ဒီဇင်ဘာ ၁၀ နှင့် မြန်မာ ICJ ခုနစ်ချက်

ဒီဇင်ဘာ ၁၀ ရက်နေ့တွင် မြန်မာနိုင်ငံသည် နယ်သာလန်နိုင်ငံအခြေစိုက် ကုလသမဂ္ဂ၏အမြင့်ဆုံးတရားရုံး ICJ (International Court of Justice) တွင် ဂမ်ဘီယာနှင့် တရားစတင်ရင်ဆိုင်ရမည်။ မြန်မာဘက်က ဒေါ်အောင်ဆန်းစုကြည် ဦးဆောင်ပြီး ခုခံကာကွယ်မည်ဟု အစိုးရက ကြေညာထားသည်။ ဒေါ်အောင်ဆန်းစုကြည် ကိုယ်တိုင် တရားရုံးသို့ သွားရောက်ခုခံထွက်ဆိုမည်မူ မသေချာသေး။ ဒေါ်အောင်ဆန်းစုကြည်ကို အားပေးရန် နယ်သာလန်နိုင်ငံ The Hague သို့ လိုက်ပါအားပေးမည့်သူများသည် လက်မှတ်ဝယ်ပြီးကြပြီ။ 

မြန်မာနှင့် ICJ တွင် သတိပြုရမည့် ခုနစ်ချက်ကို ဆွဲထုတ်ဖော်ပြလိုက်ပါသည်။

(၁) ရေရှည်ရင်ဆိုင်ရမည်

The Hague တွင် ခဏတစ်ဖြုတ် တစ်ချီရင်ဆိုင်ပြီး ပြီးသွားမည့် ပွဲမဟုတ်။ ရေရှည်ရင်ဆိုင်ရမည့် ပွဲဖြစ်သည်။ ၁၉၉၃ တွင် ဘော့စနီးယား၊ ဟာဇီဂိုဗီးနားက ယခင်ယူဂိုဆလားဗီးယား (နောင်ဆားဘီးယား) ကို စွဲသော အမှုသည် ၁၃ နှစ်ကြာပြီးမှ ဆုံးဖြတ်ချက်ချသည်။ မြန်မာကို တရားစွဲဆိုသောကိစ္စသည် အနည်းဆုံး သုံးနှစ်ခန့်ကြာနိုင်သည်ဟု ဂမ်ဘီယာဘက်က သုံးသပ်ထားသည်။

ငွေကြေး၊ အချိန်နှင့် အာရုံစိုက်မှု များစွာကုန်ကျမည်။ ငွေကြေးအားဖြင့် ဒေါ်လာသန်းချီကုန်မည်။ အချိန်ဆယ်နှစ်၊ ဆယ့်ငါးနှစ်၊ နှစ်များစွာကြာမည်။ တရား ရင်ဆိုင်မှုအစား နိုင်ငံတည်ဆောက်ရေး အခြားနေရာများတွင် သုံးနိုင်သည့် နိုင်ငံခေါင်းဆောင်ပိုင်းများ၏ တန်ဖိုးရှိသော အာရုံစိုက်မှုများစွာ ကုန်မည်။ ဂမ်ဘီယာဘက်က တရားကုန်ကျစရိတ်ကို လူချမ်းသာနိုင်ငံများပါသည့် OIC (Irganization of Islamic Cooperation) က စိုက်သည်။ မြန်မာ့ကုန်ကျစရိတ်ကို မည်သူစိုက်မည်လဲ။

(၂) နိုင်ငံကို တရားစွဲဆိုသည်

ICJ သည် ပုဂ္ဂိုလ်ကို တရားစွဲဆိုသည် မဟုတ်။ နိုင်ငံကို တရားစွဲဆိုခြင်းဖြစ်သည်။ ပုဂ္ဂိုလ်ကိုစွဲခြင်း မဟုတ်သည့်အတွက် သက်သာသည်ဟု မြင်ကြသူများရှိသော်လည်း မြန်မာနိုင်ငံ၏ အမှတ်တံဆိပ်သည် Genocide နှင့် အတွဲခံလိုက်ရသည်။ မြန်မာနိုင်ငံအနေနှင့် ထိုသို့ တံဆိပ်အတွဲခံရခြင်းကို ဖြုတ်ရန် မနည်းကြိုးစားရမည်။ ယင်းသည်ပင် တရားစွဲဆိုသူများ၏ ကနဦးရည်ရွယ်ချက်ဖြစ်မည်။ ၂၀၁၁ ပြုပြင်ပြောင်းလဲရေးကာလစတင်ကတည်းက တရိပ်ရိပ်တက်လာနေသော မြန်မာ့ဂုဏ်သတင်း Image သည် ၂၀၁၇ ကတည်းက ထိုးဆင်းသွားခဲ့ပြီး ယခုတရားစွဲဆိုမှုသည် ထိုဂုဏ်သတင်းအတွက် နောက်ထပ် အန္တရာယ် ဖြစ်သည်။

