ပြည်သူ့မျက်နှာကြည့်ရမည့် ရွေးကောက်ပွဲ အကြိုကာလ

၂၀၂၀ ရွေးကောက်ပွဲသည် မြန်မာ့ဒီမိုကရေစီအသွင်ကူးပြောင်းရေးတွင် လမ်းဆုံလမ်းခွဖြစ်သည့်အတွက် အောင်မြင်စွာကျင်းပနိုင်မှ ရထားသော အရှိန်အဟုန်ဖြင့် နိုင်ငံရှေ့ဆက်ချီတက်နိုင်မည်။ ရွေးကောက်ပွဲအကြိုကာလသည် ရွေးကောက်ပွဲအောင်မြင်ရေးအတွက် အဆုံးအဖြတ်ပေးသောကာလဖြစ်သည့်အတွက် ယခုအချိန်မှသည် ရွေးကောက်ပွဲအထိ သေချာစေ့စပ်စွာပြင်ဆင်ရမည်။ ကြိုတင်ပြင်ဆင်အောင်ပွဲဝင်။

ရွေးကောက်ပွဲရေခံမြေခံတည်ဆောက်နိုင်မှ ရွေးကောက်ပွဲအောင်မည်။ ရွေးကောက်ပွဲသည် နိုင်ငံကို ဦးဆောင်မည့်သူများကို ပြည်သူကရွေးသည့်ပွဲသာဖြစ်ပြီး တစ်ဖွဲ့နှင့်တစ်ဖွဲ့ အပြတ်ရှင်းသည့်ပွဲမဟုတ်သလို နိုင်ငံကိုချနင်းပြီး ကိုယ်အာဏာရရေးလုပ်ရသည့်ပွဲမဟုတ်ကြောင်းကို ရွေးကောက်ပွဲဝင်များအားလုံး သိနားလည်အောင် ဖန်တီးထားရမည်။

မြန်မာနိုင်ငံသည် ရွေးကောက်ပွဲများနှင့် မယဉ်ပါးသေးသောကြောင့် ရွေးကောက်ပွဲရေခံမြေခံကို အလေးပေးပြောရခြင်းဖြစ်သည်။ ပြည်လုံးကျွတ်အဆင့် လွတ်လပ်မျှတပြီး ပြည်တွင်းပြည်ပလက်ခံသော ရွေးကောက်ပွဲဟူ၍ ၁၉၉၀ မေလ ရွေးကောက်ပွဲအပြီး လွန်ခဲ့သော ၂၉ နှစ်အတွင်း ၂၀၁၅ ရွေးကောက်ပွဲသာရှိသည့်အတွက် ရွေးကောက်ပွဲများနှင့် ထိတွေ့ခါစသာ ရှိသေးသည်။

ရွေးကောက်ပွဲများသည် ဒီမိုကရေစီအတွက် မရှိမဖြစ် ဖြစ်သော်လည်း မြန်မာနိုင်ငံကို မဆိုထားနှင့် ရင့်ကျက်ပြီးနိုင်ငံများတွင်ပင် တစ်မြေထဲနေ တစ်ရေထဲသောက်များကို ခွဲခြားပစ်သည့် ချောက်ကမ်းပါးကြီးသဖွယ်ဖြစ်သည်။ တစ်ဖွဲ့နှင့်တစ်ဖွဲ့ အဖွဲ့မျိုးစုံ ပတ်ရန်ဖြစ်နေသောနိုင်ငံတွင် ရွေးကောက်ပွဲသည် အန္တရာယ်များသည်။ အမေရိကန်ပြည်ထောင်စုကဲ့သို့ တည်ငြိမ်ပြီး နိုင်ငံတွင်ပင်လျှင် သမ္မတဒေါ်နယ်ထရမ့် ရွေးကောက်ခံခဲ့ရသည့် ယခင်ရွေးကောက်ပွဲတွင် ‘ဒင်းတို့နဲ့ ငါတို့’ ဟု စိတ်ဝမ်းကွဲပြားခဲ့သည်။

မြန်မာနိုင်ငံတွင် ပြည်တွင်းလက်နက်ကိုင်ပဋိပက္ခလည်း အသက်ရှင်နေဆဲဖြစ်ပြီး လက်နက်ကိုင်အဖွဲ့များ အများဆုံးနိုင်ငံတစ်နိုင်ငံလည်းဖြစ်သည်ကိုပါ ရွေးကောက်ပွဲအကြိုကာလတွင် ထည့်သွင်းစဉ်းစားရန်လိုသည်။

ရွေးကောက်ပွဲသည် ဒီမိုကရေစီခရီးလမ်း၏ တစ်စိတ်တစ်ပိုင်းသာဖြစ်သဖြင့် ရွေးကောက်ပွဲနိုင်ချင်ဇောဖြင့်၊ ကိုယ့်လူနိုင်စေချင်ဇောဖြင့် ခရီးလမ်းကြောင်းတွင် အတူလျှောက်ရမည့်အဖော်များ Stakeholders ကို မျက်နှာချင်းမဆိုင်နိုင်လောက်အောင် မလုပ်မိစေရန် သက်ဆိုင်သူများ သတိထားသင့်သည်။

ထို့ပြင် ‘ဘယ်လိုနိုင်နိုင် နိုင်ဖို့အရေးကြီးတယ်’ ဟု ‘the ends justify the means’ မဖြစ်အောင် ရွေးကောက်ပွဲအကြိုကာလ လုပ်ရပ်များကို ဂရုစိုက်ရမည်။ သို့မဟုတ်လျှင် ‘ဒီမိုကရေစီဆိုတာ ဒါမျိုးလား’ ဟု နိုင်ငံသားတို့ စိတ်ထဲတွင် အမှတ်မှားသွားနိုင်သည်။

ရွေးကောက်ပွဲကာလသည် ရက်ပိုင်းသာကြာသော်လည်း ရွေးကောက်ပွဲအကြိုကာလသည် လပေါင်းများစွာကြာသည်။ ထို့ကြောင့် သတိထားဂရုစိုက်နိုင်မှ ရွေးကောက်ပွဲအကြိုကာလ ပြေပြစ်တရားမျှတပြီး အကြောက်တရားနည်းပါးကာ ရွေးကောက်ပွဲအောင်မြင်အောင် လမ်းခင်းပေးနိုင်မည်။

ရွေးကောက်ပွဲအကြိုကာလ ချောမွေ့ရေး၊ နိုင်ငံဖွံ့ဖြိုးမှုကို မထိခိုက်စေရေး၊ အကြောက်တရားလျော့ပါးရေးကို ဝင်ပြိုင်ပြိုင်၊ မပြိုင်ပြိုင် ရွေးကောက်ပွဲအတွက် စိုင်းပြင်းနေသူ တောနေမြို့နေ လက်နက်ကိုင်သူ၊ မကိုင်သူအားလုံး အာမခံကြရမည်။ ပြည်သူ့မျက်နှာ၊ နိုင်ငံ့မျက်နှာကို အရင်ကြည့်စေလိုသည်။

အယ်ဒီတာ
၂၈.၁၁.၂၀၁၉

You may also like...

Leave a Reply

Your email address will not be published. Required fields are marked *