မြန်မာသို့ တရုတ်၏ ဂြိုဟ်တုနည်းပညာခြေလှမ်း

Chinasat 12 ၏ EIRP Coverage (လွှင့်အားရရှိနိုင်မှု) အခြေအနေကို ဖော်ပြနေသည့် လမ်းကြောင်းပြမြေပုံ

တရုတ်နိုင်ငံ၏ နည်းပညာကဏ္ဍတွင် ၉၀ ရာခိုင်နှုန်းခန့် လွှမ်းခြုံထားနိုင်သည်ဟုဆိုသော Chinasat ဂြိုဟ်တုဆက်သွယ်ရေး နည်းပညာကုမ္ပဏီက မြန်မာနိုင်ငံသို့ ဝင်ရောက်ရန် ကြံရွယ်နေသည်။

“မြန်မာပြည်တွင်းမှာ အဆင့်မြင့်တဲ့ နည်းပညာနဲ့ ဝန်ဆောင်မှုကို အသုံးပြုစေချင်တာပါ” ဟု Chinasat ၏ မြန်မာပြည်ကိုယ်စားလှယ် Golden Myanmar Northern Arrow (GMNA) ကုမ္ပဏီ အုပ်ချုပ်မှုဒါရိုက်တာ ဦးမြင့်သန်းဦးက ပြောကြားသည်။

China Satellite Communication Co., Ltd. ဟု အမည်ရှိသည့် ယင်းကုမ္ပဏီသည် အာကာသယာဉ်အမျိုးမျိုး ဒီဇိုင်းရေးဆွဲထုတ်လုပ်လွှတ်တင်ခြင်းများကို ပြုလုပ်ပေးလျက်ရှိသည့် တရုတ်အစိုးရပိုင် အာကာသ၊ သိပ္ပံနှင့် နည်းပညာကော်ပိုရေးရှင်း (China Aerospace Science and Technology Corporation-CASC) ၏ လက်အောက်ခံ ကုမ္ပဏီတစ်ခု ဖြစ်သည်။

ကမ္ဘာ့နိုင်ငံအသီးသီးသို့ နည်းပညာနှင့် ဝန်ဆောင်မှုပေးလျက်ရှိပြီး တရုတ်ပြည်တွင်းဈေးကွက်ကို အများဆုံးရယူထားကာ မောင်းသူမဲ့ရထား၊ China Mobile၊ Broadcaster များနှင့် ဆက်သွယ်ရေးနည်းပညာဆိုင်ရာကဏ္ဍများတွင် အသုံးပြုနေသည်ဟု Chinasat ၏ ဝက်ဘ်ဆိုက်တွင် ဖော်ပြထားသည်။

Chinasat က မြန်မာပြည်တွင်းသို့ မည်ကဲ့သို့ ဝင်ရောက်ရန် ကြံရွယ်နေပါသနည်း။ အထူးသဖြင့် ရုပ်သံလိုင်းများသို့ ဝင်ရောက်လိုသည့် သဘောမျိုးရှိနေသည်။

“ပြည်တွင်းက ရုပ်သံလိုင်းတစ်ခုဖြစ်တဲ့ မြ၀တီရုပ်သံလိုင်းမှာ စက်တင်ဘာလ နောက်ဆုံးပတ်အတွင်းက စမ်းသပ်သုံးစွဲကြည့်ပြီးသွားပြီ” ဟု ဦးမြင့်သန်းဦး က ၎င်းတို့ ခရီးရောက်နေသည့် အနေအထားကို ပြောပြသည်။

မြ၀တီရုပ်သံလိုင်း ထုတ်လွှင့်နိုင်ရန်အတွက် ယခင်က အင်ဒိုနီးရှားနိုင်ငံမှ Palapa-D ဂြိုဟ်တုဆက်သွယ်ရေးစနစ်ကို ငှားရမ်းအသုံးပြုခဲ့ပြီး လက်ရှိတွင် ငှားရမ်းမှုသက်တမ်း ပြည့်ခါနီး၍ ယင်းကဲ့သို့ အခြားဂြိုဟ်တုဆက်သွယ်ရေးကုမ္ပဏီတစ်ခုကို ပြောင်းလဲရန် လုပ်ဆောင်နေခြင်း ဖြစ်နိုင်ကြောင်း နည်းပညာလုပ်ငန်းနှင့် ဆက်စပ်နေသူအချို့က ခန့်မှန်းပြောဆိုသည်။

မြ၀တီရုပ်သံလိုင်းသည် တပ်မတော်မှ တင်ဆက်ထုတ်လွှင့်လျက်ရှိသည့် အခမဲ့ရုပ်သံလိုင်းတစ်ခုဖြစ်ပြီး ကြည့်ရှုသူ သန်းပေါင်းများစွာ ရှိနေသည်။

