ရွေးကောက်ပွဲဝင်မည့် အမျိုးသမီးလွှတ်တော် ကိုယ်စားလှယ်လောင်းများအတွက် အခင်းအကျင်း

မြန်မာနိုင်ငံ၏ သမိုင်းဝင်ပြုပြင်ပြောင်းလဲရေးလုပ်ငန်းစဉ်သည် စဉ်ဆက်မပြတ် တိုးတက်ပြောင်းလဲလာသည်နှင့်အမျှ လွှတ်တော်အပါအဝင် အမျိုးမျိုးသော အင်စတီကျူးရှင်းများ၏ ဦးဆောင်မှုအခန်းကဏ္ဍတွင် အမျိုးသမီးဦးရေထပ်တိုးပါဝင်ရန် လိုအပ်လာသည်။ လက်ရှိတွင် ပြည်ထောင်စုနှင့် တိုင်းဒေသကြီး၊ ပြည်နယ်လွှတ်တော်များအတွင်း အမျိုးသမီးပါဝင်မှုသည် အရေအတွက်အားဖြင့် နည်းနေသေးသော်လည်း အမျိုးသမီးအမတ်များ၏ အပေါင်းလက္ခဏာဆောင်သော ကိုယ်စားပြုမှုများကြောင့် သက်ဆိုင်ရာမဲဆန္ဒနယ်များမှ ကောင်းမွန်သော အသိအမှတ်ပြုမှုများ ရရှိထားပြီးလည်း ဖြစ်သည်။

၂၀၂၀ အထွေထွေ ရွေးကောက်ပွဲကျင်းပရန် နီးကပ်လာသည်နှင့်အမျှ နိုင်ငံရေးပါတီများက အမျိုးသမီးကိုယ်စားလှယ်လောင်းများကို ယခင်ကထက်ပိုမို အဆိုပြုလာမည်လား၊ ထိုသို့အဆိုပြုပါကလည်း ရွေးချယ်ခံရနိုင်ပါမည်လားဟု မေးခွန်းထုတ်ရန် အချိန်ကျလာပြီဖြစ်သည်။ ကိုယ်စားလှယ်လောင်း အဆိုပြုခြင်းသည် ပါတီထိပ်ပိုင်းခေါင်းဆောင်များ၏ ဆုံးဖြတ်ချက်ပေါ်တွင် များစွာမူတည်သော်လည်း အမျိုးသမီးကိုယ်စားလှယ်လောင်းများအနေနှင့် နိုင်ငံရေးလမ်းကြောင်း ပေါ် စတင်တက်လှမ်းရာတွင် တွေ့ကြုံလာရမည့် စိန်ခေါ်မှုများကို တစ်ဦးတည်း ရင်ဆိုင်ဖြေရှင်းရန် မလိုတော့သည်ကတော့ သတင်းကောင်းဖြစ်သည်။ အကြောင်းမှာ ယခုအခါတွင် အတွေ့အကြုံရှိပြီးဖြစ်သည့် အမျိုးသမီးလွှတ်တော်အမတ်များက အမျိုးသမီးလွှတ်တော်ကိုယ်စားလှယ်လောင်းများကို အပြုသဘောဆောင်သည့် လမ်းညွှန်ပေးမှုများဖြင့် လက်တွဲခေါ်နိုင်ပြီဖြစ်သည်။

