ဒေါ်လာအကျရာသီနှင့် ရောပါလာသည့် မြန်မာ့စီးပွားရေး

ပြင်ပ ပယောဂမရှိလျှင် ယခုကာလသည် ပြည်တွင်း၌ အမေရိကန်ဒေါ်လာဈေး ကျဆင်းလေ့ရှိသည့်အချိန် ဖြစ်သည်။

ပြီးခဲ့သည့် ၂၀၁၉ ခုနှစ် နိုဝင်ဘာလမှ စတင်ကာ အမေရိကန်ဒေါ်လာဈေး စတင်ကျရိပ်ပြခဲ့ပြီး ဒီဇင်ဘာ ၃၀ ရက်နေ့တွင် ယင်းနှစ်၏ အနိမ့်ဆုံးဈေးဖြင့် ၂၀၁၉ ခုနှစ်ကို လက်ပြနှုတ်ဆက်ခဲ့သည်။

သို့သော် ဒေါ်လာဈေးမှာ ၂၀၂၀ ပြည့်နှစ်အထိ ကျဆင်း၍ ကောင်းနေဆဲပင်။

မြန်မာနိုင်ငံတော် ဗဟိုဘဏ်က နေ့စဉ်ထုတ်ပြန်သည့် ဈေးကွက်ရည်ညွှန်းနှုန်းအရ လက်ရှိ ၂၀၁၉ – ၂၀၂၀ ဘဏ္ဍာနှစ်အစ အောက်တိုဘာ ၂ ရက်နေ့တွင် အမေရိကန်တစ်ဒေါ်လာလျှင် ၁၅၃၄ ဖြစ်ပြီး သုံးလကျော်အကြာ ဇန်နဝါရီ ၈ ရက်နေ့တွင် ၁၄၆၁ ဒသမ ၇ ကျပ် ဖြစ်သည်။

သုံးလကျော်အတွင်း အမေရိကန်ဒေါ်လာဈေး ၇၂ ဒသမ ၃ ကျပ်၊ ရာခိုင်နှုန်းအားဖြင့် ၅ ရာခိုင်နှုန်းနီးပါး ကျဆင်းသွားသည်။

သို့ရာတွင် ယခင်လို ရက်ပိုင်းအတွင်း ရုတ်တရက် ဈေးထိုးတက်၊ ထိုးကျခြင်းမျိုး မဟုတ်ဘဲ တအိအိ ကျဆင်းသွားခြင်းဖြစ်သည်။

“အကြောင်းပေါင်းစုံသွားတာလည်း ပါတယ်။ ဒီအချိန်က ဈေးကွက်ထဲ ဒေါ်လာများတဲ့ ကာလ၊ ဝယ်လိုအားကျတာလည်း ပါမယ်” ဟု ကမ္ဘောဇဘဏ် အကြီးတန်း အကြံပေး ဦးသန်းလွင်က ပြောကြားသည်။

စိုက်ပျိုးရေးထွက်ကုန်၊ ကောက်ပဲသီးနှံများပေါ်ချိန်ဖြစ်သလို မြန်မာနိုင်ငံ၏ ခရီးသွားရာသီလည်းဖြစ်ရာ ဈေးကွက် အတွင်း အမေရိကန်ဒေါ်လာ များနေပြီး ဝယ်လိုအားလျော့နေချိန်ဖြစ်ကြောင်း ပြင်ပနိုင်ငံခြားငွေကြေးဈေးကွက်မှ ဝါရင့် အရောင်းအဝယ်သမားများက ဆိုကြသည်။

ယခင်ကာလများကမူ ယခုလိုကာလသည် ဘိန်းထွက်ရာသီဖြစ်၍ အမေရိကန်ဒေါ်လာ ဖောဖောသီသီ ဝင်လာချိန်ဖြစ်သည်ဟု ပြောဆိုမှုများလည်းရှိသည်။

ပုံမှန်အားဖြင့် ယခုအချိန်သည် အမေရိကန်ဒေါ်လာဈေးကျရမည့်အချိန်ဖြစ်ကြောင်း ပြည်တွင်းလုပ်ငန်းရှင်များနှင့် နိုင်ငံခြားငွေကြေးဈေးကွက်အတွင်းမှ ကျွမ်းကျင်သူများက သိမြင်ထားပြီး ဖြစ်သည်။

