ကစဥ့်ကလျားဖွံ့ ဖြိုးလာသည့် လုံခြုံရေးဝန်ဆောင်မှုဈေးကွက်

မြန်မာနိုင်ငံ ဒီမိုကရေစီအသွင်ကူးပြောင်းမှုနှင့်အတူ ပြည်တွင်း၊ ပြည်ပစီးပွားရေးလုပ်ငန်းများ ချဲ့ထွင်လာချိန်တွင် ပုဂ္ဂလိကလုံခြုံရေးဝန်ဆောင်မှုလုပ်ငန်းမှာလည်း ကျွဲကူးရေပါ ကြီးထွားလာသည်။

ခိုး၊ ဆိုး၊ လု၊ နှိုက် ဒုစရိုက်မှုနှင့် ပဋိပက္ခထူပြောလှသည့် မြန်မာနိုင်ငံတွင် လူ့အသက်အိုးအိမ်နှင့် ဥစ္စာစီးပွားများ အနီးကပ်စောင့်ရှောက်ထိန်းသိမ်းရန် ပုဂ္ဂလိကလုံခြုံရေးဝန်ဆောင်မှုလုပ်ငန်းကို အားကိုးအသုံးပြုလာခြင်းကြောင့် အဆိုပါ လုံခြုံရေးဝန်ဆောင်မှုလုပ်ငန်းများ တွင် ကျယ်လာခြင်းဖြစ်သည်။

မြန်မာနိုင်ငံ၏ ပုဂ္ဂလိကလုံခြုံရေးဝန်ဆောင်မှုကဏ္ဍတွင် ပြည်တွင်းလုံခြုံရေးဝန်ဆောင်မှုလုပ်ငန်းများသာမက နိုင်ငံတကာကုမ္ပဏီများကပါ ဝင်ရောက်လုပ်ကိုင်နေကြပြီဖြစ်သည်။ စက်ရုံ၊ အလုပ်ရုံ၊ ဟိုတယ်၊ ဆေးရုံ၊ ဘဏ်၊ ကျောင်း၊ စတိုးဆိုင် အစရှိသည့်နေရာများတွင် ယူနီဖောင်း ဝတ်ဆင်ထားသည့် ပုဂ္ဂလိကလုံခြုံရေးဝန်ထမ်းများက နေ့၊ ည ၂၄ နာရီ စောင့် ကြပ်ပေးနေကြသည်။

ပုဂ္ဂလိကလုံခြုံရေးဝန်ဆောင်မှုသည် အများပြည်သူလုံခြုံရေးနှင့် ဆက်စပ်နေသည့်လုပ်ငန်းတစ်ခုဖြစ်သော်လည်း ထိုလုပ်ငန်းအတွက် ရှင်းလင်းတိကျသည့် ဥပဒေနှင့် လုပ်ထုံးလုပ်နည်းများမရှိသေးချေ။ လက်ရှိလုပ်ငန်းများသည် ကိုယ့်နည်းကိုယ့်ဟန်ဖြင့် ဝန်ဆောင်မှုပေးနေရဆဲ ဖြစ်ပြီး လုံခြုံရေးဝန်ဆောင်မှုအရည်အသွေးမှာလည်း အမျိုးမျိုးအဖုံဖုံ ကွဲပြားလျက်ရှိသည်။

အဆိုပါလုံခြုံရေးဝန်ဆောင်မှုလုပ်ငန်း၏ လားရာနှင့် အခက်အခဲတို့က အဘယ်နည်း။

ပုဂ္ဂလိကလုံခြုံရေးဟုဆိုရာတွင် လုံခြုံရေးဝန်ဆောင်မှုတစ်ခုတည်းကို သီးသန့်လုပ်ကိုင်ပေးသည့်ကုမ္ပဏီများရှိပြီး စက်ရုံ၊ အလုပ်ရုံကုမ္ပဏီများက ကိုယ်တိုင်လစာပေးခန့်အပ်သည့် လုံခြုံရေးဝန်ထမ်းများလည်းရှိသည်။ ယခုအခါ လုံခြုံရေးဝန်ထမ်းကိုယ်တိုင်ခန့်အပ်ခြင်းထက် လုံခြုံရေးသီးသန့်ပေးသည့် ကုမ္ပဏီများကို ငှားရမ်းလာကြကြောင်း လုံခြုံရေးဝန်ဆောင်မှုကုမ္ပဏီများထံမှ သိရသည်။

