အရှုံးပေါ်နိုင်ငံပိုင်စက်ရုံများအတွက် အရေးပေါ်ကုထုံး

အရှုံးပေါ်နေသည့် နိုင်ငံပိုင်စက်ရုံ၊ အလုပ်ရုံများအရေးအတွက် ပြည်ထောင်စုဝန်ကြီးဌာနနှစ်ခုကို တစ်ခုတည်းအဖြစ် ပေါင်းစည်းမည်ဖြစ်ကြောင်း နိုင်ငံတော်သမ္မတရုံးက ယခုနှစ်အောက်တိုဘာလ  ၃၁ ရက်နေ့တွင် ထုတ်ပြန်လိုက်သည်။

စက်မှုဝန်ကြီးဌာနလက်အောက်ရှိ အရှုံးပေါ်နေသော နိုင်ငံပိုင်စက်ရုံများကို ပုဂ္ဂလိကပိုင်ပြုလုပ်ရာတွင် စနစ်တကျနှင့် ထိရောက်မြန်ဆန်စွာ အသွင်ကူးပြောင်းနိုင်ရန် စီမံကိန်း၊ ဘဏ္ဍာရေးနှင့် စက်မှုဝန်ကြီးဌာနအဖြစ် ပြင်ဆင်ဖွဲ့စည်းမည်ဖြစ်ကြောင်း နိုင်ငံတော်သမ္မတရုံး၏ ထုတ်ပြန်ချက်တွင် ဖော်ပြထားသည်။

စက်မှုဝန်ကြီးဌာန၏ဖွဲ့စည်းပုံသည် ဗဟိုချုပ်ကိုင်အမိန့်ပေးသည့် စီးပွားရေးစနစ်ဖြစ်ပြီး လက်ရှိအစိုးရဖော်ဆောင်နေသော ဈေးကွက်စီးပွားရေးစနစ်နှင့် ကိုက်ညီမည့် ဖွဲ့စည်းပုံအသစ်သို့ အသွင်ကူးပြောင်းရန်လွန်စွာအရေးကြီးကြောင်း စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီးဦးဆက်အောင်က ပြောကြားသည်။

အဆိုပါဝန်ကြီးဌာနနှစ်ခုကို တစ်ခုတည်းအဖြစ် ပြင်ဆင်သတ်မှတ်နိုင်ရေးအတွက် ယခုနှစ် နိုဝင်ဘာလ ၁၅ ရက်နေ့ကျင်းပသည့် ပြည်ထောင်စုလွှတ်တော်တွင် လာရောက်ရှင်းလင်းဖြေကြားစဉ် ၎င်းက အထက်ပါအတိုင်းပြောဆိုခဲ့ခြင်းဖြစ်သည်။

စက်မှုဝန်ကြီးဌာနလက်အောက်ရှိ ဦးစီးဌာနနှစ်ခု၏ လုပ်ငန်းစဉ်များ တစ်ခုနှင့် တစ်ခုထပ်နေခြင်း၊ ခေတ်ကာလနှင့် မညီသောလုပ်ငန်းစဉ်များ ဖြစ်နေခြင်း၊ လုပ်ငန်းသဘာဝနှင့် ဌာနအမည် မဆီလျော်ခြင်းစသည်တို့ကြောင့် ယင်းအချက်တို့ကို ပြောင်းလဲပြင်ဆင်ရန် အထူးအရေးကြီးကြောင်း ဦးဆက်အောင်က ဆိုသည်။

အရှုံးပေါ်နေသည့် နိုင်ငံပိုင်စက်ရုံ၊ အလုပ်ရုံများကို မဟာဗျူဟာအရအရေးပါမှုနှင့် စီးပွားဖြစ်ရပ်တည်နိုင်မှုအပေါ် အခြေခံကာ အုပ်စုခွဲခြားသတ်မှတ်ပြီး အသွင်ကူးပြောင်းမှုကို စနစ်တကျလုပ်ဆောင်နိုင်ရန် ယခုလိုပေါင်းစည်းခြင်းဖြစ်ကြောင်း ၎င်းက ရှင်းလင်းသည်။

