နှစ်သစ်ဦး ပွဲဆူပါမစ်

ယခုနှစ်ဆန်းပိုင်းတွင် နိုင်ငံ့ဝန်ထမ်းများအတွက် မော်တော်ယာဉ်တင်သွင်းခွင့် (ကားပါမစ်) ပေးမည့် သတင်းက ပွဲဆူစေခဲ့သည်။

ညွှန်ကြားရေးမှူးချုပ်နှင့် အထက်အဆင့်ဝန်ထမ်းများကို ပထမအဆင့်၊ ဒုတိယညွှန်ကြားရေးမှူးချုပ်နှင့် လုပ်သက် ၂၅ နှစ်ပြည့်ပြီး ပြည်သူ့ဝန်ထမ်းကောင်းတံဆိပ် ရရှိသူဝန်ထမ်းများကို ဒုတိယအဆင့်ဟူ၍ နှစ်ဆင့်ခွဲ၍ ဆောင်ရွက်ပေးသွားမည်ဟု  လူမှုကွန်ရက်တွင် ပျံ့နှံ့ခဲ့သည့် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၏ ထုတ်ပြန်စာအရ သိရသည်။

“သက်ဆိုင်ရာ ဝန်ကြီးဌာနတွေရဲ့သဘောတူညီချက်နဲ့ ဆောင်ရွက်တာပါ” ဟု ယင်းဌာန လက်ထောက်အမြဲတမ်းအတွင်းဝန် ဦးခင်မောင်လွင်က ပြောကြားသည်။

ထိုမော်တော်ယာဉ်ပါမစ်ကို အစိုးရက မည်သို့ ပေးမည်နည်း။

အခွန်လွတ်ပါမစ်လော

အစိုးရ ဝန်ထမ်းများကို မော်တော်ယာဉ်ပါမစ်ပေးမည့် အကြောင်းက မြန်မာ့မော်တော်ယာဉ်လောကအတွင်း လှုပ်ခတ်သွားသည့်  သတင်းတစ်ပုဒ် ဖြစ်သည်။

အထူးသဖြင့် မော်တော်ယာဉ်အရောင်းပြခန်းများအတွက် မျက်ခုံးလှုပ်ဖွယ် သတင်းဖြစ်ခဲ့သည်။ ပိုဆိုးသည်က အခွန်လွတ်တင်သွင်းခွင့်ပြုမည်ဟု သတင်းများက ထွက်ပေါ်ခဲ့သည်။

“ကားပါမစ်ပေးတာသည် လုံးဝ လွဲမှားတဲ့ ပုံစံမျိုး ဖြစ်တယ်” ဟု ဝေဖန်သူက မော်တော်ယာဉ်လောက ကျွမ်းကျင်သူ  အရည်ကြို ဖြစ်သည်။

တင်သွင်းခွင့် (ပါမစ်) ပေးခြင်းကို ထောက်ခံသော်လည်း အကောက်ခွန်၊  ကညနခွန် စသည်တို့ကို ကင်းလွတ်ခွင့်ပြု မည့်အပေါ် ကန့်ကွက်ကြောင်း ၎င်းက  ဆိုသည်။

“ရွေးကောက်ခံ ဝန်ကြီးတွေ၊ ဝန်ကြီးချုပ်တွေက (အခွန်) မပေးရဘူးဆိုရင် ဒီအခွင့်အရေးတွေ ပေးချင်လို့ ဒီလူတွေက ဝင်ယူထားတာမှ မဟုတ်တာ”  ဟု အရည်ကြိုက ဝေဖန်သည်။

အခွန်လွတ်သည်ဟု ဆိုခြင်းသည် အခွန်ယဉ်ကျေးမှုစနစ်ကို ဖျက်ဆီးသည့် သဘောရောက်နေသည်ဟု ၎င်းက ဆိုသည်။

