တစ်ရေးနိုးလာသည့် ငြိမ်းချမ်းရေးချိုးငှက်

၁၅ လကြာ ရပ်တန့်ထားခဲ့သည့် တရားဝင်ငြိမ်းချမ်းရေးဆွေးနွေးပွဲများကို ၂၀၂၀ ပြည့်နှစ် ဇန်နဝါရီလ ၈ ရက်တွင် ပြန်လည်စတင်ခဲ့ခြင်းဖြင့် တစ်ရေးနိုးလာသော ငြိမ်းချမ်းရေးချိုးငှက်သည် ပြည်သူများဆီသို့ မျှော်လင့်ချက်များကို ပြန်လည်ယူဆောင်လာခဲ့ပြီဖြစ်သည်။

၂၀၁၈ ခုနှစ် အောက်တိုဘာလအတွင်း နောက်ဆုံးကျင်းပခဲ့သော နေပြည်တော်ထိပ်သီးဆွေးနွေးပွဲမှ ပြန်တွက်စစ်လျှင် ငြိမ်းချမ်းရေးဆွေးနွေးပွဲများကို ရပ်ဆိုင်းထားခဲ့သည်မှာ ၁၅ လကြာမြင့်ခဲ့ပြီဖြစ်သည်။

၂၀၁၈ ခုနှစ် အောက်တိုဘာလအတွင်း ကျင်းပခဲ့သည့် နေပြည်တော်ထိပ်သီးဆွေးနွေးပွဲနောက်ပိုင်း တရားဝင် ငြိမ်းချမ်းရေးဆွေးနွေးပွဲများကို ဖယ်ကြဉ်ခဲ့သော ကရင်အမျိုးသားအစည်းအရုံး KNU နှင့် ရှမ်းပြည်ပြန်လည်ထူထောင်ရေးကောင်စီ (RCSS) တို့သည် ၂၀၂၀ ပြည့်နှစ် ဇန်နဝါရီလ ၈ ရက်တွင် နေပြည်တော်၌ ကျင်းပသော တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူညီချက် ပူးတွဲအကောင်အထည်ဖော်ရေးညှိနှိုင်းအစည်းအဝေး(JICM) တွင် ပါဝင်လာခဲ့သည်။

တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူညီချက်စာချုပ် NCA တွင် လက်မှတ်ရေးထိုးထားသည့် တိုင်းရင်းသား ၁၀ ဖွဲ့စလုံး ဤအစည်းအဝေးသို့ တက်ရောက်ခဲ့ပြီး သဘောတူညီချက်ရှစ်ချက် ရရှိခဲ့သည်။

ဦးစွာ NCA အခန်း(၃) ပစ်ခတ်တိုက်ခိုက်မှုရပ်စဲရေးဆိုင်ရာကိစ္စရပ်များ၊ အခန်း (၄) ပစ်ခတ်တိုက်ခိုက်မှုရပ်စဲရေးခိုင်မာရန် လုပ်ဆောင်ခြင်းနှင့် အခန်း(၆) ကြားကာလဆောင်ရွက်မည့် အစီအစဉ်များကို သဘောတူညီနိုင်ခဲ့ကြသည်။

ထို့အပြင် NCA အကောင်အထည်ဖော်မှုဆိုင်ရာ မူဘောင်သဘောတူညီချက်ရယူရေးကိစ္စ၊ ၂၀၂၀ မတိုင်မီနှင့် ၂၀၂၀ အလွန်ဆက်လက်အကောင်အထည်ဖော်မည့် အဆင့်လိုက်ငြိမ်းချမ်းရေး လုပ်ငန်းစဉ်များ၊ အဆင့်လိုက်အကောင်အထည်ဖော်မှုများကိစ္စ၊ ပြည်ထောင်စု သဘောတူစာချုပ်အစိတ်အပိုင်း (၃) တွင် ထည့်သွင်းချုပ်ဆိုမည့် သဘောတူညီချက်များ၊ ပြည်ထောင်စုငြိမ်းချမ်းရေး ညီလာခံ၂၁ ရာစု ပင်လုံစတုတ္ထအကြိမ် အစည်းအဝေးကို ၂၀၂၀ ဧပြီ မတိုင်မီ ကျင်းပနိုင်ရေး၊ NCA  ပါဝေါဟာရများနှင့် အဓိပ္ပါယ်ဖွင့်ဆိုချက်များကိစ္စ၊ ငြိမ်းချမ်းရေးလုပ်ငန်းစဉ်တွင် တိုင်းရင်းသားလက်နက်ကိုင်များအဖွဲ့များ ပိုမိုပါဝင်လာနိုင်ရေး NCA အခြေခံဆောင်ရွက်ရန်၊ UPDJC နှင့် JMC အစည်းအဝေးများကျင်းပရေး အစရှိသည့် အချက်ရှစ်ချက်ကို သဘောတူညီခဲ့ကြခြင်းဖြစ်သည်။

