ငွေကြေးခဝါချတိုက်ဖျက်မှု နိုင်ငံတကာသတ်မှတ်ချက် အညိုရောင်အဆင့်မှ လွတ်မြောက်နိုင်ရေး ပုဂ္ဂလိကပူးပေါင်းရန် တိုက်တွန်း

ရန်ကုန်၊ နိုဝင်ဘာ ၇

မြန်မာနိုင်ငံသည် ငွေကြေးခဝါချ တိုက်ဖျက်ရေးတွင် နိုင်ငံတကာအဆင့် အညွှန်းကိန်း၌ သတိထားစောင့်ကြည့်ရသည့် အညိုရောင်အဆင့်တွင်ပါဝင်လျက် ရှိသောကြောင့် ယင်းအဆင့်မှ လွတ်မြောက်နိုင်ရေးအတွက် ပုဂ္ဂလိကကဏ္ဍက ပူးပေါင်းပါဝင်ကြရန် ငွေကြေးခဝါချတိုက်ဖျက်ရေးဗဟိုအဖွဲ့ အတွင်းရေးမှူး ရဲမှူးချုပ် ကျော်ဝင်းသိန်းက ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် UMFCCI တွင် ပြောကြားသည်။

ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေး အမျိုးသားအဆင့် မဟာဗျူဟာလုပ်ငန်းစဉ် ရှင်းလင်းပွဲကို UMFCCI တွင် နိုဝင်ဘာလ ၇ ရက်က ပြုလုပ်ခဲ့ပြီး ယင်းအစည်းအဝေးသို့ တက်ရောက်ခဲ့သည့် စီးပွားရေးလုပ်ငန်းရှင် ဒေါက်တာစိုးထွန်းက ပြန်လည်ပြောပြခြင်းဖြစ်သည်။

မြန်မာနိုင်ငံသည် ၂၀၁၈ ခုနှစ်အတွင်း ငွေကြေးခဝါချတိုက်ဖျက်ရေးအမှု လေးမှုကိုသာ တရားစွဲအရေးယူနိုင်ခဲ့ပြီး အဆိုပါ အရေအတွက်သည် အညိုရောင်အဆင့်သို့ ရောက်ရှိနေသော မြန်မာနိုင်ငံအတွက် ငွေကြေးခဝါချတိုက်ဖျက်ရေးလုပ်ငန်းစဉ် နှောင့်နှေးလျက်ရှိသည်ဟုဆိုနိုင်ကြောင်း ၎င်းကရှင်းပြသည်။

“ငွေကြေးခဝါချရေးမှာ အစိုးရရော၊ ကျွန်တော်တို့ ပုဂ္ဂလိကရော ပူးပေါင်းဆောင်ရွက်ဖို့လိုတာပေါ့။ မပါဘူးဆိုရင် နိုင်ငံအလိုက် ငွေကြေးခဝါချမှုအန္တရာယ်ရှိတဲ့နိုင်ငံလို့ သတ်မှတ်ခံလိုက်ရရင် ပြည်ပရင်းနှီးမြှုပ်နှံမှုတွေဘာတွေ လျော့ ကျသွားနိုင်တာပေါ့” ဟု ဒေါက်တာစိုးထွန်း က ဆိုသည်။

လာမည့် ဇန်နဝါရီလတွင် ငွေကြေးခဝါချမှုတိုက်ဖျက်ရေး အစီရင်ခံအတွက် မြန်မာနိုင်ငံ၏ တိုးတက်မှုအခြေအနေများကို တင်ပြရမည်ဖြစ်ပြီး ပုဂ္ဂလိကက ပူးပေါင်းပါဝင်မှသာ အောင်မြင်နိုင်မည်ဖြစ်ကြောင်း ဒေါက်တာစိုးထွန်းက ပြန်လည်ပြောပြသည်။

မြန်မာနိုင်ငံသည် ငွေကြေးခဝါချမှုတိုက်ဖျက်ရေး မဟာဗျူဟာလုပ်ငန်းစဉ်ကို ရေးဆွဲအကောင်အထည်ဖော်လျက်ရှိပြီး မြန်မာနိုင်ငံ၏ ငွေကြေးခဝါချမှုများအနက် သစ်တောထွက်ပစ္စည်းနှင့် ကျောက်မျက်တို့သည် အများဆုံးဖြစ်ကာ ဒုတိယမှာ အခွန်ရှောင်ခြင်း၊ တတိယမှာ အဂတိလိုက်စားခြင်းနှင့် စတုတ္ထအများဆုံးမှာ မူးယစ်ဆေးဝါးဖြစ်ကြောင်း ပြီးခဲ့သည့် ဇွန်လက နေပြည်တော်ရှိ Hilton ဟိုတယ်တွင် ပြုလုပ်ခဲ့သည့် ငွေကြေးခဝါချမှုနှင့်အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေးဆိုင်ရာ အမျိုးသားအဆင့်မဟာဗျူဟာရှင်းလင်းခြင်း အလုပ်ရုံဆွေးနွေးပွဲတွင် ရဲမှူးချုပ် ကျော်ဝင်းသိန်းက ပြောကြားသည်။

မြန်မာနိုင်ငံတွင် အကြမ်းဖက်မှုကို ငွေကြေးထောက်ပံ့မှုများ မရှိသေးသော်လည်း အနာဂတ်ဖြစ်လာနိုင်ခြေထဲတွင် ထည့်သွင်း၍ ဆောင်ရွက်လျက်ရှိသည်ဟုလည်း ၎င်းက အဆိုပါပွဲတွင် ပြောကြားသည်။ 

You may also like...

Leave a Reply

Your email address will not be published. Required fields are marked *