တိုင်းပြုပြည်ပြု ပုဂ္ဂိုလ် ရေခံမြေခံ

မြန်မာနိုင်ငံသည် ဖွံ့ဖြိုးဆဲနိုင်ငံဖြစ်ပြီး ပြဿနာပေါင်း သောင်းခြောက်ထောင်ရှိနေသည့်အတွက် နော်ဝေ၊ ဆွစ်ဇာလန်တို့ကဲ့သို့ တည်ငြိမ်ပြီး ချမ်းသာပြီး နိုင်ငံများမှ နိုင်ငံရေးသမားများ အဆင့်လောက်နှင့် မြန်မာကို စီမံအုပ်ချုပ်ဦးဆောင်၍ မရဘဲ တိုင်းပြုပြည်ပြုပုဂ္ဂိုလ်များက ဦးဆောင်မှသာ ပြဿနာကြီးများကို ရှိစုမဲ့စုအရင်းအမြစ်ဖြင့် ဖြေရှင်းနိုင်မည်။

တိုင်းပြုပြည်ပြုပုဂ္ဂိုလ်ဆိုသည်ကို ဤနေရာတွင် အတန်ငယ်ရှင်းလင်းလိုပါသည်။ တိုင်းပြုပြည်ပြုပုဂ္ဂိုလ်သည် တိုင်းပြည်ပြုသူ Nation Builder ဖြစ်သည်။ တိုင်းပြည်ကို သူမဖျက်။ သူသည် ရွေးကောက်ပွဲ တစ်ဖြတ်လောက်ကိုသာကြည့်သည့် အာဏာရပြီးရော သာမန်ရွေးကောက်ပွဲနိုင်ငံရေးသမားမျိုးမဟုတ်ဘဲ နိုင်ငံအတွက် မျိုးဆက်နှင့်ချီ၍ ကောင်းအောင်ကြည့်သူဖြစ်သည်။ တိုင်းပြုပြည်ပြုပုဂ္ဂိုလ်သည် Vision ကြီးသလောက် နိုင်ငံ့အကျိုးအတွက်ဆိုလျှင် လက်တွေ့လည်းကျသည်။

မြန်မာနိုင်ငံအတွက် လိုအပ်သော တိုင်းပြုပြည်ပြုပုဂ္ဂိုလ်များ ထိုးထွက်လာရန်၊ နေရာရလာရန်အတွက် မဲဆန္ဒရှင်များ၊ ပါတီများ၊ နိုင်ငံရေးသမားများ သုံးမျိုးစလုံး ပူးပေါင်းဆောင်ရွက်ရန် လိုပါသည်။ တစ်နည်းအားဖြင့် တိုင်းပြု ပြည်ပြုပုဂ္ဂိုလ်များ ထွက်ပေါ်လာရန် နိုင်ငံရေးရေခံမြေခံကောင်းလိုသည်။

မြန်မာနိုင်ငံ၏ နိုင်ငံရေးရေခံမြေခံသည် ခက်ခဲကြမ်းတမ်းသဖြင့် နိုင်ငံရေးသမားဖြစ်ရန်ပင် မလွယ်ပါ။ အတော်များများက နိုင်ငံရေးဆိုလျှင် ရှောင်ကြသည်။ တိုင်းပြုပြည်ပြုပုဂ္ဂိုလ်ဖြစ်လိုလျှင် နောက်တစ်ဆင့်ထပ်ခုန်ကြရမည်။

နိုင်ငံရေးပါတီများကလည်း ပါတီဝင်များကို တိုင်းပြုပြည်ပြုပုဂ္ဂိုလ်ဖြစ်အောင် ပြုစုပျိုးထောင်ပေးရမည်၊ နေရာပေးရမည်။ မဲဆန္ဒရှင်များကလည်း နိုင်ငံ၏ လက်ရှိအခြေအနေကိုလေ့လာပြီး ထိုအခြေအနေများတိုးတက်အောင် ရေရှည်အမြင်ဖြင့် ထက်ထက်မြက်မြက်ဖြေရှင်းနိုင်မည့် တိုင်းပြုပြည်ပြုပုဂ္ဂိုလ်များကို ရွေးကောက်တင်မြှောက်ကြရမည်။ ထိုသို့ သုံးဦးသုံးဖလှယ် ဝိုင်းဝန်းပျိုးထောင်လိုက်လျှင် တိုင်းပြုပြည်ပြုပုဂ္ဂိုလ်များ ရှင်သန်ကြီးထွားမည့် နိုင်ငံရေး ရေခံမြေခံ ထွန်းကားလာမည်။

တိုင်းပြုပြည်ပြုပုဂ္ဂိုလ်များ ထွက်ပေါ်စေမည့် နိုင်ငံရေးရေခံမြေခံကို The Voice Journal က ဝိုင်းဝန်းတည်ဆောက်မည်ဖြစ်သည်။ 

 

အယ်ဒီတာ
၁၃.၂.၂၀၂၀

You may also like...

Leave a Reply

Your email address will not be published. Required fields are marked *