“မသုံးမဖြစ်လည်းသုံးရတယ်။ ဘာဖြစ်လို့လဲဆိုတော့ ကျွန်မတို့နိုင်ငံမှာ လူရှိနေတာတောင် ခိုးဆိုးလုနှိုက်က တော်တော်လေးတက်လာတဲ့အခါကျတော့ ငှားရမ်းသုံးစွဲမှုကတော့မြင့်လာပါတယ်” ဟု Winning Security Group ၏ အုပ်ချုပ်မှုဒါရိုက်တာ ဒေါ်စုစုလှိုင်က The Voice Journal သို့ပြောကြားသည်။

ဆောက်လုပ်ရေးလုပ်ငန်းခွင်များ၊ လက်ဝတ်ရတနာအရောင်းဆိုင်များအပြင် နေပြည်တော်၊ ရန်ကုန်နှင့် မန္တလေး အစိုးရဆေးရုံကြီးများ၊ ဘုရားကျောင်းကန်များသည်ပင် ပုဂ္ဂလိကလုံခြုံရေးများကို ငှားရမ်းအသုံးပြုနေကြသည်။ ကုန်စည်ပြပွဲ၊ ဖျော်ဖြေပွဲ၊ ကာလတိုကျင်းပပြုလုပ်သည့် အခမ်းအနားများတွင် ပုဂ္ဂလိကလုံခြုံရေးဝန်ဆောင်မှုလုပ်ငန်းများသည် မပါမဖြစ်။

နိုင်ငံခြားတိုက်ရိုက်ရင်းနှီးမြှုပ်နှံမှုလုပ်ငန်းများ ဝင်ရောက်ရာတွင် ကနဦးအနေနှင့် မဖြစ်မနေစဉ်းစားသည်မှာ ရုံးတည်နေရာနှင့် လုံခြုံရေးစောင့်ရှောက်မှုဖြစ်ကြောင်း ၎င်းကရှင်းပြသည်။ စီးပွားရေးလုပ်ငန်းများအတွက် လုံခြုံရေးသည် ကုန်ထုတ်လုပ်မှုနှင့် အကျိုးအမြတ်ကို တိုက်ရိုက်ထောက်ပံ့မပေးသော်လည်း ရေရှည်တွင်မူ မလိုလားအပ်သည့် ဘေးအန္တရာယ်များမှ စောင့်ရှောက်နိုင်သဖြင့် အကျိုးရှိကြောင်း ဒေါ်စုစုလှိုင်က ဆိုသည်။

နိုင်ငံတကာ စီးပွားရေးလုပ်ငန်းများသည် လုံခြုံရေးဝန်ဆောင်မှုနှင့် လုံခြုံရေးကိရိယာပစ္စည်းများကို ထိရောက်စွာအသုံးချပြီး မိမိလုပ်ငန်းကိုထိန်းကျောင်းကြခြင်းဖြစ်သည်။ ဝန်ဆောင်မှုအရည်အသွေးမြင့်မားသည့် လုံခြုံရေး၊ အာမခံကုမ္ပဏီတို့နှင့်ချိတ်ဆက်၍ လုပ်ငန်းလည် ပတ်ကြသဖြင့် မလိုလားအပ်သည် ဘေးဥပါဒ်အန္တရာယ်ကို ကာကွယ်နိုင်သည်။

