ပြည်သူ့မျက်စိအောက် ပြန်ရောက်လာသော တပ်မဲရုံများ

တပ်မတော်သားတစ်ဦးဖြစ်ခဲ့သော်လည်း ဦးကျော်ဇေယျတစ်ယောက် ၂၀၁၅ ရွေးကောက်ပွဲတွင် အနိုင်ရရှိခဲ့ပြီးနောက် ရန်ကုန်တိုင်းဒေသကြီးလွှတ်တော်ကိုယ်စားလှယ်တစ်ဦး ဖြစ်လာခဲ့သည်။

အမျိုးသားဒီမိုကရေစီအဖွဲ့ချုပ် NLD ပါတီမှ ဝင်ပြိုင်သူဖြစ်သောကြောင့် NLD ထောက်ခံသူများ၏ မဲများကို ရရှိခဲ့သော်လည်း တပ်မတော်သားတစ်ယောက် ဖြစ်ခြင်းကြောင့်အတွက်မူ ၎င်း၏ ရန်ကုန်တိုင်း ဒဂုံမြို့နယ် မဲဆန္ဒနယ်ရှိ တပ်မဲရုံနှစ်ရုံမှ မဲများကို မသိမ်းပိုက်နိုင်ခဲ့။

တပ်မဲရုံများသည် အများပြည်သူ မဲရုံများကဲ့သို့ ပွင့်လင်းမြင်သာသည့် နေရာတွင် ရှိမနေချေ။ တပ်ရင်းတပ်ဖွဲ့ထဲတွင်သာ တပ်မဲရုံများကို ထားရှိခြင်းဖြစ်သောကြောင့် အရပ်ဘက်အဖွဲ့အစည်းများ၊ ရွေးကောက်ပွဲစောင့်ကြည့်လေ့လာသူများ၊ မီဒီယာများနှင့် အခြားစိတ်ဝင်စားသူများ အလွယ်တကူကြည့်ရူရန် မဖြစ်နိုင်သည့် အခြေအနေလည်းဖြစ်သည်။

ထို့ကြောင့် လာမည့် ၂၀၂၀ ရွေးကောက်ပွဲတွင်လည်း တပ်တွင်းမဲရုံများ၏ မဲများကြောင့် ရွေးကောက်ပွဲရလဒ်များ ပြောင်းလဲမည်ကို ပါတီအချို့က စိုးရိမ်နေကြခြင်းဖြစ်သည်။

ယခုအခါ ပြည်ထောင်စုရွေးကောက်ပွဲကော်မရှင်သည် တပ်တွင်းမဲရုံများကို အများပြည်သူ ဝင်ထွက်သွားလာရလွယ်ကူသော၊ ပွင့်လင်းမြင်သာမှုရှိသော၊ တပ်တွင်းမဟုတ်သည့် အခြားသင့်လျော်သည့် နေရာတွင် ရွေးကောက်ပွဲကော်မရှင်အစီအစဉ်ဖြင့် ထားရှိရန် ပြည်သူ့လွှတ်တော်ရွေးကောက်ပွဲနည်းဥပဒေကို ပြင်ဆင်လိုက်ကြောင်း အောက်တိုဘာလ ၃ ရက်က ညွှန်ကြားချက်ထုတ်ပြန်ခဲ့ပြီဖြစ်သည်။

“ကျွန်တော်လည်း ဒဂုံမြို့နယ်ထဲမှာ တပ်ရင်းနှစ်ရင်းနဲ့ ဆုံခဲ့တာပေါ့နော်။ အင်ဂျင်နီယာတပ်ရယ်၊ နောက် အမှတ် (၂) စစ်ဆေးရုံပေါ့။ သူကလည်း အင်အားက များတယ်။ အဲဒီတော့ ကျွန်တော် ကြုံတွေ့ခဲ့တဲ့ အတွေ့အကြုံအရတော့ တပ်တွင်းမှာ မဲရုံမထားနဲ့။ အပြင်မှာ မဲရုံထားဆိုတဲ့ဟာကို ကျွန်တော် ထောက်ခံပါတယ်”ဟု ရန်ကုန်တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျက ဆိုသည်။