သမ္မတရုံးညွှန်ကြားရေးမှူးချုပ်ဦးဇော်ဌေးကမူ “JICM ကျင်းပပြုလုပ်ခဲ့တဲ့ သက်တမ်းတစ်လျှောက်မှာ ဒီတစ်ကြိမ်က အချိန်တိုတိုအတွင်း သဘောတူညီချက်ရယူနိုင်ခဲ့တဲ့ အစည်းအဝေး ဖြစ်ပါတယ်” ဟု အစည်းအဝေးအပြီးတွင် မီဒီယာများသို့ ပြောကြားသည်။

ယင်းသို့ဆုံးဖြတ်ချက်ချနိုင်ရန်နောက်ကွယ်မှ ဆောင်ရွက်ပေးကြသည့် အလုပ်အမှုဆောင်အဖွဲ့များနှင့် အတွင်းရေးမှူးအဖွဲ့ကို ကျေးဇူးတင်ကြောင်း ဒုတိယတပ်မတော်ကာကွယ်ရေးဦးစီးချုပ်ကာကွယ်ရေးဦးစီးချုပ် (ကြည်း) ဒုတိယဗိုလ်ချုပ်မှူးကြီးစိုးဝင်းကလည်း ပြောကြားခဲ့သည်။

သို့သော်လည်း ထောက်ပြသူများကမူ ၂၀၂၀ မြန်မာ့ငြိမ်းချမ်းရေးသည် စိန်ခေါ်မှုများရှိနှင့်နေသေးကြောင်း ဆိုကြသည်။

(၁)

ပထမစိန်ခေါ်ချက်မှာ အချိန်ကန့်သတ်ချက်ပင် ဖြစ်သည်။

လာမည့် ဧပြီလမတိုင်မီ ပြည်ထောင်စုငြိမ်းချမ်းရေးညီလာခံကို ကျင်းပရန် JICM အစည်းအဝေးက သဘောတူညီခဲ့သည်။ ထို့ကြောင့် အစည်းအဝေးကျင်းပရန် သုံးလကျော်သာလိုသည်။ ဤအချိန်အတွင်း အစည်းအဝေးကျင်းပနိုင်မည်လော ဟူသည်မှာ စဉ်းစားဖွယ်ဖြစ်သည်။

“အဲဒါ ဖြစ်နိုင်ပါတယ်။ ညီလာခံ လုပ်ဖို့က ပြဿာနာမရှိဘူး။ ညီလာခံမှာ ရလဒ်ကောင်းတွေထွက်ဖို့ဆိုရင်တော့ နှစ်ဖက်စလုံးက စနစ်ကျပြီးတော့ ပြင်ဆင်မှုတွေ လုပ်ဖို့လိုတာပေါ့။ အခုအချိန်မှာတော့ အဲဒီလောက်ထိ ပြင်ပြင်ဆင်ဆင်လုပ်ထားတာတွေ မတွေ့ရသေးဘူးပေါ့”ဟု ငြိမ်းချမ်းရေးနှင့် လုံခြုံရေးဆိုင်ရာမြန်မာ အင်စတီကျု (MIPS) အမှုဆောင်ဒါရိုက်တာ ဒေါက်တာမင်းဇော်ဦးက ဆိုသည်။

သဘောတရားအားဖြင့် ပြည်ထောင်စုငြိမ်းချမ်းရေးညီလာခံကို ကျင်းပမည်ဟု ဆိုထားသောကြောင့် အမြင့်ဆုံးအားဖြင့် ဖက်ဒရယ်ကို မျှော်မှန်းနိုင်သည်ဟု ၎င်းက ဆိုသည်။

