မြန်မာ အသင့်ဖြစ်ပြီလား

မြန်မာနိုင်ငံ၏ အနာဂတ်ကို ရေရှည်သက်ရောက်လွှမ်းမိုးမည့် ဖြစ်ရပ်ကြီးနှစ်ခု ၂၀၂၀ ဇန်နဝါရီလက ဖြစ်ပွားခဲ့သည်။ တရုတ်သမ္မတ ရှီကျင့်ဖျင်၏ ဇန်နဝါရီ ၁၇၊ ၁၈ ခရီးစဉ်နှင့် ကမ္ဘာ့တရားရုံး International Court of Justice ICJ တွင် ရခိုင်အရေးနှင့်ပတ်သက်ပြီး မြန်မာကို ဂမ်ဘီယာက တရားစွဲဆိုမှုအား တရားရုံးက ဇန်နဝါရီ ၂၃ ရက်နေ့ စီရင်ချက်။ ထိုဖြစ်ရပ်ကြီး နှစ်ခု၏ ရေရှည်အကျိုးဆက်များအတွက် မြန်မာအသင့်ဖြစ်ပြီလား။

တရုတ်နံပါတ်တစ်ခေါင်းဆောင်တစ်ဦး၏ ၁၉ နှစ်အတွင်း ပထမဆုံး မြန်မာသို့လာခြင်းဖြစ်သော တရုတ်သမ္မတ ရှီကျင့်ဖျင်၏ ခရီးစဉ်၊ ၂၀၂၀ ပြည့်နှစ်အတွက် သူ၏ပွဲဦးထွက်လည်းဖြစ်သည့် ခရီးစဉ်အပြီးတွင် တရုတ်၏ ပိုးလမ်းမသစ်စီမံကိန်းကြီးသည် မြန်မာနိုင်ငံတွင် ရှေ့ဆက်သွားတော့မည်။

ပိုးလမ်းမသစ်စီမံကိန်းကြီးသည် ကမ္ဘာကို ပြောင်းလဲပစ်မည့် စီမံကိန်းကြီးဖြစ်ရာ ထိုစီမံကိန်း သူတို့နိုင်ငံအပေါ်သက်ရောက်မှုကို ကမ္ဘာ့ထိပ်တန်းနိုင်ငံများက စနစ်တကျတွက်ချက်ထားပြီး မဟာဗျူဟာ၊ နည်းဗျူဟာများဖြင့် အသင့်ပြင်ဆင်ထားကြသည်။ ဥပမာကောင်းအဖြစ် စင်ကာပူသည် ပိုးလမ်းမသစ်၏ သူတို့နိုင်ငံကို ရိုက်ခတ်မည့်အလားအလာကို ဘက်ပေါင်းစုံမှတွက်ချက်ပြီး ထိုစီမံကိန်းကြီးမှ စင်ကာပူအကျိုးဖြစ်ထွန်းအောင် ပြင်ဆင်နေသည်။ စင်ကာပူသည် တရုတ်နှင့် အိမ်နီးချင်းမဟုတ်။ စင်ကာပူသည် မြန်မာလောက် တရုတ်ကို အားမကိုးရ။ သို့သော် စင်ကာပူသည် ပိုးလမ်းမသစ်နှင့်ပတ်သက်ပြီး အစစအရာရာ ပြင်ထားသည်။ ပိုးလမ်းမသစ်ကို လက်သာလက်ခံလိုက်သည်၊ စီမံကိန်းအများအပြားသာ လက်မှတ်ထိုးလိုက်သည်၊ မြန်မာနိုင်ငံတွင် ပိုးလမ်းမသစ်ကြောင့်ပြောင်းသွားမည့် မြန်မာ့အနာဂတ်အတွက် စနစ်တကျ ဘက်စုံထောင့်စုံမှ စဉ်းစားပြင်ဆင်ထားသလား။

ICJ က ဂမ်ဘီယာ၏ တောင်းဆိုချက်အချို့ကို လက်ခံပြီး မြန်မာလိုက်နာစေရန် အမိန့်ထုတ်သည်။ အမှုကို မြန်မာတောင်းဆိုသကဲ့သို့ မပယ်ချဘဲ ဆက်စစ်မည်။ နှစ်ရှည် မြန်မာရင်ဆိုင်ရမည်။ တရားရုံးတွင်သာမဟုတ်ဘဲ နိုင်ငံတကာစင်မြင့်များတွင်၊ နိုင်ငံတကာသတင်းမီဒီယာများတွင်ပါ မြန်မာဆက်တိုက်ရမည်။ နိုင်ငံတွင်းတွင်ပြုပြင်ပြောင်းလဲရေးများစွာ အကောင်အထည်ဖော်ရမည်။ ထိုကဲ့သို့ ပြည်တွင်း ပြည်ပ စစ်မျက်နှာမျိုးစုံတွင် ရင်ဆိုင်ရမည့် တိုက်ပွဲများအတွက် သေချာစွာစဉ်းစားပြီး မဟာဗျူဟာ၊ နည်းဗျူဟာများ ရေးဆွဲပြင်ဆင်ထားပြီလား။

ထိုအရေးကြီးနှစ်ခုကို ရင်ဆိုင်ရင်းနှင့် မြန်မာသည် လက်ရှိလျှောက်လှမ်းနေသော ဒီမိုကရေစီခရီးလမ်းကို ဆက်လျှောက်ရဦးမည်၊ ပြည်တွင်းလက်နက်ကိုင်ပဋိပက္ခကို အေးငြိမ်းစေပြီး ဖွံ့ဖြိုးမှုအနိမ့်ဆုံး နိုင်ငံကိုဖွံ့ဖြိုးတိုးတက်အောင် ဆွဲတင်ရဦးမည်။ ထိုသို့ နဂိုကတည်းက ခက်ခဲသော အသွင်ကူးပြောင်းရေးကို အကောင်အထည်ဖော်ရင်း ပိုးလမ်းမသစ်နှင့် ရခိုင်အရေးတို့ကို တစ်ပြိုင်တည်းရင်ဆိုင်ကိုင်တွယ်နိုင်ရန် မြန်မာနိုင်ငံက စနစ်တကျ စဉ်းစားပြင်ဆင်ထားသလား။

ထိုမေးခွန်းကြီး သုံးခွန်းကို ချုပ်ရလျှင် မေးခွန်းတစ်ခုသာရသည်။

ထိုမေးခွန်းက ‘မြန်မာအသင့်ဖြစ်ပြီလား’။ 

အယ်ဒီတာ
၂၃.၁.၂၀၂၀

You may also like...

Leave a Reply

Your email address will not be published. Required fields are marked *