ကျောချင်းကပ်ချိန်တန်ပြီ

မြန်မာနိုင်ငံကို International Court of Justice တွင် OIC (Organization of Islamic Cooperation) ၏ ကျောထောက်နောက်ခံဖြင့် ဂမ်ဘီယာနိုင်ငံက ရခိုင်အရေး တရားစွဲဆိုလိုက်ခြင်းကြောင့် ကံတူအကျိုးပေး မြန်မာနိုင်ငံသားအားလုံး၊ အဖွဲ့များအားလုံးသည် အချင်းချင်း ဝိဝါဒကွဲပြားခြင်းများကို အသာထားပြီး ကျောချင်းကပ်ချိန်တန်ပြီ။

ထိုသို့ တရားစွဲဆိုလိုက်ခြင်းသည် မြန်မာနိုင်ငံပေါ် ကျရောက်လာသော နိုင်ငံတကာဖိအားများအနက် နောက်ဆုံးပေါ်ဖိအားဖြစ်ပြီး နောက်ဆုံးမဟုတ်သေးပါ။ နောက်ထပ်ဆက်ရန် ရှိသေးသည်။

မြန်မာနိုင်ငံသည် နိုင်ငံငယ် Small State ဖြစ်သည်။ ဆင်းရဲနိုင်ငံဖြစ်သည်။ ကြီးမားကျယ်ပြန့်ပြီး ကာလတာရှည် ဆက်တိုက်လာမည့် နိုင်ငံတကာဖိအားများကို ရင်ဆိုင်ရာတွင် နိုင်ငံကြီးများကဲ့သို့ ငွေကြေး၊ နိုင်ငံတကာဝင်ဆံ့မှု၊ စစ်အင်အား စသည့် ရင်းမြစ်များ မကြွယ်ဝသည့်အတွက် ရှိစုမဲ့စုအားများကို စုစုစည်းစည်းဖြင့် ရင်ဆိုင်ပါမှ ထိရောက်မည်ဖြစ်သည်။ နိုင်ငံပြင်ပတွင် နိုင်ငံအတွက်တိုက်ပွဲဝင်နေစဉ် နိုင်ငံတွင်းတွင် တစ်ဖွဲ့နှင့်တစ်ဖွဲ့ချနေလျှင် ကျောလုံမည်မဟုတ်။ စုစည်းအင်အားမဟုတ်ဘဲ ပြန့်ကျဲအင်အားဖြင့် တိုက်ပွဲဝင်ရခြင်းကြောင့် ဆုံးရှုံးသွားလျှင် နိုင်ငံသားအားလုံး၊ အဖွဲ့အစည်းများအားလုံး အထိနာမည်။

တစ်ဖန် မြန်မာ့အသိုင်းအဝိုင်းတွင် သမိုင်းအမွေအရ အက်ကြောင်းများရှိရာ တာရှည်ပြီး ကြီးမားကျယ်ပြန့်သော နိုင်ငံတကာဖိအားသည် နိုင်ငံ၏ အက်ကြောင်းများကို ပိုမိုနက်ရှိုင်းသွားစေပြီး ပြန်မစေ့နိုင်လောက်အောင် အစိတ်စိတ်အမြွာမြွာကွဲထွက်သွားစေနိုင်သည့် အန္တရာယ်သည် သီအိုရီအရမဟုတ်ဘဲ လက်တွေ့ရှိနေသည်။

သဘောထားမတိုက်ဆိုင်သည့် သွေးရင်းသားရင်း အဖွဲ့အစည်းများ၊ နိုင်ငံသားများသည် နိုင်ငံအတွက် ယခုကျောချင်းကပ်ပါမှ ဖိအားကြောင့် ကွဲထွက်မည့်အန္တရာယ်ကိုလည်းကောင်း၊ ကျောမလုံသောကြောင့် အင်အားမပြည့်ဘဲ ရင်ဆိုင်ရလျှင် နိုင်ငံတကာစစ်မြေပြင်တွင် ဆုံးရှုံးနိုင်သည့်အန္တရာယ်ကိုလည်းကောင်း ကာကွယ်နိုင်မည်ဖြစ်သည်။ 

 

အယ်ဒီတာ
၂၁.၁၁.၂၀၁၉

You may also like...

Leave a Reply

Your email address will not be published. Required fields are marked *