ဧပြီလမှ ရွေးကောက်ပွဲကျင်းပမည့် နိုဝင်ဘာလအထိဆိုပါက ကြားကာလမှ ခြောက်လခန့်သာရှိမည်ဖြစ်သည်။ ရွေးကောက်ပွဲ မဲဆွယ်ကာလများ၊ ပါတီ ကိုယ်စားလှယ်လောင်း ရွေးချယ်ခြင်းများနှင့် ပါတီများ သူနိုင်ကိုယ်နိုင်အပြိုင်အဆိုင် ပြင်ဆင်ကြသည်များနှင့် တွက်ချက်ကြည့်လျှင် ဧပြီလနောက်ပိုင်းတွင် အစိုးရသည် ငြိမ်းချမ်းရေးကို အာရုံမစိုက်နိုင်မည့် သဘောရှိနေပြန်သည်။

ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) အထွေထွေ အတွင်းရေးမှူး(၁) ဦးစိုင်းကျော်ညွန့်ကမူ “သကြန်မတိုင်ခင် အစည်းအဝေးလုပ်မယ်ဆိုတော့ ဒီသုံးလလောက်အတွင်းမှာ စည်းရုံးလို့ရနိုင်ပါ့မလားပေါ့။ ညီလာခံပြီးသွားရင်တော့ အစိုးရဖြစ်နေတဲ့ NLD ရော၊ ကျန်တဲ့ ပါတီတွေရော ရွေးကောက်ပွဲအတွက် Campaign လုပ်ကြတော့မှာ။ အရှင်းဆုံးပြောရရင် ဒီငြိမ်းချမ်းရေး ဖြစ်စဉ်ကြီးကို ဘေးရွှေ့ထားကြတော့မှာ။ ဒါက ဖြစ်လာနိုင်တဲ့ အခင်းအကျင်းပေါ့” ဟု မှတ်ချက်ပြုသည်။

(၂)

နောက်တစ်ချက်မှာ NCA မထိုးရသေးသော တိုင်းရင်းသားလက်နက်ကိုင်အဖွဲ့များမှာ ယခု ၂၀၂၀ ပြည့်နှစ်တွင် NCA လက်မှတ်ရေးထိုးနိုင်မည်လားဟူသည့် မျှော်လင့်ချက်ဖြစ်သည်။

KNU အပါအဝင် တိုင်းရင်းသားလက်နက်ကိုင် ၁၀ ဖွဲ့မှာ NCA တွင် လက်မှတ်ရေးထိုးထားပြီးဖြစ်သည်။

မြောက်ပိုင်းမဟာအဖွဲ့ဖြစ်သော ကချင်တိုင်းရင်းသားလက်နက်ကိုင်အဖွဲ့ (KIA)၊ ကိုးကန့်လက်နက်ကိုင်အဖွဲ့ MNDAA ၊ တအောင်းပလောင်တိုင်းရင်းသားလက်နက်ကိုင်အဖွဲ့ (TNLA) ၊ ရခိုင်တိုင်းရင်းသားလက်နက်ကိုင်အဖွဲ့ (AA) ၊ ပြည်ထောင်စုနိုင်ငံရေးဆွေးနွေးညှိနှိုင်းရေးကော်မတီ (FPNCC) ဝင်များဖြစ်သော ‘ဝ’ လက်နက်ကိုင်တပ်ဖွဲ့ (UWSA)၊မိုင်းလားအဖွဲ့ (NDAA) ၊ရှမ်းတိုင်းရင်း သားလက်နက်ကိုင်အဖွဲ့ (SSPP/SSA) နှင့် KNPP တို့မှာ NCA တွင် လက်မှတ်ရေးထိုးထားခြင်းမရှိသေးချေ။

“သင်္ကြန်ရှေ့ပိုင်းကို တွက်လို့ရမယ်။ အဲဒီသုံးလအတွင်းမှာ လက်မှတ်မထိုးထားတဲ့ အဖွဲ့တွေကို စည်းရုံးလှုံ့ဆော်နိုင်မလားပေါ့။ လက်မှတ်ထိုးအောင် စည်းရုံးမယ်ဆိုရင် အခုရော ဘာတွေစီစဉ်ထားလဲဆိုတာ မေးခွန်းထုတ်ဖို့ ရှိတာပေါ့ဗျာ” ဟု ရှမ်းတိုင်းရင်းသားများဒီမိုကရေစီအဖွဲ့ချုပ် (SNLD) အထွေထွေအတွင်းရေးမှူး (၁) ဦးစိုင်းကျော်ညွန့်က ဆိုသည်။

