နဂါးကြီး မျက်စိကျရာ မန္တလေး

တရုတ်သမ္မတ၏ သမိုင်းဝင်ခရီးစဉ်ပြီးသည့်နောက် မြန်မာနှင့် တရုတ်အကြား သဘောတူညီချက် ၃၃ ခု ရှိခဲ့သည်။ သဘောတူညီချက်အများစုမှာ တရုတ်-မြန်မာ စီးပွားရေးစင်္ကြံလမ်း (China Myanmar Economic Corridor-CMEC) စီမံကိန်းအတွက် အဓိကကျသည့် အခြေခံအဆောက်အဦများ တည်ဆောက်ရန် သဘောတူညီခဲ့ကြခြင်းဟုလည်း ဆိုရမည်ဖြစ်သည်။ ယင်းစီးပွားရေးစင်္ကြံလမ်းသည် မြန်မာပြည်မြောက်ပိုင်းမှစတင်ကာ ရန်ကုန်တွင် အဆုံးသတ်သည်။ ယင်းအနက် မန္တလေးတိုင်းဒေသကြီးနှင့် သက်ဆိုင်သည့်ကဏ္ဍအချို့ကို ကောက်နုတ်ပြပါမည်။

မန္တလေး-ယူနန် စီးပွားရေးစင်္ကြံ

မန္တလေးတိုင်းနှင့် ယူနန်ပြည်နယ်အကြား မြန်မာ့စီးပွားရေးစင်္ကြံ ပူးတွဲတည်ထောင်ရေး မူဘောင်အောက်မှ ဒေသန္တရအဆင့် ပူးပေါင်းဆောင်ရွက်ရန် နားလည်မှုစာချွန်လွှာကိုလည်း လက်မှတ်ရေးထိုးခဲ့သည်။

မန္တလေးတိုင်းသည် ယခင်ကတည်းက တရုတ်နိုင်ငံယူနန်ပြည်နယ်နှင့် စီးပွားရေးကူးလူးဆက်ဆံမှုများရှိနေခဲ့ပြီး ယခုကဲ့သို့ တရားဝင်လုပ်ဆောင်လာခြင်းကြောင့် လုပ်ငန်းရှင်များအတွက် အခွင့်အလမ်းပိုမိုကောင်းမွန်လာမည်ဟု မန္တလေးတိုင်းဒေသကြီး ကုန်သည်များနှင့် စက်မှုလက်မှုလုပ်ငန်းရှင်များအသင်း (MRCCI) အတွင်းရေးမှူး ဦးဥက္ကာကျော်ကဆိုသည်။

“သာမန် Border Trade (နယ်စပ်ကုန်သွယ်ရေး) ထက် နှစ်နိုင်ငံလုံး ပိုမိုကောင်းမွန်တဲ့ စီးပွားရေးလုပ်ငန်းတွေ၊ ကုန်သွယ်မှုလုပ်ငန်းတွေကို လုပ်နိုင်အောင် အချက်အလက်တွေသိရှိဖို့ အရမ်းအရေးကြီးပါတယ်” ဟု ၎င်းက ပြောသည်။

မည်သည့်လုပ်ငန်းများတွင် မည်သည့်သဘောတူညီချက်များလုပ်ဆောင်ထားသည် စသည့်အချက်အလက်များ သိရှိနိုင်ရန်အတွက် သက်ဆိုင်ရာက ဆောင်ရွက်ပေးရန် လိုအပ်ပြီး သို့မှသာလျှင် လုပ်ငန်းရှင်များအနေနှင့် စင်္ကြံလမ်းအတွက် ပြင်ဆင်ဆောင်ရွက်ရာ၌ ထိရောက်နိုင်မည်ဟု ဦးဥက္ကာကျော်က ပြောဆိုသည်။

၂၀၁၈-၂၀၁၉ ဘဏ္ဍာရေးနှစ်အတွင်း မြန်မာ-တရုတ် နှစ်နိုင်ငံကုန်သွယ်မှုပမာဏသည် အမေရိကန်ဒေါ်လာ ၁၁ ဘီလီယံကျော်ရှိခဲ့သည်ဟု အစိုးရ၏ ထုတ်ပြန်ချက်များအရ သိရသည်။ ယင်းအနက် အဓိကကျသည့် မူဆယ်နယ်စပ်ကုန်သွယ်ရေးစခန်းတစ်ခုတည်းကပင် အမေရိကန်ဒေါ်လာ ၅ ဘီလီယံနီးပါး ဖြစ်သည်။

မန္တလေးတိုင်းအနေနှင့် တရုတ်နိုင်ငံသို့ ကုန်ပစ္စည်းတင်ပို့မှုများတွင် လက်ရှိတင်ပို့နေသည့် ကုန်ကြမ်းထက် ကုန်ချောထုတ်လုပ်ကာ တင်ပို့နိုင်လျှင် အမြတ်ပိုကျန်မည်ဟု ဦးဥက္ကာကျော်က သုံးသပ်သည်။

