တိုင်းပြည်ပြု ၂၀၂၀

မကြာမီ ၂၀၂၀ ရောက်တော့မည်။ ၂၀၂၀သည် သာမန်နှစ်တစ်နှစ်မဟုတ်၊ ရွေးကောက်ပွဲနှစ်ဖြစ်သည်။ သာမန်ရွေးကောက်ပွဲနှစ်လည်း မဟုတ်ပြန်၊ မြန်မာ့အသွင်ကူးပြောင်းရေး သို့မဟုတ် တိုင်းပြည်ပြုဖြစ်စဉ် Nation-building ၏ လမ်းဆုံလမ်းခွ နောက်တစ်ခုလည်း ဖြစ်သည်။

၂၀၂၀ ရွေးကောက်ပွဲသည် လွတ်လပ်၍မျှတသော ရွေးကောက်ပွဲ ၂၀၁၅ တွင် ကျင်းပအပြီး ဒုတိယမြောက်ကျင်းပသော ရွေးကောက်ပွဲဖြစ်သည်။ အသွင်ကူးပြောင်းသည့် နိုင်ငံများတွင် ဒုတိယမြောက် ရွေးကောက်ပွဲသည် အရေးကြီးပြီး နိုင်ငံနောင်ဆက်လျှောက်မည့်လမ်းကို အဆုံးအဖြတ်ပေးလေ့ရှိသည်။

၂၀၂၀ သည် ပြုပြင်ပြောင်းလဲရေးစတင်သည့်အချိန်မှ ဆယ်စုနှစ် တစ်စုအတွင်း၊ လက်ရှိဒီမိုကရေစီ အရပ်သားအစိုးရတက်သည့် ငါးနှစ်အတွင်း နိုင်ငံဘယ်မျှခရီးပေါက်၊ ဒီမိုကရေစီ ဘယ်မျှခရီးပေါက်သည်ကို တိုင်းတာသည့် မှတ်ကျောက်လည်း ဖြစ်သည်။

နိုင်ငံကို ဦးဆောင်မည့်ပုဂ္ဂိုလ်များကို ၂၀၂၀တွင် ပြည်သူတို့က နောက်တစ်ကြိမ် ရွေးချယ်ကြရဦးမည်။ ယခုကဲ့သို့ နိုင်ငံ့ခေါင်းဆောင်များကို ပြည်သူလူထုက ရွေးချယ်ခွင့်ရသည့် အကြိမ်မှာ မြန်မာ့သမိုင်းတွင် မများလှသဖြင့် ရခဲသောအခွင့်အရေးကို ပိုင်ပိုင်နိုင်နိုင် အသုံးချရန်လိုသည်။

မြန်မာနိုင်ငံသည် တိုင်းပြည်ပြုရာတွင် အကြောင်းအမျိုးမျိုးကြောင့် အခြားနိုင်ငံများထက် နောက်ကျကျန်နေခဲ့ရသဖြင့် နိုင်ငံကိုဦးဆောင်မည့်သူများသည် တည်ငြိမ်အောင်မြင်ပြီး နိုင်ငံများကဲ့သို့ နိုင်ငံကို အရှိန်မပျက် အုပ်ချုပ်ရုံတင်မကဘဲ တိုင်းပြည်ကို ဆက်ပြုကြရမည်။

ဆိုလိုသည်မှာ မြန်မာနိုင်ငံ၏ လမ်းဆုံလမ်းခွဖြစ်သည့် ၂၀၂၀ ရွေးကောက်ပွဲသည် သာမန်နိုင်ငံရေးသမားများအဆင့်ထက် သာလွန်သော တိုင်းပြုပြည်ပြုပုဂ္ဂိုလ်များကို လိုအပ်နေပါသည်။

တိုင်းပြည်ကို ပြုနိုင်သူများသာ ၂၀၂၀ရွေးကောက်ပွဲတွင် ပါဝင်အရွေးခံသင့်ပြီး တိုင်းပြည်ပြုနိုင်သူများကိုသာ ပြည်သူများက ရွေးချယ်တင်မြှောက်သင့်သည်။ 

အယ်ဒီတာ
၅.၁၂.၂၀၁၉

You may also like...

Leave a Reply

Your email address will not be published. Required fields are marked *