ယခုနှစ် စက်တင်ဘာလအစောပိုင်းတွင် အာရှဖောင်ဒေးရှင်းနှင့် ၎င်း၏ မိတ်ဖက်အဖွဲ့အစည်းဖြစ်သော ဖန်တီးအိမ်အဖွဲ့တို့ ပူးပေါင်း၍ စတုတ္ထအကြိမ်မြောက် မြန်မာနိုင်ငံလုံးဆိုင်ရာ အမျိုးသမီးလွှတ်တော် ကိုယ်စားလှယ်များဖိုရမ်ကို နေပြည်တော်တွင် အောင်မြင်စွာ ကျင်းပနိုင်ခဲ့ပါသည်။ တက်ရောက်ခဲ့သော အမျိုးသမီးလွှတ်တော်ကိုယ်စားလှယ်ပေါင်း ၅၈ ဦးအနက် အမျိုးသားလွှတ်တော်နှင့် ပြည်သူ့လွှတ်တော်မှ ကိုယ်စားလှယ် ကိုးဦး၊ ကချင်ပြည်နယ်နှင့် ရှမ်းပြည်နယ်အပါအဝင် ရန်ကုန်၊ မန္တလေး၊ မကွေး၊ စစ်ကိုင်းနှင့် ဧရာဝတီတိုင်းဒေသကြီး လွှတ်တော်တို့မှ ကိုယ်စားလှယ် ၄၉ ဦး ပါဝင်ခဲ့သည်။ ယင်းဖိုရမ်သည် လာမည့်ရွေးကောက်ပွဲတွင် ဝင်ရောက်ယှဉ်ပြိုင်မည့် အမျိုးသမီးကိုယ်စားလှယ်လောင်းများကို ပံ့ပိုးပေးနိုင်မည့် မဟာဗျူဟာများ အတူတကွ စဉ်းစားဖော်ထုတ်ရေးဆွဲရန် အခွင့်အရေးကောင်းတစ်ခု ဖြစ်စေခဲ့သည်။ ဆွေးနွေးပွဲမှရရှိခဲ့သည့် အရေးကြီးသောနည်းဗျူဟာတစ်ခုမှာ အမျိုးသမီး လွှတ်တော်ကိုယ်စားလှယ်အဖြစ် ဆောင်ရွက်ရာတွင် ရရှိထားသည့် အတွေ့အကြုံနှင့် အကြံဉာဏ်များကို ရွေးကောက်ခံမည့် အမျိုးသမီးကိုယ်စားလှယ်လောင်းများကို ဝေမျှသွားရန်ဖြစ်သည်။ ဤနည်းအားဖြင့် အမျိုးသမီးကိုယ်စားလှယ်လောင်းများမှာ ကြိုတင်မျှော်လင့်ထားရမည့် အရာများနှင့် လွှတ်တော်ကိုယ်စားလှယ်အဖြစ် ဝင်ရောက်ရွေးကောက်ခံရာတွင် အနိုင်ရရှိစေနိုင်မည့် မိမိတို့၏ ပင်ကိုအားသာချက်များကို မည်သို့ကောင်းမွန်စွာ အသုံးချရမည်ကို သိရှိနိုင်မည်ဖြစ်သည်။

လာမည့်ရွေးကောက်ပွဲတွင် ဝင်ရောက်ရွေးကောက်ခံမည့် အမျိုးသမီးကိုယ်စားလှယ်လောင်းများက မည်သည့်အချက်များကို ပြင်ဆင်ထားသင့်ပါသလဲ။

၁။ ပထမဦးစွာ အမျိုးသမီးလွှတ်တော် ကိုယ်စားလှယ်လောင်းများသည် ရွေးကောက်ပွဲဆိုင်ရာ ဥပဒေများ၊ နည်းဥပဒေများ၊ လမ်းညွှန်ချက်များ၊ ကျင့်ဝတ်များ၊ ရွေးကောက်ပွဲနှင့် ဆက်စပ်သောဥပဒေများ စသည့် ရွေးကောက်ပွဲလုပ်ငန်းစဉ်များကို သေချာစွာ ကြိုတင်လေ့လာထားရန် လိုအပ်ပါသည်။ မဲဆွယ်စည်းရုံးလှုံ့ဆော်ရေးကို ကောင်းမွန်ထိရောက်စွာ ဆောင်ရွက်နိုင်ရန်အတွက် ရွေးကောက်ပွဲလုပ်ငန်းစဉ်ကို မဖြစ်မနေသိရှိရန် လိုအပ်လှပါသည်။

၂။ အမျိုးသမီးလွှတ်တော် ကိုယ်စားလှယ်လောင်းများနှင့် ၎င်းတို့၏ မဲဆွယ်စည်းရုံးရေးအဖွဲ့ဝင်များသည် မဲဆန္ဒရှင်ပြည်သူများ အထူးသဖြင့် အမျိုးသမီးမဲဆန္ဒရှင်များနှင့် ပါတီစွဲမရှိသော မဲဆန္ဒရှင်များကို အောင်မြင်စွာစည်းရုံးနိုင်စေရန် မဲဆွယ်စည်းရုံးရေး ရန်ပုံငွေကို ရှင်းလင်းထိရောက်စွာ သုံးစွဲနိုင်သည့် နည်းဗျုဟာ ရှိသင့်ပါသည်။