“စက်ရုံ၊ အလုပ်ရုံမှာ Accident (မတော်တဆမှု) ဖြစ်တာမျိုးတွေရှိတယ်။ သဘာဝဘေးအန္တရာယ်နဲ့ပတ်သက်လို့သော်လည်းကောင်း၊ မသမာတဲ့သူတွေ အနှောက်အယှက်တွေကြောင့်သော်လည်းကောင်း Security (လုံခြုံရေး) ထားတဲ့အတွက် အကျိုးရလဒ်တွေရှိတယ်” ဟု အမေရိကန်ပြည်ထောင်စု University of Montana တွင် ဈေးကွက်မဟာဗျူဟာနှင့် လုံခြုံရေးဝန်ဆောင်မှုကို လက်တွေ့လေ့လာခဲ့သူ ဒေါ်စုစုလှိုင် က ပြောကြားသည်။

မြန်မာနိုင်ငံတွင် လုံခြုံရေးဝန်ဆောင်မှုလုပ်ငန်းတိုးတက်လာနေသော်လည်း ဒေသတွင်းနိုင်ငံများနှင့်ယှဉ်လျှင် နိမ့်ကျနေဆဲဖြစ်သည်။ လုံခြုံရေးနည်းပညာမြင့် ပစ္စည်းကိရိယာများအသုံးပြုနိုင်မှု၊ လုံခြုံရေးနှင့်ပတ်သက်သည့် အရည်အသွေးမြှင့်တင်သည့်သင်တန်းများ သင်ကြားနိုင်မှု အားနည်းနေဆဲဖြစ်သည်။

မြန်မာစီးပွားရေးလုပ်ငန်းရှင်များ၏ အမြင်တွင်လည်း လုံခြုံရေးဝန်ဆောင်မှုသည် သမားရိုးကျ ရုံးအစောင့်အဖြစ် ရှုမြင်ထားကြသည်။ သို့သော် လုံခြုံရေးဝန်ဆောင်မှုသည် ယင်းထက်ပိုမိုအဆင့်မြင့်သည်။ လုံခြုံရေးအသိအမြင်၊ နည်းစနစ်နှင့် ထိခိုက်မှုဘေးအန္တရာယ်များကို အရေးပေါ်တုံ့ပြန်ပေးနိုင်သည့် ဝန်ဆောင်မှုတစ်ခုဖြစ်ကြောင်း လုံခြုံရေးဝန်ဆောင်မှုလုပ်ကိုင်သူများက ဆိုသည်။

နိုင်ငံတကာတွင် နိုင်ငံတော်လုံခြုံရေးကိစ္စများအထိ ပုဂ္ဂလိကလုံခြုံရေးကို ငှားရမ်းအသုံးပြုနေပြီး စစ်မြေပြင်တွင် ပါဝင်တိုက်ခိုက်သည့် အငှားစစ်သားအဆင့်ထိ အသုံးပြုမှုရှိသည်။ အရေးကြီးပုဂ္ဂိုလ်များ၊ နိုင်ငံရေးသမားများ၊ ထင်ပေါ်ကျော်ကြားသူများကို လုံခြုံရေးအစောင့် အရှောက်များထားရှိသည်။

မြန်မာနိုင်ငံတွင် အဆိုပါဝန်ဆောင်မှုလုပ်ငန်းကို မလုပ်ကိုင်နိုင်သေးသော်လည်း ပုံမှန်လုံခြုံရေးဝန်ဆောင်မှုမှာ တစ်ရက်ထက်တစ်ရက် ပိုမိုလိုအပ်လျက်ရှိကြောင်း မန္တလေးမြို့အခြေစိုက် Black Eagle လုံခြုံရေးကုမ္ပဏီ၏ အုပ်ချုပ်မှုဒါရိုက်တာ ဦးအေးလွင်က ဆိုသည်။

“တိုင်းပြည်ရဲ့ အနေအထားအရ လုံခြုံရေးကတော့လိုအပ်နေတာပဲ။ တစ်ရက်ပြီးတစ်ရက်လိုအပ်နေတာပဲ” ဟု ၎င်းကဆိုသည်။