တပ်တွင်းမဲရုံများ

၂၀၁၂ ကြားဖြတ်ရွေးကောက်ပွဲမှ စတင်၍ တပ်တွင်းမဲရုံများသည် အတိုက်အခံပါတီများ၏ လက်ညှိုးထိုးခံခဲ့ရသည်။

တပ်မတော် တပ်ရင်းတပ်ဖွဲ့များ၊ ၎င်းတို့၏ မိသားစုဝင်များသည် မဲပေးရာတွင် အခြားသော မဲဆန္ဒရှင်များကဲ့သို့ ရွေးကောက်ပွဲကော်မရှင်က သတ်မှတ်ထားသည့် မဲရုံများတွင် မဲမပေးရဘဲ ၎င်းတို့ တပ်တွင်းရှိ မဲရုံများတွင်သာ မဲပေးခဲ့ခြင်း ဖြစ်သည်။

ရွေးကောက်ပွဲ ကျင်းပသည့် ရက်များတွင် အဆိုပါ မဲရုံများသို့ အဝင်အထွက်မှာ ခက်ခဲသည်။ အရပ်ဘက် အဖွဲ့အစည်းများ၊ ရွေးကောက်ပွဲ စောင့်ကြည့်လေ့လာသူများနှင့် မီဒီယာများသည် လုံခြုံရေးအဆင့်ဆင့်ကို ဖြတ်သန်း၍ စောင့်ကြည့်ကြရခြင်း ဖြစ်သည်။ အချို့မှာ စောင့်ကြည့်၍ပင် မရ။

“တပ်တွင်းမဲရုံမထားတာကတော့ တရားမျှတမှုပိုရှိတာပေါ့။ ကျွန်တော့် အတွေ့အကြုံအရဆိုရင် မြို့နယ်တွင်း တပ်ကနေ ကြိုတင်မဲလာယူတယ်။ လွှတ်တော်ကိုယ်စားလှယ်လောင်းတွေ၊ မဲရုံကိုယ်စားလှယ်တွေ လိုက်ပါ ကြည့်ရူခွင့် မရဘူးလေ။ တပ်က သူခေါ်မှ လိုက်ရမယ်ဆိုတာမျိုးပေါ့။ ဒါမျိုးတွေ ရှိတာပေါ့”ဟု ဦးမျိုးဝင်းက ဆိုသည်။

ဦးမျိုးဝင်းသည် ၂၀၁၅ ရွေးကောက်ပွဲ တွင် NLD ပါတီကိုယ်စားပြု၍ ကိုကိုးကျွန်းမဲဆန္ဒနယ်မှ ဝင်ရောက်ယှဉ်ပြိုင်ခဲ့ပြီးနောက် ကြံ့ခိုင်ရေးပါတီမှ အငြိမ်းစားကာကွယ်ရေးဦးစီးချုပ်(ရေ) ဗိုလ်ချုပ် သူရသက်ဆွေကို ရှုံးနိမ်ခဲ့သူဖြစ်သည်။

ကိုကိုးကျွန်းမဲဆန္ဒနယ်တွင် အခြားသော အနိုင်ရသူများမှာ ရန်ကုန်တိုင်းဒေသကြီး လုံခြုံရေးနှင့်နယ်စပ်ရေးရာ ဝန်ကြီးဟောင်း ဦးတင်ဝင်းနှင့် ဦးအောင်နိုင်တို့ ဖြစ်သည်။

အကြောင်းရင်း

တပ်တွင်းမဲရုံများ၏ အဓိကပြဿနာမှာ ပွင့်လင်းမြင်သာမှုအားနည်းခြင်းပင် ဖြစ်သည်။ ဝင်ရောက်ယှဉ်ပြိုင်သည့် ကိုယ်စားလှယ်လောင်းများပင်လျှင် ဝင်ရထွက်ရခက်ခဲသောကြောင့် အရပ်ဘက်အဖွဲ့အစည်းများ၊ ရွေးကောက်ပွဲစောင့်ကြည့်လေ့လာသူများနှင့် မီဒီယာများ၏ စောင့်ကြည့်ခံရမှုမှ ကင်းလွတ်လျက်ရှိသည်။