ပြည်သူ့ဘဏ္ဍာများစွာ စိုက်ထုတ်သုံးစွဲနေရသည့် နိုင်ငံပိုင်စက်ရုံ၊ အလုပ်ရုံ များကို ပုဂ္ဂလိကပိုင်ပြုလုပ်ရေး အစဉ်တစိုက်ပြောဆိုထောက်ပြမှုများရှိပြီး ယခင်အစိုးရများ လက်ထက်ကပင် ယင်းအချက်ကို လုပ်ဆောင်ခဲ့ကြခြင်းဖြစ်သည်။

သို့သော် လက်ရှိအချိန်ထိ အရှုံးပေါ်နေသည့် နိုင်ငံပိုင်စက်ရုံ၊ အလုပ်ရုံ၊ အဖွဲ့အစည်းများစွာကျန်ရှိနေပြီး အောင်မြင်စွာအသွင်ကူးပြောင်းရေးကို မဆောင်ရွက်နိုင်သေးပေ။

နိုင်ငံပိုင်လုပ်ငန်းများကို ပုဂ္ဂလိကသို့ လွှဲပြောင်းရန် န၀တ အစိုးရလက်ထက် ၁၉၉၅ ခုနှစ်မှစတင်ကာ ပုဂ္ဂလိကပိုင်ပြုလုပ်ရေး ကော်မရှင် ဖွဲ့စည်းဆောင်ရွက်ခဲ့ပြီး ဦးသိန်းစိန်အစိုးရလက်ထက်မှ လက်ရှိအစိုးရလက်ထက်အထိ အဆိုပါကော်မရှင်ကို အကြိမ်ကြိမ်ပြင်ဆင်ဖွဲ့စည်းကာ ဆောင်ရွက်နေဆဲပင်။

ဈေးကွက်ဖော်ဆောင်ရေး စီးပွားရေးစနစ်မှသည် ဈေးကွက်စီးပွားရေးစနစ်အဖြစ် ဆယ်စုနှစ်နှစ်စုခွဲခန့် ကျင့်သုံး  အကောင်အထည်ဖော်နေသော်လည်း တိုင်းပြည်၏ စီးပွားရေးကဏ္ဍတွင် နိုင်ငံပိုင်လုပ်ငန်းများ၏ ပါဝင်မှုကို သိသာစွာ မလျှော့ချနိုင်ခဲ့ပေ။

ယခင် အစိုးရလက်ထက်မှ လက်ရှိ အစိုးရလက်ထက်အထိ ငါးနှစ်ဆက်တိုက်အရှုံးပြနေသည့် စက်မှုဝန်ကြီးဌာနမှ နိုင်ငံပိုင်စက်ရုံ ၂၄ ရုံကို လုပ်ငန်းရပ်ဆိုင်းရန် ၂၀၁၆ ခုနှစ်တွင် လွှတ်တော်တွင် ဆုံးဖြတ်အတည်ပြုခဲ့သည်။

လုပ်ငန်းရပ်ဆိုင်းလိုက်သော်လည်း အဆိုပါ စက်ရုံ၊ အလုပ်ရုံများမှာ ဆက်လက်အရှုံးပြနေဆဲ။

အဘယ်ကြောင့်ဆိုသော် လုပ်ငန်းစီမံကိန်းစတင်စဉ်က ပြည်ပချေးငွေဖြင့် ဆောင်ရွက်ခဲ့သည့် လုပ်ငန်းများမှာ ချေးငွေ အတိုးအရင်းပေးဆပ်နေရပြီး အဆိုပါ စက်ရုံ၊ အလုပ်ရုံများရှိ ဝန်ထမ်းစရိတ်၊ ပင်စင်စရိတ်များကြောင့် နှစ်စဉ်အရှုံး ပေါ်ပေါက်နေခြင်း ဖြစ်သည်။