တရားဝင်ကိန်းဂဏန်းအတိအကျမရှိသော်လည်း မြန်မာနိုင်ငံတွင် လုံခြုံရေးဝန်ဆောင်မှုလုပ်ငန်းလုပ်ကိုင်သည့် ပြည်တွင်းကုမ္ပဏီ ၁၃၀ ဝန်းကျင်နှင့် နိုင်ငံခြားကုမ္ပဏီ ၁၅ ခုထက် မနည်းရှိကြောင်း မြန်မာနိုင်ငံ ပုဂ္ဂလိကလုံခြုံရေးဝန်ဆောင်မှုလုပ်ငန်းရှင်များအသင်းက ခန့်မှန်းတွက်ချက်ထားသည်။

သို့သော် မြန်မာနိုင်ငံသားလုပ်ငန်းရှင်များစုပေါင်းဖွဲ့စည်းထားသည့် မြန်မာနိုင်ငံပုဂ္ဂလိကလုံခြုံရေးဝန်ဆောင်မှုလုပ်ငန်းရှင်များအသင်းတွင် အသင်းဝင်ကုမ္ပဏီပေါင်း ၂၀ ကျော်သာရှိသည်။ နိုင်ငံခြားပုဂ္ဂလိကုမ္ပဏီပေါင်း ၁၅ ခုကျော်သည် ဂျပန်၊ အင်္ဂလန်နှင့် အာဖဂန်နစ္စတန် စသည့်နိုင်ငံတို့မှ လာရောက်လုပ်ကိုင်နေခြင်းဖြစ်ကြောင်း မြန်မာနိုင်ငံပုဂ္ဂလိကလုံခြုံရေးဝန်ဆောင်မှုလုပ်ငန်းရှင်များအသင်းထံမှ သိရသည်။

အမေရိကန်စစ်ဘက်ဆိုင်ရာ ကန်ထရိုက်တာဟောင်း Eril Prince ပါဝင်ထူထောင်ထားသည့် Frontier Security Service (FSG) လုံခြုံရေးကုမ္ပဏီသည် တရုတ်နိုင်ငံသားနှင့် အခြားပြည်ပနိုင်ငံသားရင်းနှီးမြှုပ်နှံသူများအတွက် လုံခြုံရေးဝန်ဆောင်မှုပေးရန် မြန်မာနိုင်ငံသို့ ဦးတည်လျက်ရှိကြောင်း AFP သတင်းတစ်ပုဒ်တွင်ဖော်ပြဖူးသည်။

Eril Prince သည် ပုဂ္ဂလိက လုံခြုံရေးကုမ္ပဏီ Black Water ကို ပူးတွဲတည်ထောင်သူဖြစ်သည်။ အမေရိကန်တို့ ဆင်နွှဲသည့် အီရတ်နှင့် အာဖဂန်နစ္စတန် စစ်ပွဲတွင် Black Water ဝန်ထမ်းများပါဝင်ပြီး အီရတ်အရပ်သားများကို သတ်ဖြတ်ရာတွင်ပါဝင်ကြောင်း AFP သတင်းတွင် ရေးသားထားသည်။

လက်ရှိ လုံခြုံရေးကုမ္ပဏီများအနက် တရားဝင်လုပ်ငန်းများရှိသကဲ့သို့ တရားမဝင်လုပ်ငန်းများလည်းရှိသည်။ တရားဝင်ကုမ္ပဏီများသည် ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနတွင် ကုမ္ပဏီမှတ်ပုံတင်ထားရပြီး လုံခြုံရေးဆိုင်ရာသင်တန်းခန်းမနှင့် သင်ရိုးညွှန်းတမ်း စသည်တို့ထားရှိရမည်ဖြစ်ကြောင်း မြန်မာနိုင်ငံပုဂ္ဂလိကလုံခြုံရေးဝန်ဆောင်မှုလုပ်ငန်းရှင်များအသင်း တွဲဖက်အထွေထွေအတွင်းရေးမှူး ဦးသန်းထိုက်ဇော်က ဆိုသည်။