“ထုတ်ကုန်ထုတ်လုပ်နိုင်အောင်၊ ဟိုဘက်က လိုအပ်ချက်အပေါ် မူတည်ပြီးတော့ ပို့နိုင်အောင်၊ စင်္ကြံလမ်းက တရုတ်ပြည်မှ မဟုတ်ပါဘူး။ အများကြီးပဲ ဖြတ်သွားမှာဆိုတော့ နိုင်ငံတကာလည်း ရောက်မှာလေ။ ဒီအခွင့်အလမ်းတွေတော့ ရလာလိမ့်မယ်” ဟု ၎င်းကဆိုသည်။

စိတ်ဝင်စားဖွယ် အမြန်လမ်း

မန္တလေး-ထီးချိုင့်-မူဆယ် အမြန်လမ်းစီမံကိန်းသည် မန္တလေးတိုင်း၊ စစ်ကိုင်းတိုင်းနှင့် ရှမ်းပြည်နယ်တို့ကိုဖြတ်သန်းမည့် အမြန်လမ်းသစ်စီမံကိန်းဖြစ်သည်။ တရုတ်၏ ပိုးလမ်းမရပ်ဝန်းအစိတ်အပိုင်းတစ်ခုလည်းဖြစ်ပြီး မြန်မာပြည်အထက်ပိုင်းဒေသအချို့အတွက် ကုန်စည်ပို့ဆောင်ရေးကဏ္ဍကို အပြောင်းအလဲဖြစ်နိုင်မည့်စီမံကိန်းဟု ဆိုရမည်ဖြစ်သည်။

ယင်းစီမံကိန်းကို တရုတ်နိုင်ငံ China Harbour Engineering ကုမ္ပဏီက ရင်းနှီးမြှုပ်နှံမည်ဖြစ်ပြီး ခန့်မှန်းကုန်ကျစရိတ် တွက်ချက်ဆဲဖြစ်သည်။

လက်ရှိတွင်လည်း ဖြစ်တန်ခြေလေ့လာဆန်းစစ်မှု လုပ်ဆောင်နေဆဲဖြစ်ကာ လေ့လာမှုလုပ်ငန်းစတင်ရန်အတွက် ဆောက်လုပ်ရေးဝန်ကြီးဌာနနှင့် တရုတ်ကုမ္ပဏီတို့က ၂၀၁၈ ခုနှစ် မတ်လတွင် နားလည်မှုစာချွန်လွှာ လက်မှတ်ရေးထိုး ခဲ့သည်။

မန္တလေးအခြေစိုက် ကုန်သည်များသည် လက်ရှိတွင် မန္တလေး-လားရှိုး-မူဆယ်လမ်းမှ တစ်ဆင့် တရုတ်နိုင်ငံသို့ တင်ပို့နေကြပြီး ယင်းလမ်းအသစ် ပေါ်ပေါက်လာပါက မိမိတို့အတွက် ထိခိုက်မှုနည်းပါးနိုင်မည်ဟု မြန်မာနိုင်ငံ အဝေးပြေး ကုန်စည်ပို့ဆောင်ရေးဝန်ဆောင်မှုလုပ်ငန်းရှင်များအသင်း မန္တလေးတိုင်းဥက္ကဋ္ဌ ဦးမျိုးဆွေက သုံးသပ်သည်။

“လမ်းကြောင်းက တခြားစီဖြစ်သလို ပို့မယ့်ကုန်စည်တွေကလည်း မတူနိုင်ဘူး။ အဲဒီလမ်းအသစ်က ကျောက်ဖြူကိုတိုက်ရိုက်ချိတ်ဆက်နိုင်ဖို့အတွက် လိုအပ်လို့ ဖောက်လုပ်တယ်လို့ မြင်ပါတယ်” ဟု ၎င်းကဆိုသည်။

နေပြည်တော်-ကျောက်ဖြူ အမြန်လမ်းစီမံကိန်းသည်လည်း မန္တလေးတိုင်း- မကွေးတိုင်းနှင့် ရခိုင်ပြည်နယ်တို့ကိုဆက်သွယ်မည့် အမြန်လမ်းသစ်စီမံကိန်း ဖြစ်သည်။

လုပ်ဆောင်မည့်ကုမ္ပဏီနှင့် လုပ်ငန်းဆောင်ရွက်မှုအခြေအနေများမှာ မန္တလေး- ထီးချိုင့်-မူဆယ် အမြန်လမ်းသစ်အတိုင်းပင် ဖြစ်သည်။