ထို့ကြောင့် မျက်ကွယ်ရာသဘော ရောက်လျက်ရှိနေသည်ဟု နိုင်ငံရေးအသိုင်းအဝိုင်းက ဆိုသည်။

ထို့အပြင် မဲရုံကို တပ်တွင်း၌ တည်ဆောက်သောကြောင့် တပ်မတော်သားတစ်ဦးသည် အခြားသော ၎င်း လိုလားသော ပါတီကို မဲပေးပါကလည်း သိရှိရန်လွယ်ကူကြောင်း၊ သို့မဟုတ်ပါကလည်း တပ်တွင်းမဲရုံအတွင်းမှ အခြားသော ပါတီကို ထောက်ခံသည့် မဲမည်မျှရှိသည်ကို သိရှိနိုင်သောကြောင့် တပ်မတော်သားများမှာ လွတ်လပ်စွာ ဆန္ဒမဲမပေးနိုင်ကြောင်း ဝေဖန်မှုများရှိသည်။

ရန်ကုန်တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျကမူ တပ်မတော်သားများသည် ရွေးကောက်ပွဲ နီးချိန်တွင် မဲပေးရန်အတွက် လမ်းညွှန်မှုရရှိထားပြီဖြစ်ကြောင်း The Voice Journal သို့ ဖွင့်ဟသည်။

“(၂၀၁၅ ရွေးကောက်ပွဲပြီးနောက်) ပြန်မေးကြည့်တော့ သူတို့ကို လမ်းညွှန်ချက်ပေးပြီးသားဗျ။ ဘယ်သူ့ကို မဲထည့်ရမလဲဆိုတာ လမ်းညွှန်ထားပြီးသား။ တပ်တွင်းမှာကျတော့ သူများကို မဲပေးရင် တို့ တပ်က ဘယ်သူကတော့ NLD ကို မဲပေးတယ်ဆိုတာ တိတိကျကျ သိတာပေါ့ဗျာ”ဟု ဦးကျော်ဇေယျက ဆိုသည်။

သို့သော်လည်း ရွေးကောက်ပွဲကော်မရှင်က တပ်တွင်းမဲရုံများကို ပြင်ပသို့ ထုတ်လိုက်မည်ဆိုပါက တပ်မတော်သားများ မည်သူကိုမဲပေးကြောင်း သိနိုင်မည် မဟုတ်သောကြောင့် မဲပြန့်သွားမည်ဟု ယူဆရကြောင်း ၎င်းက ဆိုသည်။

“အဲဒီတော့ အပြင်မှာကျရင် ပြည်သူနဲ့ ပေါင်းပြီး မဲပေးရင်တော့ ဒီမဲဟာ ပြန့်သွားနိုင်တာပေါ့။ သီးသန့်ကြီး မဟုတ်တော့ဘူးပေါ့”ဟု ၎င်းက ဆိုသည်။

လာမည့် ၂၀၂၀ ရွေးကောက်ပွဲတွင် တပ်မတော်သားများနှင့် ၎င်းတို့၏မိသားစုဝင်များသည် အများပြည်သူနှင့်အတူ တစ်သားတည်း မဲထည့်ရတော့မည်ဖြစ်၍ ၎င်းတို့ လွတ်လပ်သောဆန္ဒကို ဖော်ထုတ်နိုင်လိမ့်မည်ဟု မျှော်လင့်ကြောင်း NLD ပါတီ ပြန်ကြားရေးဗဟိုအလုပ်မှုဆောင်အဖွဲ့ဝင်ဖြစ်သူ မုံရွာအောင်ရှင်က ဆိုသည်။

“တပ်မတော်သား မဲဆန္ဒရှင်တွေအနေနဲ့ တပ်တွင်းမဲရုံမထားဘဲ အပြင်မှာ မဲဆန္ဒရှင်တွေနဲ့အတူ မဲပေးရတယ်ဆိုတော့ အတော်အသင့်တော့ သူတို့(တပ်မတော်သားတွေ)ရဲ့ လွတ်လပ်တဲ့ ဆန္ဒကို ဖော်ထုတ်နိုင်လိမ့်မယ်လို့တော့ ထင်ပါတယ်”ဟု ၎င်းက ဆိုသည်။