“တရားမဝင်ကုမ္ပဏီကျတော့ ရုံးခန်းမရှိဘူး။ ဖြစ်သလို Facilities လောက်နဲ့လုပ်ပေးနိုင်တယ်။ လတ်တလောအနေအထားမှာတောင် ကုမ္ပဏီ လေး၊ ငါးခုလောက်ကဆိုရင် သက်ဆိုင်ရာကုမ္ပဏီတွေက တရားပြန်စွဲထားတာ ကြုံတွေ့နေရတာရှိတယ်။ ဒါကတော့ တရားမဝင်ကုမ္ပဏီတွေရဲ့အားနည်းချက်ပေါ့” ဟု ၎င်းက ဆိုသည်။

တရားဝင်ဖြစ်မှု၊ မဖြစ်မှုကို ကိုင်တွယ်ကြီးကြပ်မည့် အစိုးရဝန်ကြီးဌာနအဖွဲ့အစည်း သတ်သတ်မှတ်မှတ်မရှိသဖြင့် မြန်မာနိုင်ငံ၏ လုံခြုံရေးဝန်ဆောင်မှုကဏ္ဍ တိုးတက်လာသော်လည်း ကစဥ့်ကလျား ဖြစ်နေသည်။ ယေဘုယျအားဖြင့် လုံခြုံရေးဝန်ဆောင်မှုကဏ္ဍကို ပြည်ထဲရေး ဝန်ကြီးဌာနက ကိုင်တွယ်ရမည်ဖြစ်သော်လည်း လိုအပ်သည့် မူဝါဒ၊ ဥပဒေနှင့် လုပ်ထုံးလုပ်နည်းများ ထုတ်ပြန်မှုအားနည်းကြောင်း ဝေဖန်မှုများရှိသည်။

ပြည်ထဲရေးဝန်ကြီးဌာနသည် ၂၀၁၅ ခုနှစ် ဇန်နဝါရီလက လုံခြုံရေးလုပ်ငန်းဆိုင်ရာဥပဒေ ပေါ်ပေါက်လာရန်၊ ပုဂ္ဂလိကလုံခြုံရေးဝန်ဆောင်မှုလုပ်ငန်းများ ဥပဒေနှင့်အညီစနစ်တကျဖြစ်လာရန် ဆွေးနွေးမှုပြုလုပ်ခဲ့ပြီးနောက်ပိုင်း သိသာသည့်ဆောင်ရွက်ချက်များ မထွက်ပေါ် လာသေးပေ။

လက်ရှိလုပ်ကိုင်နေသည့် လုံခြုံရေးကုမ္ပဏီများသည်ပင် ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနတွင် ကုမ္ပဏီမှတ်ပုံတင်ကာ လုံခြုံရေးဝန်ဆောင်မှုပေးနေခြင်းဖြစ်သည်။ ပုဂ္ဂလိကလုံခြုံရေးဝန်ဆောင်မှုလုပ်ငန်းဟူ၍ သီခြားလိုင်စင်လျှောက်ထားရန်မလိုဘဲ လုပ်ငန်း လည်ပတ်နိုင်သည်။

အထူးသဖြင့် မြန်မာနိုင်ငံတွင် နိုင်ငံခြားလုံခြုံရေးကုမ္ပဏီ ၁၅ ခုထက်မနည်း ဝန်ဆောင်မှုပေးနေသော်လည်း ကုမ္ပဏီများသည် လုံခြုံရေးဝန်ဆောင်မှုကုမ္ပဏီအမည်ဖြင့် မှတ်ပုံတင်ခြင်းမဟုတ်ကြောင်း မြန်မာနိုင်ငံပုဂ္ဂလိကလုံခြုံရေးဝန်ဆောင်မှုလုပ်ငန်းရှင်များအသင်း ဥက္ကဋ္ဌ ဦးတက်တိုးရှင်က ပြောကြားသည်။

