၆၆(ဃ) ဖြင့် အဖမ်းခံရလျှင် အာမခံရသင့်ဟု ဦးဝင်းထိန်ပြော

နေပြည်တော်၊ ဇွန် ၃၀

သတင်းမီဒီယာများအပါအဝင် ပြည်သူအများအပြား၏ အင်တာနက် စာမျက်နှာတွင် လွတ်လပ်စွာ ပြောဆို ဝေဖန်ရေးသားမှုကို အကြီးအကျယ်ခြိမ်း ခြောက်နေသော ဆက်သွယ်ရေးဥပဒေ ပုဒ်မ ၆၆(ဃ) ဖြင့် ဖမ်းဆီးတရားစွဲဆိုခံရ လျှင် အာမခံရသင့်ကြောင်း အမျိုးသား ဒီမိုကရေစီအဖွဲ့ချုပ်ပါတီ ဗဟိုအလုပ်အမှု ဆောင် ဦးဝင်းထိန်က ပြောကြားသည်။

လွှတ်တော်လေ့လာရေးခရီးလာ ရောက်သော ဒဂုံတက္ကသိုလ် ကျောင်းသား သမဂ္ဂအဖွဲ့ဝင်များနှင့် နေပြည်တော်ရှိ စည်ပင်ရိပ်သာတွင် ဇွန်လ ၃၀ ရက်နေ့က တွေ့ဆုံစဉ် ဦးဝင်းထိန်က အထက်ပါ အတိုင်း ပြောဆိုလိုက်ခြင်းဖြစ်သည်။

ပုဒ်မ ၆၆(ဃ) အမှုဖြစ်စဉ်များသည် အာမခံရသင့်သည်ဟု ယုံကြည်ကြောင်း၊ မကြာမီ ဆက်သွယ်ရေးဥပဒေကို ပြင်ဆင် မည့် အစီအစဉ်၌ ယင်းအချက်ပါဝင်လာ နိုင်မည်ဖြစ်ကြောင်း၊ သို့သော် ယင်းသို့ ပြင်ဆင်ရန် အကြံပြုသည့် ပြည်ထောင်စု လွှတ်တော် ဥပဒေရေးရာနှင့် အထူးကိစ္စရပ် များ လေ့လာဆန်းစစ်သုံးသပ်ရေး ကော်မရှင်တွင် ဆုံးဖြတ်ပိုင်ခွင့် မရှိကြောင်း ဦးဝင်းထိန်က ကျောင်းသားသမဂ္ဂအဖွဲ့ဝင် များကို ရှင်းပြသည်။
“၆၆(ဃ) မှာ အဓိကပြဿနာက တရားသူကြီးတွေက တစ်ပြေးညီအာမခံ မပေးတဲ့ ပြဿနာ” ဟု ဦးဝင်းထိန်က ဆိုသည်။

ဆက်သွယ်ရေးဥပဒေပုဒ်မ ၆၆(ဃ) ဖြင့် တရားစွဲခံရမှုများတွင် အာမခံမရခြင်း မှာမဖြစ်သင့်ကြောင်း ဇွန်လ ၂၉ ရက်နေ့ က နေပြည်တော်ကောင်စီ ဇေယျာသီရီ မြို့နယ်တွင်ပြုလုပ်သည့် ပညာရည်ချွန်ဆု ပေးပွဲအပြီး သတင်းထောက်များကို ပြည်ထောင်စုလွှတ်တော် ဥပဒေရေးရာနှင့် အထူးကိစ္စရပ်များ လေ့လာဆန်းစစ်သုံးသပ် ရေးကော်မရှင်ဥက္ကဋ္ဌ သူရဦးရွှေမန်းက ပြောဆိုခဲ့သည်။

အာဏာရ အမျိုးသားဒီမိုကရေစီ အဖွဲ့ချုပ်ပါတီ၏ ခေါင်းဆောင်တစ်ဦးလည်း ဖြစ်သူ ဦးဝင်းထိန်သည် ပြည်ထောင်စု လွှတ်တော် ဥပဒေရေးရာနှင့် အထူးကိစ္စရပ် များ လေ့လာဆန်းစစ်သုံးသပ်ရေး ကော်မရှင် တွင် အဖွဲ့ဝင်ဖြစ်သည်။

You may also like...

Leave a Reply

Your email address will not be published. Required fields are marked *