တပ်တွင်းမဲရုံများကို ပြင်ပသို့ ထုတ်၍ ပြည်သူနှင့်အတူ မဲပေးရန်စီစဉ်ခြင်းမှာ ကောင်းမွန်သော်လည်း ယင်း တစ်ခုတည်းနှင့် လွတ်လပ်မျှတသော ရွေးကောက်ပွဲဖြစ်ရန် မပြည့်စုံသေးဟု ၎င်းက ထောက်ပြသည်။

“အခု မေးခွန်းထုတ်ဖို့ရှိတာက တပ်မတော် ကြိုတင်မဲတွေပေါ့လေ။ အဲဒါ တွေလည်း အတော်ကို စိစစ်ဖို့ လိုပါလိမ့်မယ်။ တပ်တွင်းမဲရုံနဲ့ တပ်မတော်ကြိုတင်မဲတွေက ဆက်စပ်နေတော့ ဒါတွေလည်း လုပ်ဖို့လိုပါလိမ့်မယ်”ဟု ၎င်းက ဆိုသည်။

၂၀၁၅ ရွေးကောက်ပွဲတွင် NLD ပါတီကိုယ်စားပြု၍ ကိုကိုးကျွန်းမဲဆန္ဒနယ်မှ ဝင်ရောက်ယှဉ်ပြိုင်ခဲ့ပြီးနောက် ရှုံးနိမ့်ခဲ့သူ ဦးမျိုးဝင်းကမူ ကိုကိုးကျွန်းမဲဆန္ဒနယ်ရှိ တပ်မဲများသည် ဧရာဝတိုင်းဟိုင်းကြီးကျွန်းရှိ တပ်မဲများနှင့် တူညီနေသည်ကို တွေ့ခဲ့ရပြီး အရေအတွက်အားဖြင့် မဲ ၂၀၀ နီးပါးရှိသောကြောင့် ထိုစဉ်က ရွေးကောက်ပွဲ ကော်မရှင်ထံ ကန့်ကွက်ခဲ့ရသည်ဟု သူ့အတွေ့အကြုံကို The Voice Journal သို့ ဖွင့်ဟသည်။

ဤသို့သောဖြစ်ရပ်များသည်လည်း ရွေးကောက်ပွဲတွင် သတိထားရမည့် ကိစ္စရပ်များဖြစ်သည်ဟု ၎င်းက ဆိုသည်။

အခြားတစ်ဖက်တွင်လည်း တပ်တွင်းမဲရုံများကို ရွှေ့ပြောင်းခြင်းအပေါ်တွင် မတူညီသော အမြင်များလည်း ရှိနေပြန်သည်။

အခြားတစ်ဖက်မှအမြင်များ

အထူးသဖြင့် တပ်မတော်သည် တပ်တွင်းမဲရုံများရွှေ့ပြောင်းမည်ကို ငြင်းဆန်လျက်ရှိသည်။ တပ်မတော်သည် တပ်ပြင်ပသို့ ထွက်၍ ဆန္ဒမဲပေးရမည်ဆိုပါက အခက်အခဲများရှိကြောင်း ပြီးခဲ့သည့် စက်တင်ဘာလကုန်ကပင် တပ်မတော်နှင့် မီဒီယာများတွေ့ဆုံရာတွင် တပ်မတော်သတင်းမှန်ပြန်ကြားရေးအဖွဲ့မှ ဒုတိယဥက္ကဋ္ဌ ဗိုလ်ချုပ်ထွန်းထွန်းညီက ပြောကြားထားသည်။

ထို့အတူ တပ်မတော်တပ်ရင်းတပ်ဖွဲ့များနှင့် ၎င်းတို့၏မိသားစုများသည် တပ်ပြင်ပမဲရုံများတွင် မဲပေးရမည်ဆိုပါက တပ်မတော်၏ လုံခြုံရေးကျိုးပေါက်မည်ကို စိုးရိမ်ရသည်ဟု ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီဝင် ဒေါက်တာနန္ဒာလှမြင့်ကလည်း The Voice Journal သို့ ပြောကြားသည်။ 

