လုပ်ချင်ရာလုပ်

ဆွေးနွေးပွဲများတွင် လည်းကောင်း၊ ပြင်ပတွင်လည်းကောင်း လာလာမေးကြသည်။ ‘ဘာလုပ်ရမလဲ’။ လုပ်ချင်တာသာ လုပ်ပါ။  အဘယ်ကြောင့်နည်း။

(၁) ပျော်စရာကောင်းသည်

ကိုယ်လုပ်ချင်သော အလုပ်၊ ကိုယ်ရွေးထားသည့် အလုပ်ဖြစ်သည့်အတွက် ပျော်သည် ။ ပျော်သောကြောင့် အလုပ်တွင် အချိန်ကုန်မှန်းမသိ  ကုန်သည်။ ပျော်ရွှင်ခြင်းသည် လူတိုင်းအတွက် အရေးကြီးသည်။ အိပ်ချိန်နုတ်လိုက်လျှင် လူ့ဘ၀၏ တစ်ဝက်သည် အလုပ်တွင်ဖြစ်သည်။  အလုပ်တွင် ပျော်သူသည် ဘ၀တွင်ပျော်သည်။ ပျော်သူများနှင့် အလုပ်လုပ်ရသူများ အပျော်ကူးစက်သည်။ အလုပ်တွင် ပျော်သူများ အိမ်ပြန်သွားလျှင် အိမ်က လူများပျော်ကြသည်။ အပန်းဖြေနားရက် တကူးတက ရှာစရာမလို။ အလုပ်နှင့် ဘ၀ မျှမျှတတဖြစ်အောင် Work-life balance လုပ်ရန်မလို။ အလုပ်နှင့်ဘ၀ တစ်သားတည်းကျ Work-life balance ပြီးသား။ 

(၂) တတ်လွယ်သည်

ကိုယ့်အကြိုက် အလုပ်ဖြစ်သောကြောင့် စိတ်ဝင်စားသည်၊ အာရုံစိုက်သည်။ အလုပ်တွင် စိတ်ဝင်စားလျှင် ဈာန်ဝင်သည်။ ဈာန်ဝင်လျှင် အလုပ်အရည်အသွေးမြင့်သည်။ ဝါသနာပါသောကြောင့် အနစ်နာခံနိုင်သည်။ မည်သည့်လုပ်ငန်းခွင်တွင်မဆို ကြုံရတတ်သော အခက်အခဲများကို  တောင့်ခံနိုင်သည်။ မည်သည့်အလုပ်မဆို ဆယ်နှစ်၊ ဆယ့်ငါးနှစ်ဆက်တိုက် ဖိမလုပ်လျှင် မကျွမ်းကျင်နိုင်။ နာရီတစ်သောင်းလောက်လုပ်ရင်း မှားသည်ကို ပြင်ရင်းဖြင့်သာ ကမ္ဘာ့အဆင့်ကိုရောက်သည်ဟု သုတေသနများက  တွေ့ရှိထားသည်။ စိတ်ကြိုက်နယ်ပယ်တွင် အလုပ်လုပ်ရသောသူသည်  အလုပ်လုပ်ရသည် မဟုတ်တော့။ ကစားနေရသလို ဖြစ်သည့်အတွက်  ဆယ်နှစ်၊ ဆယ့်ငါးနှစ်ဟူသော အချိန်သည် သတိမထားမိလိုက်ဘဲနှင့်  ကုန်သွားမည်။

(၃) ငွေရသည်

ကြိုက်သော အလုပ်တိုင်း ငွေရပါ့မလားဟု ပြောကြမည်။ မည်သည့် အလုပ်လုပ်လုပ် ကျွမ်းကျင်သူအတွက် ငွေရလွယ်သည်။ အနည်း အများသည် အလုပ်အမျိုးအစားပေါ်တည်နိုင်သော်လည်း ယေဘုယျအားဖြင့်  ရသင့်သလောက် ရသည်။ ကိုယ့်နယ်တွင် ဆရာတစ်ဆူဆိုလျှင် တောင်းသလောက်ပင် ရနိုင်သည်။ အခြားသူ မဖြေရှင်းနိုင်သော ပြဿနာများကို ဖြေရှင်းနိုင်သူသည် ငွေ မလိုချင်လျှင်ပင် ငွေက သူ့နောက်လိုက်လာမည်။

