၂၀၂၀ နှင့် တိုင်းပြုပြည်ပြုပုဂ္ဂိုလ်

၂၀၂၀သည် မကြာမီလာမည့် ရွေးကောက်ပွဲဖြစ်သည်။ ပါဝင်ယှဉ်ပြိုင်ကြမည့်သူများ၊ ပါတီများသည် ယခုကတည်းက ကြိုပြင်နေပြီ။ လူရွေးနေကြပြီ။ မဟာမိတ်ဖွဲ့ရန် ကြံနေကြပြီ။ နိုင်ငံတည်ဆောက်နေဆဲဖြစ်သည့် မြန်မာနိုင်ငံအတွက် ၂၀၂၀ သည် တည်ငြိမ်ပြီး ရွေးကောက်ပွဲတစ်ခုထက်မူ ပိုလွန်နေသည်။

၂၀၂၀ သည် ပြုပြင်ပြောင်းလဲရေးစတင်သည့်အချိန်မှ ဆယ်စုနှစ်တစ်စုအတွင်း၊ လက်ရှိဒီမိုကရေစီ အရပ်သားအစိုးရတက်သည့် ငါးနှစ်အတွင်း နိုင်ငံ ဘယ်မျှခရီးပေါက်၊ ဒီမိုကရေစီ ဘယ်မျှခရီးပေါက်သည်ကို တိုင်းတာမည့် မှတ်ကျောက်လည်း ဖြစ်သည်။

‘နိုင်ငံရေးသမားသည် လာမည့်ရွေးကောက်ပွဲကို ကြည့်သည်။ တိုင်းပြုပြည်ပြုပုဂ္ဂိုလ်သည် လာမည့်မျိုးဆက်ကို ကြည့်သည်။’ ဟူသော နာမည်ကျော်စကားရှိသည်။ ရွေးကောက်ပွဲတွင် ပြန်အရွေးခံရရေး သို့မဟုတ် အရွေးခံရရေးကိုသာ အာရုံထား လုံးပန်းနေလျှင် သာမန်နိုင်ငံရေးသမားဖြစ်ပြီး မျိုးဆက်သစ်ကောင်းစားရေး၊ နိုင်ငံတည်ဆောက်ရေးကို ရည်မှန်းချက်ထားမှ တိုင်းပြုပြည်ပြု ပုဂ္ဂိုလ်အဆင့်သို့ ရောက်မည်ဟု ပြောလိုရင်းဖြစ်သည်။ ထို့ကြောင့် ၂၀၂၀ ကို ကြိုပြင်ခြေသွေးနေကြသူများသည် နိုင်ငံတည်ဆောက်ရေးကို အဓိကထားမှသာ တိုင်းပြုပြည်ပြုပုဂ္ဂိုလ်များ ဖြစ်မည်။

အာဏာရနိုင်ငံရေးသမားများ သို့မဟုတ် အစိုးရနေရာတွင် ရောက်နေသူများ၊ အစိုးရကိုခန့်အပ်ထားသူများအတွက် ၂၀၂၀ နိုင်ငံတော်သည် သူတို့ဆက်ခံစဉ်ကထက် ကိန်းဂဏန်းအရသော်လည်းကောင်း၊ အသွင်အပြင်အရသော်လည်းကောင်း၊ အနှစ်သာရသော်လည်းကောင်း တိုးတက်သွားမှသာ တိုင်းပြုပြည်ပြုပုဂ္ဂိုလ်များအဖြစ် ဂုဏ်ယူနိုင်မည်။

၂၀၂၀ တွင် အရွေးခံလိုသည့်၊ လောလောဆယ်တွင် အာဏာမဲ့နိုင်ငံရေး သမားများမှာမူ အာဏာရအစိုးရ၏ တာဝန်ယူတာဝန်ခံမှု ပိုအားကောင်းလာအောင် အတိုက်အခံအနေနှင့် ပဲ့ပြင်လမ်းကြောင်းပေးခြင်းဖြင့် တိုင်းပြုပြည်ပြု ပုဂ္ဂိုလ်များအဖြစ် ရှေ့ဆောင်လမ်းပြနိုင်မည်။

၂၀၂၀ သည် ပန်းတိုင်သာမက ခရီးလမ်းလည်း ဖြစ်သည်။ ၂၀၂၀ ရောက်မှ နိုင်ငံဆောက်ရမည်မဟုတ်။ ၂၀၂၀ သို့ သွားရာလမ်းတွင်လည်း နိုင်ငံကို ဆောက်ရန်လိုသည်။ နိုင်ငံဆောက်နေသည့် မြန်မာနိုင်ငံသည် သာမန်နိုင်ငံရေးသမားများကို မလိုအပ်ပါ။ တိုင်းပြုပြည်ပြုပုဂ္ဂိုလ်များကိုသာ လိုအပ်သည်။ 

 

အယ်ဒီတာ
၂၄.၁၀.၂၀၁၉

You may also like...

Leave a Reply

Your email address will not be published. Required fields are marked *