ရုပ်သံလိုင်း တင်ဆက်ထုတ်လွှင့်နိုင်ရန်အတွက် Satellite ဂြိုဟ်တုဆက်သွယ်ရေးနည်းစနစ် လိုအပ်ပြီး အရည်အသွေးပြည့်ဝသည့် High Definition (HD) ဖြင့် ဖမ်းယူကြည့်ရှုနိုင်ရန် ပြည်တွင်းရုပ်သံလိုင်းများက ကြိုးပမ်းလာနေသည်။

ဥပမာ – Channel 7 ရုပ်သံလိုင်းဆိုလျှင် SD (Standard Definition) စနစ်မှ HD စနစ်သို့ ပြောင်းလဲကြည့်ရှုကြရန် နာမည်ကျော်အစီအစဉ်တင်ဆက်သူ ကောင်းထက်ဇော်ဖြင့် ကြေညာလျက်ရှိနေသည်။ အခြားသော ရုပ်သံလိုင်းအချို့သည်လည်း SD နှင့် HD နှစ်မျိုးစလုံးဖြင့် ထုတ်လွှင့်ပေးလျက်ရှိနေကြောင်း ရုပ်သံလိုင်းကြည့်ရှုသူအချို့ထံမှ သိရှိရသည်။

“စမ်းသပ်သုံးစွဲမှုအရတော့ ရုပ်သံလိုင်းဘက်က ကြိုက်နှစ်သက်မှု ရှိပါတယ်။ Satellite တစ်ခုရဲ့ အရေးအကြီးဆုံးဖြစ်တဲ့ Watt အားသက်သာမှု၊ Elevation Angle နဲ့ Coverage Area မှာ မြန်မာနိုင်ငံအတွက် Chinasat 12 ဟာ အလွန်ကောင်းမွန်ပါတယ်။ ငှားရမ်းသုံးစွဲမယ် မသုံးစွဲဘူးကတော့ မသိရသေးပါဘူး” ဟု ဦးမြင့်သန်းဦးက ထပ်လောင်းပြောဆိုသည်။

အကယ်၍ မြ၀တီရုပ်သံလိုင်းက ငှားရမ်းသုံးစွဲလိုက်ပါက Chinasat သည် မြန်မာပြည်သို့ ပထမဆုံးရောက်ရှိလာနိုင်မည်ဖြစ်ပြီး နည်းပညာအသုံးပြုရသည့် အခြားသော ကုမ္ပဏီများ (ဥပမာ- ပြည်တွင်းဘဏ်များ) နှင့်လည်း ချိတ်ဆက်လုပ်ကိုင်နိုင်ရန် ဆက်လက်ဆောင်ရွက်မည်ဟု ယင်းကုမ္ပဏီက ဆိုသည်။

လက်ရှိတွင်လည်း တရုတ်ပြည်တွင်းနှင့် ကမ္ဘာ့နိုင်ငံအသီးသီးသို့ ဘဏ်ဝန်ဆောင်မှုလုပ်ငန်း၊ ကမ်းလွန်ပင်လယ်ပြင် ဆက်သွယ်ရေး၊ ရုပ်သံထုတ်လွှင့်မှု၊ အင်တာနက်၊ ဆက်သွယ်ရေး စသည့် ကဏ္ဍငါးခုအတွက် ဝန်ဆောင်မှုများကို ပေးနေသည်ဟု ဆိုသည်။

Chinasat နှင့် အခြားသော နည်းပညာဆိုင်ရာ ဝက်ဘ်ဆိုက်များတွင် လေ့လာမှုများအရ Chinasat ၏ နည်းပညာကောင်းမွန်မှုသည် အာရှ အဆင့် ၂ ဖြစ်ပြီး ပထမမှာ JapanSat ဖြစ်သည်။ ထိုင်းနိုင်ငံပိုင် Thai Com သည် အဆင့် ၅ တွင် ရှိပြီး တရုတ်နိုင်ငံပိုင် နည်းပညာကုမ္ပဏီတစ်ခုဖြစ်သည့် AsiaSat သည် အဆင့် ၆ ရှိနေသည်။

Chinasat သည် မြန်မာပြည်သို့ ယခုမှ ဝင်ရောက်ရန် ဟန်ပြင်လျက်ရှိသော်လည်း AsiaSat မှာကား ပြည်တွင်း၌ အနည်းဆုံး သုံးနှစ်ခန့် ဝင်ရောက်နေခဲ့ပြီး ဖြစ်သည်။