(၄) တစ်နေရာမှ တစ်နေရာ သယ်လို့ရသည်

ကြိုက်ပြီး ဝင်လုပ်လိုက်သောအခါမှ ကိုယ်မကြိုက်သော အလုပ်၊  ကိုယ်နှင့်မကိုက်မှန်း သိလာလျှင်ရော။ မည်သည့်အလုပ်မှ အလဟဿ မဖြစ်။  အလုပ်လုပ်ရာမှ တိုးတက်မြင့်မားလာသော အရည်အချင်းများ၊  အလုပ်ကြိုးစားသည် ရိုးသားသည်ဟူသော ဂုဏ်သတင်းများ၊ ခင်မင် အလုပ်တွဲလုပ်ခဲ့သည့်  မိတ်ဆွေများကို လုပ်ငန်းခွင်တစ်ခုမှ နောက်တစ်ခုသို့ သယ်သွားနိုင်သည်။ လူရိပ်လူကဲခတ်ခြင်း၊ ပေါင်းလုပ်ခြင်း စသော  လူနှင့်ဆိုင်သော အရည်အသွေးများသည် ကိုယ့်နောက်ပါသည်။ ဂုဏ်သတင်းသည်လည်း ကိုယ့်နောက် အရိပ်လို ထပ်ချပ်လိုက်သည်။  ကိုယ်နောက်လုပ်မည့် အလုပ်သွားလျှောက်လျှင်  ရိုးသားသလား ကြိုးစားသလားကို ထိုလုပ်ငန်းခွင်မှသူများက သိချင်သည့်အတွက် စုံစမ်းကြမည်။ အတူတူတွဲလုပ်ခဲ့ဖူးသူများသည် မိတ္တဗလဖြစ်သွားသည့်အတွက် ကိုယ်ဘာလုပ်လုပ် အထောက်အကူ ပေးနိုင်သည်။ ပညာ၊ ဂုဏ်သတင်းနှင့် မိတ်ဆွေတို့ကို လူမခိုး။

(၅) ရွှေ့ယူနိုင်သည်

ပျော်သည်ထင်ပြီးမှ လွဲသွားလျှင်ပင် လုပ်ငန်းခွင်တစ်ခုတည်း၊ ရုံးတစ်ရုံးတည်းတွင်ပင် တိမ်းညွတ်သောဘက်ကို ရွှေ့ပြောင်းယူနိုင်သည်။  လူများများနှင့် အလုပ်လုပ်ချင်သော်လည်း တစ်ယောက်တည်း လုပ်ရသောအလုပ် ဖြစ်နေလျှင် လူများများနှင့် ထိတွေ့ရသောဘက်ကို တဖြည်းဖြည်းချင်း ပြောင်းယူနိုင်သည်။ ကွင်းထဲဆင်းချင်သော်လည်း ရုံးထိုင်နေရလျှင် ကွင်းထဲဆင်းရသောဘက်ကို ရွှေ့ယူနိုင်သည်။ လက်ရှိ ရောက်နေသော နေရာတွင် ကြိုးစားရန်မူလိုသည်။ အလုပ်ကြိုးစားသူသည် နေရာပြောင်းလျှင်ပင် တတ်လွယ်သဖြင့် မည်သည့်ဌာနကမဆို လက်ကမ်းချင်ကြမည်။ ရုံးတစ်ရုံးတွင်ပင် ဌာနတစ်ခုမှ တစ်ခုသို့ ပြောင်းရာတွင် ပြောင်းလုပ်လိုသောအလုပ်၏ သဘောသဘာဝကို တီးခေါက်မိထားလျှင် ပြောင်းရသည် ပိုလွယ်သည်။ လုပ်ငန်းခွင်နယ်ပယ် အကျယ် အကျဉ်း၊ အသေးအကြီးပေါ်တွင်မူ  မူတည်မည်။

(၆) နေရာတိုင်းတွင် သင်ယူနိုင်သည်

မည်သည့် လုပ်ငန်းခွင်တွင်ပင်မဆို သင်ယူလို့ ရနိုင်သည်။ ငယ်တုန်းတွင် Job Description ခေါ် အလုပ်တာဝန် သတ်မှတ်ချက်ထဲကအတိုင်း ကန့်မထားပါနှင့်။ အကုန်လိုက်လေ့လာကြည့်ပါ။ လုပ်ငန်းခွင်တွင်  မသိသင့် မသိထိုက်၊ မတတ်သင့် မတတ်ထိုက်သည် မရှိ။ ကိုယ့်ပတ်ဝန်းကျင်တွင် ဖြစ်နေသည်များကို လိုက်သင်၊ လိုက်လုပ်ကြည့်ပါ။ ကိုယ်နဲ့မဆိုင်ဟု သဘောမထားဘဲ တာဝန်ပေးလျှင် လုပ်ကြည့်။ အလုပ်များသည် တစ်ခုနှင့် တစ်ခုချိတ်ဆက်နေသည့်အတွက် ဆက်စပ်လုပ်ငန်းများကို ဝင်လုပ်ကြည့်လျှင် လုပ်ငန်းခွင်တစ်ခုလုံးကို အပေါ်စီးကမြင်ပြီး ကိုယ်တာဝန်ယူရသောအလုပ်ကို ပိုကောင်းအောင် လုပ်နိုင်လာမည်။  တာဝန်မပေးလျှင်ပင်  ခွင့်တောင်းပြီး ယူလုပ်ရန် ဝန်မလေးပါနှင့်။ လုပ်ငန်းခွင်တစ်ခုလုံး၏  သဘောကို နားလည်လျှင် ကိုယ်တာဝန်ယူရသော အပိုင်းကို ပိုနားလည် ပိုကျွမ်းကျင်ပြီး ပိုအောင်မြင်အောင် ဆောင်ရွက်နိုင်မည်။ တချိန်တွင်  ထိုနေရာတွင်ပင် သို့မဟုတ် အခြားတနေရာတွင် အကြီးအကဲဖြစ်လာမည်။  သေချာသည်က ကိုယ့်လုပ်ငန်းနယ်ပယ်ကို ကျွမ်းကျင်သူဖြစ်လာလိမ့်မည်။

လုပ်ချင်ရာသာ လုပ်ပါ။

ဇေယျသူ

You may also like...

Leave a Reply

Your email address will not be published. Required fields are marked *