ထို့အပြင် ဒီဇင်ဘာ၊ ဇန်နဝါရီ၊ ဖေဖော်ဝါရီလတို့သည် ရုံး၊ လုပ်ငန်းပိတ်ရက်များသောကာလ၊ နိုင်ငံတကာ နှစ်သစ်ကူး၊ တရုတ်နှစ်သစ်ကူးကာလလည်းဖြစ်သောကြောင့် လုပ်ငန်းလည်ပတ်မှု လျော့နည်းသွားလေ့ရှိသည်။

“ဈေးကွက်မှာ ဒေါ်လာဝယ်လိုအား နည်းသွားလို့ရယ်၊ အများပြည်သူရုံးပိတ်ရက်တွေကြောင့်ရယ်လို့ ထင်ပါတယ်။ ပြည်ပခရီးသွားတွေဝင်တဲ့ အချိန်လည်း ဖြစ်တာပေါ့” ဟု မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် ဒုတိယဥက္ကဋ္ဌ ဒေါက်တာမောင်မောင်လေးက ဆိုသည်။

သို့ရာတွင် အမေရိကန်ဒေါ်လာဈေးမှာ ရာသီချိန်ဈေးကျဆင်းသည်ဟုဆိုသော်လည်း ပုံမှန်ဖြစ်လေ့ရှိသည့် အကြောင်းတရားများအပြင် နောက်ထပ်အကြောင်းခြင်းရာများလည်း ရှိသေးသည်။

ယင်းမှာ ငွေကြေးဈေးကွက်ကို ယခင်ထက်ပိုမိုတက်ကြွစွာ ထိန်းကျောင်းလာသော ဗဟိုဘဏ် လုပ်ဆောင်ချက် အချို့ဖြစ်သည်။

ပို့ကုန်များ ပြည်ပသို့တင်ပို့လိုက်ပြီးနောက် ရရှိသည့် ပို့ကုန်ရငွေ အမေရိကန်ဒေါ်လာများကို ပြည်တွင်းသို့ ဝင်ရောက်လာရန် ယခင်ထက်ပိုမိုကြပ်မတ်လာပြီး သွင်းကုန်များ ပြည်တွင်းသို့ တင်သွင်းလာချိန်တွင် ပစ္စည်း အမှန်တကယ် မရောက်လာဘဲ ငွေစီးထွက်သွားခြင်း ရှိ၊ မရှိကို စိစစ်လာခြင်းဖြစ်နိုင်ကြောင်း ဦးသန်းလွင်က သုံးသပ်သည်။

“ပို့ကုန်ကနေ ပိုက်ဆံ ပြန်ဝင် မဝင် ကြပ်မတ်လာတော့ ဒီကနေလည်း ဒေါ်လာ ပြန်ဝင်လာတဲ့ သဘော ရှိတယ်” ဟု ၎င်းက ဆိုသည်။

နောက်တစ်ချက်မှာ ကုန်သွယ်မှုတွင် သွင်းကုန်ပမာဏလျော့သွားခြင်းနှင့် ပြည်တွင်းဝယ်လိုအား ကျလာခြင်းကြောင့် ဖြစ်နိုင်ကြောင်း ဒေါက်တာမောင်မောင်လေးက ပြောသည်။

သွင်းကုန်ပမာဏလျော့ကျသွားခြင်းဖြစ်နိုင်ကြောင်း လုပ်ငန်းရှင်များက ပြောကြားသော်လည်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ တရားဝင်ကိန်းဂဏန်းများအရ သွင်းကုန်ပမာဏ သိသာစွာ လျော့ကျခြင်း မရှိပေ။

ပြီးခဲ့သည့် ၂၀၁၈-၂၀၁၉ ဘဏ္ဍာနှစ်တွင် ပို့ကုန်ပမာဏ အမေရိကန်ဒေါ်လာ ၁၇ ဘီလီယံခန့်၊ သွင်းကုန်ပမာဏ အမေ ရိကန်ဒေါ်လာ ၁၈ ဘီလီယံခန့်ရှိပြီး စုစုပေါင်းကုန်သွယ်မှုပမာဏ အမေရိကန်ဒေါ်လာ ၃၅ ဘီလီယံရှိကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက ထုတ်ပြန်ထားသည်။