မဲရုံများကို အပြင်ထုတ်ခြင်းအားဖြင့် တပ်မတော်သားများ၏ မဲစာရင်းများ၊ တပ်မတော်အင်အားစာရင်းများကို ကောက်ယူသည့် အဖွဲ့အစည်းများမှတစ်ဆင့် သိရှိသွားနိုင်သောကြောင့် လုံခြုံရေးအန္တရာယ်ရှိနိုင်ကြောင်း ၎င်းက ဆိုလိုခြင်းပင်ဖြစ်သည်။

“ကျွန်တော်တို့ တပ်အင်အားကို သူများသိသွားရင် အမျိုးသားလုံခြုံရေး အန္တရာယ်ရှိတာပေါ့ဗျာ”ဟု ဒေါက်တာ နန္ဒာလှမြင့်က ဆိုသည်။

လက်ရှိတွင် နိုင်ငံသည် အမျိုးသားရင်ကြားစေ့ရေးကို ရှေးရှုလျက်ရှိသည်ဟုဆိုထားပြီး တပ်တွင်းမဲရုံများကို ပြင်ပသို့ ထုတ်သည့် လုပ်ရပ်မှာ တပ်မတော်သားများ၏ ဆန္ဒမဲပေးမှုကို မယုံကြည်ရာရောက်သောကြောင့် ရေရှည်ကို ပြန်လည်မျှော်တွေးကာ ပြန်လည်သုံးသပ်သင့်ကြောင်း ၎င်းက ဆိုသည်။

မည်သို့ဆိုစေလာမည့် ၂၀၂၀ ပြည့်နှစ်တွင်ကား ရွေးကောက်ပွဲကို ကျင်းပတော့မည်ဖြစ်သည်။ လက်ရှိတွင် ရွေးကောက်ပွဲကျင်းပရေး ကော်မရှင်သည် တပ်မဲရုံများကို ပြောင်းရွှေ့ရေးနှင့်အတူ အခြားသော ပြင်ဆင်စရာရှိသည်များကိုလည်း ပြင်ဆင်လျက်ရှိပြီဖြစ်သည်။

၂၀၂၀ ပြည့်နှစ် ရွေးကောက်ပွဲကြီး တရားမျှတမှုရှိရေးတွင် တပ်မဲရုံများကို ပြောင်းရွေ့စေခြင်းသည် အချက်တစ်ချက်အနေနှင့်ပါဝင်သော်လည်း အဓိကမကျဘဲ အဓိကကျသည်မှာ နိုင်ငံတော်သမ္မတနှင့် တပ်မတော်ကာကွယ်ရေးဦးစီးချုပ်တို့သည် နိုင်ငံတစ်ဝန်းသို့ ယခုကဲ့သို့ ကြေညာချက်တစ်ခု ထုတ်ပေးရန်လိုသည်ဟု ရွေးကောက်ပွဲဆိုင်ရာပြည်သူလှုပ်ရှားမှုအဖွဲ့ (PACE) အမှုဆောင်ဒါရိုက်တာ ဦးစိုင်းရဲကျော်စွာမြင့်က ယခုကဲ့သို့ ဖွင့်ဟသည်။

“ဘယ်လိုကြေညာပေးရမလဲဆိုတော့ ပြည်သူ့ဝန်ထမ်းတွေရယ်၊ တပ်မတော်သား မဲဆန္ဒရှင်တွေရယ်ဟာ သူတို့ နိုင်ငံရေးဆန္ဒအရ ကြိုက်တဲ့ ပါတီကို မဲထည့်လို့ရကြောင်း၊ အဲဒီလိုထည့်လို့ အပြစ်မဖြစ်စေရကြောင်း ကြေညာပေးဖို့ လိုတယ်”

မည်သို့ဆိုစေ တပ်တွင်းမဲရုံများသည်ကား ပြည်သူ့မျက်စိအောက် ပြန်လည်ရောက်ရှိလာပေတော့မည် ဖြစ်ပေသည်။

ရဲနိုင်ဦး

You may also like...

Leave a Reply

Your email address will not be published. Required fields are marked *