“လုံခြုံရေးနာမည်နဲ့ထွက်လာတာ မရှိသေးဘူး။ Logistic ကုမ္ပဏီအနေနဲ့ လုပ်ကြတယ်။ အခြားကုမ္ပဏီဆိုရင် Consultant ကုမ္ပဏီအနေနဲ့ မှတ်ပုံတင်တယ်။ အဲဒီလို လက်တစ်လုံးခြားလုပ်ပြီးတော့ မှတ်ပုံတင်ကြတယ်။ တကယ်တမ်းကျတော့ Man Power စုပြီးတော့၊ သူတို့ကိုယ်တိုင်ဦးစီးပြီးတော့ ဆောင်ရွက်နေတာ” ဟု ၎င်းက ထပ်မံပြောဆိုသည်။

အချို့ကုမ္ပဏီများသည် လုံခြုံရေးဝန်ထမ်း ၄၀၀ ကျော်အထိ စုဆောင်းထားနိုင်သည်။ ဂျပန်ကုမ္ပဏီများသည် မြန်မာနိုင်ငံတွင် ရင်းနှီးမြှုပ်နှံမည့် ဂျပန်စီးပွားရေးလုပ်ငန်းများနှင့် တိုက်ရိုက်ချိတ်ဆက်၍ လုပ်ကိုင်ကြကြောင်း ၎င်းက ဆိုသည်။

၁၉၆၂ ခုနှစ်ကတည်းက တည်ထောင်သည့် ဂျပန်အခြေစိုက် နာမည်ကြီးလုံခြုံရေးကုမ္ပဏီ SECOM သည် ၂၀၁၃ ခုနှစ်တွင် မြန်မာနိုင်ငံသို့ ဝင်ရောက်လာပြီး ၂၀၁၅ ခုနှစ်တွင် လုံခြုံရေးဝန်ဆောင်မှုပေးကာ အွန်လိုင်းအခြေပြု လုံခြုံရေးအချက်ပေးစနစ်၊ လုံခြုံရေးဝန်ထမ်းစောင့်ကြပ် သည့် ဝန်ဆောင်မှုပေးခဲ့သည်။

သို့သော် မြန်မာနိုင်ငံ ရင်းနှီးမြှုပ်နှံမှုဥပဒေတွင် ရင်းနှီးမြှုပ်နှံမှုများခွင့်ပြုရာတွင် လုံခြုံရေးဝန်ဆောင်မှုလုပ်ငန်းဟူ၍ တိတိကျကျပြဋ္ဌာန်းထားခြင်းမရှိကြောင်း မြန်မာနိုင်ငံပုဂ္ဂလိကလုံခြုံရေးဝန်ဆောင်မှုလုပ်ငန်းရှင်များအသင်း ဒုတိယဥက္ကဋ္ဌ ဒေါ်မေစန်းပွင့်က ပြောကြားသည်။

သို့သော် ခဲယမ်းမီးကျောက်ထုတ်လုပ်ခြင်း၊ ကျောက်ခွဲရာတွင် အသုံးပြုသည့် မိုင်းများထုတ်လုပ်ခြင်းကဲ့သို့ လုံခြုံရေးနှင့်နွှယ်သည့်လုပ်ငန်းများကို နိုင်ငံခြားရင်းနှီးမြှုပ်နှံမှုအဖြစ် ခွင့်မပြုကြောင်း ဥပဒေပညာရှင်လည်းဖြစ်သည့် ၎င်းက ဆိုသည်။