၂၀၁၇ – ၂၀၁၈ နှင့် ၂၀၁၈ – ၂၀၁၉ ဘဏ္ဍာနှစ်၏ သွင်းကုန်ပမာဏကို နှိုင်းယှဉ်ပါက အမေရိကန်ဒေါ်လာသန်း ခြောက်ရာခန့် လျော့နည်းသွားကြောင်း အဆိုပါဝန်ကြီးဌာန၏ ကိန်းဂဏန်းများအရ သိရသည်။

သို့ရာတွင် ဘဏ္ဍာနှစ်ကာလကို ပြောင်းလဲသတ်မှတ်ထားသည့်အတွက် ၂၀၁၇-၂၀၁၈ ဘဏ္ဍာနှစ်သည် ဧပြီလမှ မတ်လဖြစ်ပြီး ၂၀၁၈-၂၀၁၉ ဘဏ္ဍာနှစ် သည် အောက်တိုဘာလမှ စက်တင်ဘာလဖြစ်ရာ တိုက်ရိုက်နှိုင်းယှဉ်ရန် မလွယ်ကူပေ။

“ဝယ်လိုအား ရောင်းလိုအားနဲ့ ပြောရင်တော့ ဝယ်လိုအားကျလာတယ်ပေါ့။ သွင်းကုန်ကျတယ်လို့ ပြောပေမယ့်လည်း စီးပွား/ကူးသန်းက ထုတ်ပြန်တဲ့ ကိန်းဂဏန်းမှာတော့ သိပ်မကျဘူးလို့ ပြနေတာပဲ” ဟု စီးပွားရေးလုပ်ငန်းရှင် ဒေါက်တာစိုးထွန်းက ဆိုသည်။

အဆိုပါဝန်ကြီးဌာနက ထုတ်ပြန်သည့် ကိန်းဂဏန်းများမှာ အကောက်ခွန်ဦးစီးဌာနမှရရှိသည့် တရားဝင်ကုန်သွယ်မှုကိန်းဂဏန်းမျှသာ ဖြစ်သည်။

တရားမဝင်ကုန်သွယ်မှုလမ်းကြောင်းတွင် လုပ်ဆောင်နေသော ကိန်းဂဏန်း၊ အချက်အလက်များ ပါဝင်နိုင်မည် မဟုတ်ပေ။

“မြန်မာက တခြားနိုင်ငံတွေနဲ့ မတူပါဘူး။ တရားမဝင်ကုန်သွယ်မှုကလည်း များပါတယ်။ ခုနောက်ပိုင်း ဒီ တရားမဝင်ကုန်သွယ်မှုဘက်မှာ ပမာဏနည်းသွားလို့နဲ့ ဈေးကွက်မှာ ဒေါ်လာလိုအပ်ချက် နည်းသွားလို့လည်း ဖြစ်နိုင်ပါတယ်” ဟု ဒေါ်လာဈေးကျဆင်းမှုနှင့်ပတ်သက်ပြီး ဒေါက်တာမောင်မောင်လေးက ခန့်မှန်းပြောသည်။

လက်ရှိဘဏ္ဍာနှစ်အစ အောက်တိုဘာလတွင် အမေရိကန်ဒေါ်လာဈေးမှာ တစ်ဒေါ်လာလျှင် ၁၅၁၀ နှင့် ၁၅၃၅ ကျပ် အတွင်းရှိရာမှ ဒီဇင်ဘာလမှစတင်ကာ တအိအိဈေးကျလာပြီး ၁၅၀၀ ကျပ် ကျပ်အောက်သို့ ကျဆင်းသွားသည်။

ယင်းကာလအတွင်း မြန်မာနိုင်ငံတော် ဗဟိုဘဏ်သည် နိုင်ငံခြားငွေလေလံဈေးကွက်အတွင်းမှ အမေရိကန် ဒေါ်လာဝယ်ယူခဲ့ပြီး ၂၀၁၉ ခုနှစ် နိုဝင်ဘာလတွင် အမေရိကန်ဒေါ်လာ ၂၉ ဒသမ ၄ သန်း၊ ဒီဇင်ဘာလတွင် ၂၇ သန်းနှင့် ယခုနှစ် ဇန်နဝါရီလတွင် (ဇန်နဝါရီလ ၈ ရက်နေ့အထိ) ၁၂ သန်း ဝယ်ယူထားသည်။