ထို့ကြောင့် ၂၀၂၀ ပြည့်နှစ်သည် NLD အစိုးရအတွက် ငြိမ်းချမ်းရေးကဏ္ဍတွင် ခြေကုန်သုတ်မှ တော်ကာကျမည့် အနေအထားမျိုး ဖြစ်လာသည်။ အချိန်ကာလနည်းနည်းတွင် အားသွန်စိုက်ပါမှ ရလဒ်ကောင်းများ ထွက်ပေါ်မည့် သဘောပင်။ တစ်ဖက်တွင်လည်း NCA  စာချုပ်တွင် ပါဝင်လက်မှတ်ရေးထိုးမည့် အဖွဲ့များရှိလာနိုင်သည်ဟု ယူဆသူများလည်းရှိသည်။

“အခုဆိုရင် UWSA နဲ့ အဲဒီကိစ္စတွေ ညှိနှိုင်းနေတယ်လို့ ကြားတယ်။ အကယ်၍ UWSA လက်မှတ်ထိုးပြီးဆိုရင် သူနဲ့နီးစပ်တဲ့ SSPP တို့၊ မိုင်းလားတို့ အကုန်ပါလာနိုင်တဲ့ အနေအထားရှိတယ်။ နောက်တစ်ခုကလည်း သူတို့တွေပါလာပြီဆိုရင်လည်း KNPP လိုဟာမျိုးက သူ့ဘာသာမနေဘဲ ပါလာမယ့်အနေအထား ရှိတယ်။ ဒါပေမယ့် KNPP နဲ့ကျတော့လည်း သူက တိုက်ပွဲမှ မရှိတာ။ အားလုံးငြိမ်နေတာပဲလေ”ဟုဒေါက်တာမင်းဇော်ဦး က ဆိုသည်။

ဒေါက်တာမင်းဇော်ဦးကမူ AA မှလွဲ၍ ကျန်ရှိသည့် တိုင်းရင်းသားလက်နက်ကိုင်အဖွဲ့များနှင့် အပစ်ရပ်နိုင်သည့် အခွင့်အလမ်းပိုများသည်ဟု ယူဆလျက်ရှိသည်။

တစ်ဖက်တွင်လည်း ရွေးကောက်ပွဲအပြီး တက်လာမည့် အစိုးရသည် လက်ရှိအစိုးရပင် ဖြစ်မည်လား။ အခြားပါတီမှပင် ဖြစ်မည်လား မရေရာ။ ထို့အတူ လက်ရှိ အစိုးရသည်ပင် အစိုးရဖြစ်လာပါက ငြိမ်းချမ်းရေးကစားပွဲကစားသမားမှာ လက်ရှိပုဂ္ဂိုလ်ပင်ဖြစ်မည်လား၊ သို့တည်းမဟုတ် အသစ်တစ်ယောက်ပင်ဖြစ်မည်လား စဉ်းစားဖွယ်ရာများရှိနေသည်။

ကစားသမားပြောင်းလဲပါက ကစားပုံပြောင်းလဲမည်ဖြစ်သောကြောင့် NCA မထိုးရသေးသည့် တိုင်းရင်းသားလက်နက်ကိုင်အဖွဲ့များမှာ အစိုးရအပြောင်းအလဲကို စောင့်ကြည့်မည့် အခြေအနေလည်း ရှိနိုင်ကြောင်း ရှမ်းတိုင်းရင်းသားများဒီမိုကရေစီအဖွဲ့ချုပ် (SNLD) အထွေထွေ အတွင်းရေးမှူး(၁) ဦးစိုင်းကျော်ညွန့်က ယခုကဲ့သို့ဆိုသည်။

“အစိုးရကလည်း ဖွဲ့ပြီဆိုရင် သေချာတယ်။ ဒီလူတွေ အားလုံးပြန်ဖြစ်မယ်တော့ မထင်ဘူး။ ဘယ်အဖွဲ့အစည်းပဲနိုင်နိုင်ပေါ့။ အစိုးရမှာ Player ပြောင်းလာပြီဆိုရင် သူတို့ရဲ့ လုပ်နည်းလုပ်ဟန်တွေ ပြောင်းလဲနိုင်ခြေ ရှိနိုင်တယ်လေ။ ဒါဆိုရင် လက်မှတ်မထိုးရသေးတဲ့ အဖွဲ့တွေ လက်မှတ်ထိုးလာနိုင်လား ဘာလားဆိုတာကလည်း အစိုးရသစ်ရဲ့ မူဝါဒအပေါ်မှာလည်း မူတည်တယ်”

