မြန်မာ့စီးပွားနှင့် နိုင်ငံတော်၏နေရာစစ်

မည်သည့်နိုင်ငံတွင်မဆို စီးပွားရေးတိုးတက်ဖွံ့ဖြိုးရေးအတွက် အစိုးရခေါ် နိုင်ငံတော်သည် အရေးကြီးသောနေရာက ပါဝင်သောကြောင့် မြန်မာ့စီးပွားရေး ကောင်းမွန်စွာလည်ပတ်ရေး၊ ဖွံ့ဖြိုးတိုးတက်ရေးတွင်လည်း မြန်မာ့နိုင်ငံတော်၏နေရာသည် အလွန်အရေးကြီးသည်။ အရေးကြီးသည်ဆိုခြင်းမှာ နိုင်ငံတော်က နေရာပိုယူရန် တိုက်တွန်းခြင်းမဟုတ်ဘဲ နိုင်ငံတော်က သူ့နေရာ သူသိကာ ‘နေ’ တတ်ခြင်းကို ရည်ရွယ်သည်။

နိုင်ငံ့စီးပွားရေးတွင် State ခေါ် နိုင်ငံတော်၊ အလွယ်ခေါ် အစိုးရက ဝင်ပါခြင်းလွန်ကဲလျှင် state-controlled economy ဟု ခေါ်ကြသည်။ ထိုနိုင်ငံတို့တွင် ရေတိုရေရှည် ငါးနှစ်စီမံကိန်း၊ နှစ် ၃၀ စီမံကိန်း စသည့်စီမံကိန်းများ အသေးစိတ်ချပြီး စီးပွားရေးကို State ကပင် လုပ်သည့်အတွက် Planned Economy စီမံကိန်းစီးပွားရေးဟုလည်း ခေါ်ကြသည်။ မြန်မာနိုင်ငံတွင် မြန်မာ့ဆိုရှယ်လစ်လမ်းစဉ်ပါတီခေတ်တွင် state-controlled economy ကို ကျင့်သုံးခဲ့သည်။ အခြားတစ်ဖက်စွန်းတွင်မူ State သည် စီးပွားရေးလုပ်ငန်းများကို ပုဂ္ဂလိကကိုသာပေးလုပ်၊ လုပ်ငန်းများ ချောချောမွေ့မွေ့ လည်ပတ်နိုင်စေရန် ဥပဒေပြဋ္ဌာန်းပေးရုံလောက်သာ လုပ်ဟူသော ‘ဈေးကွက်ကိုလွှတ်သာထား’ laissez-faire ဝါဒရှိသည်။ ဈေးကွက်သည် သူ့အလိုလို လည်ပတ်နေလျှင် အကောင်းဆုံးဖြစ်သည့်အတွက် State က ခပ်ဝေးဝေးနေရမည်ဟု ယူဆကြသည်။

စီးပွားရေး အအောင်မြင်ဆုံးနိုင်ငံများတွင် ဈေးကွက်အကောင်းဆုံး လည်ပတ်အောင် State က ထိန်းကျောင်းသည်။ စီးပွားရေးကို ကောင်းစွာထိန်းကျောင်းနိုင်ရန် State သည် စီးပွားရေးအကြောင်း နားလည်သည့် မူဝါဒချမှတ်သူများဖြင့် ဖွဲ့စည်းထားရမည်ဖြစ်ပြီး ကုန်ပစ္စည်းကောင်းများ ဈေးချိုချိုဖြင့် ထုတ်နိုင်သည့် ပုဂ္ဂလိကစီးပွားရေးလုပ်ငန်းများ ပါဝင်လည်ပတ်နေသည့် ဈေးကွက်ဖြစ်လာအောင် ဖန်တီးရမည်။