၃။ လူထုရှေ့တွင် ဟောပြောစည်းရုံးခြင်း၊ ညှိနှိုင်းခြင်းနှင့် စကားစစ်ထိုးခြင်း စသည့်ပညာရပ်များကို မဖြစ်မနေ တတ်မြောက်အောင် သင်ကြားထားရန် လိုအပ်သည်။ ၎င်းပညာရပ်များသည် အမျိုးသမီးကိုယ်စားလှယ်လောင်းများကို မိမိတို့၏ မဲဆန္ဒရှင်များ ဌာနဆိုင်ရာမှ တာဝန်ရှိသူများ၊ ပြည်သူလူထုနှင့် မီဒီယာကြားတွင် ပိုမိုထိတွေ့ကောင်းမွန်သော ပြောဆိုဆက်ဆံသူများ ဖြစ်လာနိုင်စေရန် ကူညီပံ့ပိုးပေးသွားမည်ဖြစ်သည်။

၎။ အမျိုးသမီးလွှတ်တော်ကိုယ်စားလှယ်လောင်းများအနေနှင့် ဘတ်ဂျက်ရေးဆွဲခြင်းနှင့် ဥပဒေကြမ်းရေးဆွဲခြင်း စသည့်လုပ်ငန်းစဉ်များကို နားလည်သဘောပေါက်ရန် လိုအပ်သည်။ ထို့နည်းတူ နောင်တွင် မိမိအား ကူညီပံ့ပိုးပေးမည့် ဝန်ထမ်းများ ရှိနိုင်/မရှိနိုင် မသေချာသည့်အတွက် မိမိကိုယ်တိုင် ကွန်ပျူတာကို ကောင်းမွန်စွာ အသုံးပြုနိုင်ရန်နှင့် သုတေသနပြုခြင်းကို လုပ်ဆောင်နိုင်စေရန် ကြိုးစားထားသင့်သည်။

၅။ မိမိဘက်မှ ရပ်တည်ကာ ထောက်ခံအားပေးသော လူမှုအသိုင်းအဝိုင်းတစ်ခုရှိခြင်းမှာ အမျိုးသမီးကိုယ်စားလှယ်လောင်းများအတွက် လွန်စွာတန်ဖိုးရှိမည်ဖြစ်သည်။ ဤဆွေးနွေးအကြံပြုချက်ကို အာရှဖောင်ဒေးရှင်းနှင့် ဖန်တီးအိမ်တို့က ကောက်ယူခဲ့သော ‘မြန်မာ့နိုင်ငံရေးတွင် အမျိုးသမီးများပါဝင်မှု’ သုတေသနစစ်တမ်းတွင်လည်း တွေ့ရှိနိုင်မည်ဖြစ်သည်။ ထိုစစ်တမ်းတွင် ၂၀၁၀ အထွေထွေရွေးကောက်ပွဲနှင့် ၂၀၁၂ ကြားဖြတ်ရွေးကောက်ပွဲများတွင် ရွေးကောက်ခံခဲ့ရသော အမျိုးသမီးလွှတ်တော်ကိုယ်စားလှယ်များအနေနှင့် မိမိ၏ မိသားစု၊ နိုင်ငံရေးပါတီ၊ လမ်းညွှန်ပြသသူနှင့် လူမှုကွန်ရက်အသင်းအဖွဲ့များမှ စိတ်ဓာတ်ခွန်အား မြှင့်တင်ပေးရန် သို့မဟုတ် စိတ်ခံစားမှုဆိုင်ရာ ပံ့ပိုးမှုများသည် မဲဆွယ်စည်းရုံးမှုအောင်မြင်ရေးတွင် အရေးပါသည်သာမက နောက်ပိုင်းတွင် လွှတ်တော်ကိုယ်စားလှယ်တစ်ဦးအနေနှင့် ၎င်းတို့၏ တာဝန်ကို စီမံခန့်ခွဲရာ၌ လိုအပ်သည့် စွမ်းဆောင်ရည်အတွက် မရှိမဖြစ် အရေးပါသည်ဟု အစဉ်တစိုက် ထုတ်ဖော်ပြောဆိုခဲ့ကြသည်။