ယုံကြည်မှုတည်ဆောက်နေသည့် ငြိမ်းချမ်းရေးဆွေးနွေးမှုကာလအတွင်း အစိုးရပြောင်းသော်လည်း NCA ပါ အခြေခံမူများအတိုင်း ဆက်လက်အကောင်အထည်ဖော်နိုင်မှသာ ငြိမ်းချမ်းရေးခရီးသည် ပိုနီးလာမည်ဟု ထောက်ပြသူများက ဆိုသည်။

(၃)

စိန်ခေါ်ချက် ၃ မှာ ၂၀၂၀ တွင် တိုက်ပွဲများထပ်မံဖြစ်ပေါ်လာဦးမည်လားဟူသည့် စိုးရိမ်ချက်ပင်ဖြစ်သည်။

ပြီးခဲ့သည့် ၂၀၁၉ ခုနှစ်သည် မြန်မာ့တပ်မတော်နှင့် NCA လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့များအကြား တိုက်ပွဲအနည်းဆုံးနှစ်ဖြစ်ခဲ့သည်ဟု ၂၀၁၉ ခုနှစ် အောက်တိုဘာလ ၂၈ ရက်တွင် ကျင်းပသည့် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် NCA လေးနှစ်မြောက်နှစ်ပတ်လည်အခမ်းအနားတွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကပင် ပြောကြားခဲ့သည်။

အောက်ခြေအဆင့်တွင်မူ တပ်ဖွဲ့ချင်းထိတွေ့မှုများ အနည်းငယ်ရှိသော်လည်း ယင်းမှာ အပစ်ရပ်စဲရေးသဘောတရားအရ ဖြစ်လေ့ရှိသည့် သဘာဝသာဖြစ်သည်ဟု လေ့လာသူများက ဆိုသည်။ ယင်းဖြစ်သို့ ဖြစ်ရပ်များဖြစ်ပွားသည်ကို ရှောင်ရှားနိုင်ရေးအတွက် JCM ကဲ့သို့ ယန္တရားများ အားကောင်းရန်လိုအပ်သည်ဟု ထောက်ပြသူများလည်း ရှိသည်။

NCA လက်မှတ်မထိုးရသေးသည့် တိုင်းရင်းသားလက်နက်ကိုင်အဖွဲ့များ ဖြစ်သော KIA နှင့် မြန်မာ့တပ်မတော်တို့၏ တိုက်ပွဲမှာ ၂၀၁၉ ခုနှစ်တွင် မရှိသလောက်ပင် ဖြစ်ခဲ့သည်။ ရှမ်းပြည်နယ် မြောက်ပိုင်းတွင်လည်း မြန်မာ့တပ်မတော်နှင့် TNLA တိုက်ပွဲအနည်းငယ်ဖြစ်သည်မှအပ ကြီးကြီးမားမား မရှိခဲ့ချေ။

“TNLA နဲ့ကလည်း တကယ်တမ်း ညှိမယ်ဆိုရင် အဲဒီလောက် အခက်ကြီးတော့ မဟုတ်ဘူး။ ညှိလို့ရမယ့် အနေအထားတော့ ရှိတယ်”ဟု ဒေါက်တာမင်းဇော်ဦးက ဆိုသည်။

သို့သော်လည်း ကချင်ပြည်နယ်ရှိ တိုက်ပွဲများသည် ရခိုင်ပြည်နယ်သို့ ရွေ့သွားသည်ဟု ထင်ရလောက်အောင်ပင် မြန်မာ့တပ်မတော်နှင့် ရခိုင်တိုင်းရင်းသား လက်နက်ကိုင်အဖွဲ့ AA တို့သည် ၂၀၁၉ ခုနှစ်တစ်နှစ်တည်းတွင်ပင် တိုက်ပွဲပေါင်း အကြီးအသေး ၆၈၀ ကျော်ဖြစ်ပွားခဲ့သည်ဟု AA ဘက်က သတင်းထုတ်ပြန်သည်။