၂၀၁၆ ခုနှစ် မေလအတွင်း ကမ္ဘောဇကုမ္ပဏီများအုပ်စု၏ လုပ်ငန်းခွဲ KBZ Gateway ကုမ္ပဏီသည် AsiaSat ကုမ္ပဏီနှင့် ပူးပေါင်းမှုတစ်ရပ် လုပ်ဆောင်ခဲ့သည်။

ရည်ရွယ်ချက်မှာ ကမ္ဘောဇကုမ္ပဏီများအုပ်စုရှိ ဘဏ်လုပ်ငန်းနှင့် ငွေကြေးဆိုင်ရာ ဝန်ဆောင်မှုလုပ်ငန်းများကို ဂြိုဟ်တုဆက်သွယ်ရေးနည်းပညာဖြင့် ဝန်ဆောင်မှုများပေးနိုင်ရန် ဖြစ်သည်။ လက်ရှိ အသုံးပြုနေသည့် ATM စနစ်၊ KBZ Pay စနစ်များ၏ မူလအစပင် ဖြစ်သည်။

Chinasat 12 ၏ မြန်မာ့မြို့ကြီးအချို့သို့ ရောက်ရှိနိုင်မည့် EIRP Value (လွှင့်အား) ဖော်ပြမှုဇယား

AsiaSat သည် ဟောင်ကောင်စတော့ခ်အိတ်ချိန်းဝင် ကုမ္ပဏီဖြစ်ပြီး တရုတ်နိုင်ငံပိုင် China International Trust Investment Corporation (CITIC Limited) နှင့် The Carlyle Group တို့က အဓိကရှယ်ယာရှင်များဖြစ်ကာ ပုဂ္ဂလိကပိုင်အဖြစ် ကူးပြောင်းရန် ကြိုးပမ်းနေသည်ဟု ယင်းကုမ္ပဏီ၏ ဝက်ဘ်ဆိုက်တွင် ဖော်ပြထားချက်အရ သိရသည်။

ဂြိုဟ်တုအရေအတွက် ငါးခုပိုင်ဆိုင်ထားပြီး KBZ Gateway နှင့် ပူးပေါင်း၍ မြန်မာနိုင်ငံအတွက် အသုံးပြုနေသည့် ဂြိုဟ်တု၏အမည်မှာ Asia Sat 9 ဖြစ်သည်။ မြန်မာနိုင်ငံတွင် ဂြိုဟ်တုဆက်သွယ်ရေးစနစ်ကို အသုံးပြုနေသည့် လုပ်ငန်းအချို့ရှိသည်။ ကမ္ဘောဇအုပ်စုသည် AsiaSat ကို အသုံးပြုနေပြီး နိုင်ငံပိုင် မြန်မာ့အသံနှင့် ရုပ်မြင်သံကြား (MRTV)သည် Thai Com ကို သုံးစွဲလျက်ရှိသည်။

အလားတူ တပ်မတော်ပိုင် မြ၀တီရုပ်မြင်သံကြားသည်လည်း Palapa D ကို လက်ရှိအချိန်ထိ သုံးစွဲလျက်ရှိသည်။

ဆက်သွယ်ရေးအော်ပရေတာများဖြစ်သည့် MPT သည် နိုင်ငံပိုင် Myanmar Sat ၊ Ooredoo သည်လည်း Palapa D ကို သုံးစွဲလျက်ရှိသည်ဟု နည်းပညာအသိုင်းအဝိုင်းထံမှ သိရှိရသည်။

AsiaSat သည် တရုတ်နိုင်ငံပိုင်ဖြစ်သော်လည်း နည်းပညာပိုင်းဆိုင်ရာ ပံ့ပိုးပေးနေသည့် ကုမ္ပဏီသည် ဥရောပနည်းပညာထိပ်တန်းစာရင်းဝင် ပြင်သစ်အခြေစိုက် Thales Alenia Space ကုမ္ပဏီဖြစ်သည်။

ဂြိုဟ်တုအလုံးပေါင်း ၁၆ လုံးရှိပြီး တရုတ်နိုင်ငံအပြင် ဩစတြေးလျ၊ အရှေ့တောင်အာရှဒေသ၊ တောင်အာရှ၊ အရှေ့အလယ်ပိုင်းဒေသနှင့် ဥရောပနိုင်ငံအသီးသီးသို့ ဂြိုဟ်တုနှင့် ပတ်သက်သည့် ဝန်ဆောင်မှုများ ပေးနေသည်ဟု ကုမ္ပဏီ က ဆိုသည်။

