ဒီမိုကရေစီအခြေခံကို ကာကွယ်ခြင်း

 

ဒီမိုကရေစီနိုင်ငံဟုဆိုလိုက်သည်နှင့် အားကောင်းသောသတင်းမီဒီယာတို့ကို ပြေးမြင်ရလောက်အောင် သတင်းမီဒီယာတို့သည် ဒီမိုကရေစီ၏အဆင့်အတန်း၊ ဒီမိုကရေစီတည်ဆောက်ရေးတို့နှင့် ဖွားဖက်တော်ပင်ဖြစ်သည်။

ဒီမိုကရေစီဆိုသည်မှာ လွတ်လပ်ခြင်း၊ တရားမျှတခြင်း၊ ခွင့်တူညီမျှခြင်းတို့ကို အများဆန္ဒဖြင့် ဖော်ဆောင်ခြင်းဖြစ်သည်။ တစ်ဦးတစ်ယောက်တစ်ဖွဲ့က အာဏာကိုအလွဲသုံးနေလျှင် ယင်းဖြစ်ရပ်များကို အများပြည်သူသို့ အသိပေးနိုင်၊ လူ့အသိုင်းအဝိုင်းတွင် ဖြစ်ပေါ်နေသော အကြောင်းအရာများဗဟုသုတများကို ဖြန့်ဝေနိုင်မှသာ အများပြည်သူကလည်းကောင်း၊ အများပြည်သူကိုကိုယ်စားပြုသော အုပ်ချုပ်သူ များကလည်းကောင်း မှန်ကန်သော ဆုံးဖြတ်ချက်များချမှတ်ပြီး ဒီမိုကရေစီကို အသက်ဝင်စေမည်ဖြစ် သည်။ သတင်းမီဒီယာများသည် ဒီမိုကရေစီလည်ပတ်ရေး အထက်ပါတာဝန်ကို ထမ်းဆောင်နေသည်ဖြစ်ရာ အားကောင်းသောသတင်းမီဒီယာရှိမှသာ ဒီမိုကရေစီစနစ်အောင်မြင်မည်ကို အလွယ်မြင်နိုင်သည်။

အားကောင်းသော သတင်းမီဒီယာဆိုသည်မှာ အတတ်ပညာအားဖြင့် ကျွမ်းကျင်ပိုင်နိုင်သလို အကျင့်စာရိတ္တအားဖြင့်လည်း မြင့်မားသည့် သတင်းသမားများဖြင့် ဖွဲ့စည်းထားသောတာဝန်ယူမှု တာဝန်ခံမှုအပြည့်ရှိသည့် သတင်းမီဒီယာပင်ဖြစ်သည်။ လူမှန်လျှင် အစွဲမကင်းသော်လည်း ပြည်သူများထံသို့ တင်ဆက်သည့်အခါတွင် ပုဂ္ဂလိကအစွဲများ၊ အဖွဲ့အစည်းဆိုင်ရာအစွဲများ ကင်းနိုင်သလောက်ကင်းအောင် သတင်းသမားကျင့်ဝတ်ဖြင့်လည်းကောင်း၊ အတတ်ပညာအားဖြင့်လည်းကောင်း ထိန်းကျောင်းနိုင်ကြသည်မှာ အားကောင်းသော သတင်းမီဒီယာပင်ဖြစ်သည်။

တစ်ဖက်ကကြည့်ပြန်လျှင် သတင်းမီဒီယာများသည် အဖွဲ့အစည်းများ၊ လူပုဂ္ဂိုလ်များအကြောင်းကို ဖော်ပြကြရသည့်အတွက် အရှိကိုအရှိအတိုင်း ဖော်ပြလျှင်ပင် အကြောင်းအရာအလိုက် အဖွဲ့အစည်းများ၊ လူပုဂ္ဂိုလ်များကို ထိခိုက်သည်များရှိနိုင်သည့်အတွက် ရန်သူပေါများသည်မှာ ဓမ္မတာပင်ဖြစ်သည်။ ရန်သူပေါများသည့်အတွက် သတင်းမီဒီယာများ သတင်းအချက်အလက်များကို ထိထိရောက်ရောက် မဖြန့်ဝေနိုင်လျှင် ပြည်သူလူထုနှင့် ဒီမိုကရေစီသာထိခိုက်မည့်အတွက် ဒီမိုကရေစီကို ချစ်မြတ်နိုးသောအစိုးရများသည် သတင်းမီဒီယာများ အားကောင်းလာအောင် အကာအကွယ်ပေးသည့် ရေခံမြေခံကောင်းများကို တည်ဆောက်ပေးကြသည်။

သတင်းမီဒီယာများကို အကာအကွယ်ပေးသည့် ရေခံမြေခံဆိုရာတွင်လည်း အခွင့်ထူးခံသဘောမဟုတ်ဘဲ သတင်းမီဒီယာများကို တရားနည်းလမ်းတကျ ထိန်းညှိရင်းပြည်သူပြည်သားများ၏ သိပိုင်ခွင့်အား အကာအကွယ်ပေးခြင်းကို ဆိုလိုခြင်းဖြစ်သည်။

မြန်မာနိုင်ငံသည် ဒဏ်ရာအနာတရများနှင့် အမုန်းသံသရာကို ကျော်လွန်လျှောက်လှမ်းရန် ကြိုးစားနေချိန်ဖြစ်ရာ အခြားသော Institutions များနည်းတူ သတင်းမီဒီယာများဘက်တွင်လည်း ဖြည့်ဆည်းရန်များရှိနိုင်ရာ အားကောင်းသောသတင်းမီဒီယာများဖြစ်လာရန် သတင်းမီဒီယာများ ကိုယ်တိုင်က ကျင့်ဝတ်အားဖြင့်လည်းကောင်း၊ အတတ်ပညာအားဖြင့်လည်းကောင်း စဉ်ဆက်မပြတ် ဖြည့်ဆည်းအားထုတ်ရမည်ဖြစ်သည်။ ထိုနည်းတူစွာ အားကောင်းသည့် သတင်းမီဒီယာများသည် ဒီမိုကရေစီ၏ အခြေခံလိုအပ်ချက်ဖြစ်သည့်အတွက် သတင်းမီဒီယာများကို တရားနည်းလမ်းကျကျ ကာကွယ်ခြင်းဖြင့် ပိုမိုအားကောင်းမောင်းသန်ဖြစ်လာစေရန် မြေတောင်မြှောက်ပေးခြင်းဖြင့်သာ ဒီမိုကရေစီကို ကာကွယ်စောင့်ရှောက်နိုင်မည်ဖြစ်ကြောင်း သတိပေးလိုခြင်းဖြစ်သည်။

အယ်ဒီတာ
၂၈.၆.၂၀၁၇

You may also like...

Leave a Reply

Your email address will not be published. Required fields are marked *