လုံခြုံရေးဝန်ဆောင်မှုကဏ္ဍသည် ဖွံ့ဖြိုးဆဲဝန်ဆောင်မှုလုပ်ငန်းဖြစ်သဖြင့် နိုင်ငံခြားလုံခြုံရေးကုမ္ပဏီများကို ကန့်သတ်ပြီး မြန်မာနိုင်ငံသားလုပ်ငန်းရှင်များကို ဦးစားပေးသင့်ကြောင်း ၎င်းက ပြောကြားသည်။ သို့သော် ဥပဒေမပြဋ္ဌာန်းနိုင်သေးသဖြင့် နိုင်ငံခြားလုံခြုံရေးဝန်ဆောင်မှုလုပ်ငန်းများကို တား၍မရဟု ၎င်းက ဆိုသည်။

လုံခြုံရေးဝန်ထမ်းများအသုံးပြုသည့် စကားပြောစက်၊ နံပါတ်တုတ် အစရှိသည့် လုံခြုံရေးသုံးပစ္စည်းများသည် တရားဝင်၊ မဝင် ဆုံးဖြတ်ရန်ခက်ခဲသည်။ ထို့ကြောင့် ပုဂ္ဂလိကလုံခြုံရေးဝန်ဆောင်မှု လုပ်ငန်းဥပဒေပြဋ္ဌာန်းရန် မူကြမ်းရေးဆွဲပြီး လွှတ်တော်သို့တင်ပြထားကြောင်း အဆိုပါအသင်းထံမှ သိရသည်။

ပုဂ္ဂလိကလုံခြုံရေးသည် ဝန်ဆောင်မှုပေးသည့် စီးပွားရေးလုပ်ငန်းတစ်ခုဖြစ်ပြီး ဈေးကွက်ကြီးထွားလာမှုနှင့်အတူ စည်းစနစ်တကျဖွံ့ဖြိုးရန် အစိုးရက ထိန်းကျောင်းကြပ်မတ်ပေးရန် လိုအပ်ကြောင်းလည်း အဆိုပါအသင်း ဥက္ကဋ္ဌ ဦးတက်တိုးရှင်က ပြောကြားသည်။

ယင်းကဏ္ဍတိုးတက်သည်နှင့် အောက်ခြေအဆင့်ဝန်ထမ်းများကို အလုပ်အကိုင်အခွင့်အလမ်းဖန်တီးပေးနိုင်ပြီး တရားဥပဒေစိုးမိုးရေးနှင့် အများပြည်သူ လုံခြုံရေးကာကွယ်ရေးအတွက် အထောက်အကူပြုနိုင်သည်။ ထို့အပြင် နိုင်ငံတကာအထိ ဈေးကွက်ချဲ့ထွင်နိုင်သည့် ဝန်ဆောင်မှုလုပ်ငန်းဖြစ်ကြောင်း Winning Security Group ၏ အုပ်ချုပ်မှုဒါရိုက်တာ ဒေါ်စုစုလှိုင်ကဆိုသည်။

ဒူဘိုင်းနှင့် တရုတ်နိုင်ငံတို့တွင် လုံခြုံရေးဝန်ဆောင်မှုလုပ်ငန်းလုပ်ကိုင်နေသည့် မြန်မာနိုင်ငံသားများရှိကြောင်း ၎င်းကဆိုသည်။ ပြည်တွင်းလုံခြုံရေးဝန်ဆောင်မှုကဏ္ဍဖွံ့ဖြိုးလာပါက နိုင်ငံအတွက် အကျိုးများပြီး ယင်းကဏ္ဍ ဖွံ့ဖြိုးတိုးတက်လာရန် အဓိကအကျဆုံး လိုအပ်ချက်မှာ ဥပဒေပေါ်ပေါက်လာရေးဖြစ်ကြောင်း ၎င်းက ယခုကဲ့သို့ဆိုသည်။

“ဥပဒေမပြဋ္ဌာန်းဘဲနဲ့တော့ မတိုးတက်နိုင်ဘူး” 

 

နိုင်လင်းအောင်

You may also like...

Leave a Reply

Your email address will not be published. Required fields are marked *