ဝန်ထမ်းများ အခွန်လွတ်ယာဉ်တင် သွင်းခွင့်ရမည့်သတင်းထွက်ပေါ်ပြီးနောက် ဌာနတစ်ခု၏ ဒုတိယညွန်ကြားရေးမှူးချုပ် အဆင့်ရှိ မိတ်ဆွေတစ်ဦးက ဒေါ်လာ နှစ်သောင်း (ကျပ်သိန်းသုံးရာခန့်) ဝန်းကျင်ဖြင့် မည်သည့်ယာဉ်အမျိုးအစား ရနိုင်မည်နည်းဟု လာရောက်စုံစမ်းမှုရှိသည်ဟု မြန်မာနိုင်ငံ မော်တော်ယာဉ်ရောင်းဝယ်ရေးအသင်းဥက္ကဋ္ဌ ဦးအောင်သန်းဝင်းက ပြောသည်။

အကြီးတန်းအရာရှိများကို ယာဉ်ပါမစ်ချပေးလိုက်ခြင်းအပေါ် ၎င်းက သဘော မတွေ့။  ထိုအရာရှိများသည် နေအိမ်၊ မော်တော်ယာဉ်စသည့် အဆောင်အယောင်များ ခံစားခွင့်ရှိနေသည့်အပြင် ကိုယ်ပိုင်အိမ်၊ ယာဉ် စသည်များလည်း ရှိနေကြကြောင်း ၎င်းက ဆိုသည်။

“အခု ပါမစ်တစ်စောင် အနည်းဆုံး ကျပ်သိန်းငါးရာလောက် ပေါက်ဈေး ရှိတယ်” ဟု ဦးအောင်သန်းဝင်းက ပြောဆို သည်။

ဆုလာဘ်ပါမစ်

ဝန်ထမ်းများကို မော်တော်ယာဉ် ပါမစ်ပေးခြင်းသည် ချီးမြှောက်သည့် သဘောသာဖြစ်သည်ဟု လက်ထောက်  အမြဲတမ်းအတွင်းဝန် ဦးခင်မောင်လွင်က  ပြောသည်။

အဓိကအားဖြင့် ပြည်သူ့ဝန်ထမ်းကောင်းများကို ပေးခြင်းဖြစ်ပြီး လုပ်သက် ၂၅ နှစ်အထက်ရှိသူ၊ ပြစ်မှုကင်းရှင်းသူ စသည့် ဝန်ထမ်းများကို နိုင်ငံ့ဝန်ထမ်းဥပဒေအရ ပြည်သူ့ဝန်ထမ်းကောင်းအဖြစ်  အသိအမှတ်ပြုခြင်းဟု ၎င်းက ဆိုသည်။

“ဝန်ထမ်းတော်တော်များများဟာ ပင်စင်ယူပြီးသွားရင် အစိုးရအနေနဲ့က ပေးတာ မရှိဘူး။ ခံစားခွင့်လည်း သိပ် မရှိဘူး။ နောက် လုပ်သက်စုကြေးပေါ့။ လုပ်သက်စုကြေးမှာဆိုရင် ဥပမာ- ညွှန်ကြားရေးမှူးအဆင့်ပေါ့။ နှစ်ပေါင်း သုံးဆယ်လောက် လုပ်ခဲ့တဲ့ လုပ်သက်စုကြေးဟာ သိန်းတစ်ရာ မကျော်ဘူး” ဟု ဦးခင်မောင်လွင်က ပြောဆိုသည်။

ထို့ကြောင့် လုပ်သက် ၂၅ နှစ်ပြည့်ပြီးသည့် ပြည်သူ့ဝန်ထမ်းကောင်းဆုရ ဝန်ထမ်းများကို ဥပဒေအရ ခွင့်ပြုပေးနိုင်သည့် မော်တော်ယာဉ် ဝယ်ယူခွင့်ပေးခြင်းဟု ၎င်းက ရှင်းပြသည်။

ထိုသို့ ခွင့်ပြုပေးခြင်းဖြင့် ပြည်သူ့ဝန်ထမ်းကောင်းဆိုသည့်အရာကို ဝန်ထမ်းများက မက်မောလာပြီး ယင်းဆုတံဆိပ်ရရှိရန် ကြိုးစားလာကြမည်ဟု ဦးခင်မောင်လွင်က ပြောသည်။