၆။ ဘဏ္ဍာငွေဖူလုံမှုသည် လွန်စွာအရေးပါသည့်ကိစ္စဖြစ်သည်။ အမျိုးသမီးကိုယ်စားလှယ်လောင်းများသည် မဲဆွယ်စည်းရုံးရေးကာလ၌သာမက မိမိတာဝန်ထမ်းဆောင်မည့် ငါးနှစ်တာကာလအတွင်းတွင် ကောင်းမွန်စွာလည်ပတ်နိုင်သော ဖူလုံသည့် ငွေရေးကြေးရေးအခြေအနေ ရှိစေရေးကို ကြိုတင်ထည့်သွင်းစဉ်းစားထားရန် အတွေ့အကြုံရှိ အမျိုးသမီးလွှတ်တော်ကိုယ်စားလှယ်များက ဆွေးနွေးအကြံပြုခဲ့သည်။

ဆွေးနွေးပွဲမှ ရရှိခဲ့သော အရေးကြီးလှသည့် အထက်ဖော်ပြပါ အသိအမြင်နှင့် အကြံပြုထောက်ခံချက်များအပြင် စာရေးသူအနေနှင့် အမျိုးသမီးတစ်ဦး၏ ရှုထောင့်မှသော်လည်းကောင်း၊ မြန်မာ့နိုင်ငံရေးတွင် အမျိုးသမီးများ ပိုမိုပါဝင်လာနိုင်ရေးအတွက် ထောက်ခံအားပေးသူတစ်ဦးအနေနှင့်သော်လည်းကောင်း အချို့သော အကြံပြုချက်များကို ထပ်မံဖြည့်စွက်လိုပါသည်။ မြန်မာနိုင်ငံ လူဦးရေ၏ ၅၀ ရာခိုင်နှုန်းကျော်မှာ အမျိုးသမီးများဖြစ်ပြီး ပြည့်ဝသော ဒီမိုကရေစီစနစ်သို့ လျှောက်လှမ်းသည်ဆိုရာတွင် အမျိုးသမီးကဏ္ဍကိုလည်း ထည့်သွင်းစဉ်းစားထားသည့် ဥပဒေများ ပိုမိုပြဋ္ဌာန်းနိုင်ရန် လိုအပ်ပါသည်။ ဤနေရာတွင် အမျိုးသမီးလွှတ်တော်ကိုယ်စားလှယ်များအနေနှင့် ဦးဆောင်သူအခန်းကဏ္ဍမှ ပါဝင်ရန်လိုအပ်ပြီး ၂၀၂၀ ရွေးကောက်ပွဲတွင် နိုင်ငံရေးပါတီများက အရည်အချင်းပြည့်ဝသော အမျိုးသမီးများကို ပိုမိုအဆိုပြုတင်သွင်းရန် အပြင်သင်တန်းများပို့ချခြင်းနှင့် စွမ်းဆောင်ရည်မြှင့်ခြင်းတို့ကို ထောက်ပံ့ပေးရန် အကြံပြုလိုပါသည်။

အမျိုးသမီးများအနေနှင့်လည်း အဆိုပြုခြင်းခံရပြီးနောက် အမျိုးသမီးများနှင့်သက်ဆိုင်သည့် ကိစ္စရပ်များသာမက စီးပွားရေး ဖွံ့ဖြိုးတိုးတက်မှု၊ နိုင်ငံတကာရေးရာ၊ ရာသီဥတုပြောင်းလဲမှု၊ သတင်းအချက်အလက်နှင့် နည်းပညာဆိုင်ရာကိစ္စရပ်များကို ဒေသန္တရအဆင့် အမျိုးသားအဆင့်နှင့် ကမ္ဘာ့အဆင့်မူဝါဒပိုင်းဆိုင်ရာကိစ္စရပ်များအထိ ပိုမိုနားလည်သဘောပေါက်လာစေရန် ကြိုးစားလုပ်ဆောင်ရမည်ဖြစ်သည်။ ကျွမ်းကျင်မှု ရရှိပြီးနောက် အမျိုးသမီးများသည် လွှတ်တော်တွင်းသာမက လွှတ်တော်ပြင်ပတွင်လည်း မူဝါဒဆိုင်ရာ ဆုံးဖြတ်ချက် ချမှတ်သူများအနေနှင့် စစ်မှန်သော နေရာများကို ရယူနိုင်မည်ဖြစ်သည်။

