ရက်တိုင်းရက်တိုင်း အရေးကြီးသော ၂၀၂၀

စတင်နေပြီဖြစ်သော ၂၀၂၀ သည် သာမန်နှစ်မဟုတ်။ မြန်မာ့ဒီမိုကရေစီပြုပြင်ပြောင်းလဲရေးအတွက် အရေးကြီးသောနှစ်ဖြစ်သည်။ ရက်တိုင်း ရက်တိုင်းကို အကျိုးရှိရှိ သုံးရမည်။

၂၀၂၀ သည် ဒီမိုကရေစီနည်းဖြင့် ရွေးကောက်တင်မြှောက်ခံရသော အရပ်သားအစိုးရစစ်စစ်ဖြစ်သည့် လက်ရှိအစိုးရသက်တမ်း၏ နောက်ဆုံးနှစ်ဖြစ်သည်။ ရွေးကောက်ပွဲနှစ် ဖြစ်သည်။

၂၀၂၀ တွင် ကျင်းပမည့်ရွေးကောက်ပွဲ အောင်မြင်ရေးသည် မြန်မာနိုင်ငံအတွက် အလွန်အရေးကြီးသည်။ ၁၉၉၀ ရွေးကောက်ပွဲနှင့် ၂၀၁၀ ရွေးကောက်ပွဲရော ၂၀၁၅ ရွေးကောက်ပွဲကိုပါ တပ်မတော်အစိုးရ သို့မဟုတ် တပ်မတော်အစိုးရမှ အသွင်ပြောင်းအစိုးရတို့က ကျင်းပခဲ့သည့်အတွက် ၂၀၂၀ ရွေးကောက်ပွဲသည် ၁၉၆၀ ရွေးကောက်ပွဲနောက်ပိုင်း နှစ် ၆၀ အတွင်း အရပ်သားဒီမိုကရေစီအစိုးရကကျင်းပမည့် ပထမဆုံးအထွေထွေရွေးကောက်ပွဲ ဖြစ်သည်။

ပြည်သူများသည် ဒီမိုကရေစီကို လိုလားတောင့်တကြသော်လည်း ဒီမိုကရေစီအရပ်သားအစိုးရ၏ စွမ်းဆောင်ရည်ကိုကြည့်ကာ ဒီမိုကရေစီကို အကဲဖြတ်တတ်ကြသည်။ အစိုးရစွမ်းဆောင်ရည်ညံ့လျှင် ‘ဒီမိုကရေစီလည်း အလကားပါ’ ဟု စိတ်ပျက်သွားနိုင်သည်။ ရွေးကောက်ပွဲတွင် မဲလာပေးမည့်သူ အရေအတွက်သည် ၂၀၂၀ ဒီမိုကရေစီအစိုးရ၏ ၂၀၂၀ တွင်း စွမ်းဆောင်ရည်ပေါ်တွင် များစွာတည်သည်။

၂၀၂၀ တွင် လက်ရှိအစိုးရသည် ရွေးကောက်ပွဲဝင်အစိုးရများတွင်ဖြစ်တတ်သည့် ဝိရောဓိကို သတိထားရမည်။ နိုင်ငံရေးသမားမှန်သမျှသည် ရွေးကောက်ပွဲတွင် အနိုင်ရချင်စိတ်ရှိမြဲဖြစ်သည့်အတွက် မျက်နှာပန်းလှပြီး လာမည့်ရွေးကောက်ပွဲနိုင်စေရန် လူပြိန်းကြိုက်မူဝါဒ Populist Policies များကိုချမှတ်ရမည်လား၊ ပြည်သူလူထုနှင့် နိုင်ငံတကယ်ကောင်းစေမည့် မူဝါဒများကို ချမှတ်ရမည်လားဟူသော မူဝါဒလွန်ဆွဲပွဲများ အစိုးရတွင်းတွင်ဖြစ်ပေါ်တတ်သည်။ ပြည်သူများ၏ ရေရှည်ကောင်းကျိုးကိုကြည့်ပြီး မှန်ကန်ထိရောက်သော မူဝါဒများကိုသာ ချမှတ်စေလိုသည်။

၂၀၂၀ သည် အထက်တွင်ဖော်ပြသော အကြောင်းများကြောင့် နဂိုကတည်းက အရေးကြီးရသည့်အထဲတွင် ရခိုင်အရေးကြောင့် နိုင်ငံတကာ ဖိအားများ စုဆုံပြင်းထန်မည့်နှစ်လည်း ဖြစ်ပြန်သည်။

၂၀၂၀ သည် မြန်မာ့အနာဂတ်ကို ဆုံးဖြတ်မည့်နှစ်ဖြစ်သည်။ မြန်မာနိုင်ငံကိုချစ်သော နိုင်ငံသူနိုင်ငံသားအားလုံး ကျောချင်းကပ်ရမည့်နှစ်ဖြစ်သည်။

 

အယ်ဒီတာ
၂.၁.၂၀၂၀

You may also like...

Leave a Reply

Your email address will not be published. Required fields are marked *