“ပြည်သူ့ဝန်ထမ်းကောင်းဖြစ်ဖို့ ဆိုတာ ပြစ်မှုတစ်စုံတစ်ရာ ကင်းရှင်းရမယ်။  ကင်းရှင်းဖို့ဆိုရင် အဂတိကိစ္စဟာတွေ၊  မသမာမှုလုပ်မယ့် ကိစ္စတွေအားလုံးသည် လျော့နည်းသွားမယ်။ ဝန်ထမ်းကောင်း  ဖြစ်အောင် ကြိုးစားရင် ဒီအခွင့်အရေး ရမယ်” ဟု ၎င်းက ဝန်ထမ်းများအတွက် မက်လုံးကို ပြောဆိုသည်။

ဝန်ထမ်းများအားလုံးအတွက် တစ်ပြိုင်နက်တည်း ပြုလုပ်လျှင် ရှုပ်ထွေး မည်စိုးသဖြင့် အဆင့်နှစ်ဆင့်ခွဲ၍ လုပ်ဆောင် ပေးခြင်းဖြစ်သည်ဟု ၎င်းက ထပ်လောင်း ပြောဆိုသည်။

ဥပဒေရှုထောင့်

နိုင်ငံရပ်ခြားမှ မော်တော်ယာဉ် တင်သွင်းမည်ဆိုလျှင် (မည်သူမျှ) ခွင့်ပြု ချက်မရ၊ တင်သွင်းခွင့်မရဘဲ တင်သွင်းခွင့် မရှိဟု ပို့ကုန်သွင်းကုန်ဥပဒေပုဒ်မ ၆ တွင် ဖော်ပြထားသည်ဟု မန္တလေးမြို့မှ ဥပဒေ ပညာရှင် ဦးတင်အောင်က ပြောသည်။

ယင်းဥပဒေ၏ ရည်ရွယ်ချက်မှာ  နိုင်ငံတော်၏ စီးပွားရေးဆိုင်ရာ အခြေခံမူများ အောင်မြင်ရေး၊ ဖွံ့ဖြိုးတိုးတက်ရေးအတွက် ရည်ညွှန်းထားသည်ဟု တိုင်းဒေသကြီးလွှတ်တော်ကိုယ်စားလှယ်လည်း ဖြစ်သည့် ဦးတင်အောင်က ပြောဆို သည်။

“ဒါကြောင့် ပြည်သူတွေကြားမှာ ကားတွေ နာမည်ပြောင်းရင်တောင် ဝင်ငွေရလမ်း မဖော်ပြနိုင်ရင် ကားတန်ဖိုး အတွက် သတ်မှတ်တဲ့ အခွန်ဆောင်ရတယ်။ ဒါကလည်း ဥပဒေအရပါ” ဟု ၎င်းက ပြောသည်။

ယင်းအပြင် ဥပဒေအရာ၌ တန်းတူအခွင့်အရေးရှိရမည်ဟု ၂၀၀၈ ခုနှစ် ဖွဲ့စည်းပုံ အခြေခံဥပဒေ ပုဒ်မ ၃၄၇ တွင် ဖော်ပြထားသဖြင့် နိုင်ငံရပ်ခြားမှ မော်တော်ယာဉ်တင်သွင်းလိုသူတိုင်း ဥပဒေနှင့်အညီ ဝင်ငွေရလမ်း ရှိရမည်၊ တင်သွင်းခွင့် တောင်းခံရမည်၊ လိုအပ်သည့် အခွန်ထမ်းဆောင်ရမည်ဟု ၎င်းက ရှင်းပြသည်။

“ဥပဒေမှာ မည်သူမဆို၊ မည်သူမျှ  ဆိုတဲ့ စကားရပ်ပါတယ်။ အဲဒီဥပဒေကို  ပြည်သူက ရွေးချယ်တင်မြှောက်ထားတဲ့ လွှတ်တော်ကိုယ်စားလှယ်များက ပြဋ္ဌာန်းထားတာ ဖြစ်ပါတယ်။ ဥပဒေကို အမိန့် ညွှန်ကြားချက်က လွှမ်းမိုးလို့ မရပါဘူး” ဟု ဦးတင်အောင်က ပြောသည်။

ထို့ကြောင့် နိုင်ငံ့ဝန်ထမ်း အဆင့်မြင့် အရာရှိကြီးများနှင့် ပြည်သူ့ဝန်ထမ်းအချို့ ကို ယာဉ်ပါမစ်များ ထုတ်ပေးခြင်းသည်  ဥပဒေအရ ဘက်လိုက်မှုသဘော၊ ဥပဒေ အရာတွင် တန်းတူအခွင့်အရေး မရသည့် သဘော ဖြစ်နေသည်ဟု ၎င်းက ထပ်လောင်း ပြောဆိုသည်။

