တောင်သူလယ်သမားရေးရာ ဝန်ကြီးဌာနဖွဲ့စည်းရေးအဆို လွှတ်တော်တွင် ရှုံးနိမ့်

ရန်ကုန်၊ နိုဝင်ဘာ ၇

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီဝင် ကျောင်းကုန်းမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးသိန်းထွန်းတင်သွင်းသည့် ပြည်ထောင်စုလွှတ်တော်တွင် တောင်သူလယ်သမားရေးရာဝန်ကြီးဌာန ဖွဲ့စည်းရေးအဆိုကို နိုဝင်ဘာလ ၇ ရက်တွင်ကျင်းပသော ပြည်သူ့လွှတ်တော်တွင် ဆွေးနွေးမဲခွဲရာ ရှုံးနိမ့်သွားသည်။

ပြည်သူ့လွှတ်တော်ကိုယ်စားလှယ် ဦးသိန်းထွန်းက တောင်သူလယ်သမားများ၏ အခွင့်အရေးများ၊ ရပိုင်ခွင့်များ၊ အခက်အခဲများကို နိုင်ငံတော်အစိုးရက စနစ်တကျ ကျစ်လျစ်ခိုင်မာစွာ လုပ်ဆောင်နိုင်ရန်၊ နိုင်ငံတော်၏ စိုက်ပျိုးရေး၊ မွေးမြူရေးကဏ္ဍ ပိုမိုဖွံ့ဖြိုးတိုးတက်ရန်နှင့် တောင်သူလယ်သမားမိသားစုများ၏ လူမှုဘ၀ဖွံ့ဖြိုးတိုးတက်ရေးအတွက် ဝန်ကြီးဌာနတစ်ခု ဖွဲ့စည်းဆောင်ရွက်ရန် တင်ပြခဲ့ခြင်းဖြစ်သည်။

ဦးသိန်းထွန်း၏ အဆိုကို လွှတ်တော်ကိုယ်စားလှယ် ၁၄ ဦးက ဆွေးနွေးခဲ့သည်။

အဆိုရှင် ဦးသိန်းထွန်းဦးကမူ သမ္မတရုံးဝန်ကြီးဌာနရှိသော်လည်း ပြည်ထောင်စုအစိုးရအဖွဲ့ရုံးဝန်ကြီးဌာန၊ နိုင်ငံခြားရေးဝန်ကြီးဌာနရှိသော်လည်း အပြည်ပြည်ဆိုင်ရာပူးပေါင်းဆက်သွယ်ရေးဝန်ကြီးဌာန၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနရှိသော်လည်း ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနကို ထပ်မံဖွဲ့စည်းခဲ့သောကြောင့် စိုက်ပျိုးရေး၊ မွေးမြူရေးနှင့် ဆည်းမြောင်းဝန်ကြီးဌာနရှိသော်လည်း တောင်သူလယ်သမားများ၏ အကျိုးအတွက် တောင်သူလယ်သမားရေးရာဝန်ကြီးဌာန ဖွဲ့စည်းသင့်ပါကြောင်း လွှတ်တော်သို့ တင်ပြခဲ့သည်။

သို့သော်လည်း ကျိုက်လတ်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးရန်လင်းကမူ အဆိုပါဝန်ကြီးဌာနများ ထပ်မံဖွဲ့စည်းရခြင်းသည် လုပ်ငန်းသဘောသဘာဝမ တူညီသောကြောင့်သာ ဖွဲ့စည်းရခြင်းဖြစ်ပြီး နိုင်ငံတော်၏ လက်ရှိဘဏ္ဍာရေးအခြေအနေအရလည်း ပြည်ထောင်စုအဆင့်တွင် ဝန်ကြီးဌာနတစ်ခု ထပ်မံဖွဲ့စည်းရန် အဆင်ပြေမည်မဟုတ်ကြောင်း ကန့်ကွက်ဆွေးနွေးသည်။

စိုက်ပျိုးရေး၊ ဆည်မြောင်းနှင့် လယ်ယာစိုက်ပျိုးရေးဝန်ကြီးဌာနသည် တောင်သူလယ်သမားရေးရာဝန်ကြီးဌာနဟု အမည်တပ်မထားသော်လည်း မြေပြင်အနေအထားတွင် တောင်သူလယ်သမားများအကျိုးအတွက် အဓိကထားဆောင် ရွက်လျက်ရှိပြီး အခြားသော တရုတ်နှင့် အိန္ဒိယနိုင်ငံတို့တွင်လည်း မြန်မာနိုင်ငံကဲ့သို့ပင် တောင်သူလယ်သမားအရေးကို ယခုပုံစံနှင့်ပင် ဦးစားပေးဆောင်ရွက်လျက်ရှိသောကြောင့် ပြည်ထောင်စုအဆင့်တွင် ဝန်ကြီးဌာနတစ်ခု ထပ်မံဖွဲ့စည်းရန် လိုအပ်မည်မဟုတ်ကြောင်း စိုက်ပျိုးရေး၊ မွေးမြူရေးနှင့် ဆည်းမြောင်းဝန်ကြီးဌာန ဒုတိယဝန်ကြီး ဦးလှကျော်က လွှတ်တော်တွင် ဆွေးနွေးသည်။

အဆိုပါကိစ္စအတွက် လွှတ်တော်တွင် မဲခွဲဆုံးဖြတ်ရာ ထောက်ခံမှု ၁၂၇ မဲ၊ ကန့်ကွက်မဲ ၂၂၁ မဲနှင့် ကြားနေမဲ ၇ မဲ ဖြင့် ကန့်ကွက်သူများသောကြောင့် ပြည်သူ့လွှတ်တော်ကိုယ်စားလှယ် ဦးသိန်းထွန်း၏ ပြည်ထောင်စုအဆင့်တွင် တောင်သူလယ်သမားရေးရာဝန်ကြီးဌာနအသစ်တစ်ခု ဖွဲ့စည်းရန်အဆိုမှာ ရှုံးနိမ့်သွားခြင်း ဖြစ်သည်။ 

You may also like...

Leave a Reply

Your email address will not be published. Required fields are marked *