မြန်မာနှင့် ဂမ်ဘီယာ

ဂမ်ဘီယာက မြန်မာကို International Court of Justice တွင် တရားစွဲလိုက်ကတည်းက မြန်မာနှင့် ဂမ်ဘီယာဇာတ်လမ်း ကမ္ဘာတွင် နာမည်ကြီးသွားသည်။  နိုင်ငံတကာတွင် ‘ကြည့်ချင်ပွဲ’။

မြန်မာဘက်က ဒေါ်အောင်ဆန်းစုကြည် ဦးဆောင်ပြီး ခုခံကာကွယ်မည်ဟု အစိုးရက ကြေညာသည်။ ဒေါ်အောင်ဆန်းစုကြည် ကိုယ်တိုင် တရားရုံးသို့ သွားရောက် ခုခံထွက်ဆိုမည်မူ မသေချာသေး။

ဒေါ်အောင်ဆန်းစုကြည်သာ သွားလျှင် ကမ္ဘာအနှံ့က သူများ သေချာပေါက် ပိုစိတ်ဝင်စားမည်။ ပွဲက နိုင်ငံတကာသတင်းမီဒီယာများ အကြိုက်ပွဲ ဖြစ်သွားမည်။

လူ့အခွင့်အရေးခေါင်းစဉ်ဖြင့် တရားစွဲဆိုမှုကို နိုဘယ်လ်ငြိမ်းချမ်းရေးဆုရှင်၊ လူ့အခွင့်အရေး မီးရှူးတန်ဆောင်ပုဂ္ဂိုလ်က ခုခံချေဖျက်မည်။  ထူးဆန်းသလောက် ရေးလို့ ကောင်း၊ ရိုက်ကူးလို့ ကောင်းလိုက်မည်  ဖြစ်ခြင်း။

ဒေါ်အောင်ဆန်းစုကြည် သွားသောကြောင့် အကောင်းဖြစ်နိုင်သလို  အဆိုးလည်း ဖြစ်နိုင်သည်။ အကောင်းက သူကိုယ်တိုင် ခုခံသည့်အတွက် ပိုပြီး အာရုံစိုက်နားထောင်ကြမည်။ သူ့လက်ကျန် နိုင်ငံတကာရှိ ထောက်ခံသူ ပရိသတ်များ အားကို  ယူနိုင်မည်။ တာဝန်ယူမှု တာဝန်ခံမှုရှိကြောင်း ပြသနိုင်သည်။

အဆိုးက သူ့ကို တိုက်ရိုက်တရားခံစစ် စစ်ခံရမည်။ နိုဘယ်လ်ငြိမ်းချမ်းရေးဆုရှင် ကမ္ဘာ့အကျော်ကြားဆုံး လူ့အခွင့်အရေးလှုပ်ရှားသူ ဖြစ်ခဲ့သူကို စစ်မေးရခြင်းသည် တရားသူကြီးများအတွက်လည်းကောင်း၊  တရားလိုအတွက်သော် လည်းကောင်း ကြုံရခဲသော အခွင့်အလမ်း ဖြစ်သည်။

ဒေါ်အောင်ဆန်းစုကြည် ကိုယ်တိုင်သွားလျှင် တရားရုံး၏ ဆုံးဖြတ်ချက်ပေါ် လိုက်နာသင့်၊ မလိုက်နာသင့် တာဝန်ယူမှု တာဝန်ခံမှု ပိုကြီးလာမည်။

ဒေါ်အောင်ဆန်းစုကြည် ကိုယ်တိုင်ခုခံမည်ဆိုသောကြောင့် အောင်ပွဲခံလက်ခမောင်းခတ်ကြသူများ ရှိသည်က စဉ်းစားစရာ ပိုများလာသည်။

ဂမ်ဘီယာ

စိတ်ဝင်စားစရာ ရှိသေးသည်။ မြန်မာနိုင်ငံနှင့် စီးပွားရေး၊ နိုင်ငံရေး တစ်စုံတစ်ရာမရှိသည့် လူဦးရေ နှစ်သန်းခန့်သာရှိသော  အာဖရိကတိုက်မှ နိုင်ငံငယ်လေး ဂမ်ဘီယာက မြန်မာနိုင်ငံကို ဘာ့ကြောင့်  တရားစွဲဆိုသလဲ။ ဘာကြောင့်မှန်းကို ဂမ်ဘီယာသာ သိမည်ဖြစ်သော်လည်း ဖြစ်ပေါ်လာသောရလဒ်နှင့် အခြေအနေတို့ကို စုစည်းကြည့်မိပါသည်။