ထို့အပြင် ဒစ်ဂျစ်တယ်ခေတ်ကို ရောက်ရှိနေသည်နှင့်အမျှ အမျိုးသမီးလွှတ်တော်ကိုယ်စားလှယ်လောင်းများသည် ဆိုရှယ်မီဒီယာကို ကျွမ်းကျင်စွာ အသုံးပြုတတ်ရန် လိုအပ်လှသည်။ ရွေးကောက်ပွဲမတိုင်မီနှင့် ရွေးကောက်ပွဲပြီးကာလများတွင် အမုန်းစကားများနှင့် သတင်းအချက်အလက်အမှားများကို ထိထိရောက်ရောက် ကိုင်တွယ်ဖြေရှင်းနိုင်ရန် ကြိုတင်လေ့လာသင်ယူထားသင့်သည်။ အချို့သော အမျိုးသမီးလွှတ်တော်ကိုယ်စားလှယ်များက ဥပဒေပြုရေးနှင့် မူဝါဒချမှတ်ရေးအတွက် လိုအပ်သောသတင်းအချက်အလက်နှင့် စာရင်းဇယားရှာဖွေရာတွင် အခက်အခဲရှိသည်ဟု ဆိုကြသည်။ သို့ဖြစ်၍ အကျိုးအမြတ်မယူသော ပြည်တွင်းနှင့် နိုင်ငံတကာအဖွဲ့အစည်းများ၊ အရပ်ဘက်လူမှုအဖွဲ့အစည်းများ၊ အမျိုးသမီး ကွန်ရက်များနှင့် ချိတ်ဆက်၍ ထိုသတင်းအချက်အလက် လိုအပ်မှုကွာဟ ချက်ကို ဖြည့်ဆည်းရန်နှင့် ထိုအဖွဲ့အစည်းများမှ ပို့ချသော သင်တန်းများ နှင့်အလုပ်ရုံဆွေးနွေးပွဲများမှတစ်ဆင့် ၎င်းတို့၏ စွမ်းရည်များကို တစ်ဖက်တစ်လမ်းမှ မြှင့်တင်ရန် အကြံပြုလိုသည်။

နိဂုံးချုပ်အနေနှင့် ၂၀၂၀ ရွေးကောက်ပွဲတွင် အမျိုးသမီးကိုယ်စားလှယ်လောင်းများ ဝင်ရောက်ယှဉ်ပြိုင်လာပါက အမျိုးသမီးမဲဆန္ဒရှင်များက ဦးစားပေးထောက်ခံပံ့ပိုးသွားရန် စာရေးသူ မျှော်လင့်မိပါသည်။ အမျိုးသမီးများသည် မြန်မာနိုင်ငံ၏ ဒီမိုကရေစီခရီးစဉ်တွင် ထူးခြားသည့်အခန်းကဏ္ဍမှ မလွဲမသွေ ပါဝင်နိုင်မည်ဟုလည်း ယုံကြည်ပါသည်။ 

 

မီကီကျော်မြင့်

(ဒေါ်မီကီကျော်မြင့် ([email protected]) သည် အာရှဖောင်ဒေးရှင်း အထူးစီမံကိန်းများယူနစ်၏ မန်နေဂျာ ဖြစ်သည်။ ဤဆောင်းပါးတွင် ဖော်ပြထားသော အမြင်များ၊ ထင်မြင်ချက်များသည် အာရှဖောင်ဒေးရှင်း၏ အမြင်မဟုတ်ဘဲ ဆောင်းပါးရှင်၏ အမြင်များသာဖြစ်သည်။)

You may also like...

Leave a Reply

Your email address will not be published. Required fields are marked *