စက်မှုဝန်ကြီးဌာန၏ နိုင်ငံပိုင်စက်ရုံများ၏ အရှုံးဖြစ်ပေါ်မှုမှာ ၂၀၁၅ -၂၀၁၆ ဘဏ္ဍာနှစ်တွင် ငွေကျပ် ၉၀ ဘီလီယံနီးပါး (ကျပ်သန်းပေါင်းကိုးသောင်းခန့်) ရှိပြီး ယင်းမှာ အဆိုပါဘဏ္ဍာနှစ်အခွန်အကောက် ရငွေ စုစုပေါင်း၏ ၁ ဒသမ ၄၂ ရာခိုင်နှုန်း ရှိသည်။ ပြည်သူ့ဘဏ္ဍာအခွန်အကောက် ရငွေ ၁၀၀ ကျပ်တွင် ၁ ကျပ်နှင့် ၄၂ ပြားကို အဆိုပါအရှုံးအတွက် ကျခံရသည့် သဘော ဖြစ်သည်။

ယင်းမှာ စက်မှုဝန်ကြီးဌာနလက်အောက်ရှိ နိုင်ငံပိုင်စက်ရုံများ၏ အရှုံးဖြစ်ပေါ်မှုသာ ရှိသေးသည်။

အလားတူပင်၂၀၁၆ – ၂၀၁၇ ဘဏ္ဍာနှစ်တွင် ငွေကျပ် ၉၅ ဘီလီယံခန့်နှင့် ၂၀၁၇ -၂၀၁၈ ဘဏ္ဍာနှစ်တွင် ငွေကျပ် ၆၆ ဘီလီယံကျော် အရှုံးပေါ်ခဲ့သည်။

ယင်းသို့ အရှုံးပေါ်နေမှုကို ကုစားနိုင်ရန် အဆိုပါ နိုင်ငံပိုင်စက်ရုံများကို ပုဂ္ဂလိကသို့ လွှဲပြောင်းခြင်း၊အစိုးရ – ပုဂ္ဂလိက ပူးပေါင်းဆောင်ရွက်ခြင်း၊ လုပ်ငန်းကို ခွဲဝေပိုင်ဆိုင်ခြင်းနည်းလမ်းများဖြင့် အမြန်ဆုံးအကောင်အထည်ဖော်ရန် ယခုနှစ် ဇူလိုင်လက ကျင်းပသည့် ပြည်သူ့လွှတ်တော်အစည်းအဝေးတွင် ချောက်မဲဆန္ဒနယ်မှ လွှတ်တော်ကိုယ်စားလှယ် ဦးဘိုကြီးက တိုက်တွန်းအဆိုတင်သွင်းခဲ့သည်။

“ဘဏ္ဍာငွေ ဆက်လက်ဆုံးရှုံးနေမှုကို ကာကွယ်နိုင်ဖို့ နိုင်ငံနဲ့ ပြည်သူ့အတွက် အကျိုးရှိရှိ အမြန်ဆုံးအသုံးချနိုင်အောင် ဆောင်ရွက်ရန် လိုပါတယ်”ဟု ၎င်းက ဆိုသည်။

လက်ရှိ၂၀၁၉ – ၂၀၂၀ ဘဏ္ဍာနှစ်ဘဏ္ဍာငွေအရအသုံး မူလခန့်မှန်းခြေအရ နိုင်ငံပိုင်စီးပွားရေးလုပ်ငန်း၊ အဖွဲ့အစည်းကိုးခုတွင် အရှုံးဖြစ်ပေါ်နေဆဲဖြစ်ပြီး စုစုပေါင်း ကျပ် ၂၆၇ ဘီလီယံခန့်ရှိကြောင်း ပြည်သူ့ငွေစာရင်းပူးပေါင်းကော်မတီ၏ ယခုနှစ်ဩဂုတ်လက ထုတ်ပြန်သည့် အစီရင်ခံစာအရ သိရသည်။