ထီးချိုင့်လမ်းကြောင်းကြောင့် ယင်းဒေသများ၏ ကုန်သွယ်မှုလမ်းကြောင်းများ ပိုမိုပွင့်လင်းလာမည်ဟု ဦးဥက္ကာကျော်က ခန့်မှန်းသည်။ တရုတ်တို့အနေနှင့် ပထဝီအနေအထားအရလည်းကောင်း၊ စီးပွားရေးလမ်းကြောင်းအရလည်းကောင်း ဆောင်ရွက်သည်ဟု ၎င်းကဆိုသည်။

တရုတ်တို့ လုပ်ဆောင်နေသည့် ကားလမ်းနှင့် ရထားလမ်းတို့သည် ဓာတ်ငွေ့ပိုက်လိုင်းဖြတ်သန်းသွားရာဒေသများကို အခြေခံနေသည်ဟု ဦးမျိုးဆွေက ရှင်းပြသည်။

မူဆယ်-မန္တလေး ရထားလမ်း

တရုတ်သမ္မတ၏ ခရီးစဉ်အတွင်း ‘မူဆယ်-မန္တလေး ရထားလမ်း ဖြစ်နိုင်ခြေလေ့လာမှုအစီရင်ခံစာ လွှဲပြောင်းပေးအပ်ခြင်းစာလွှာ’ ကိုလည်း လက်မှတ်ရေးထိုးခဲ့သည်။

မူဆယ်-မန္တလေး ရထားလမ်းသည် မြန်မာ့ပထမဆုံးလျှပ်စစ်ရထားလမ်းစီမံကိန်းဖြစ်သည်။ အမေရိကန်ဒေါ်လာ ၈ ဒသမ ၉ ဘီလီယံ ရင်းနှီးမြှုပ်နှံမည်ဖြစ်ပြီး မြန်မာ့မီးရထားနှင့် တရုတ်နိုင်ငံ China Railway Eryuan Engineering Group-CREEG (China Railway Group Ltd.) တို့အကြား နားလည်မှုစာချွန်လွှာ (MoU) ရေးထိုးထားသည်။

ယင်းရထားသည် တရုတ်နိုင်ငံရွှေလီမြို့မှတစ်ဆင့် မူဆယ်-ကွတ်ခိုင်- သိန္နီ-လားရှိုး-သီပေါ-ကျောက်မဲ- နောင်ချို-ပြင်ဦးလွင်-မန္တလေးတို့ကို ချိတ်ဆက်ထားပြီး လက်ရှိတွင် သဘာဝပတ်ဝန်းကျင်အပေါ် သက်ရောက်မှုများကို လေ့လာဆန်းစစ်နေဆဲ ဖြစ်သည်။

အလွယ်အားဖြင့် ရွှေလီ-မန္တလေး ရထားလမ်းဟုလည်း ခေါ်ဆိုနိုင်ပြီး ပေကျင်း-ကူမင်း-တာ့လီ-ရွှေလီလမ်းကြောင်းဖြင့် ချိတ်ဆက်ထားသဖြင့် တရုတ်ပြည်မကြီးနှင့် တိုက်ရိုက်ချိတ်ဆက်ထားသည်ဟုလည်း ဆိုနိုင်သည်။

ရထားလမ်းပြီးစီးလျှင် မန္တလေး-မူဆယ်ကို အချိန်သုံးနာရီခန့်ဖြင့် ရောက်ရှိနိုင်မည်ဟု ခန့်မှန်းထားကြသည်။

မန္တလေး-ပုဂံရထားလမ်း

မန္တလေး-ပုဂံ ရထားလမ်းကိုလည်း တရုတ်တို့ အဆင့်မြှင့်မည့်သတင်းက စိတ်ဝင်စားဖွယ် ဖြစ်သည်။

မြန်မာနိုင်ငံသို့ တရုတ်ခရီးသွားဧည်သည့်သည် ၂၀၁၉ ခုနှစ်တွင် နှစ်သိန်းနှစ်သောင်းကျော်သာဝင်ရောက်ခဲ့ရာမှ ၂၀၁၉ ခုနှစ်တွင်မူ ခြောက်သိန်းနီးပါးအထိ ဝင်ရောက်လာခဲ့သည်။ ယင်းအနက် အများစုမှာ မန္တလေးနှင့် ပုဂံဒေသများသို့ လည်ပတ်ကြခြင်း ဖြစ်သည်။