(၃) ကမ္ဘာက စိတ်ဝင်စားမည်

ဒေါ်အောင်ဆန်းစုကြည်ကိုယ်တိုင် သွားလျှင် အခြားတာဝန်ရှိ ပုဂ္ဂိုလ်များသွားရောက်ရင်ဆိုင်သည်ထက် ကမ္ဘာက ပိုစိတ်ဝင်စားမည်။ နိုင်ငံတကာသတင်း မီဒီယာများ ကြိုက်မည်။

လူ့အခွင့်အရေးပုဒ်မဖြင့် နိုင်ငံတကာတရားရုံးတွင် တရားစွဲဆိုမှုကို နိုဘယ်လ်ငြိမ်းချမ်းရေးဆုရှင်၊ နိုင်ငံတကာလူ့အခွင့်အရေး မီးရှူးတန်ဆောင်ပုဂ္ဂိုလ်က ခုခံချေဖျက်မည်။ နိုင်ငံတကာဥပဒေကျွမ်းကျင်သူများ၊ နိုင်ငံတကာလူ့အခွင့်အရေးကျွမ်းကျင်သူများက နိုင်ငံတကာရုပ်မြင်သံကြား အစီအစဉ်များတွင် ဝေဖန်သုံးသပ်ကြမည်။ ဒေါ်အောင်ဆန်းစုကြည်ကိုယ်တိုင် ရင်ဆိုင်မည့် သတင်းကို နိုင်ငံတကာပညာရှင်အချို့က ဝေဖန်သုံးသပ်နေကြပြီ။

(၄) ပြည်တွင်းသို့ ရိုက်ခတ်မည်

နယ်သာလန်တွင် ပြုလုပ်သော တရားစွဲဆိုခြင်း၊ တရားရင်ဆိုင်ရခြင်းသည် ပြည်တွင်းကို ရိုက်ခတ်မည်။

တရားစွဲဆိုမှုကြောင့် ပြည်တွင်းတွင် စည်းလုံးညီညွတ်မှုရသွားနိုင်သည်ဟု မြင်သူများရှိသည်။ ရနိုင်သည်။ နိုင်ငံ တစ်နိုင်ငံသည် ပြည်ပဘုံအန္တရာယ်ရှိလာသောအခါတွင် ကျစ်လျစ်စည်းရုံးသည်။ ယခုပင်လျှင် နယ်သာလန်သို့ သွားရောက်အားပေးမည့်သူများ လက်မှတ်ဝယ်ပြီးကြပြီ။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဦးဆောင်ပြီး သွားရောက်ရင်ဆိုင်ရန် ပြည်ထောင်စုရှေ့နေချုပ်ရုံးက ဦးဆောင်ကာ စစ်ဥပဒေချုပ်ရုံးနှင့် နိုင်ငံခြားရေးဝန်ကြီးဌာနတို့ပါဝင်သော နိုင်ငံတကာရာဇဝတ်မှုတရားစီရင်ရေးဆိုင်ရာအထူးအဖွဲ့ကို နိုဝင်ဘာလ ၂၆ ရက်နေ့တွင် ဖွဲ့စည်းလိုက်သည်။ တပ်မတော်နှင့် NLD အတူလက်တွဲ လုပ်ကိုင်ခွင့်ရသွားသည်။ အတူလက်တွဲလုပ်ကိုင်ခွင့်ရရှိမှ နားလည်မှုရှိသည့်အတွက် နားလည်မှုတိုးတက်လာနိုင်သည်။