ယင်းအပြင် ယာဉ်ပါမစ်ချထားပေးမည့် ကိစ္စသည် လွှတ်တော်သို့လည်း အသိမပေးသဖြင့် လွှတ်တော်နှင့် မသက်ဆိုင်သည့် သဘောမျိုးဖြစ်နေသည်ဟု စစ်ကိုင်းတိုင်း အမှတ် (၅) မဲဆန္ဒနယ် အမျိုးသားလွှတ်တော်ကိုယ်စားလှယ် ဦးရဲထွဋ်က ပြောသည်။

သို့သော် လက်ရှိ ယာဉ်ပါမစ် ရရှိမည့် ညွှန်ချုပ်၊ ဒုညွှန်ချုပ်၊ ညွှန်မှူးစသည့်  အရာရှိများထံ၌ ရုံးသုံးယာဉ်နှစ်စီး၊ သုံးစီးရှိနေပြီး လက်ရှိအပိုင်ဝယ်ခွင့်ပါမစ် ထပ်ပေးလိုက်ခြင်းသည် အခွင့်ထူးခံတစ်ရပ်သဖွယ် ဖြစ်နေသည်ဟု ၎င်းက ဆိုသည်။

“ဘာကြောင့်ပေးလဲဆိုတာကတော့ စဉ်းစားစရာပေါ့။ မေးခွန်းထုတ်စရာပေါ့။ အခြား အဆင့်မြင့်အရာရှိ မဟုတ်တဲ့ သူတွေလည်း လိုအပ်မယ်လေ။ သူတို့ကော မရထိုက်ဘူးလားပေါ့”ဟု ဦးရဲထွဋ်က  ပြောဆိုသည်။

အရစ်ကျပါမစ်

ညွှန်ကြားရေးမှူးချုပ်နှင့် အထက်အဆင့် ဝန်ထမ်းများဆိုရာ၌ နိုင်ငံတော်သမ္မတအထိလည်း ပါဝင်နေသည်။ လက်ရှိတွင် ဌာနဆိုင်ရာအလိုက် မော်တော်ယာဉ်တင်သွင်းခွင့် လျှောက်ထားလိုသူများ စာရင်းကို ကောက်ခံနေဆဲဖြစ်၍ မည်သူများ လျှောက်ထားသည်၊ အရေအတွက် မည်မျှရှိသည်ကိုမူ မသိရသေးပေ။

အခွန်လွတ်တင်သွင်းခွင့်ရမည်ဟု သတင်းများ ထွက်ပေါ်နေသော်လည်း ဦးခင်မောင်လွင်ကမူ ဘဏ်ဖြင့် ချိတ်ဆက်ကာ အရစ်ကျစနစ်ဖြင့် ဝယ်ယူနိုင်မည့် အရစ်ကျပါမစ်ဟု ပြောသည်။

ဝင်ငွေခွန်၊ အကောက်ခွန် စသည်တို့အတွက် သက်ဆိုင်ရာဝန်ကြီးဌာနသို့ သွားရောက်ပေးဆောင်ရမည်ဖြစ်ပြီး သက်သာခွင့်လျှောက်ထားလိုသူများအနေနှင့်လည်း ဥပဒေအရသာ လျှောက်ထားဆောင်ရွက်ကြရမည်ဟု ၎င်းက ဆိုသည်။

“အခွန်လွတ်ပါမစ်လို့ ကိုယ် မသုံးဘူး။ အခွန်လွတ်ကိစ္စက သူ့ဥပဒေအရ သက်ဆိုင်ရာဌာနမှာ ဆောင်ရွက်ရမှာ။  အခွန်လွတ်ပါမစ်ပေးတာ မဟုတ်ဘူး။ ဝန်ထမ်းတွေကို အရစ်ကျရောင်းချပေးတယ်ဆိုတဲ့ သဘောပါ” ဟု ဦးခင်မောင်လွင်က ရှင်းပြသည်။