ပတ်သက်ဆက်စပ်မှု မရှိသောကြောင့် စွဲသည်ဟုဆိုရမည်။ ပတ်သက်မှုရှိလျှင် အားနာနေရမည်။

ဂမ်ဘီယာ နာမည်တက်သည်။ ယခုပင် နိုင်ငံတကာစင်မြင့်တွင် ဝိုင်းဝန်းချီးကျူးနေကြပြီ။ နာမည်ကြီး နိုင်ငံတကာသတင်းမီဒီယာများက  ဂမ်ဘီယာ၏ ခေါင်းဆောင်မှုကို ထောမနာပြုကြသည်။ နိုင်ငံငယ်များ အနေနှင့် နိုင်ငံတကာအဆင့်တွင် လောက်လောက်လားလား တွင်ကျယ်နိုင်ရန် အရင်းအမြစ်၊ အင်အားနည်းပါးသည့်အတွက် ယခုကဲ့သို့ အခွင့်အလမ်းများကို ယူတတ်မှ တွင်ကျယ်နိုင်သည် ။ Small State Diplomacy နိုင်ငံပိစိကွေးများ သုံးတတ်သည့် သံခင်းတမန်ခင်း နည်းလမ်းများ။

ဂမ်ဘီယာနှင့် ရပ်ထား၍ မရ။ ဂမ်ဘီယာသည် အဖွဲ့ဝင် ၅၇ နိုင်ငံ  ပါဝင်သော OIC Organization of Islamic Cooperation ကိုယ်စား တရားစွဲဆိုခြင်းဖြစ်သည်။ နိုင်ငံတကာရှေ့နေများကို ငှားခ OIC က ပေးသည်။ လူဦးရေ နှစ်သန်းခန့်သာရှိသော ဂမ်ဘီယာတွင် မွတ်ဆလင်ဘာသာဝင်အများစုနေကြသည်။ ဆိုတော့ မြန်မာနှင့် OIC တရားရင်ဆိုင်ရခြင်း။ OIC တွင် ကမ္ဘာအနှံ့ ဩဇာတိက္ကမ ရှိသောနိုင်ငံများနှင့် အာဆီယံအဖွဲ့ဝင် မလေးရှား၊ အင်ဒိုနီးရှား၊ ဘရူနိုင်းတို့ ပါသည်။

ယခုကဲ့သို့ တရားစွဲဆိုခြင်းသည် OIC ၏ အစည်းအဝေးများတွင်  မြန်မာအကြောင်း အကြိမ်ကြိမ်ကျော့ ဆွေးနွေးကြရာမှ ဖြစ်ပေါ်လာသည်။ ဂမ်ဘီယာရှေ့နေချုပ်သည် ၁၉၉၄ ရဝမ်ဒါလူမျိုး အပြုတ်ရှင်းမှုကြီးကို  စစ်ဆေးသည့် ကုလသမဂ္ဂခုံရုံးတွင် ဆယ်နှစ်ကျော်အလုပ်လုပ်ခဲ့သည့်အတွက် သူ၏ အထူးကျွမ်းကျင်မှုကြောင့် ထိုဆွေးနွေးပွဲများတွင် ခေါင်းဆောင်မှုနေရာရသည်ဟု New York Times က ရေးသားသည်။ 

ဘာတွေဖြစ်လာမလဲ

နိုင်ငံအချင်းချင်း အငြင်းပွားမှုကို ဖြေရှင်းပေးရသည့် ICJ သည်  ကမ္ဘာ့တရားရုံး အမည်ရသော်လည်း သူ့ဆုံးဖြတ်ချက်များကို လိုက်နာအောင် လုပ်နိုင်မည့် ယန္တရားမရှိ။  ဆုံးဖြတ်ချက်များကို မလိုက်နာလျှင်  သိက္ခာထပ်ကျနိုင်သည်။ စင်စစ် မြန်မာကို သိက္ခာထပ်ချခြင်းဖြင့် ဖိအားပေးရန်သည် တရားလိုများ၏ အဓိကရည်ရွယ်ချက် ဖြစ်မည်။

ဇေယျသူ

You may also like...

Leave a Reply

Your email address will not be published. Required fields are marked *