သို့သော် မြန်မာနိုင်ငံသည် နဂိုကတည်းက အက်ကွဲကြောင်းများရှိနေသည့်အတွက် ပြင်ပဖိအားရင်ဆိုင်ရချိန်တွင် အကွဲအပြဲပိုကြီးလာမည်လားဟု စိုးရိမ်စရာများလည်းရှိသည်။ တပ်မတော်နှင့် NLD သည် တရားရင်ဆိုင်ရသည့်အတွက် ပိုပြီး ကျောချင်းကပ်လာမည်လား၊ ခွာပြဲမည်လားဟု မေးကြသည်။

ယခုပင်လျှင် မြန်မာကို ဂမ်ဘီယာက တရားစွဲဆိုခြင်းကို ပြည်တွင်းလက်နက်ကိုင်တပ်ဖွဲ့ သုံးဖွဲ့ဖြစ်သည့် ရခိုင်လက်နက်ကိုင်တပ်ဖွဲ့ (AA) ၊ တအောင်းပလောင်လက်နက်ကိုင်တပ်ဖွဲ့ (TNLA)၊ ကိုးကန့်လက်နက်ကိုင်တပ်ဖွဲ့တို့က ထောက်ခံသည်။

အင်အားတောင့်တင်းသော ၀လက်နက်ကိုင်တပ်ဖွဲ့ (UWSA)၊ မိုင်းလားလက်နက်ကိုင်တပ်ဖွဲ့ (NDAA)၊ ရှမ်း လက်နက်ကိုင်အဖွဲ့ (SSPP) တို့ကမူ သွားရောက်ရင်ဆိုင်မည့် အစိုးရ၏ဆုံးဖြတ်ချက်ကို ထောက်ခံကြောင်း ကြေညာသည်။

တရားစွဲဆိုခြင်းကို ထောက်ခံသော လက်နက်ကိုင်အဖွဲ့ များသည် လက်ရှိတွင် တပ်မတော်နှင့် တိုက်ပွဲဖြစ်ပွားနေသော အဖွဲ့များ ဖြစ်သည်။

(၅) ဒေါ်အောင်ဆန်းစုကြည် ဘာကြောင့်ရင်ဆိုင်သလဲ

ယခုမေးခွန်းသည် ပြည်တွင်းရော ပြည်ပကပါ တစ်မေးတည်း မေးနေသော မေးခွန်းဖြစ်သည်။

နိုင်ငံကို လက်ရှိအုပ်ချုပ်နေသူဟူသော ရှုထောင့်က ကြည့်လျှင် ရှင်းသည်။ လက်ရှိအစိုးရသည် ထိုပြဿနာကို ရင်ဆိုင်ရှင်းမည်။ တပ်မတော်အစိုးရလက်ထက်က ထိုပြဿနာမျိုးများကို သူ့နည်းသူ့ဟန် သူ့မူဝါဒနှင့် သူ ရှင်းခဲ့သည်။ လက်ရှိအစိုးရသည် ထိုပြဿနာကို လက်ရှိ သူ့မူဝါဒနှင့် သူ ရှင်းရမည်။ ရှင်းပုံရှင်းနည်းသည် အစိုးရများ၏ နောက်ခံ၊ အယူဝါဒနှင့် မူတို့ကို မူတည်သော်လည်း လက်ရှိအစိုးရအနေဖြင့် ရှင်းကို ရှင်းရမည်သာ။

လက်ရှိ အစိုးရဖြစ်နေရုံသာမက နောင်တွင်ပါ အစိုးရဆက်ဖြစ်မည်ဟု ခန့်မှန်းထားလျှင် ပိုပြီး ရှင်းဖို့ လိုအပ်လာသည်။

ယခု အမှုသည် ကြာမည်။ ၂၀၂၀ ရွေးကောက်ပွဲတွင် ထပ်နိုင်မည်ဟုမှန်းလျှင် ဒေါ်အောင်ဆန်းစုကြည်သည် ယခုအမှုကို ရှင်းရမည်။

ဒေါ်အောင်ဆန်းစုကြည်ကိုယ်တိုင် ခုခံလျှင် ပိုပြီး အာရုံစိုက်နားထောင်ကြမည်။ နိုင်ငံတကာတွင် သူ့ကို ထောက်ခံသူများ ယခင်ထက် နည်းသွားသော်လည်း ကျန်ရှိ နေသေးသည့်အတွက် ထိုသူများ၏ အားကို ယူနိုင်မည်။ တာဝန်ယူမှု တာဝန်ခံမှုရှိကြောင်း ပြသနိုင်သည်။ ပြည်တွင်းတွင် ခေါင်းဆောင်မှု Leadership ကို ပြနိုင်မည်။

