တပ်မတော်သည် လက်နက်အားကိုးဖြင့် အာဏာသိမ်းခဲ့ကြောင်း လွှတ်တော်တွင် ဆွေးနွေးမှု တပ်မတော်သားလွှတ်တော်ကိုယ်စားလှယ် ကန့်ကွက်

ရန်ကုန်၊ နိုဝင်ဘာ ၇

တောင်သူလယ်သမားနေ့ကို မတ်လ ၂ ရက်ဟု သတ်မှတ်ထားခြင်းအစား ဆရာစံတောင်သူလယ်သမားအရေးတော်ပုံ စတင်ခဲ့သည့် ဒီဇင်ဘာလ ၂၂ ရက်နေ့ကို ပြောင်းလဲသတ်မှတ်ပေးရန် မေးမြန်းမှုတွင် တပ်မတော်သည် လက်နက် အားကိုးဖြင့် အာဏာသိမ်းခဲ့ကြောင်း ဆွေးနွေးချက် ပါဝင်သွားသဖြင့် ယင်းအချက်ကို ပယ်ဖျက်ပေးရန် တပ်မတော်သား လွှတ်တော်ကိုယ်စားလှယ်တစ်ဦးက နိုဝင်ဘာလ ၇ ရက်က ကျင်းပသည့် ပြည်သူ့လွှတ်တော်တွင် ကန့်ကွက်ဆွေးနွေးသည်။

စစ်ကိုင်းတိုင်းဒေသကြီး ဒီပဲယင်းမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးဝင်းမြင့်အောင်က တောင်သူလယ်သမားနေ့ကို မတ်လ ၂ ရက်နေ့အစား ဒီဇင်ဘာလ ၂၂ ရက်နေ့တွင် ပြောင်းလဲသတ်မှတ်ရန် အစီအစဉ် ရှိ မရှိ နိုဝင်ဘာလ ၇ ရက်က ကျင်းပသည့် ပြည်သူ့လွှတ်တော်တွင် မေးမြန်းခဲ့ခြင်းဖြစ်သည်။

မတ်လ ၂ ရက်နေ့သည် တပ်မတော်က နိုင်ငံတော်အာဏာကို လက်နက်အားကိုးဖြင့် သိမ်းယူခဲ့သည့်နေ့၊ လူထုက တင်မြှောက်သည့် အစိုးရ၊ ပြည်သူ့လွှတ်တော်၊ လူမျိုးစုလွှတ်တော်များကို ဖျက်သိမ်းသည့်နေ့၊ ပြည်သူအပေါင်း ဒီမိုကရေစီနှင့် လူ့အခွင့်အရေး စတင်ဆုံးရှုံးရသည့်နေ့၊ အာဏာရှင်စနစ်အောက် ပြည်သူ၊ ကျောင်းသား ပြားပြားမှောက်ရသည့်နေ့ဖြစ်သည့်အပြင် အာဏာရှင်တို့မွေးနေ့ဖြစ်ကြောင်း ပြည်သူ့လွှတ်တော်ကိုယ်စားလှယ် ဦးဝင်းမြင့်အောင်က ဆိုသည်။

ယင်းဆွေးနွေးချက်အပေါ် တပ်မတော်လွှတ်တော်ကိုယ်စားလှယ်တစ်ဦးက ကန့်ကွက်ရာတွင် လွှတ်တော်အတွင်း ဆွေးနွေးရာ၌ ပြည်သူ့လွှတ်တော်ဆိုင်ရာ နည်းဥပဒေ ၁၄၀၊ ၁၄၁ အရ မေးခွန်းနှင့်ဆိုင်သည့်အချက်များကို ကိုးကား၍ရ သော်လည်း မိမိ၏ထင်မြင်ယူဆချက်များ၊ မခိုင်လုံသည့်အကြောင်းရင်းများကို ထည့်သွင်းဆွေးနွေး၍မရကြောင်း ပြောသည်။