အဆိုပါ အရှုံးဖြစ်ပေါ်သည့် ကျပ် ၂၆၇ ဘီလီယံအနက် စက်မှုဝန်ကြီးဌာနလက်အောက်ရှိ အမှတ် (၁)၊ အမှတ် (၂) နှင့် အမှတ် (၃) အကြီးစားစက်မှုလုပ်ငန်းတို့မှ အရှုံးဖြစ်ပေါ်မှုပမာဏ ကျပ် ၈၂ ဘီလီယံရှိရာ နိုင်ငံပိုင်စီးပွားရေးလုပ်ငန်းကဏ္ဍ အရှုံးဖြစ်ပေါ်မှု စုစုပေါင်း၏ ၃၁ ရာခိုင်နှုန်းခန့် ရှိနေသည်။

စက်မှုဝန်ကြီးဌာနလက်အောက်တွင် နိုင်ငံပိုင်လုပ်ငန်းလေးခုရှိသည့်အနက် မြန်မာ့ဆေးဝါးလုပ်ငန်းမှလွဲလျှင် ကျန်သုံးခုက အရှုံးပြနေခြင်းဖြစ်သည်။

အဆိုပါအရှုံးဖြစ်ပေါ်နေသည့် လုပ်ငန်းများကို ပုဂ္ဂလိကသို့ လွှဲပြောင်းရန်စိတ်ဝင်စားမှု ဆန္ဒပြုလွှာခေါ်ယူသော်လည်း ခေတ်နှင့် လျော်ညီမှုမရှိတော့သော စက်ပစ္စည်းများ၊ လုပ်ငန်းအမျိုးအစားပြောင်းလဲခွင့်မရှိခြင်းနှင့် ဝန်ထမ်းအင်အားများပြားမှုစသည့် အချက်များကြောင့် ပုဂ္ဂလိကကဏ္ဍက စိတ်ဝင်စားမှုနည်းပါးခဲ့သည်။

စက်မှုဝန်ကြီးဌာနက ကိုင်တွယ်နေသည့် နိုင်ငံပိုင်စက်ရုံ ၁၁၂ ရုံရှိသည့်အနက် ၅၅ ရုံကို အစိုးရ – ပုဂ္ဂလိကပူးပေါင်းဆောင်ရွက်မှု (PPP) ပုံစံဖြင့် ၂၀၁၂ ခုနှစ်မှ ၂၀၁၅ ခုနှစ်အတွင်း လွှဲပြောင်းလုပ်ဆောင်ခဲ့သည်။

သို့သော်လည်း အများစုမှာ လုပ်ငန်းရပ်ဆိုင်းထားခြင်း၊ စာချုပ်ဖျက်သိမ်းတင်ပြထားခြင်းနှင့် စာချုပ်အတိုင်း အကောင်အထည် မဖော်နိုင်ခြင်း၊ အရှုံးဖြင့် လုပ်ငန်းလည်ပတ်နေခြင်းတို့ ဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး ဦးဆက်အောင်က ယခုနှစ် နိုဝင်ဘာလ ၁၅ ရက်နေ့တွင် ပြည်ထောင်စုလွှတ်တော်၌ ရှင်းလင်းပြောကြားသည်။

စက်မှုဝန်ကြီးဌာန၏ တိုက်ရိုက်ကြီးကြပ်မှုဖြင့် လုပ်ငန်းလည်ပတ်နေသော စက်ရုံ ၅၇ ရုံတွင် မြန်မာ့ဆေးဝါးလုပ်ငန်းမှ စက်ရုံလေးရုံသာ အမြတ်ဖြင့် လည်ပတ်နိုင်ပြီး ကျန်ရှိသည့် စက်ရုံများမှာ အရှုံးပေါ်နေကြောင်း ဦးဆက်အောင်က ဆိုသည်။

ထို့အတွက် အဆိုပါ အရှုံးဝန်ထုပ်ဝန်ပိုးကို လျှော့ချနိုင်ရန်၊ အသွင်ကူးပြောင်းရေးကို ထိရောက်မြန်ဆန်စေရန်ဆိုသည့် ရည်ရွယ်ချက်ဖြင့် ဝန်ကြီးဌာနနှစ်ခုကို တစ်ခုတည်းအဖြစ် ပြင်ဆင်ဖွဲ့စည်းခြင်းဖြစ်ကြောင်း ၎င်းက ဆက်လက်ပြောကြားသည်။

