လူမှန်နေရာမှန် ၂၀၂၀

ဘာပဲလုပ်လုပ် လူမှန်နေရာမှန်မှ အောင်မြင်သည်။ ၂၀၂၀ ရွေးကောက်ပွဲအတွက် လွှတ်တော်ကိုယ်စားလှယ်လောင်း လူမှန်နေရာမှန် ရွေးချယ်နိုင်မှ။

၂၀၁၅ ရွေးကောက်ပွဲတုန်းက လူမှားနေရာမှားခဲ့သည်များရှိခဲ့သည့်အတွက် ရွေ့သင့်သည့်နေရာများတွင် ရွေ့သင့်သလောက် မရွေ့ခဲ့ကြ။

သန်း၅၀ကျော် ပြည်သူကို ကိုယ်စားပြုကာ အစိုးရကို ရွေးချယ်ခန့်အပ်မည့် လွှတ်တော်ကိုယ်စားလှယ်များ၊ အစိုးရအဆင့်ဆင့်၏ လုပ်ငန်းဆောင်ရွက်ပုံတို့ကို အကဲဖြတ်ထောက်ပြမည့် လွှတ်တော်ကိုယ်စားလှယ်များ၊ နိုင်ငံအခြေခံလည်ပတ်မည့်ဥပဒေများ ရေးဆွဲကြမည့် နိုင်ငံပြုလွှတ်တော်ကိုယ်စားလှယ်များဖြစ်လာမည့် လွှတ်တော်ကိုယ်စားလှယ်လောင်းများနေရာတွင် နိုင်ငံကိုချစ်ပြီး တော်တတ်ထက်မြက်သည့် လူတော်လူထက်များ ရောက်လာရန် အရေးကြီးသည်။

ကုမ္ပဏီအဆင့် အရွေးမှားလျှင် ကုမ္ပဏီအဆင့်သာထိမည်။ နိုင်ငံပြုမည့် လွှတ်တော်ကိုယ်စားလှယ်တို့မှားလျှင် နိုင်ငံသားစဉ်မြေးဆက်ပင် နစ်နာစေသလို သူတို့ စွမ်းဆောင်ချက်များ မှန်ကန်လျှင်လည်း နိုင်ငံအနာဂတ် ထွန်းလင်းတောက်ပပေလိမ့်မည်။

လွှတ်တော်ကိုယ်စားလှယ်တို့သည် အလုပ်သင်ကာလ လုံးဝမရှိ။ လွှတ်တော်တွင်း ရောက်သည်နှင့် တန်းပြီး လုပ်နိုင်၊ ကိုင်နိုင်ရလိမ့်မည်။ လွှတ်တော်တွင်း ရောက်စကာလတွင် ဆုံးဖြတ်ချက်မချသေးဟု ဆိုင်းထား၍ မရသည့်အတွက် အရည်အချင်းမရှိဘဲ ဆုံးဖြတ်ချက်များချလိုက်လျှင် နောင်ကိုယ့်အမှားကိုယ်သိချိန်တွင်ပင် ပြန်ပြင်ရန်ခက်သည်။

မြန်မာနိုင်ငံသည် အခြားနိုင်ငံများနောက် နေရာအတော်များများတွင် နောက်ကျန်ခဲ့သည့်အတွက် မြန်မာ့လွှတ်တော်ကိုယ်စားလှယ်များသည် တည်ငြိမ်ဖွံ့ဖြိုးပြီးနိုင်ငံများ၏ လွှတ်တော်ကိုယ်စားလှယ်များထက်ပင် သုံးလေးဆ ထက်မြက်၊ သုံးလေးဆ နိုင်ငံကိုချစ်မှ ရှေ့သွားနိုင်ငံများကို အမီလိုက်နိုင်မည်။

မြန်မာနိုင်ငံသည် ဖွံ့ဖြိုးဆဲနိုင်ငံဖြစ်သည့်အတွက် ဖွံ့ဖြိုးပြီးနိုင်ငံများနှင့်ယှဉ်လျှင် လူတော် လူထက် အရည်အသွေးပြည့်လူနည်းသည် မှန်သော်လည်း လွှတ်တော်ကိုယ်စားလှယ်လောင်းနေရာများအတွက်မူ ဖြည့်စရာ လူလုံလောက်သည်။

လူမှန်နေရာမှန် ၂၀၂၀ ဖြစ်ရမည်။ 

အယ်ဒီတာ
၃၁.၁၀.၂၀၁၉

You may also like...

Leave a Reply

Your email address will not be published. Required fields are marked *