်ထားပြီး လက်တွေ့လုပ်ငန်းနှင့် စက်ရုံ၊ ကုမ္ပဏီများသို့ လက်တွေ့ကွင်းဆင်းနိုင်သူများ လျှောက်ထားနိုင်ကြောင်း ပညာရေးဝန်ကြီးဌာန၏ ထုတ်ပြန်ချက်တွင် ဖော်ပြထားသည်။

သင်တန်းဝင်ခွင့်လျှောက်လွှာများကို နိုဝင်ဘာလ ၁ ရက်နေ့ ညနေ ၄ နာရီ နောက်ဆုံးထားပြီး ရန်ကုန်တိုင်းဒေသကြီး အင်းစိန်မြို့နယ် စဥ့်ငူရပ်ကွက်ရှိ ဂျပန်-မြန်မာ အောင်ဆန်း အသက်မွေးပညာသင်ကျောင်းသို့ လာရောက်လျှောက်ထားနိုင်ကြောင်း၊ သင်တန်းနှင့်ပတ်သက်ပြီး အသေးစိတ်သိရှိလိုပါက ဖုန်း ၀၉ ၄၀၆၀၅၃၁၂၄ ကို ဆက်သွယ်မေးမြန်းနိုင်ကြောင်း ယင်းသင်တန်းမှ တာဝန်ရှိသူတစ်ဦးက ပြောဆိုသည်။ 

You may also like...

Leave a Reply

Your email address will not be published. Required fields are marked *