တစ်နှစ်လျှင် အမေရိကန်ဒေါ်လာ သန်း ၃၀၀ ဝန်းကျင် ဝင်ငွေရှိကြောင်း ယင်းကုမ္ပဏီ၏ တရားဝင်ထုတ်ပြန်ချက်များအရ သိရပြီး ငွေကြေးအရဖြစ်စေ၊ နည်းပညာအရဖြစ်စေ၊ ဝန်ဆောင်မှုအရဖြစ်စေ အင်အားကောင်းသည့် ကုမ္ပဏီတစ်ခုဟု Golden Myanmar Northern Arrow(GMNA) ကုမ္ပဏီက ဆိုသည်။

“China Mobile လို၊ မောင်းသူမဲ့ရထားလို နေ့စဉ် မရှိမဖြစ်အသုံးပြုရတဲ့ ပစ္စည်းတွေမှာ ဒီ Satellite ကို အသုံးပြုနေတဲ့အတွက် တစ်ခုခု ချို့ယွင်းဖို့ဆိုတာ အင်မတန်နည်းပါတယ်။ သူက ဂြိုဟ်တုတစ်လုံးထဲ မဟုတ်ဘူး။ ၁၆ လုံးတောင်ရှိပြီး အရံသုံးလုံးက အဆင်သင့် ရှိနေတယ်။ တစ်ခုခု ချို့ယွင်းချက်ဖြစ်လာရင် တစ်ခါတည်း Backup လုပ်ပေးနိုင်ဖို့ပေါ့” ဟု ဦးမြင့်သန်းဦးက ပြောဆိုသည်။

နေ့စဉ် လူနေမှုဘ၀တွင် မရှိမဖြစ် သုံးစွဲလာရသည့် မိုဘိုင်းလ်ဖုန်း၊ အင်တာနက်၊ ရုပ်သံအစီအစဉ်များ၊ ရေဒီယိုအစီအစဉ်များ စသည်တို့ကို ထိတွေ့နေကြရသော်လည်း ယင်းကဲ့သို့ ထုတ်လွှင့်တင်ဆက် ဖမ်းယူသုံးစွဲနိုင်ရန် အဓိကအရေးကြီးသည်မှာ ဂြိုဟ်တုစနစ်ဖြစ်ကြောင်းကို သာမန်လူတို့အတွက် နားလည်ရန် မလွယ်ကူပေ။

ဂြိုလ်တုအမျိုးမျိုးရှိပြီး ပြည်တွင်းသို့ ဝင်ရောက်လာမည့် ဂြိုလ်တုကုမ္ပဏီ များပြားလာပါက အရည်အသွေးနှင့် ဝန်ဆောင်မှုကို စားသုံးသူက စိတ်ကြိုက်ရွေးချယ်နိုင်မည်ဟု မန္တလေးမြို့ခံ ကွန်ပျူတာပညာရှင် ဦးရဲမြတ်သူက သုံးသပ်သည်။

“အခုနောက်ပိုင်း တရုတ်ဂြိုဟ်တုတွေက GPS လိုမျိုး သွားတဲ့ဟာတွေ ရှိတယ်။ တရုတ်ဂြိုဟ်တုရှိရင် ဖုန်းတွေရဲ့ GPS ပိုကောင်းလာတာမျိုးတွေ ဖြစ်လာနိုင်တယ်” ဟု ၎င်းကဆိုသည်။

ယခင်က မြန်မာ့ဆက်သွယ်ရေးက ရောင်းချသည့် MPT ဆင်းမ်ကတ်များသာရှိသည့်အတွက် ဈေးကြီးပေးသုံးစွဲခဲ့ကြရသော်လည်း ပုဂ္ဂလိကလုပ်ငန်းရှင်များ ဖိတ်ခေါ်ပြီးနောက် တယ်လီနော၊ အူရီဒူး စသည့် အော်ပရေတာများ အပြိုင်အဆိုင် ဝင်ရောက်လာပြီးနောက် ဈေးနှုန်း သက်သာသည့် မိုဘိုင်းလ်ဖုန်း ဆက်သွယ်ရေးစနစ်ကို ပြည်သူများ ခံစားခဲ့ကြရသည်ဟု ဦးမြင့်သန်းဦးက ပြောသည်။

“အလားတူပဲ ဂြိုဟ်တုသုံးစွဲမှုမှာလည်း အပြိုင်အဆိုင် ဖြစ်လာမယ်ဆိုရင်၊ ရွေးချယ်စရာရှိလာမယ်ဆိုရင် ဈေးနှုန်းသက်သာလာပြီး ဝန်ဆောင်မှုတွေ ပိုကောင်းလာမယ်” ဟု ဦးမြင့်သန်းဦးက မှတ်ချက်ပြုသည်။ 

မြတ်(ကလေး)

You may also like...

Leave a Reply

Your email address will not be published. Required fields are marked *