ကိုယ်တိုင်သွားလျှင် တရားခံစစ် စစ်ခံရမည်။ နိုဘယ်လ်ငြိမ်းချမ်းရေးဆုရှင် ကမ္ဘာ့နံပါတ်တစ်လူ့အခွင့်အရေးလှုပ်ရှားသူ နာမည်ကျော်ကို စစ်မေးရခြင်းသည် တရားသူကြီးများအတွက်၊ တရားလိုအတွက် ရှားပါးအခွင့်အလမ်းဖြစ်သည်။

ဒေါ်အောင်ဆန်းစုကြည်ကိုယ်တိုင် သွားလျှင် တရားရုံး၏ ဆုံးဖြတ်ချက်ပေါ် လိုက်နာသင့်၊ မလိုက်နာသင့် တာဝန်ပိုကြီးလာမည်။

ဒေါ်အောင်ဆန်းစုကြည်ကိုယ်တိုင် ခုခံမည်ဆိုသောကြောင့် တရားလိုဘက်မှ အောင်ပွဲခံ လက်ခမောင်းခတ်ကြသည်။

the diplomat  မှ ဆောင်းပါးရှင် နယူးဒေလီအခြေစိုက် Institute of  Peace and Conflict Studies မှ အကြီးတန်းသုတေသနသမား Angshuman Chowdhury url ‘Why will Aung San Suu Kyi personally defend Myanmar against genocide claims? ဆောင်းပါးတွင် အဓိကနှစ်ချက် သုံးသပ်သည်။ (၁) ၂၀၂၀ ရွေးကောက်ပွဲ နီးသောကြောင့် ဒေါ်အောင်ဆန်းစုကြည်ကိုယ်တိုင် ရှေ့က ထွက်သည်၊ (၂) အခြေခံဥပဒေပြင်ဆင်ရေးတွင် တပ်မတော်၏ လိုက်လျောမှုလိုချင်သည့်အတွက်။

သူကဲ့သို့ သုံးသပ်သော အခြားနိုင်ငံတကာပညာရှင်များလည်း ရှိသည်။

(၆) နိုင်ငံတကာဖိအား ပိုများလာနိုင်သည်

မြန်မာနိုင်ငံနှင့် စီးပွားရေး၊ နိုင်ငံရေး တစ်စုံတစ်ရာမရှိသည့် လူဦးရေနှစ်သန်းခန့်သာရှိသော အာဖရိကတိုက်မှ နိုင်ငံငယ်လေး ဂမ်ဘီယာက မြန်မာနိုင်ငံကို တရားစွဲသည်။

ရလဒ်က ဂမ်ဘီယာ နာမည်တက်သည်။ ယခုပင် နိုင်ငံတကာစင်မြင့်တွင် ဝိုင်းဝန်းချီးကျူးနေကြပြီ။ တစ်ကမ္ဘာလုံး ကိုယ်စား၊ အသိတရား၏ ကိုယ်စား တရားစွဲဆိုခြင်းဟု ချီးကျူးကြသည်။ နာမည်ကြီး နိုင်ငံတကာသတင်းမီဒီယာများက ဂမ်ဘီယာ၏ ခေါင်းဆောင်မှုကို ထောပနာပြုကြသည်။

မြန်မာနိုင်ငံကို ဂမ်ဘီယာသည် အဖွဲ့ဝင် ၅၇ နိုင်ငံပါဝင်သော OIC Organization of Islamic  Cooperation ကိုယ်စားတရားစွဲဆိုခြင်း ဖြစ်သည်။ ဂမ်ဘီယာတွင် မွတ်ဆလင် ဘာသာဝင် အများစုနေကြသည်။ ထို့ကြောင့် မြန်မာနှင့် OIC တရားရင်ဆိုင်ရခြင်း ဖြစ်သည်။ OIC  တွင် ကမ္ဘာအနှံ့ ဩဇာတိက္ကမရှိသော ဆော်ဒီအာရေဗျ၊ တူရကီကဲ့သို့ နိုင်ငံများနှင့် အာဆီယံအဖွဲ့ဝင် မလေးရှား၊ အင်ဒိုနီးရှား၊ ဘရူနိုင်းတို့ပါသည်။