ယမန်နှစ် ဒီဇင်ဘာလ ၂၀ ရက်နေ့မှစတင်ကာ ဈေးကွက်ဖွင့်ရက်တိုင်းတွင် ဗဟိုဘဏ်သည် အမေရိကန်ဒေါ်လာ ဝယ်ယူခဲ့ခြင်းဖြစ်သည်။

“ဗဟိုဘဏ်လုပ်တာ မှန်ပါတယ်။ သူလည်း အင်အားတောင့်အောင်လို့ပေါ့။ ဒါပေမဲ့လည်း ဒီပမာဏက ဆင့်ပါးစပ် နှမ်းပက်သလောက်ပါပဲ” ဟု ဒေါက်တာမောင်မောင်လေးက ဆိုသည်။

နိုင်ငံခြားအရန်ငွေပမာဏ များပြားလာရန် လုပ်ဆောင်လျက်ရှိကြောင်း လက်ရှိနိုင်ငံခြားအရန်ငွေပမာဏသည် စုစုပေါင်းသွင်းကုန်ပမာဏ သုံးလခွဲစာခန့် ရှိကြောင်း ဗဟိုဘဏ်တာဝန်ရှိသူများက ပြောကြားထားသည်။

မြန်မာနိုင်ငံ၏ နိုင်ငံခြားအရန်ငွေပမာဏမှာ ၂၀၁၅-၂၀၁၆ ဘဏ္ဍာနှစ်တွင် အမေရိကန်ဒေါ်လာသန်း ၄၈၀၀ ကျော်ရှိပြီး ၂၀၁၈-၂၀၁၉ ဘဏ္ဍာနှစ်တွင် အမေရိကန် ဒေါ်လာသန်း ၅၆၀၀ ကျော်ရှိကြောင်း အပြည်ပြည်ဆိုင်ရာ ငွေကြေးရံပုံငွေအဖွဲ့  (IMF) ၏ ကိန်းဂဏန်းများအရ သိရသည်။

ဒေါ်လာဈေး ပုံမှန်ထက်ကျဆင်းရမှုသည် စီးပွားရေးလုပ်ငန်းများ လည်ပတ်မှုနှေးကွေးသွားခြင်းနှင့် အစိုးရ၏ ယခင်နှစ်များက ကျင့်သုံးခဲ့သည့် ခြိုးခြံချွေတာရေး ဘဏ္ဍာရေးမူဝါဒကြောင့်လည်း ဖြစ်သည်။

စီးပွားရေး နှေးကွေးတုံ့ဆိုင်းလာကြောင်း စီးပွားရေးပညာရှင်များ၊ စီးပွားရေးသုတေသီများနှင့် လုပ်ငန်းရှင်များက ပြောဆိုထောက်ပြလာပြီးနောက် လက်ရှိဘဏ္ဍာနှစ်အတွက် အစိုးရအနေနှင့် ငွေကြေး ပိုမိုသုံးစွဲမည်ဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာနက ပြောကြားထားသည်။

အစိုးရအနေနှင့် စီမံကိန်းများ၊ လုပ်ငန်းများဖော်ဆောင်ကာ စီးပွားရေးလှုပ်နှိုးခြင်း၊ အတိုးနှုန်းချခြင်းတို့ကို လုပ်ဆောင်ရန်လိုကြောင်း ဒေါက်တာမောင်မောင်လေးက ပြောသည်။ ဒေါ်လာဈေး ကျဆင်းသည့် ရာသီချိန် ဖြစ်သော်လည်း တိုင်းပြည်စီးပွားရေးအခြေအနေအရ ပုံမှန်ထက် ဈေးကျလာခြင်းကို ၎င်းက ယင်းသို့ဆိုသည်။

“စီးပွားရေး ကျတယ်၊ တန့်တယ်လို့ မပြောချင်ပါဘူး။ ဒါပေမဲ့ တခြားနိုင်ငံတွေမှာ ဒီလိုဖြစ်လာပြီဆိုရင်တော့ စီးပွားရေးကျလာပြီလို့ ပြောကြတယ်”

စစ်ငြိမ်းသူ

You may also like...

Leave a Reply

Your email address will not be published. Required fields are marked *