တစ်သောင်းတန် အတု အန္တရာယ်

 

စက္ကူတစ်ရွက်ကို တစ်သောင်းတန်သည်ဟု မြန်မာ နိုင်ငံတော်အစိုးရက အာမခံချက်ပေးထားသည့်အတွက် ထို ငွေစက္ကူသည် တစ်သောင်းတန်လာခြင်းဖြစ်သည်။ ထိုငွေစက္ကူ နောက်တွင် မြန်မာနိုင်ငံအစိုးရရှိသည်၊ မြန်မာနိုင်ငံရှိသည်။ စင်စစ် တစ်သောင်းတန်ငွေစက္ကူသည် မြန်မာနိုင်ငံ၏ သိက္ခာကို အပေါင်ထားကာ ထုတ်ပေးသော စက္ကူတစ်ရွက်သာဖြစ်သည်။

နိုင်ငံတစ်နိုင်ငံတွင်း ငွေစက္ကူထုတ်ဝေပိုင်ခွင့်ကို ထိုနိုင်ငံ၏ အစိုးရကသာ ပိုင်ဆိုင်ရာ ငွေစက္ကူသည် နိုင်ငံ၏အချုပ်အခြာ အာဏာလည်းဖြစ်သည်။

ယခုအခါ တစ်သောင်းတန်အတုများကြောင့် ထိုတစ်သောင်း တန်ကို မယူရဲ မပေးရဲဖြစ်လာခြင်းသည် နိုင်ငံတော်ကို မယုံ ကြည်ခြင်းပင်ဖြစ်သည့်အတွက် တည်ဆောက်ဆဲ မြန်မာနိုင်ငံနှင့် မြန်မာ့စီးပွားရေးအတွက် အန္တရာယ်ပင်ဖြစ်သည်။

ငွေစက္ကူအတုများသည် နိုင်ငံ့အချုပ်အခြာအာဏာကို ထိပါးခြင်းဖြစ်သလို ပမာဏအနည်းအများပေါ်မူတည်၍ ငွေကြေး ဖောင်းပွမှု မြင့်တက်စေခြင်းတို့ ပေါ်ပေါက်စေနိုင်ရာ ငွေကြေး အကျိုးအမြတ်ရှာကြံသည့် သာမန်စီးပွားရေးရာဇဝတ်မှု ကျူးလွန်ခြင်းလား၊ နိုင်ငံမတည်ငြိမ်အောင် လုပ်ဆောင်ခြင်းလား၊ ထိုသို့လုပ်ဆောင်ခြင်းတွင် ပြည်တွင်းသာမက ပြည်ပကပါ ပါဝင် ပတ်သက်နေခြင်းလားဟူသော မေးခွန်းများမှာ အရေးကြီး ပါသည်။

တစ်ဖက်တွင် ငွေစက္ကူသုံးစွဲခြင်း မြင့်မားနေသမျှ ငွေစက္ကူအတုလုပ်ခြင်းများ ဖြစ်ပေါ်နေမည်ဖြစ်ရာ ‘ငွေစက္ကူ အလွန်အကျွံသုံးစွဲသည့် နိုင်ငံ’ Cash Economy ဖြစ်သည့် မြန်မာနိုင်ငံတွင် ငွေစက္ကူအတုများ ပေါ်လာခြင်းမှာ သဘာဝကျ သည်ဟုသာ ဆိုရမည်ပင်။ ငွေပေးချေရာတွင် Cash Payment ငွေစက္ကူဖြင့် ပေးချေခြင်းထက် Electoronic Money၊ Plastic Money ခေါ်ကတ်၊ အင်တာနက်၊ ဖုန်းဖြင့်ပေးချေခြင်း တို့ မြင့်မားလာသည်နှင့်အမျှ ငွေစက္ကူအတုကိစ္စ နည်းပါးလာ မည်ဖြစ်သည်။

Cashless Economy ငွေစက္ကူသုံးစွဲခြင်းနည်းပါးသည့် နိုင်ငံအဖြစ်သို့ ချီတက်ခြင်းသည် ငွေစက္ကူအတုပြဿနာအတွက် ရေရှည်သို့မဟုတ် ရေလတ်အဖြေဖြစ်ပြီး တရားဥပဒေစိုးမိုးအောင် ဆောင်ရွက်ခြင်းသည် ရေတိုအဖြေဖြစ်သည်ဟု The Voice Journal က မြင်ပါသည်။
အယ်ဒီတာ
( ၅.၇.၂၀၁၇)

The Voice Weekly (Vol.13/No.23)

You may also like...

Leave a Reply

Your email address will not be published. Required fields are marked *