နိုင်ငံသားအားလုံးနှင့် ဆိုင်သော ပြည်ထောင်စု

ပြည်ထောင်စုဆိုသောဝေါဟာရကို အင်္ဂလိပ်-မြန်မာ အဘိဓာန်တွင် Union ကို ပြည်ထောင်စုဆိုသော အနက်အပြင် ပေါင်းစည်းခြင်း၊ သင့်မြတ်ခြင်း၊ သဟဇာတဖြစ်ခြင်းဟုလည်း ဖွင့်ဆိုထားသည်။ မြန်မာနိုင်ငံတွင်မူ နှစ်ပေါင်းများစွာ အစဉ်အလာဆန်သော အဓိပ္ပာယ်ဖွင့်ဆိုချက်ဖြင့် အများစုယဉ်ပါးလာခဲ့ကြသည်။

စင်စစ်အားဖြင့် ပြည်ထောင်စုနေ့အခမ်းအနားသည်ပင်လျှင် ၁၉၄၇ ခုနှစ် ပင်လုံညီလာခံတွင် လွတ်လပ်ရေးရရှိရန်အလို့ငှာ တိုင်းရင်းသားများ သဘောတူလက်မှတ်ရေးထိုးခဲ့သော ပင်လုံသဘောတူညီချက်ကို အခြေပြု၍ နှစ်စဉ် ဂုဏ်ပြုကျင်းပလာခဲ့ခြင်းဖြစ်သောကြောင့် ထိုအစဉ်အလာ အဓိပ္ပာယ်ဖွင့်ဆိုချက် မှားယွင်းသည်ဟု မဆိုနိုင်ပေ။

သို့သော် ကမ္ဘာလုံးဆိုင်ရာ စံနှုန်းများ၊ လူသားဆန်မှုများ၊ ခေတ်မီမှုဆိုင်ရာ အမြင်သဘောထားများက တစ်နှစ်ပြီးတစ်နှစ် ပြောင်းလဲလာသည်။ ထိုအပြောင်းအလဲများနှင့်အညီ ပြည်ထောင်စုဆိုသော ဝေါဟာရ၏ အဓိပ္ပာယ်မှာလည်း ပို၍ ကျယ်ပြန့် နက်နဲလာသည်။

အထူးသဖြင့် ကမ္ဘာပေါ်ရှိ များစွာသော ဖွံ့ဖြိုးပြီးနိုင်ငံများအလယ်တွင် အစစအရာရာနောက်ကျကျန်ရစ်သော နိုင်ငံတစ်ခုအနေနှင့် လက်ရှိအခြေအနေမှ ပို၍ ဖွံ့ဖြိုးတိုးတက်သော၊ အေးချမ်းသာယာသော န်ိုင်ငံတစ်ခုအဖြစ် ထူထောင်၊ တည်ဆောက်လိုပါက နိုင်ငံအတွင်း မှီတင်းနေထိုင်သူ နိုင်ငံသားအားလုံး တစ်စိတ်တည်း၊ တစ်ဝမ်းတည်း စည်းလုံးညီညွတ်ရန် လိုသည်။

ထို့ကြောင့် သမားရိုးကျဆန်သော အစဉ်အလာအတွေးအခေါ်၊ အယူအဆ၊ ခံယူချက်များမှာ မျက်မှောက်အခြေအနေများနှင့် ကိုက်ညီစေရန် ပြင်သင့် ပြောင်းသင့်လျှင် ပြင်ရ၊ ပြောင်းရမည်ဖြစ်သည်။ ပြည်ထောင်စုဆိုသော ဝေါဟာရတွင် အစဉ်လာ ပြောဆိုလက်ခံ၊ အသိအမှတ်ပြုလာသော တိုင်းရင်းသားများအပြင် မြန်မာနိုင်ငံ အချုပ်အခြာနယ်နိမိတ်အတွင်း မျိုးဆက်လေးဆက်အထိ မွေးဖွား၊ ကြီးပြင်း၊ နေထိုင်ကြသည့် နိုင်ငံသားအသိအမှတ်ပြုထားသူအားလုံး အကျုံးဝင်သည်ဆိုသော ပကတိအခြေအနေမှန်ကို မျက်မှောက်ပြု လက်ခံရန် လိုပေသည်။

ထိုသို့ မျက်မှောက်ပြု လက်ခံနိုင်ရန်လည်း နိုင်ငံကြီးသားပီသခြင်း၊ သဘောထားကြီး ရင့်ကျက်ခြင်း၊ ဗြဟ္မစိုရ်တရား လက်ကိုင်ပြုခြင်း၊ နိုင်ငံသားအခွင့်အရေး၊ လူ့အခွင့်အရေးများကို ပိုင်ဆိုင်လေးစားနိုင်စေမည့် မျှတညီညွတ်သည့် ဥပဒေ၊ စည်းမျဉ်း၊ စည်းကမ်းများကဲ့သို့ စိတ်ပိုင်းဆိုင်ရာ၊ ရုပ်ပိုင်းဆိုင်ရာ ရေခံ၊ မြေခံများကိုလည်း အသင့်ပြင်ဆင်ထားရမည်ဖြစ်သည်။

ထိုအတွက် တိုင်းရင်းသားများ၊ မျိုးဆက်လေးဆက်အထိ နေထိုင်လာသော နိုင်ငံသားများအားလုံးအပေါ် အနှစ်သာရမပါသော အစဉ်အလာဆန်ဆန် ဟန်ပြအသိအမှတ်ပြုလက်ခံခြင်းမျိုးအစား လှိုက်လှဲလေးနက်သော ခေတ်သစ်ပြည်ထောင်စုစိတ်ဓာတ်မျိုးဖြင့် အသိအမှတ်ပြု လက်ခံရမည်ဖြစ်သည်။

သို့ဆိုလျှင် ယခုနှစ် ပြည်ထောင်စုနေ့ကို နိုင်ငံတော်သီချင်း ခြေဆင်းပါ ‘တရားမျှတ၊ လွတ်လပ်ခြင်းနှင့်မသွေ၊ တို့ပြည် တို့မြေ… ခွင့်တူညီမျှ ဝါဒဖြူစင်တဲ့ပြည်’ ဆိုသော စာသားအဓိဋ္ဌာန်များနှင့် ကိုက်ညီသည့် ပြည်ထောင်စုနိုင်ငံတော် သို့မဟုတ် ဖက်ဒရယ်ပြည်ထောင်စုနိုင်ငံတော်ကို စုပေါင်းအား၊ ပေါင်းစည်းခြင်းအားဖြင့် တည်ဆောက်ထူထောင်နိုင်မည့် အထိမ်းအမှတ်၊ အဓိပ္ပာယ်ဖြင့် ဆင်ယင်ကျင်းပနိုင်မည်ဖြစ်သည်။ 

အယ်ဒီတာ(၆-၂-၂၀၂၀)

You may also like...

Leave a Reply

Your email address will not be published. Required fields are marked *