ယင်းသို့ အသွင်ကူးပြောင်းရာတွင် စက်မှုဝန်ကြီးဌာန၏ စက်ရုံ ၁၁၂ ရုံကို စီမံကိန်းနှင့် ဘဏ္ဍာရေးဝန်ကြီးဌာန လက်အောက်တွင် အသစ်ထပ်မံဖွဲ့စည်းမည့် နိုင်ငံတော်၏ ပုံသေပိုင်ပစ္စည်းများစီမံခန့်ခွဲရေးကော်ပိုရေးရှင်း (SAMCO)  သို့ လွှဲပြောင်းယူမည် ဖြစ်သည်။

“SAMCO ကတော့ လွတ်လပ်တဲ့ အဖွဲ့အစည်း၊ ခိုင်မာအားကောင်းတဲ့ အဖွဲ့အစည်း ဖြစ်ရပါမယ်။ သင့်တော်တဲ့ ပုဂ္ဂိုလ်တွေ ပါဝင်ဖွဲ့စည်းနိုင်ဖို့ လိုပါတယ်”ဟု အုတ်တွင်းမဲဆန္ဒနယ် ပြည်သူ့လွှတ်တော်ကိုယ်စားလှယ် ဒေါ်ချိုချိုက ဆွေးနွေးခဲ့သည်။

ယခုလိုဝန်ကြီးဌာန ပြင်ဆင်သတ်မှတ်ဖွဲ့စည်းခြင်းကို ထောက်ခံသော်လည်း ဝန်ကြီးဌာနနှစ်ခုပေါင်းစည်းရာတွင် လုပ်ဆောင်မည့် လုပ်ငန်းစဉ်ကို ပြည်သူ့ကိုယ်စားပြုလွှတ်တော်သို့ ရှင်းလင်းတင်ပြရန်လိုကြောင်း ချောက်မဲဆန္ဒနယ် ပြည်သူ့လွှတ်တော်ကိုယ်စားလှယ် ဦးဘိုကြီးက ဆိုသည်။

“ဝန်ကြီးဌာနနှစ်ခုပေါင်းမယ်ဆိုရင် ခွင့်ပြုပြီး ဘတ်ဂျတ်ငွေတွေကို ဘယ်လိုပေါင်းစပ်သုံးစွဲမလဲ။ ဝန်ထမ်းတွေရဲ့ ပေါင်းစည်းမှုလုပ်ငန်းစဉ်က ဘယ်လိုလဲ။ ဒီနိုင်ငံပိုင်စက်ရုံတွေကို လွှဲပြောင်းယူမယ့် အသေးစိတ် Plan တွေကို သေသေချာချာချပြဖို့တော့ လိုတယ်”ဟု ၎င်းက ပြောသည်။

သို့သော် ထောက်ခံကြိုဆိုသူများရှိသလို ကန့်ကွက်သူများလည်း ရှိသည်။

ဝန်ထမ်းအင်အား များပြားပြီး လုပ်ငန်းသဘောသဘာဝကွဲပြားသည့် ဝန်ကြီးဌာနနှစ်ခုပေါင်းစပ်ခြင်းမှာ မသင့်လျော်ကြောင်း ကန့်ကွက်သူ လွှတ်တော်ကိုယ်စားလှယ်များက ဆိုသည်။

“စီမံဘဏ္ဍာဝန်ကြီးဌာနအောက်မှာ ဦးစီး၊ လုပ်ငန်းဌာနများစွာ ရှိပါတယ်။ ပြည်သူ့ဘဏ္ဍာကို စီမံခန့်ခွဲနေရတဲ့ဌာန၊ အရအသုံးထိန်းကျောင်းကွပ်ကွဲနေတဲ့ ဌာန ဖြစ်ပါတယ်။ စက်မှုကတော့ ငွေသုံးရမယ်၊ ငွေရှာရမယ်၊ ကုန်ထုတ်ရမယ်ဆိုတဲ့ သဘာဝပါ”ဟု စစ်ကိုင်းတိုင်းဒေသကြီး မဲဆန္ဒနယ်အမှတ်(၅) မှ လွှတ်တော်ကိုယ်စားလှယ် ဦးရဲထွဋ်က ဝန်ကြီးဌာနနှစ်ခု၏ လုပ်ငန်းသဘာဝမတူညီမှုကြောင့် ကန့်ကွက်ခြင်းဖြစ်ကြောင်း ပြောဆိုသည်။