ပြည်သူ့လွှတ်တော်ဥက္ကဋ္ဌ ဦးတီခွန်မြတ်ကမူ လက်ရှိအချိန်တွင် မိမိတို့နိုင်ငံသည် အမျိုးသားရင်ကြားစေ့ရေးကို ရှေးရှုနေသည့်အချိန်ဖြစ်ရာ စကားလုံးအသုံးအနှုန်းကို သတိထားဆွေးနွေးစေလိုကြောင်း သတိပေးသည်။

ဦးဝင်းမြင့်အောင်၏ တောင်သူလယ်သမားနေ့ကို ပြောင်းလဲသတ်မှတ်ရန်မေးခွန်းနှင့်ပတ်သက်၍မူ တောင်သူလယ်သမားနေ့ကို တောင်သူလယ်သမားနှီးနှောဖလှယ်ပွဲများမှတစ်ဆင့် သတ်မှတ်ခဲ့ကြခြင်းဖြစ်ကြောင်း စိုက်ပျိုးရေး၊ မွေးမြူရေးနှင့် ဆည်းမြောင်းဝန်ကြီးဌာန ဒုတိယဝန်ကြီး ဦးလှကျော်က လွှတ်တော်တွင် ပြောကြားသည်။

၁၉၆၂ ခုနှစ် အုန်းတောတောင်သူလယ်သမားနှီးနှောဖလှယ်ပွဲ၊ ၁၉၆၃ ခုနှစ် ဒူးယားတောင်သူလယ်သမား နှီးနှောဖလှယ်ပွဲ၊ ပုပ္ပါးတောင်သူလယ်သမားနှီးနှောဖလှယ်ပွဲ၊ ၁၉၆၄ ခပေါင်းတောင်သူလယ်သမားနှီးနှောဖလှယ်ပွဲ၊ ၁၉၆၅ ခုနှစ်မှ ၁၉၆၈ ခုနှစ်အထိ ကျိုက္ကဆံတောင်သူလယ်သမားနှီးနှောဖလှယ်ပွဲများကို ကျင်းပခဲ့သည်ဟု ၎င်းကဆိုသည်။

၁၉၆၃ ခုနှစ်အထိ တောင်သူလယ်သမားနေ့ကို ဇန်နဝါရီလ ၁ ရက်နေ့အဖြစ် သတ်မှတ်ခဲ့သော်လည်း ၁၉၆၃ ခုနှစ် ပုပ္ပါးတောင်သူလယ်သမားနှီးနှောဖလှယ်ပွဲတွင် ဆရာစံအရေးတော်ပုံ၌ ပါဝင်ခဲ့သော တောင်သူလယ်သမားကြီးများက ဇန်နဝါရီလသည် တောင်သူလယ်သမားများ မအားလပ်သည့်ကာလဖြစ်သည့်အပြင် ဇန်နဝါရီလ ၁ ရက်ကို တောင်သူလယ်သမားနေ့အဖြစ် သတ်မှတ်မှုသည် အင်္ဂလိပ်နှစ်ကူးကို ဂုဏ်ပြုရာရောက်ကြောင်းတင်ပြပြီး ပွင့်လင်းရာသီဖြစ်သည့် မတ်လအတွင်း ကျင်းပရန် တင်ပြခဲ့ကြောင်း ဒုတိယဝန်ကြီးက ဆိုသည်။

ထို့ကြောင့် ပြင်ဆင်လိုပါက တောင်သူလယ်သမားများ၏ သဘောထားကိုရယူကာ ပြည်ထောင်စုအစိုးရ၏ လမ်းညွှန်မှုဖြင့်သာ ပြောင်းလဲနိုင်မည်ဖြစ်ပြီး လက်ရှိတွင် ပြင်ဆင်သတ်မှတ်ရန် အစီအစဉ်မရှိကြောင်း ဒုတိယဝန်ကြီးက ဖြေကြားသည်။ 

You may also like...

Leave a Reply

Your email address will not be published. Required fields are marked *