ယခုနှစ်အတွင်း၌ပင် AA သည် အစိုးရ၏ အုပ်ချုပ်ရေးယန္တရားများဖြစ်သည့် ပြည်သူ့ဝန်ထမ်းများကိုပင် ဖမ်းဆီးသည်ကို တွေ့ရသည်။ ထို့အတူ ပြည်သူက တင်မြှောက်ထားသည့် အမျိုးသားလွှတ်တော် ကိုယ်စားလှယ်ဦးဝှေ့တင်းကိုလည်း ဖမ်းဆီးခဲ့သည်။ ရခိုင်ပြည်နယ် ဘူးသီးတောင်မြို့နယ် NLD ဥက္ကဋ္ဌဦးရဲသိန်း သည်လည်း AA ၏ ဖမ်းဆီးခံရပြီးနောက် သေဆုံးခဲ့ရသည်။

“အားလုံးခြုံကြည့်လိုက်ရင်တော့ ၂၀၂၀ မှာ ၂၀၁၉ ထက်ပိုကောင်းတဲ့ အနေအထားတော့ တွေ့ရတယ်။ ရခိုင်ကလွဲလို့ ရှိရင်ပေါ့။ ရခ်ိုင်မှာတော့ တိုက်ပွဲတွေ ဆက်ဖြစ်နိုင်တယ်။ ဒီ့ထက်လည်း ပိုပြီးတော့ ပြင်းထန်လာနိုင်တဲ့ အနေအထားရှိတယ်”ဟု ဒေါက်တာမင်းဇော်ဦးက ဆိုသည်။

ငြိမ်းချမ်းရေး ရောင်နီ

မည်သို့ပင်ဆိုစေ တစ်နှစ်ခွဲနီးပါးတစ်ဆို့နေခဲ့သည့် မြန်မာ့ငြိမ်းချမ်းရေးခရီးစဉ်သည် ၂၀၂၀ နှစ်ဦးပိုင်းတွင် JICM အစည်းအဝေးသဘောတူညီချက် ရှစ်ချက်ဖြင့် ပြန်လည်လှုပ်နိုးလာပြီဖြစ်သည်။

ရှစ်ကြိမ်မြောက် JICM အစည်းအဝေးပြီးဆုံးသည်မှ နှစ်လအတွင်း UPDJC နှင့် JMC အစည်းအဝေးများကို ကျင်းပကြရမည်ဖြစ်သည်။ ထို့ကြောင့် အဆိုပါအစည်းအဝေးများသည် မတ်လလယ်အတွင်း ဖြစ်ပေါ်လာနိုင်မည်ဟု မျှော်လင့်ရမည် ဖြစ်သည်။ လာမည့် ဧပြီလတွင် ပြည်ထောင်စုငြိမ်းချမ်းရေးညီလာခံကို ကျင်းပကြပေလိမ့်မည်။

၂၀၂၀ နှစ်ဦးပိုင်းတွင် ငြိမ်းချမ်းရေးချိုးငှက်မှာ တစ်ရေးနိုးထလာခဲ့ပြီးနောက် ဆက်လက်ပျံသန်းရမည့်ခရီးမှာမူ အချိန်ကန့်သတ်ချက်၊ NCA တွင် လက်မှတ်ထိုးရေးတိုင်းရင်းသားလက်နက်ကိုင်များကို ညှိနှိုင်းနိုင်မှုနှင့်တိုက်ပွဲများ ဆက်လက်မဖြစ်ပေါ်ရေးဟူသည့် စိန်ခေါ်မှုများကလည်း ရှိနေဆဲပင်ဖြစ်သည်။

ဤစိန်ခေါ်မှုများကို မည်သို့ကျော်လွှားမည်နည်းဟူသည့် မေးမြန်းချက်များနှင့် ပတ်သက်၍မူ ပြည်ထောင်စုငြိမ်းချမ်းရေးဆွေးနွေးမှုပူးတွဲကော်မတီ (UPDJC) အတွင်းရေးမှူးအဖွဲ့ဝင်လည်း ဖြစ်၊ ငြိမ်းချမ်းရေးကော်မရှင်အကြံပေးလည်း ဖြစ်သူ ဦးလှမောင်ရွှေက ယခုကဲ့သို့ဆိုသည်။

“ကျွန်တော်တို့က အကြိမ်ကြိမ် ညှိနှိုင်းရမယ်။ ကြိုတင်ပြင်ဆင်ရမယ်”

ရဲနိုင်ဦး

You may also like...

Leave a Reply

Your email address will not be published. Required fields are marked *