မြန်မာနိုင်ငံတွင် ယခင်က State ကချည်း စီးပွားရေးတွင် လွှမ်းမိုးကြီးစိုးသော ခေတ်မှ State ၏ အခန်းကဏ္ဍကို လျှော့ချပြီး Market ဘက်သို့ ကူးပြောင်းနေသည်မှာ ဆယ်စုနှစ်သုံးစုရှိခဲ့ပြီ။ ပုဂ္ဂလိကကဏ္ဍသည် ယခင်ကထက် သန်မြန်လာသော်လည်း ဖွံ့ဖြိုးရန် အချိန်ယူနေရဆဲဖြစ်သည်။ State တွင်လည်း စီးပွားရေးကိုနားလည်သည့် အတွေ့အကြုံရှိ ဒေါင်ဒေါင်မြည်မူဝါဒချမှတ်သူများ နည်းပါးနေသေးသည်။ state-owned enterprise ခေါ် နိုင်ငံပိုင်စီးပွားရေးလုပ်ငန်းကြီးများလည်း တည်ရှိနေဆဲ၊ အချို့သည် အရှုံးပေါ်နေဆဲ ဖြစ်သည်။ နိုင်ငံပိုင်စီးပွားရေးလုပ်ငန်းကြီးများကို အရှုံးနည်းအောင် သို့မဟုတ် အမြတ်ပေါ်အောင် ပြုပြင်ပြောင်းလဲရာတွင် State သည် မှန်းသလောက်မပေါက်ဘဲ အခက်အခဲ အတော်ကြုံနေရပုံပေါ်သည်။

ဈေးကွက်စီးပွားရေး ကောင်းမွန်စွာလည်ပတ်အောင် ကြပ်မတ်ခြင်းသည် State ၏ တာဝန်ဖြစ်သည်။ ကြပ်မတ်ခြင်းသည် စီးပွားရေးလုပ်ငန်းများ လုပ်ရကိုင်ရခက်အောင် လုပ်ဆောင်ခြင်းမဟုတ်ဘဲ နိုင်ငံအတွက်၊ ပြည်သူအတွက် အကျိုးရှိမည့် စီးပွားရေးလုပ်ငန်းများကို မြေတောင်မြှောက်ပေးခြင်း၊ အကျိုးမဲ့စေမည့်လုပ်ငန်းများကို အပြစ်ပေးခြင်းတို့ ဖြစ်သည်။ အထူးသဖြင့် စီးပွားရေးလုပ်ငန်းနယ်ပယ်သစ်များကို ကြပ်မတ်ရာတွင် ခေတ်နှင့်အညီ တွေးခေါ်တတ်သော၊ စီးပွားရေးလုပ်ငန်းရှင်များနေရာမှ နိုင်ငံတကာစီးပွားရေးရှုထောင့်မှ လိုက်တွေးတတ်သည့် မူဝါဒချမှတ်သူများ State တွင် လိုအပ်သည်။

အရှုံးပေါ်နေသော၊ အမြတ်မထွက်သော နိုင်ငံပိုင်လုပ်ငန်းကြီးများကို ပြုပြင်ပြောင်းလဲရန်၊ ပုဂ္ဂလိကပိုင်ပြောင်းရန်အတွက် စက်မှုဝန်ကြီးဌာနကို စီမံကိန်းနှင့် ဘဏ္ဍာရေးဝန်ကြီးဌာနနှင့် ပေါင်းလိုက်သည့် ယခုကာလတွင် နိုင်ငံတော်၏ ‘နေရာ’ သည် ယခင်ကထက်ပင် ပိုစကားပြောလာသည်။

‘နိုင်ငံတော်’ သည် စီးပွားရေးအမြင်ရှိရမည်။ မြန်မာ့ ‘ဈေးကွက်’ ကို တက်တက်ကြွကြွ အားပေးရမည်။ ယင်းသည်ပင် မြန်မာ့ ‘နိုင်ငံတော်၏နေရာ’ ဖြစ်သည်။ 

 

အယ်ဒီတာ
၁၄.၁၁.၂၀၁၉  

You may also like...

Leave a Reply

Your email address will not be published. Required fields are marked *