ထို့အတူ စက်မှုဝန်ထမ်းပင်စင်စား ဦးရေ၊ လက်ရှိဝန်ထမ်းဦးရေ နှစ်ခုပေါင်းခြောက်သောင်းခန့်ရှိပြီး စက်ရုံ၊ အလုပ်ရုံ ၁၁၂ ခုရှိသည့် ဝန်ကြီးဌာနကို လက်လွတ်စပယ် မလုပ်သင့်ကြောင်း မင်းကင်းမဲဆန္ဒနယ်မှ လွှတ်တော်ကိုယ်စားလှယ် ဦးမောင်မြင့်ကလည်း ဝေဖန်သည်။

“ဝန်ကြီးဌာနပေါင်းတာတွေ ရှိပါတယ်။ ဆီလျော်တာတွေရှိပေမယ့် အခုပေါင်းစည်းမှုမျိုးကိုတော့ တစ်ခါမှ မတွေ့ဖူးဘူးပါဘူး”ဟု ယခင် အစိုးရလက်ထက်စက်မှုဝန်ကြီးဌာန ပြည်ထောင်စုဝန်ကြီး အဖြစ် တာဝန်ယူခဲ့သူလည်းဖြစ်သည့် ၎င်းက ဆိုသည်။

ကန့်ကွက်ဆွေးနွေးသူများ၏ အဓိကထောက်ပြချက်မှာ စက်မှုဝန်ကြီးဌာနတွင် လုပ်ကိုင်နေသော ဝန်ထမ်းများ၏အခြေအနေ၊ လုပ်ငန်းသဘာဝကွဲပြားသည့် ဝန်ကြီးဌာနနှစ်ခု ပေါင်းစည်းမှုသည် မဆီလျော်ခြင်းနှင့် လက်ရှိအစိုးရသက်တမ်းတစ်နှစ်သာ ကျန်ချိန်တွင် ယင်းကဲ့သို့ ဝန်ကြီးဌာနကြီးနှစ်ခုပေါင်းစည်းမှုမှာ အလုပ်ဖြစ်နိုင်ရန်ခက်ခဲနိုင်ခြင်းတို့ ဖြစ်သည်။

“တကယ်လုပ်သင့်တာက ၂၀၁၆ ကတည်းက Master Plan တွေ ရှိခဲ့ရမှာပါ။ အဲဒီကတည်းက ဝန်ကြီးဌာနတွေကို Plan ချခဲ့ရင် ဒီနေ့ ဒီအချိန်မှာ တည်ငြိမ်နေရမှာပါ။ ခုချိန်မှ ဌာနတွေ ခွဲလိုက်၊ ပေါင်းလိုက်နဲ့ လုပ်နေလို့ မရပါဘူး”ဟု စစ်ကိုင်းတိုင်းဒေသကြီး မဲဆန္ဒနယ်အမှတ် (၅) မှ လွှတ်တော်ကိုယ်စားလှယ် ဦးရဲထွဋ်က ဆိုသည်။

ထောက်ခံသူများကမူ တစ်မျိုး တစ်ဘာသာ ပူပန်မှု ရှိကြသည်။

အရှုံးပေါ် နိုင်ငံပိုင်စက်ရုံများကို ပြည်သူ့ဘဏ္ဍာများဖြင့် ကျားကန်ထားရမှုကို လျှော့ချနိုင်ရေး၊ အတတ်နိုင်ဆုံး မြန်ဆန်စွာ ပုဂ္ဂလိကပိုင်အသွင်ကူးပြောင်းရေးနှင့် ယင်းလုပ်ငန်းစဉ် အသေးစိတ်ကို ရှင်းရှင်းလင်းလင်းချပြစေလိုခြင်းတို့ ဖြစ်သည်။