မော်တော်ယာဉ်ဈေးကွက်

ယခုသတင်းကြောင့် မော်တော်ယာဉ် ဈေးကွက်အတွင်း အပြောင်းအလဲဖြစ်နိုင် သည်ဟု ဦးအောင်သန်းဝင်းက သုံးသပ် သည်။

“ချပေးလိုက်ရင်တော့ Show Room သမားတွေ သေတာပေါ့ဗျာ” ဟု ၎င်းက ဆိုသည်။

မြန်မာ့ယာဉ်ဈေးကွက်အတွင်း လာရောက်ရင်းနှီးမြှုပ်နှံထားကြသည့် ကုမ္ပဏီများ၊ ယာဉ်တင်သွင်းခွင့်ရ၍ အစီးရေများစွာ တင်သွင်းထားသူများရှိနေပြီး ယင်းသို့ အခွန်အရပ်ရပ်ပေးဆောင်ကာ တင်သွင်းထားသည့် မော်တော်ယာဉ်များ တန်ဖိုးတစ်ခုအထိ ကျဆင်းသွားနိုင်သည်ဟု အရည်ကြိုကလည်း ပြောသည်။

“တချို့တွေက ဘဏ်တွေနဲ့ ချိတ်ဆက်ပြီး အလုပ်လုပ်ထားတဲ့သူတွေ အများကြီးပါတယ်လေ။ အဲဒီကျတော့  ဒီလူတွေက ပြိုလဲသွားနိုင်တယ်။ ဒီတော့  ဘဏ်ကို ပိုက်ဆံမဆပ်နိုင်တာတို့ ဘာတို့ ဆက်ဖြစ်လာနိုင်တယ်”ဟု အရည်ကြိုက ဆိုလေသည်။

မော်တော်ယာဉ်တင်သွင်းရန် အကောက်ခွန်၊ ကုန်သွယ်လုပ်ငန်းခွန်၊  ဝင်ငွေခွန်၊ ကညန မှတ်ပုံတင်ခ စသည်ဖြင့် ရာခိုင်နှုန်းအလိုက် ကောက်ခံမှုများရှိသည်။ ဝယ်ယူသည့် ယာဉ်အမျိုးအစားကို လိုက်၍ အခွန်နှုန်းထားလည်း အမျိုးမျိုးရှိမည်။

လက်ရှိ မော်တော်ယာဉ်တစ်စီး ဝယ်ယူရာ၌ ဝင်ငွေခွန် ၃ ရာခိုင်နှုန်း ပေးဆောင်ရသည်။ ဥပမာ – ကျပ်သိန်း သုံးရာတန်ဖိုးရှိ မော်တော်ယာဉ်တစ်စီး ဝယ်ယူမည်ဆိုလျှင် ကျပ်ကိုးသိန်း  ပေး ဆောင်ရမည် ဖြစ်သည်။

“ကားဆိုတာ ပိုက်ဆံရှိလို့ ဝယ်စီးကြတာမဟုတ်ဘဲ မဖြစ်မနေလိုအပ်လို့  ဝယ်ကြရတဲ့သူတွေ ရှိတယ်။ အခု အမည်ပေါက်ပြောင်းခိုင်းတာတွေ လုပ်နေတဲ့ အချိန် ဒီလို အခွန် ၃ ရာခိုင်နှုန်းကိုတောင် မပေးနိုင်တဲ့ ပြည်သူတွေ ရှိနေတယ်”  ဟု  မန္တလေးမြို့မှ မော်တော်ယာဉ်ဝယ်ရောင်းလုပ်ကိုင်သူတစ်ဦးက ပြောသည်။

ဝန်ထမ်းကောင်းပါမစ်

ပြီးခဲ့သည့်အစိုးရလက်ထက်များ၌ ယခုကဲ့သို့ ဝန်ထမ်းများကို မော်တော်ယာဉ် ပါမစ်ပေးခြင်း မရှိခဲ့ပေ။

ယခင်က ဌာနဆိုင်ရာပါမစ်၊ ဦးပိုင် ပါမစ်၊ သင်္ဘောသားပါမစ်၊ ငြိမ်းချမ်းရေးပါမစ် စသည်တို့ ချထားပေးမှုများ ရှိခဲ့သော်လည်း အစိုးရဝန်ထမ်းများအတွက်မူ  ယခုမှ ချထားပေးခံရခြင်း ဖြစ်သည်။

