ကျွန်ရုပ်ရှင်ဇာတ်ကားနှင့် သက်ဆိုင်သူများကို ရှေးဟောင်းဦးစီးဌာနတရားစွဲ

 

မန္တလေး၊ ဇွန် ၃၀

ပုဂံဒေသကို အခြေတည်ရိုက်ကူးထားသည့် ကျွန်ရုပ်ရှင်ဇာတ်ကားနှင့် သက်ဆိုင်သူများကို တရားစွဲဆိုထား ကြောင်း ရှေးဟောင်းသုတေသနနှင့် အမျိုးသား ပြတိုက်ဦးစီးဌာန (ပုဂံဌာနခွဲ)ထံမှ သိရှိ ရသည်။

ရှေးဟောင်းသုတေသနနှင့် အမျိုးသားပြတိုက်ဦးစီးဌာနက ခွင့်မပြုခဲ့သည့် ကျွန်ဇာတ်ကားအမည်ဖြင့် ရုံတင် ပြသခဲ့သဖြင့် ဒါရိုက်တာ ညွန့်မြန်မာညီညီအောင်၊ ရှုတင်မန်နေဂျာ ကိုဟိန်းမင်းနှင့် ရုပ်ရှင်ထုတ်လုပ် ဖြန့်ချိသူ (အောင်တိုင်းကျော်ရုပ်ရှင်ထုတ်လုပ်ရေး) တို့ကို အရေးယူပေးရန် ပုဂံရှေးဟောင်းဌာနခွဲ ညွှန်ကြားရေးမှူးက တရားလိုပြုလုပ်၍ ပုဂံမြို့သစ် ရဲစခန်းသို့ တိုင်ကြားခဲ့ခြင်းဖြစ်သည်။

“ဌာနက ခွင့်မပြုတာကို ပြသလို့၊ ရှေးဟောင်းအဆောက်အအုံတွေနဲ့ ပတ်သက်ပြီး ရိုက်ကူးထားတဲ့ဟာကို ပြသလို့” ဟု တရားလို ညွှန်ကြားရေးမှူး ဦးအောင်အောင်ကျော်က ပြောကြားသည်။

ယင်းတိုင်ကြားချက်ကို (ပ)၂၉/၂၀၁၇၊ ရှေးဟောင်းအဆောက်အအုံများ ကာကွယ်ထိန်းသိမ်းရေးဥပဒေ (၂၀၁၅) ပုဒ်မ ၂၁ ဖြင့် အရေးယူဆောင်ရွက်ထားကြောင်း ပုဂံမြို့သစ်ရဲစခန်းမှ သိရသည်။

ဒါရိုက်တာ ညွန့်မြန်မာညီညီအောင်ကမူ “စိတ်မကောင်းစရာတော့ ဖြစ်တယ်။ ဘာလို့လဲဆိုတော့ ဌာနဆိုင်ရာကို ကျွန်တော်တို့က စော်ကားလို့ တရားစွဲတယ်ဆိုရင် မှန်တယ်။ အခုဟာက ဘယ်ဌာနဆိုင်ရာကိုမှ စော်ကားတာ မဟုတ်ဘူး။ ဌာနဆိုင်ရာ ဆိုတာ ပြည်သူကို အကူအညီပေးဖို့ပါ” ဟု ပြောဆိုသည်။

ရိုက်ကူးနေသည့်အချိန်တွင် ဇာတ်ကားအမည်ပြောင်းလဲရန် အကြောင်းကြားလာမှုရှိကြောင်း၊ လူပေါင်း ၈၀ ခန့် ဖြင့် ရိုက်ကူးမှုနှစ်ရက်ရှိနေပြီဖြစ်သည့်အတွက် ရပ်တန့်ရန်မဖြစ်နိုင်ကြောင်း၊ တရားစွဲဆိုမှုနှင့်ပတ်သက်၍ အကြောင်းကြားမှု မရှိသေးကြောင်း ၎င်းကဆိုသည်။

ပုဂံဒေသသို့ ဒါရိုက်တာညွန့်မြန်မာ ညီညီအောင်ရိုက်ကူးမည့် ‘အမှောင်တွေ ရွာချတဲ့ မိုးတိမ်’ ဇာတ်ကားကို ခွင့်ပြုချက်ပေးရန် ၂၀၁၅ခုနှစ် ဇူလိုင်လ ၂ ရက်နေ့ တွင် ဟိန်းမင်းဆိုသူ၏ အမည်ဖြင့် ဌာနသို့ လာရောက်တင်ပြသည်ကို တွေ့ရှိရပြီး ဇာတ်လမ်းထွက်ရှိလာချိန်တွင် ‘ကျွန်’ ဟူသည့်အမည် ပြောင်းလဲခဲ့ခြင်း ဖြစ်သည်ဟု ရှေးဟောင်းသုတေသနနှင့် အမျိုးသားပြတိုက်ဦးစီးဌာန (ပုဂံဌာနခွဲ) မှ သိရသည်။

 

You may also like...

Leave a Reply

Your email address will not be published. Required fields are marked *