“ချေးငွေက အတိုး၊ အရင်း တရိပ်ရိပ်တက်နေတဲ့အတွက် မဖြစ်မနေ မြန်မြန်ဆန်ဆန်အသွင်ကူးပြောင်းဖို့ လိုအပ်နေပါတယ်”ဟု ပုလဲမဲဆန္ဒနယ်လွှတ်တော်ကိုယ်စားလှယ် ဒေါ်ခင်စန်းလှိုင်က ဆိုသည်။

ယခုလို ဝန်ကြီးဌာနပြင်ဆင်သတ်မှတ်ပေါင်းစည်းမှုကို အရှုံးပေါ် နိုင်ငံပိုင်လုပ်ငန်းများ၏ ဝန်ထုပ်ဝန်ပိုးလျှော့ချရေးအပြင် စီးပွားရေးကဏ္ဍမူဝါဒများအချင်းချင်း ပိုမိုချိတ်ဆက်မိလာနိုင်သည့်အတွက် ကောင်းမွန်ကြောင်း လုပ်ငန်းရှင်များက ဆိုကြသည်။

နိုင်ငံအများစုတွင်လည်း စီးပွားရေး၊ ကုန်သွယ်ရေး၊ စက်မှုကဲ့သို့ ဌာနများကို ပေါင်းစည်းကာ ဝန်ကြီးဌာနတစ်ခုတည်းအဖြစ် ထားရှိဆောင်ရွက်ခြင်းဖြင့် အဆိုပါကဏ္ဍများ၏ မူဝါဒချင်း သဟဇာတပိုဖြစ်နိုင်ကြောင်း မြန်မာနိုင်ငံစက်မှုကုန်ထုတ်လုပ်ငန်းရှင်များအသင်း ဥက္ကဋ္ဌဒေါက်တာအောင်သိန်းက ပြောသည်။

“တစ်ခါတလေကုန်သွယ်ရေးမူဝါဒက ဖွင့်ပေးလိုက်ပေမယ့် စက်မှုကဏ္ဍမှာလာပြီး သက်ရောက်တာတွေ ရှိတယ်။ ဆိုတော့ ခုလိုပေါင်းလိုက်လို့ မူဝါဒချင်း ပိုအချိတ်အဆက်မိမိ လုပ်နိုင်ရင် ပိုကောင်းတယ်”ဟု ၎င်းက ဆိုသည်။

ထို့ပြင်တိုင်းပြည်၏ မဟာဗျူဟာအရ မဖြစ်မနေလုပ်ရမည့်လုပ်ငန်းမှ လွဲလျှင် ကျန်လုပ်ငန်းများကို ပုဂ္ဂလိကကဏ္ဍက လုပ်ကိုင်ခြင်းက အကောင်းဆုံးဖြစ်ကြောင်း ၎င်းက ဆိုသည်။

အရှုံးပေါ် နိုင်ငံပိုင်စက်ရုံများအတွက် အရေးပေါ်ကုထုံးအလုပ်ဖြစ်၊ မဖြစ်နှင့် စိုက်ပျိုးရေးအခြေခံသည့် စက်မှုလုပ်ငန်းကဏ္ဍ ဖွံ့ဖြိုးရေးဖြစ် မဖြစ် လက်ရှိအစိုးရ၏ ကျန်ရှိသည့် သက်တမ်းတစ်နှစ်အတွင်း မည်မျှလုပ်ဆောင်နိုင်မည်လဲဆိုသည်မှာ မေးခွန်း ဖြစ်သည်။

“ပုဂ္ဂလိကကဏ္ဍမှာ အသေးစား၊ အလတ်စားက အများဆုံးဖြစ်တယ်။ ဒီကဏ္ဍ ဖွံ့ဖြိုးရေးကို အာရုံစိုက်ပြီး လုပ်ပေးနိုင်ရင်တော့ စက်မှုကဏ္ဍက ကောင်းလာမှာပေါ့”ဟု ဒေါက်တာအောင်သိန်းက မှတ်ချက်ပေးသည်။

စစ်ငြိမ်းသူ

You may also like...

Leave a Reply

Your email address will not be published. Required fields are marked *