သို့သော် ဝန်ထမ်းတိုင်း ရရှိမည် မဟုတ်။ လုပ်သက် ၂၅ နှစ်ကျော်သော်လည်း ပြစ်ချက်တစ်ခုခုကြောင့် ပြည်သူ့ ဝန်ထမ်းကောင်းတံဆိပ် မရရှိသည့် ဝန်ထမ်းများသည် ယခုပေးသည့် မော်တော်ယာဉ်ပါမစ်တွင် အကျုံးမဝင်ပေ။

တစ်နည်းအားဖြင့် ဝန်ထမ်းကောင်း ပါမစ် မရ။ အစိုးရဝန်ထမ်းနှင့် ပုဂ္ဂလိကဝန်ထမ်းတို့သည် လစာရရှိမှုတွင်လည်း  များစွာကွာဟနေခြင်းကြောင့် ပြည့်စုံသည့် ဝန်ထမ်းဟူ၍မရှိ။ ထို့ကြောင့် ဝန်ထမ်းများကို ချီးမြှောက်သည့်အနေနှင့် ယာဉ်ပါမစ်ချထားပေးခြင်းသာဟု ဦးခင်မောင်လွင်က ပြောသည်။

“ဝန်ထမ်းကောင်းဆိုတာကို တန်ဖိုးထားလာနိုင်အောင်ပါ။ ပင်စင်သွားလို့ရှိရင်  စီးစရာကားလေးတစ်စီး ရှိသွားတယ်ဆိုတဲ့ သဘောမျိုး ရည်ရွယ်တာပါ” ဟု  ၎င်းက ပြောဆိုသည်။

ယခင် ခေတ်အစိုးရများသည် ၎င်းတို့နှင့် ပုလဲနံပသင့်သူများကို သူကောင်းပြုသည့်သဘော၊ အာဏာတည်မြဲရေးအတွက် မိမိတို့ကို အလုပ်အကျွေးပြုသူများကို ချီးမြှောက်ခြင်းများ ပြုလုပ်ခဲ့ကြသည်ဟု စစ်ကိုင်းတိုင်း အမျိုးသားလွှတ်တော်ကိုယ်စားလှယ် ဦးရဲထွဋ်က ပြောသည်။

“လွှတ်တော်ကိုယ်စားလှယ်တွေကိုတောင်မှ နိုင်ငံတော်ဘတ်ဂျက် ချွေတာတဲ့အနေနဲ့ မပေးဘူး။ ဒီလွှတ်တော် သက်တမ်းမှာ” ဟု ၎င်းက ဆိုသည်။

“အရေးကြီးတာ အခြေခံလူတန်းစားတွေရဲ့ လိုအပ်ချက်ကို ဖြည့်ဆည်းပေးဖို့ပါပဲ” ဟု ဦးရဲထွဋ်က အစိုးရ၏ လုပ်ကိုင်ရမည့် အချက်တစ်ခုကို သတိပေးပြောဆိုသည်။

ဝန်ထမ်းလုပ်သက် နှစ် ၄၀ ရှိပြီဖြစ်ပြီး ၂၀၂၀ ပြည့်နှစ် ဇန်နဝါရီလ ၄ ရက်နေ့တွင် ပြည်သူ့ဝန်ထမ်းကောင်း ဆုတံဆိပ်ချီးမြှင့်ခြင်း ခံခဲ့ရသည့် မန္တလေးမြို့မှ  ဝန်ထမ်းတစ်ဦးကမူ အကယ်၍ ယာဉ်ပါမစ်ရရှိလာလျှင် ပြန်လည်ရောင်းချမည်ဟု ပြောဆိုသည်။

“ဒီလိုလုပ်ပေးတာ ကောင်းပါတယ်။ ဝန်ထမ်းတွေအတွက် အဆင်ပြေတာပေါ့။ ပါမစ်ရရင်လည်း ပြန်ရောင်းလို့  အမြတ်ရတယ်ဆိုရင် အဆင်ပြေတာပေါ့”ဟု ၎င်းက သူ့ဆန္ဒကို ပြောဆိုလေသည်။

မြတ်(ကလေး)

You may also like...

Leave a Reply

Your email address will not be published. Required fields are marked *