ဂမ်ဘီယာက တရားစွဲထားရုံတင်မက ဘင်္ဂလားဒေ့ရ်ှကလည်း မြန်မာကို ဖိအားပေးရန် တစ်မြို့တော်ဝင် တစ်မြို့တော်ထွက်နှင့် စည်းရုံးပြောကြားနေသည်။ သံခင်းတမန်ခင်းတွင် မြန်မာသည် ယခုထက် ခြေလှမ်းများများလှမ်းနိုင်ရမည်။

ရခိုင်အရေးနှင့် ပတ်သက်ပြီး မြန်မာကို တိုက်တွန်းဖိအားပေးခြင်းသည် နိုင်ငံတကာတွင် ခေတ်စားလာပြီး ဓမ္မကြောင်းဘက်မှ ရပ်တည်သည့်သဘော ရောက်စေသည့်အတွက် နောင်လာမည့် နှစ်များတွင် မြန်မာအပေါ် ဖိအားဆက်များနေဦးမည်။

မြန်မာနိုင်ငံဘက်ကလည်း သံခင်းတမန်ခင်းများများ လှုပ်ရှားရမည်။

နိုင်ငံအချင်းချင်းအငြင်းပွားမှုကို ဖြေရှင်းပေးရသည့် ICJ သည် ကမ္ဘာ့တရားရုံးအမည်ရသော်လည်း သူ့ ဆုံးဖြတ်ချက်များကို လိုက်နာအောင် လုပ်နိုင်မည့်ယန္တရားမရှိ။ ဆုံးဖြတ်ချက်များကို မလိုက်နာလျှင် သိက္ခာထပ်ကျနိုင်သည်။ စင်စစ် မြန်မာကို သိက္ခာထပ်ချခြင်းဖြင့် ဖိအားပေးရန်သည် တရားလိုများ၏ အဓိကရည်ရွယ်ချက် ဖြစ်မည်။

(၇) အခွင့်အလမ်း

The Hague တွင် တရားသွားရင်ဆိုင်ရခြင်းကို အခွင့်အလမ်းဟု မြင်ကြည့်လျှင်လည်း ရနိုင်သည်။ မြန်မာနိုင်ငံသည် ရခိုင်အရေးနှင့်ပတ်သက်ပြီး ကမ္ဘာကို သေသေချာချာရှင်းပြခွင့် ရနိုင်မည်။ မြန်မာက ပြောသည့် အချက်များကို ဂရုတစိုက်နားထောင်ကြလိမ့်မည်။

တရားစွဲဆိုခြင်းသည် လက်ရှိ ရခိုင်အရေးကို ပြေလည်အောင် မြန်မာနိုင်ငံ ဖြေရှင်းပေးရန် ရည်ရွယ်ခြင်း ဖြစ်သည်။ ထွက်ပြေးသူများအတွက် တရားမျှတရေးဆောင်ရွက်ပေးရန် ဖြစ်သည်။ ထို့ကြောင့် မြန်မာက ဖြေရှင်းပေးနေသည်ဆိုလျှင် စိုးရိမ်ပူပန်စရာ မရှိပါ။ ကိုယ့်ဘက်က ဆောင်ရွက်ထားသည်များ၊ ရင်ဆိုင်နေရသည့် အခက်အခဲများကို ပွင့်ပွင့်လင်းလင်းရှင်းပြနိုင်မည့် စင်မြင့်တစ်ခုရလိုက်သည်ဟုပင် သတ်မှတ်နိုင်သည်။ ပိုပြီးမြန်မြန် ဆန်ဆန်ဖြေရှင်းပေးရန်မူ လိုအပ်သည်။

မြန်မာသည် နိုင်ငံတွင်းတွင် လူ့အခွင့်အရေးအပါအဝင် အခြေအနေများပိုကောင်းအောင် ဆောင်ရွက်ရမည်။ နိုင်ငံတွင်းတွင် ပြုပြင်ပြောင်းလဲမှုများ အရှိန်မြှင့်ဆောင်ရွက်ရမည်။

တစ်နိုင်ငံလုံးကျောချင်းကပ်အောင် သွေးစည်းညီညွတ်ရေး ဦးစားပေးဆောင်ရွက်ရမည်။

မှန်မှန်ကန်ကန်တရားရင်ဆိုင်လျှင် မြန်မာနိုင်ငံ ပိုကောင်းသွားနိုင်သည့် အခွင့်အလမ်းဟုပင် ဆိုနိုင်သည်။

TVJ

You may also like...

Leave a Reply

Your email address will not be published. Required fields are marked *