ခရီးသွားဝင်ရောက်မှုများသော်လည်း တရုတ်ဧည့်သည်များသည် တရုတ်ငွေပေးချေမှုစနစ်ဖြစ်သည့် WeChat Pay ကိုသာ သုံးစွဲကြခြင်း၊ တရုတ်နိုင်ငံသားများ ပိုင်ဆိုင်ထားသည့် ဟိုတယ်နှင့် စားသောက်ဆိုင်များ၊ အမှတ်တရပစ္စည်း အရောင်းဆိုင်များတွင်သာ သုံးစွဲနေကြခြင်းမျိုးကြောင့် ဒေသခံများအတွက် ရသင့်ရထိုက်သည်များ ဆုံးရှုံးနေရသည်ဟု ဟိုတယ်လုပ်ငန်းလုပ်ကိုင်သူအချို့ထံမှ သိရသည်။

“သူတို့က ဟိုတယ်တွေကို အခန်းပြတ် နှစ်ချုပ်နဲ့ ယူထားတာမျိုးရှိတယ်။ စားသောက်ဆိုင်တွေ ကြိုချိတ်ထားကြတယ်။ အခုတောင် တရုတ်ဧည့်သည်ပဲ ဝင်လာသလိုဖြစ်နေတာ။ မူဆယ်-မန္တလေး- ပုဂံရထားလမ်းသာ ပေါက်လာရင် ဒီထက် ပိုများလာလိမ့်မယ်” ဟု ပုဂံဒေသရှိ ဟိုတယ်လုပ်ငန်းလုပ်ကိုင်သူတစ်ဦးက ပြောသည်။

တရုတ်အနေနှင့် မန္တလေးနှင့် ရထားလမ်း၊ ကားလမ်း နှစ်မျိုးလုံးသွားလာနိုင်ရန် လုပ်ဆောင်နေသည့်အပြင် လက်ရှိ၌လည်း လေကြောင်းလိုင်းများ တိုးချဲ့ပြေးဆွဲနေမှုများ ရှိသည်။

မူဆယ်မှတစ်ဆင့် မန္တလေးသို့ ကုန်သွယ်လမ်းမကြီးနှစ်လမ်းကို အပြိုင်လုပ်ဆောင်ပေးမည့်သဘောရှိပြီး ရထားလမ်းကိုလည်း အဆင့်မြှင့်တင်မည့်အခြေအနေမျိုး ဖြစ်သည်။

မူဆယ်-မန္တလေး ရထားလမ်းသည် အမြန်ရထားလမ်းဖြစ်ပြီး ယခင်က ၁၀ နာရီခန့်ကြာသည့်ခရီးကို သုံးနာရီခန့်ဖြင့်သွားနိုင်မည်ဟု ဆိုထားသည်။

မန္တလေး-ပုဂံ ရထားလမ်းသည်လည်း အမြန်ရထား သို့မဟုတ် ရိုးရိုးရထားဆိုသည်ကို မကြေညာသေးသော်လည်း လက်ရှိပြေးဆွဲနေသည့် ရထားတွဲများထက် ပို၍အဆင့်မြှင့်လာနိုင်ဖွယ် ရှိသည်။

တရုတ်သမ္မတ လက်မှတ်ရေးထိုးခဲ့သည့် သဘောတူညီချက်တစ်ခုတွင် အတိုးမဲ့ချေးငွေဖြင့် လူစီးရထားတွဲများဝယ်ယူခွင့် သဘောတူညီချက်လည်း ပါဝင်သဖြင့် ယင်းလမ်းပိုင်းများ၌ အသုံးပြုမည်ဟု ယူဆရသည်။

လက်ရှိအားဖြင့် မြန်မာ-တရုတ် နယ်စပ်ကုန်သွယ်မှုသည် ကားလမ်းကို အဓိကအသုံးပြုနေသည်။ မူဆယ်-မန္တလေးရထားလမ်းပြီးသွားလျှင်မူ ကုန်စည်တင်ပို့မှုစနစ်မှာ အပြောင်းအလဲတစ်ခု ဖြစ်လာနိုင်သည်။

ရထားသည် မော်တော်ယာဉ်ထက် ကုန်ချိန်များစွာတင်ဆောင်နိုင်သောကြောင့် အချိန်တိုဖြင့်ရောက်မည့် ရထားလမ်းကြောင်းကို ကုန်သည်များက ရွေးချယ်ကြတော့မည်။

“လေးငါးနှစ်အတွင်းတော့ မပြောနိုင်သေးပါဘူး။ တကယ်လို့ ကုန်သည်တွေက ရထားကို ရွေးသွားရင်လည်း အပြောင်းအလဲတစ်ခုပေါ့” ဟု မြန်မာနိုင်ငံ အဝေးပြေးကုန်စည်ပို့ဆောင်ရေးဝန်ဆောင်မှုလုပ်ငန်းရှင်များအသင်း မန္တလေးတိုင်း ဥက္ကဋ္ဌ ဦးမျိုးဆွေက ဆိုလေသည်။ 

 

မြတ် (ကလေး)

You may also like...

Leave a Reply

Your email address will not be published. Required fields are marked *